Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 28:1-29

LI TI ATËNË NI

  • Mawa na azo ti nyongo sämba so ayeke na Éphraïm! (1-6)

  • Sämba asara si aprêtre nga na aprophète ti Juda atambela kirikiri (7-13)

  • “E na kuâ e te mbele awe” (14-22)

    • Kozo tênë ti coin ti da na Sion (16)

    • Mbeni kua so Jéhovah asara so ahon gbungo li ti zo (21)

  • Fango lege so Jéhovah afa na ndara (23-29)

28  Aï! Gbata so ayeke tongana couronne* ti baba* ti azo ti nyongo sämba so ayeke na Éphraïm!+ Pendere ye so ala sara baba ndali ni ayeke gï mbeni fleur so pendere ni akomanse ti hon awe. A yeke na li ti gbata so ayeke na ndö ti hoto so ayeke na terê ti popo-hoto so sese ni awoko pendere, ndo so azo so vin asara ala ayeke lango dä.   Bâ, Jéhovah ayeke na mbeni kpengba zo so ayeke ngangu mingi. Lo yeke tongana ngu so apika na akota glason, kota ngu-nzapa so apika na pupu si abuba ye. Lo yeke nga tongana kota ngu-nzapa so apika na bekpa si asuku amû ndo. Lo yeke bi ande couronne so na sese na ngangu.   Azo ayeke tambela ande na ndö ti couronne ti baba* ti azo ti nyongo sämba so ayeke na Éphraïm.+   Fleur ni so pendere ni akomanse ti hon awe, so ayeke na li ti hoto so ayeke na terê ti popo-hoto so sese ni awoko pendere so, ayeke ga ande tongana akozo lê ti figue so asigi kozo na ngoi ti ndowa. Tongana mbeni zo abâ ni, lo yeke ko ni na lo mene ni hio.  Na ngoi ni so, Jéhovah ti aturugu ayeke ga tongana couronne ti gloire nga tongana pendere guirlande ndali ti azo ti lo so angbâ.+  Lo yeke sara si ajuge aye gï ti fâ ngbanga mbilimbili, nga lo yeke mû ngangu na azo so ayeke tomba awato so aga ti tiri na ala na yanga ti gbagba.+   Azo so nga ague yongoro ndali ti so vin asara ala; sämba so ala nyon asara si ala tambela kirikiri. Sämba asara si aprêtre na aprophète ague yongoro; vin asara si li ti ala aga kirikiri. Sämba so ala nyon asara si ala tambela kirikiri; vision so ala bâ asara si ala gue yongoro, nga ala fâ ngbanga na lege ni pëpe.+   Atable ti ala asi singo na saleté ti dengo ti ala, na ndo kue a yeke wara gï dengo ti ala.   Ala tene: “Lo pensé so e yeke azo wa si lo yeke gi ti fa ye na e? Lo pensé so e yeke azo wa si lo gi ti fa nda ti tënë na e? Azo so azia ti nyon ngu ti me ade ti ninga ape? Azo so a zi ala na me ade ti ninga ape? 10  Lakue lo yeke tene ka: ‘A lingbi ala sara ye tongaso, ala sara ye tongaso; ala sara ti so awe, ala sara ti so;*+ ala sara anzene nzene ye so awe, ala sara anzene nzene ye so.’” 11  Ndani la Nzapa ayeke sara ande tënë na azo so na lege ti azo so ayeke tene guguma* nga na ala so atene mbeni yanga ti kodro nde.+ 12  Mbeni lâ, lo tene na ala, lo tene: “So ayeke ndo ti wungo terê la. Zia zo so afatigué mingi awu terê ti lo. So ayeke ndo ti tene zo aduti dä si lo wara ngangu la.” Me ala ke ti mä lo.+ 13  Ni la, tënë so Jéhovah ayeke tene ande na ala ayeke gï so: “A lingbi ala sara ye tongaso, ala sara ye tongaso; ala sara ti so awe, ala sara ti so;*+ ala sara anzene nzene ye so awe, ala sara anzene nzene ye so.” Me ala yeke mä ande lo pëpe. Tongaso na ngoi so ala yeke tambela, ala yeke pika gere ti ala, ala yeke tï na mbage ti peko na ala wara sioni; ala yeke tï na yâ ti kûkû na a yeke gbu ala.+ 14  Ni la ala so ayeke pika kate ti ala so, ala so ayeke komande na Jérusalem na ndö ti azo so, ala mä tënë ti Jéhovah, 15  ndali ti so ala tene: “E na kuâ e te mbele awe,+ nga e na Dû ti kuâ* e mä terê awe.* Na ngoi so ngu so asuku amû ndo ahon na yâ ti kodro ni, a yeke si na e pëpe, ndali ti so e sara si mvene aga ndo ti batango terê ti e, na e honde terê ti e na peko ti tënë ti mvene.”+ 16  Tongaso Jéhovah, Seigneur ti dunia kue, atene: “Mbi yeke zia mbeni tênë so a tara ni awe tongana fondation ti da so a leke na Sion,+ kozo tênë ti coin ti fondation ti da so akpengba nzoni,+ tênë ti ngangu ngere.+ Zo kue so amä na bê na ni, mbeto ayeke pusu lo ti sara ye kirikiri pëpe.+ 17  Mbi yeke sara si mbilimbili aga tongana kamba ti mungo na mesure ti ye+ nga sarango ye na lege ni aga tongana niveau* so maçon asara na kua.+ Amvene so ala yeke bata terê ti ala dä, akota glason ayeke mû ni ahon na ni, nga angu so asuku ayeke mû ando so ala honde terê ti ala dä. 18  Yâ ti mbele so ala na kuâ ate so ayeke fâ, nga mango terê so ayeke na popo ti ala na Dû ti kuâ* ayeke ngbâ pëpe.+ Na ngoi so ngu so asuku amû ndo ahon na yâ ti kodro ni, a yeke neka ala. 19  Lakue tongana a yeke hon na yâ ti kodro ni, a yeke hon na ala;+ a yeke hon na yâ ti kodro ni lakue na ndapre, na kota lâ nga na bï. Gï kota mbeto la ayeke sara si ala mä yâ ti tënë so a tene na ala.”* 20  So gbogbo ayo pëpe, zo alingbi ti lango ti gboto yâ ti terê ti lo pëpe, so lê ti drap akono pëpe, zo alingbi ti bi ni na ndö ti lo kue pëpe. 21  Jéhovah ayeke londo ande tongana ti so lo londo lani na ndö ti Hoto ti Pérazim; lo yeke londo tongana ti so lo londo lani na yâ ti popo-hoto* so ayeke nduru na Gabaon,+ si lo sara kota kua ti lo, mbeni kua so ahon gbungo li ti zo, nga si lo sara kua ti lo, kua so lo yeke sara ka ni lakue pëpe.+ 22  Ti fadeso, ala zere ndo pëpe,+ si kamba so a kanga na ala akiri aserré ala ahon ndö ni pëpe, ndali ti so mbi mä a tene Seigneur ti dunia kue, Jéhovah ti aturugu, amû desizion ti futi azo kue na yâ ti kodro ni.*+ 23  Ala dengi mê ala mä mbi; ala dengi mê ala mä tënë so mbi yeke tene. 24  Eskê zo ti fango yaka ayeke tourné yâ ti sese na yâ ti lango ni kue sân ti lu ngongoa ti kobe? Eskê lo yeke ngbâ lakue ti dë gï sese ni nga ti pika yâ ti angbongboro sese ni?+ 25  Ên-ën. Tongana lo leke lê ti sese ni pendere awe, lo yeke tuku lê ti vuko cumin dä, nga lo yeke lu cumin. Lo yeke lu blé, hâriyâ nga na orge na ando so lo leke ndali ni, nga lo yeke lu épeautre*+ na yanga ti yaka ni kue. 26  Nzapa afa na lo nzoni lege ti sarango kua ni;* Nzapa ti lo afa na lo ye so a lingbi lo sara.+ 27  A yeke pika vuko cumin pëpe na keke so abagara agboto ni ti pika na alê ti kobe.+ Nga a yeke hon na roue pëpe na ndö ti cumin. Me a yeke pika vuko cumin na keke, a yeke pika nga cumin na keke. 28  Zo ayeke neka lê ti kobe na ndo ti pikango alê ti kobe si lo sara na mapa? Ên-ën, pikango alê ti kobe ni ayeke pëpe mbeni ye so a yeke sara ni gï lakue lakue tongaso.+ Nga tongana lo hon na roue ti puse na ambarata na ndö ni, lo yeke neka yâ ni pëpe.+ 29  Ye so kue alondo na Jéhovah ti aturugu, lo so wango ti lo* apika bê ti zo mingi nga aye so lo sara ayeke kota mingi.*+

Kete tënë

Âmanke a ye ti sara tënë ti Samarie so ayeke li-kodro ni.
Wala “fandara; wuma.”
Wala “fandara; wuma.”
Wala “Kamba ti mungo na mesure ti ye na ndö ti kamba ti mungo na mesure ti ye, kamba ti mungo na mesure ti ye na ndö ti kamba ti mungo na mesure ti ye.”
Na Hébreu: “azo so asara tënë gï na poro ti yanga ti ala.”
Wala “Kamba ti mungo na mesure ti ye na ndö ti kamba ti mungo na mesure ti ye, kamba ti mungo na mesure ti ye na ndö ti kamba ti mungo na mesure ti ye.”
Wala “Shéol,” so ti tene dû ti kuâ so azo kue ayeke gue dä. Bâ na kete bakari.
A lingbi nga ti tene “e bâ mbeni vision so atene kuâ ayeke mû e pëpe.”
Wala “fil à plomb.”
Wala “Shéol,” so ti tene dû ti kuâ so azo kue ayeke gue dä. Bâ na kete bakari.
A lingbi nga ti tene “Tongana ala mä yâ ti tënë ni awe, mbeto ayeke hon ndö ti ala.”
Wala “kpangbala ndo.”
Wala “na sese ni kue.”
Wala “afa lege na lo; apunir lo.”
Wala “ye so lo leke ti sara.”
Wala “ndara ti lo ti sara ye ti nzoni ayeke kota mingi.”