Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 10:1-34

LI TI ATËNË NI

  • Maboko ti Nzapa ane na ndö ti Israël (1-4)

  • Assyrie ayeke keke so Nzapa amû ti fa na ngonzo ti lo (5-11)

  • A punir Assyrie (12-19)

  • Mbeni tanga ti Jacob so angbâ ayeke kiri (20-27)

  • Nzapa ayeke fâ ngbanga na ndö ti Assyrie (28-34)

10  Mawa na azo so alu andia so ayeke ti fa lege na zo me so asara sioni na lo,+ala so lakue ayeke sû ambela so ayeke sara pasi na zo,   si a ke ti mû na awayere ye so ala yeke na droit ti wara ni,si a fâ pëpe ngbanga ti azo ti mawa so ayeke na popo ti azo ti mbi,+si a mû aye ti awali-mua tongana aye so a gbu ni na ngoi ti biranga si a nzi aye ti amolenge so babâ ti ala ayeke dä pëpe.*+   Nyen la ala yeke sara ande na ngoi so a yeke hunda ala ti kiri tënë* ndali ti aye so ala sara?+ Nyen la ala yeke sara ande na ngoi so mbeni ye ayeke londo na yongoro ndo ti ga ti futi ala?+ Zo wa la ala yeke kpe na mbage ti lo ti tene lo mû maboko na ala?+ Ala yeke zia ande mosoro* ti ala na ndo wa?   Ye so ala lingbi ti sara ayeke gï ti kuku na sese na popo ti azo ti kangawala ti tï na sese na popo ti azo so a fâ ala. Ndali ti asioni ye kue so azo ni asara, ade ngonzo ti Nzapa adë pëpe,na maboko ti lo ayeke lakue nduru ti pika ala.+   Bâ tënë so lo tene: “Zo ti Assyrie+ayeke keke so mbi yeke mû ti fa na ngonzo ti mbi.+ Keke so ayeke na maboko ti lo ayeke ti fa na gigi ye so ason bê ti mbi.   Mbi yeke tokua lo na terê ti mbeni mara so azo ni ayeke a-apostat,+na terê ti mara so azo ni ason bê ti mbi ngangu. Mbi yeke mû yanga na lo ti gbu gbâ ti aye nga ti nzi gbâ ti aye ti alanga ti tambela na ndö ti ala tongana ti so zo ayeke dö yâ ti popoto na ndö ti lege.+   Me lo yeke duti ande nduru ti sara ye ni tongaso pëpenga a yeke pëpe ye so lo leke na bê ti lo ti sara la. Na yâ ti bê ti lo, lo ye gï ti hunzi azo ni kue,lo ye ti lo ti futi gbâ ti amara, me kete wungo ti ala pëpe.   Lo tene: ‘Azo ti mbi so ayeke akota zo ti kodro, ala kue ayeke agbia ape?+   Gbata ti Calno+ ayeke tongana gbata ti Carkémish+ ape? Gbata ti Hamath+ ayeke tongana gbata ti Arpad+ ape? Gbata ti Samarie+ ayeke tongana gbata ti Damas+ ape? 10  Mbi mû aroyaume so azo ni ayeke voro anzapa so ayeke ye oko pëpe,so ayanda ti ala so a leke ni na kode ayeke mingi ahon ti Jérusalem na ti Samarie.+ 11  Mbi yeke sara ande na Jérusalem nga na ayanda nioko ye so mbi sara lani na Samarie nga na anzapa ni so ayeke ye oko pëpe so.’+ 12  “Na ngoi so Jéhovah ahunzi kusala ti lo kue na ndö ti Hoto ti Sion nga na yâ ti Jérusalem awe, lo* yeke punir gbia ti Assyrie ndali ti baba nga na fandara ti lo,+ 13  ndali ti so lo tene: ‘Mbi yeke sara ye ni so grâce na ngangu ti mbinga na ndara ti mbi, ndali ti so mbi yeke zo ti ndara. Mbi yeke zi akatikati so ayeke na popo ti amara,+mbi yeke gbu amosoro ti ala na ngangu+nga mbi yeke sö benda na ndö ti ala tongana mbeni zo so ayeke ngangu mingi.+ 14  Tongana ti so zo ayeke yôro maboko ti lo ti mû ye so ayeke na yâ ti da ti ndeke,mbi yeke yôro maboko ti mbi ti mû amosoro ti amara. Tongana ti so zo ayeke bungbi place oko apara so a dö ni a zia,mbi yeke bungbi akodro ti sese kue ti tene aga oko. Mbeni zo ti sara ngangu, tongana ndeke so ayeke pika yâ ti akpangbi ti lo, so ayeke zi yanga ti lo wala so ayeke toto, ayeke dä pëpe.’” 15  Dö ayeke gonda ande terê ti lo ahon zo so ayeke dë ye na ni? Scie ayeke gonda terê ti lo ahon zo so ayeke fâ yâ ti ye na ni? Keke+ so zo ayengi ni alingbi ti yengi zo so ayô ni na nduzu? Wala keke alingbi ti yô na nduzu zo so agbu ni? 16  Tongaso Seigneur, Jéhovah ti aturugu,ayeke sara si azo ti lo* so akono pendere ayeke nge gï ngengo,+na gloire ti lo ayeke hon biani biani mo bâ mo tene wâ la agbi ni.+ 17  Lumière ti Israël+ ayeke ga tongana wâ,+Nzapa ti Israël so ayeke nzoni-kue ayeke ga tongana wâ. Na yâ ti lango oko, wâ ni ayeke za ngangu si ayeke gbi apere nga na akeke ti sisi ti lo.* 18  Nzapa ayeke zi biani biani gloire ti gbako ti lo nga na ti yaka ti lo ti akeke so zo ayeke te lê ni. Gloire ti lo ayeke ga ande tongana ti zo so kobela asara si lo nge kue.+ 19  Tanga ti akeke ti gbako ti loayeke ngbâ mingi pëpe, na kete molenge alingbi ti fa a-iri ni.  20  Na ngoi ni so, tanga ti azo ti Israël so angbânga na ala so asö kuâ na popo ti ahale ti Jacobayeke zia bê ti ala encore ape na ndö ti zo so apika ala.+ Me ala yeke zia bê ti ala na Jéhovah,Nzapa ti Israël so ayeke nzoni-kue, na dutingo be-ta-zo. 21  Gï mbeni tanga ni la ayeke kiri na mbage ti Nzapa so ayeke na ngangu mingi;tanga ti ahale ti Jacob la ayeke kiri na mbage ti lo.+ 22  Israël, atâa so azo ti moayeke gbani tongana mbutu ti ngu-ingo,gï mbeni tanga ni la ayeke kiri.+ Nzapa amû desizion awe ti futi azo ti mo. Desizion ni+ ayeke mbilimbili,* na a yeke ga na ndö ti ala tongana ngu so asuku amû ndo.+ 23  Futingo so Seigneur ti dunia kue, Jéhovah ti aturugu, amû desizion ti ga na ni na ndö ti azo niayeke mû yâ ti kodro ni kue.+ 24  Ni la Seigneur ti dunia kue, Jéhovah ti aturugu, atene: “Azo ti mbi so asara kodro na Sion, ala sara mbeto pëpe ndali ti zo ti Assyrie so apika ala lani na keke+ nga ayô keke ti lo na nduzu na terê ti ala tongana ti so azo ti Égypte asara lani.+ 25  Na yâ ti kete ngoi, ye so mbi sara ti fa na gigi ngonzo ti bê ti mbi ayeke hunzi. Mbi yeke kiri na ngonzo ti mbi na ndö ti azo ti Assyrie ti futi ala.+ 26  Mbi Jéhovah ti aturugu, mbi yeke yô zaza na terê ti zo ti Assyrie,+ tongana ti ngoi so mbi* sö benda lani na ndö ti azo ti Madian na terê ti kota tênë ti Oreb.+ Mbi* yeke yôro keke ti mbi* na ndö ti ngu-ingo nga mbi* yeke yô ni na nduzu tongana ti so mbi* sara lani na terê ti azo ti Égypte.+ 27  Na ngoi ni so, a yeke zi nengo kungba so zo ti Assyrie azia na ndö ti go ti ala,+nga a yeke zi joug ti lo na ndö ti go ti ala;+a yeke fâ yâ ti joug+ ni grâce na mafuta* so a tuku na li ti gbia.” 28  Lo ga na gbata ti Aïath;+lo hon na yâ ti gbata ti Migron;lo zia akungba ti lo na gbata ti Micmash.+ 29  Lo na azo ti lo afâ ngu na ndo so ngu ni alï mingi pëpe;ala lango na bï ni so na gbata ti Guéba.+ Terê ti azo ti gbata ti Ramah adö na mbeto, na azo ti Guibéah,+ gbata ti Saül, akpe awe.+ 30  Azo ti gbata ti Gallim, ala dekongo ngangu! Azo ti gbata ti Laïshah, ala sara hange! Aï-oo, azo ti gbata ti Anathoth!+ 31  Azo ti gbata ti Madménah akpe awe. Azo ti gbata ti Guébim ague ti gi mbeni ndo ti bata terê ti ala dä. 32  Laso lo yeke luti kete na gbata ti Nob.+ Lo kanga yâ ti maboko ti lo, lo yôro ni na lê ti azo so asara kodro na ndö ti hoto so gbata ti Sion ayeke dä,kete hoto so Jérusalem ayeke na ndö ni. 33  Bâ, Seigneur Jéhovah ti aturuguayeke dë amaboko ti keke, na bruit ti tingo ti ala amû mbeto na zo.+ A yeke dë akeke so ayo ahon atanga ni kue,nga ala so ayo mingi, a yeke dë ni si a kiri nduru. 34  Lo mû mbeni wen* so yanga ni aza, lo dë na gbako so yâ ni aserré mingi,lo so ayeke ngangu mingi ayeke dë ande akeke ti Liban.

Kete tënë

Wala “anyindu.”
Wala “na ngoi so a ga ti punir ala.”
Wala “gloire.”
Na Hébreu: “mbi.”
So ti tene “zo ti Assyrie” so a sara tënë ti lo na versê 5 nga na 24.
So ti tene “zo ti Assyrie” so a sara tënë ti lo na versê 5 nga na 24.
Wala “Desizion ni ayeke ti punir ala.”
Na Hébreu: “lo.”
Na Hébreu: “Lo.”
Na Hébreu: “lo.”
Na Hébreu: “lo.”
Na Hébreu: “lo.”
Wala “ndali ti mafuta.”
Wala “dö.”