Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ésaïe 1:1-31

LI TI ATËNË NI

  • Mbeni babâ nga na amolenge ti lo so ake yanga (1-9)

  • Jéhovah ake vorongo so azo avoro lo gï tongaso (10-17)

  • “Ala ga, e leke tënë” (18-20)

  • Sion ayeke kiri ti ga gbata so ayeke sara ye so Nzapa aye (21-31)

1  So ayeke tënë ti aye so Ésaïe,*+ molenge ti Amos, abâ na yâ ti vision so andu Juda na Jérusalem. Lo bâ ni na ngoi ti komandema ti Ozias,+ ti Jotham,+ ti Achaz+ nga na ti Ézéchias,+ so ayeke agbia ti Juda:+   Yayu, mo mä; sese,+ mo dengi mê mo mä, ndali ti so Jéhovah asara tënë, lo tene: “Mbi bata amolenge ngbii ala kono,+ me ala ke yanga ti mbi.+   Bagara ahinga zo so avo lo, kororo ahinga ye so wa ti lo ayeke zia kobe na yâ ni na lo; me Israël ahinga mbi* pëpe,+ azo ti mbi wani asara ye tongana azo so ahinga ndo pëpe.”   Mawa na mara so siokpari ti lo ahon ndö ni,+ azo so faute ti ala ane ala ahon ndö ni, ala yeke ahale ti azo ti sioni, amolenge so abuba awe! Ala dö Jéhovah ala zia;+ Nzapa ti Israël so ayeke nzoni-kue, ala ne lo kete pëpe. Ala tourné peko na lo.   So ala ngbâ gï ti ke yanga so, mbage ti terê ti ala wa la mbi yeke pika ala dä?+ Li ti ala kue ayeke na kobela, bê ti ala nga kue ayeke gï na kobela.+   Ti londo na gbe ti gere ti ala juska na li ti ala, mbeni ndo so angbâ nzoni ayeke dä pëpe. Terê ti ala kue ayeke gï kä, gbe ti poro ti terê ti ala ayeke gï kä nga lê ti akä ni akono. A zia yorö dä pëpe,* a kanga nga ni pëpe nga a zia mafuta dä pëpe.+   Kodro ti ala aga gï benyama. A gbi agbata ti ala. Awande ate aye ti kodro ti ala kue na lê ti ala.+ Kodro ni abuba mo bâ mo tene kodro so awande akinda ni.+   Gbata ti Sion angbâ gï lo oko tongana kete da* na yâ ti yaka ti vigne, tongana kete da ti pere na yâ ti yaka ti concombre, tongana gbata so awato asara camp na terê ni.+   Tongana fade Jéhovah ti aturugu asara si ambeni zo na popo ti e asö kuâ pëpe, ka e ga gï tongana Sodome, na e kpa Gomorrhe.+ 10  Ala azo so akomande na ngangu* na ndö ti Sodome,+ ala mä tënë ti Jéhovah. Ala azo ti Gomorrhe, ala dengi mê amä ndia* ti Nzapa ti e.+ 11  Jéhovah atene: “Gbâ ti asandaga ti ala asara nyen na mbi?+ Mbi fatigué awe na asandaga ti ala ti akoli-taba+ so a zö ni agbi kue nga na ti mafuta ti anyama so ate ye nzoni so;+ mênë+ ti akoli-bagara+ so akono awe, ti amolenge ti taba nga na ti angasa+ anzere na mbi pëpe. 12  Na ngoi so ala ga na gbele mbi,+ zo wa la ahunda na ala ti ga zo wa? Zo wa la ahunda na ala ti tambela na lê ti alacour ti mbi zo wa?+ 13  Ala zia ti ga na asandaga ti alê ti kobe so ayeke asenge senge ye. Bê ti mbi ake adukane ti ala.+ Ala yeke bata alango ti fini nze+ na ti sabbat,+ nga ala yeke sara akota bungbi.+ Me mbi lingbi pëpe ti yeda na magie+ so ala yeke sara na ngoi ti akota bungbi ti ala. 14  Mbi ke* alango ti ala ti fini nze nga na amatanga ti ala.  Aye ni so aga nengo kungba na ndö ti mbi; mbi fatigué na yongo ni awe. 15  Tongana ala yâa maboko ti ala na nduzu, mbi yeke kanga lê ti mbi si mbi bâ ala pëpe.+ Même tongana ala sambela gbani,+ mbi yeke mä pëpe;+ maboko ti ala asi singo na mênë.+ 16  Ala sukula terê ti ala, ala zi ye ti sioni na terê ti ala;+ ala zi asioni kusala ti ala na lê ti mbi; ala zia ti sara ye ti sioni.+ 17  Ala manda ti sara ye ti nzoni, ala gi ti sara ye ti mbilimbili.+ Zo so ayeke sara ye ti ngangu na azo, ala kiri na lo na nzoni lege. Ala tiri ti bata adroit ti molenge so babâ ti lo ayeke dä pëpe.* Ala gbu koko ti wali-mua.”+ 18  Jéhovah atene: “Ala ga, e leke tënë.+ Même tongana siokpari ti ala ni abe tongana mênë, a yeke vuru tongana neige.+ Même tongana a be ngbii aye ti vuko vukongo, a yeke vuru tongana kuä ti terê ti taba. 19  Tongana ala yeke nduru ti mä tënë ti mbi, ala yeke te ande anzoni ye ti kodro ni.+ 20  Me tongana ala ke na ala sara kpengba-li, a yeke fâ ala na épée.+ Jéhovah atene ti lo awe.” 21  A sara tongana nyen si gbata so ayeke be-ta-zo+ aga tongana wali-ndumba?+ Ândö aye ti mbilimbili asi singo dä.+ Sarango ye na lege ni la amû ndo lani na yâ ni,+ me fadeso a yeke gï azo ti fango zo la ayeke dä.+ 22  Argent ti mo aga gï saleté ti ye,+ a tuku ngu na yâ ti sämba* ti mo. 23  Li ti azo ti mo so ayeke akota zo ti kodro akpengba nga ala yeke mä terê na azo ti nzi.+ Ala oko oko kue aye gï goro, nga ala yeke gi peko ti acadeau gingo.+ Na gbe ti ngbanga, ala yeke mû raison pëpe na amolenge so babâ ti ala ayeke dä pëpe,* nga tënë ti ngbanga ti wali-mua ayeke si na gbe ti ala lâ oko pëpe.+ 24  Tongaso, Seigneur Jéhovah ti aturugu, Nzapa ti Israël so ayeke ngangu mingi, atene: “Mbi yeke tomba awato ti mbi na terê ti mbi, mbi yeke kiri na ala peko ti sioni so ala sara.+ 25  Mbi yeke punir mo, mbi yeke sara si saleté so ayeke na terê ti mo ahon, nga mbi yeke zi aye ti sioni kue so ayeke na terê ti mo.+ 26  Mbi yeke sara si ajuge ti mo akiri asara ye tongana ti kozo nga awawango ti mo ayeke kiri ti sara ye tongana ti kozo.+ Na pekoni a yeke iri mo Gbata so ayeke mbilimbili, Gbata so ayeke sara ye so Nzapa aye.+ 27  A yeke zi Sion na lege ti fango ngbanga ti mbilimbili,+ nga azo ti Sion so akiri, a yeke zi ala na lege ti sarango ye ti mbilimbili.  28  A yeke futi azo ti kpengba-li nga na awasiokpari legeoko.+ Azo so adö Jéhovah azia ayeke kui.+ 29  Kamene ayeke sara ala ndali ti angangu keke so ala ye ni mingi so,+ kamene ayeke sara ala ndali ti ajardin* so ala soro ni so.+ 30  Ala yeke ga ande tongana mbeni kota keke so akugbe ni ahule,+ nga tongana mbeni jardin so ngu ayeke dä pëpe. 31  Ngangu koli ayeke ga tongana mbeni hulengo pere,* na kua ti lo ayeke ga tongana kete kete wâ. Wâ ayeke gbi lo na kua ti lo ni kue legeoko, na zo ti mingongo wâ ni ayeke dä pëpe.”

Kete tënë

Ndani aye ti tene “Jéhovah la amû salut na zo.”
Wala “wa ti lo.”
Na Hébreu: “A pete sanzo ni pëpe.”
Wala “kpangba.”
Wala “azo so akomande.”
Wala “fango ye.”
Wala “Âme ti mbi ake.”
Wala “nyindu.”
Wala “bière ti blé.”
Wala “anyindu.”
Âmanke akeke na ajardin ni aye ti sara tënë ti ayanda so azo ni ayeke voro.
A ye ti sara tënë ti aye tongana kuä ti li ti nzö so wâ aninga ti gbi ni pëpe.