Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Matthieu 9:1-38

9  Tongaso, lo ko na yâ ti ngö, lo fâ ngu na lo gue na kodoro ti lo.  Na bâ, ala yeke ga na lo mbeni zo so mbage ti tere ti lo akui na so alango na ndo ti gbogbo. Tongana lo bâ mabe ti ala, Jésus atene na koli ni so mbage ti tere ti lo akui so: “Gbu ngangu, molenge ti mbi. A pardone asiokpari ti mo awe.”  Me, ambeni na popo ti ascribe atene na bê ti ala: “Koli so ayeke zonga Nzapa la.”  Teti so Jésus ahinga atënë so ayeke na bê ti ala, lo tene: “Ngbanga ti nyen ALA yeke tene asioni tënë na yâ ti bê ti ALA?  Na tapande, ti tene: ‘A pardone asiokpari ti mo awe,’ wala ti tene: ‘Londo, mo tambela,’ so wa si ayeke ngangu pëpe?  Me ti tene ALA hinga so a mû komandema na Molenge ti zo na ndo ti sese ti pardone asiokpari . . .”, lo tene na zo so mbage ti tere ti lo akui so: “Londo, mo mû gbogbo ti mo, mo gue na da ti mo.”  Na lo londo, lo gue na da ti lo.  Tongana gbâ ti azo ni abâ ye so, mbeto asara ala, na ala mû gloire na Nzapa, lo so amû mara ti komandema tongaso na azo.  Tongana Jésus azia ndo ni na lo yeke hon, lê ti lo atï na ndo ti mbeni koli so iri ti lo ayeke Matthieu. Lo yeke duti na da ti rongo nginza ti lapo. Lo tene na Matthieu ni: “Mû peko ti mbi.” Na Matthieu alondo amû peko ti lo. 10  Na pekoni, na ngoi so lo yeke duti na tere ti table si lo yeke te kobe na yâ ti da, bâ, gbâ ti azo ti rongo nginza ti lapo nga na awasiokpari aga na ala yeke duti na tere ti Jésus na adisciple ti lo si ala yeke te kobe. 11  Me tongana aFarizien abâ ye so, ala to nda ti tene na adisciple ti lo: “Ngbanga ti nyen wafango ye na ALA ayeke te kobe na azo ti rongo nginza ti lapo nga na awasiokpari?” 12  Na mango ala, lo tene: “Azo so ayeke na nzoni tere ayeke na bezoin ti wanganga pëpe, me gi azo ti kobela. 13  ALA gue, na ALA gi ti hinga nda ti tënë so atene: ‘Mbi ye sarango nzoni bê na zo, me mbi ye sandaga pëpe.’ Teti mbi ga ti iri azo ti mbilimbili pëpe, me awasiokpari.” 14  Na pekoni, adisciple ti Jean aga na lo, na ala hunda lo: “A sara tongana nyen si e na aFarizien e yeke mû jeûne, me adisciple ti mo amû jeûne pëpe?” 15  Na ndo ti tënë so, Jésus atene na ala: “Na ngoi kue so koli so ayeke mû wali fini fini angbâ na tere ti akamarade ti lo, ala yeke na nda ti tënë oko pëpe ti sara vundu. Me ambeni lango ayeke ga ande so fade a yeke zi lo na tere ti ala, na a yeke na ngoi ni so la si fade ala yeke mû jeûne. 16  Mbeni zo ayeke mû fini yanga ti bongo ti fü na lê ti kä ti ngbene bongo pëpe. Tongana lo sara ni, ngangu ti fini yanga ti bongo ni ayeke gboto ngbene bongo ni, na lê ti kä ti bongo ni akiri akono. 17  Wala azo ayeke tuku fini vin na yâ ti angbene bozo ti vin pëpe. Me tongana ala tuku ni dä, abozo ni alingbi ti sungba na vin ni ayuru kirikiri na abozo ni abuba. Ye oko, azo ayeke tuku fini vin na yâ ti afini bozo ti vin, na abozo ni na vin ni kue angbâ nzoni.” 18  Tongana lo ngbâ ti sara atënë so na ala, bâ, mbeni mokonzi apusu nduru, na lo to nda ti ba li ti lo na gbe ti lo, lo tene: “Na ngoi so, âmanke molenge ti mbi ti wali akui awe. Me mo ga mo zia maboko ti mo na ndo ti lo na fade lo kiri na fini.” 19  Jésus alondo, na lo na adisciple ti lo ague na peko ti mokonzi so. 20  Me mbeni wali ayeke dä so ayeke na kobela so asara si mênë ayeke ga na tere ti lo mingi. A sara ngu bale-oko na use si lo yeke na kobela so. Bâ, wali ni aga na mbage ti peko ti Jésus na lo ndu yanga ti bongo ti lo ti ndo ni. 21  Wali ni ayeke tene na yâ ti bê ti lo, atene: “Tongana mbi ndu gi yanga ti bongo ti lo ti ndo ni, mbi yeke sava ande.” 22  Jésus aturnê, na tongana lo bâ wali ni, lo tene: “Molenge ti mbi, mo gbu ngangu; mabe ti mo asava mo awe.” Gi na ngbonga ni so, tere ti wali ni asava. 23  Na ngoi so Jésus alï na da ti mokonzi ni, lê ti lo atï na ndo ti azo ti hurungo flûte nga na gbâ ti azo so ayeke sara wuluwulu. 24  Jésus atene na ala: “ALA sigigi, teti kete molenge-wali ni akui pëpe, me lo yeke lango.” Na ndo ti tënë so, ala to nda ti he lo na ti zere lo. 25  Gi so a tomba gbâ ti azo ni na gigi awe, Jésus alï na da ni na lo gbu maboko ti kete molenge-wali ni, na molenge ni alondo. 26  Na tënë ti ye so amû yâ ti kodoro ni kue. 27  Tongana Jésus azia ndo ni lo yeke hon, awaziba use amû peko ti lo, ala yeke dekongo, ala tene: “Mo sara nzoni bê na e, Molenge ti David.” 28  Na peko ti so lo lï na yâ ti da, awaziba ni aga na tere ti lo, na Jésus ahunda ala: “ALA yeke na mabe so mbi lingbi ti sara ye so?” Ala kiri tënë na lo: “En, e yeke na ni, Seigneur.” 29  Lo ndu lê ti ala, lo tene: “Zia ye ni asi na ALA alingbi na mabe ti ALA.” 30  Na lê ti ala azi. Nga, Jésus agboto mê ti ala ngangu, lo tene: “Zia si mbeni zo amä tënë ni pëpe.” 31  Me na peko ti so ala sigigi na yâ ti da ni awe, ala sara si sango ti lo amû yâ ti kodoro ni kue. 32  Na tongana ala yeke zia ndo ni ti hon, bâ, azo aga na lo mbeni koli so yanga ti lo akanga nga so sioni yingo ayeke na yâ ti lo. 33  Na peko ti so lo tomba sioni yingo ni awe, koli so asara tënë. Na bê ti gbâ ti azo ni adö, ala tene: “Lâ oko ade a bâ mara ti ye tongaso na Israël pëpe.” 34  Me aFarizien atene: “Lo yeke tomba asioni yingo na ngangu ti mokonzi ti asioni yingo.” 35  Jésus atambela na yâ ti agbata nga na akete kodoro oko oko kue. Lo fa ye na yâ ti asynagogue ti ala nga lo fa nzoni tënë ti royaume. Lo sava mara ti akobela na asongo tere nde nde kue. 36  Me tongana lo bâ gbâ ti azo so, mawa ti ala asara lo ngbanga ti so a sara pasi na ala nga yâ ti ala akangbi kirikiri tongana angasangbaga so ayeke na berger pëpe. 37  Lo tene na adisciple ti lo: “Ti tâ tënë ni, akobe ti fango ni ayeke mingi, me azo ti kua ni ayeke mingi pëpe. 38  Tongaso, ALA hunda mingi na Wa ti kua ni ti tokua azo ti kua ti fâ akobe ti yaka ti lo.”

Kete tënë