Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Matthieu 8:1-34

8  Tongana Jésus alondo na ndo ti hoto ni lo zu awe, azo mingi mingi amû peko ti lo.  Bâ, mbeni zo ti buruma aga, lo ba li ti lo na gbe ti lo, na lo tene: “Seigneur, tongana mo ye, mo lingbi ti sara si tere ti mbi aga nzoni.”  Lo yôro maboko ti lo, lo ndu zo ti buruma ni, na lo tene: “Mbi ye. Zia tere ti mo aga nzoni.” Gi na lê ni lê ni, buruma ti lo ni ahunzi.  Na Jésus atene na lo: “Hange si mo sara tënë ni na zo oko pëpe. Me mo gue, mo fa tere ti mo na prêtre, na mo mû matabisi so Moïse afa ni, si ala bâ ni na lê ti ala.”  Tongana lo lï na Capernaüm, mbeni turugu ti kota kamba aga na mbage ti lo, lo voro yanga na lo,  lo tene: “Seigneur, zo ti kua ti mbi ayeke lango na da. Mbage ti tere ti lo akui na lo yeke bâ pasi mingi.”  Lo tene na turugu ni: “Tongana mbi si kâ, fade mbi yeke sava lo.”  Turugu ni akiri tënë na lo, atene: “Kota zo, mbi kpa ti tene mo lï na da ti mbi pëpe. Me mo sara gi tënë, na fade tere ti zo ti kua ti mbi ayeke kaï.  Teti mbi kue mbi yeke zo so ayeke na gbe ti komandema ti mbeni zo, na mbi yeke na aturugu na gbe ti mbi nga. Tongana mbi tene na lo so: ‘Gue kâ!’ lo yeke gue. Na mbeni nde, mbi tene: ‘Ga!’ lo yeke ga. Na tongana mbi tene na ngbâa ti mbi: ‘Sara ye so!’ lo yeke sara ni.” 10  Na mango tënë so, bê ti Jésus apika na lo tene na ala so amû peko ti lo: “Ti tâ tënë ni, mbi tene na ALA: Na popo ti azo ti Israël, mbi de mbi wara mbeni zo na mara ti kota mabe tongaso pëpe. 11  Me mbi tene na ALA so azo mingi ayeke londo na mbage ti Tö nga na mbage ti Do ti ga ti duti na table ti te kobe legeoko na Abraham, na Isaac, na Jacob na yâ ti royaume ti yayu. 12  Me a yeke bi amolenge ti royaume ni na gigi na yâ ti bingo. Kâ la si fade ala yeke toto na ala yeke te pembe ti ala.” 13  Na Jésus atene na turugu ti kota kamba so: “Gue. Zia ye ni asi na mo alingbi na mabe ti mo.” Na tere ti zo ti kua ni akaï gi na ngbonga ni so. 14  Jésus alï na da ti Pierre na lo bâ mama ti wali ti Pierre alango na gbogbo, lo yeke na kobela so asara si tere ti lo amû wâ mingi. 15  Tongaso lo ndu maboko ti mama ni, na kobela ni ahon na tere ti lo. Mama ni alondo na lo to nda ti sara kua na lo. 16  Me tongana lakui alingbi awe, azo aga na lo gbâ ti azo so asioni yingo ayeke na yâ ti ala. Na lo sara gi tënë oko na asioni yingo ni ahon, na lo sava ala kue so tere ti ala ason. 17  Ye ni asi tongaso si tënë so a tene na lege ti prophète Ésaïe aga tâ tënë, tongana a tene: “Lo wani lo mû akobela ti e nga lo yô asongo tere ti e.” 18  Na ngoi so Jésus abâ gbâ ti azo na tere ti lo, lo mû yanga ti tene ala mû ngö ala gue na mbage ti ngu ni kâ. 19  Mbeni scribe aga, na lo tene na lo: “Wafango ye, na ndo kue so mo ye ti gue dä, mbi yeke mû peko ti mo ande.” 20  Me Jésus atene na lo: “Anyama ti mungo kondo ayeke na adû ti ala, na andeke ti nduzu ayeke na ando ti wu tere ti ala dä. Me Molenge ti zo ayeke na mbeni ndo ti zia li ti lo dä pëpe.” 21  Nga, mbeni disciple ni atene na lo: “Seigneur, mo zia mbi gue mbi lu babâ ti mbi kozoni si.” 22  Jésus atene na lo: “Ngbâ ti mû peko ti mbi, me zia akuâ alu akuâ ti ala.” 23  Tongana lo ko na yâ ti mbeni ngö, adisciple ti lo amû peko ti lo. 24  Na bâ! Kota pupu aya ngangu na ndo ti kota ngu ni, na a sara si amapo ni aye ti mene ngö ni. Me lo ngbâ ti lo ti lango. 25  Na ala ga ala zingo lo, ala tene: “Seigneur, mo sö e! E yeke kui!” 26  Me lo tene na ala: “ALA, azo ti kete mabe, ngbanga ti nyen mbeto ahon ndo ti ALA?” Na lo londo, lo suku na pupu ni nga na kota ngu ni, na ndo adë ngii. 27  Tongaso bê ti azo ni apika na ala tene: “So mara ti zo ti nyen? Même pupu na kota ngu kue amä yanga ti lo.” 28  Tongana lo si na mbage ti ngu ni, na sese ti azo ti Gadara, akoli use so asioni yingo ayeke na yâ ti ala alondo na popo ti asende ti kuâ atingbi na lo. Akoli so ayeke tâ sioni mingi, ni la si zo oko ti tara ti hon na lege ni so ayeke dä pëpe. 29  Bâ, ala dekongo, ala tene: “Ti mo na e nyen? Molenge ti Nzapa. Mo ga ge ti sara pasi na e kozo si ngoi ni so a fa alingbi?” 30  Me yongoro na ala, gbâ ti agaduru ayeke te ye. 31  Na asioni yingo ni ato nda ti voro yanga na lo, ala tene: “Tongana mo tomba e, mo tokua e na yâ ti gbâ ti agaduru ni.” 32  Tongaso lo tene na ala: “ALA gue!” Ala sigigi na ala gue ala lï na yâ ti agaduru ni. Na bâ! Agaduru ni kue alondo na loro na li ti hoto ni atï na yâ ti kota ngu ni na ala kui na yâ ti ngu ni. 33  Me azo ti batango agaduru ni akpe, ala gue na yâ ti gbata ni. Kâ, ala fa peko ti ye kue so asi, ala fa nga tënë ti ye so asi na akoli so asioni yingo ayeke na yâ ti ala. 34  Na bâ, azo ti gbata ni kue asigigi ti tingbi na Jésus. Tongana ala bâ lo awe, ala hunda na lo mingi ti tene lo zia sese ti ala lo hon.

Kete tënë