Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Matthieu 5:1-48

5  Tongana lo bâ azo mingi mingi, lo montê na ndo ti hoto. Na peko ti so lo duti awe, adisciple ti lo aga na tere ti lo.  Lo to nda ti sara tënë, lo fa ye na ala, lo tene:  “Ngia ayeke na ala so ahinga so ala yeke na bezoin ti aye ti yingo, teti royaume ti yayu ayeke ti ala.  “Ngia ayeke na ala so ayeke na vundu, teti fade a yeke dë bê ti ala.  “Ngia ayeke na ala so ayeke sara ye na ngangu pëpe, teti fade sese ayeke ga ti ala.  “Ngia ayeke na ala so nzara ti mbilimbili asara ala tongana nzara ti kobe na ti ngu, teti fade nzara ti ala ayeke hunzi.  “Ngia ayeke na ala so ayeke sara nzoni bê na amba ti ala, teti fade a yeke sara nzoni bê na ala.  “Ngia ayeke na ala so bê ti ala avuru, teti fade ala yeke bâ Nzapa.  “Ngia ayeke na ala so asara si siriri amaï, teti fade a yeke iri ala ‘amolenge ti Nzapa.’ 10  “Ngia ayeke na ala so a sara ye ti ngangu na ala ngbanga ti ye ti mbilimbili, teti fade royaume ti yayu ayeke ti ala. 11  “Ngia ayeke na ALA tongana azo azonga ALA, asara ye ti ngangu na ALA na atene mara ti asioni tënë ti mvene nde nde kue na ndo ti ALA ndali ti mbi. 12  ALA duti na ngia na ALA huru na ngia, teti futa ti ALA ayeke kota na yayu. A yeke tongaso si lani a sara ye ti ngangu na aprophète so aga kozo na ALA. 13  “ALA yeke ingo ti sese so. Me tongana songo ti ingo asigigi dä awe, fade a yeke kiri na songo ni so dä tongana nyen? A lingbi ti sara ye na ingo ni so mbeni pëpe. A lingbi gi ti tuku ni na gigi si azo adö ni na gere. 14  “ALA yeke lumière ti dunia so. Mbeni gbata so ayeke na li ti hoto alingbi ti honde tere ti lo pëpe. 15  Azo azia wâ na lampe ti zia ni na gbe ti sakpa pëpe, me ti zia ni na ndo ti mbeni ye ti yongo lampe, na a za na ndo ti azo kue na yâ ti da ni. 16  Legeoko nga, zia lumière ti ALA aza na gbele azo, si azo ni alingbi ti bâ anzoni kusala ti ALA na ala mû gloire na Babâ ti ALA so ayeke na yayu. 17  “ALA tene na bê ti ALA pëpe so mbi ga ti futi Ndia wala ambeti ti aProphète. Mbi ga ti futi ye pëpe, me ti sara si ye aga tâ tënë. 18  Teti biani mbi tene na ALA so, ti tene mbeni lê ti gere-mbeti ti Ndia ni oko wala mbeni kete ye ti tere ni ahon na aye kue aga tâ tënë pëpe, a yeke nzoni yayu na sese ahon kozoni awe si. 19  Tongaso, zo so adoro oko ti akete commandement so na lo fa na azo ti sara tongaso, fade a yeke bâ lo ‘kete mingi’ tongana a ndu tënë ti royaume ti yayu. Âdu ti lo so abata ni na lo fa na azo ti sara tongaso, fade a yeke bâ lo ‘kota’ tongana a ndu tënë ti royaume ti yayu. 20  Teti mbi tene na ALA so, tongana mbilimbili ti ALA awu ahon ti ascribe na aFarizien pëpe, fade ALA yeke lï oko pëpe na yâ ti royaume ti yayu. 21  “ALA mä so a tene na azo ti ngoi ti giriri: ‘Mo fâ zo pëpe. Me zo so afâ zo, fade lo yeke na tënë ti kiri na ni na gbele ngbanga.’ 22  Me mbi tene na ALA so zo so angbâ ti sara ngonzo na tere ti ita ti lo, lo yeke na tënë ti kiri na ni na gbele ngbanga. Me zo so atene na mbeni ita ti lo mbeni tënë so akpa ti tene a tene na zo pëpe, fade lo yeke na tënë ti kiri na ni na gbele Kota Da-ngbanga. Me zo kue so atene: ‘Buba zo!’ fade lo lingbi na ngbanga ti wâ ti Géhenne. 23  “Tongaso, tongana mo yeke ga na matabisi ti mo na gbele gbalaka, na kâ mo dabe ti mo so ita ti mo ayeke na mbeni tënë na tere ti mo, 24  zia matabisi ti mo kâ na gbele gbalaka ni na mo gue. Leke tënë na ita ti mo kozoni, na pekoni tongana mo kiri awe, mû matabisi ti mo ni. 25  “Duti nduru ti leke tënë hio na zo so ague na mo na gbele ngbanga, na ngoi so mo na lo angbâ na lege ti gue na gbele ngbanga ni. Tongaso pëpe, lo lingbi ti zia mo na maboko ti wafango ngbanga, na wafango ngbanga azia mo na maboko ti turugu ti da-ngbanga na a bi mo na da ti kanga. 26  Biani, mbi tene na mo: Mo yeke ngbâ kâ juska mo futa tanga ti kete pata oko ni kue si mo sigigi. 27  “ALA mä awe so a tene: ‘Mo gi wali wala koli nde pëpe.’ 28  Me mbi tene na ALA: Zo kue so angbâ ti bâ mbeni wali si lo sara nzara ti wali ni so, andâ lo gi lo na wali na yâ ti bê ti lo awe. 29  Ni la, tongana lê ti mo ti mbage ti koli ayeke sara ti tene mo tï, gboto ni na bi ni yongoro na mo. A yeke nzoni mingi teti mo ti tene mbeni mbage ti tere ti mo oko agirisa ahon ti tene a bi tere ti mo kue na yâ ti Géhenne. 30  Nga, tongana maboko ti mo ti koli ayeke sara ti tene mo tï, fâ ni na bi ni yongoro na mo. A yeke nzoni mingi teti mo ti tene mbeni mbage ti tere ti mo oko agirisa ahon ti tene tere ti mo kue atï na yâ ti Géhenne. 31  “Nga, a tene: ‘Zo so asara divorce na wali ti lo, zia lo mû na lo mbeti ti divorce.’ 32  Me mbi tene na ALA: Zo kue so asara divorce na wali ti lo, tongana a yeke ngbanga ti tënë ti lango-sioni pëpe, lo yeke sara ti tene mbeni koli nde agi wali ni. Na zo so asara mariage na mbeni wali so koli ti lo asara mara ti divorce so na lo, andâ lo gi wali so ayeke ti lo pëpe. 33  “Nga, ALA mä so a tene na azo ti ngoi ti giriri: ‘Mo deba yanga ti mo senge senge pëpe, me a lingbi mo sara ye alingbi na zendo so mo mû na Jéhovah.’ 34  Me mbi tene na ALA: A lingbi mo deba oko pëpe. Wala na iri ti yayu pëpe, teti a yeke trône ti Nzapa. 35  Wala na iri ti sese pëpe, teti a yeke mbata ti gere ti lo. Wala na iri ti Jérusalem pëpe, teti a yeke gbata ti kota Gbia. 36  Na a lingbi mo deba na ndo ti li ti mo pëpe, teti mo lingbi pëpe ti sara si kuä ti li ti mo oko avuru wala avuko. 37  Tongana ALA tene En, zia a ngbâ gi En, wala Ên-ën angbâ gi Ên-ën. Teti tënë kue so a zia na ndo ni alondo na Zo ti sioni. 38  “ALA mä so a tene: ‘Lê na place ti lê na pembe na place ti pembe.’ 39  Me mbi tene na ALA: Mo ke pëpe zo so ayeke sioni. Me zo so apika ngbangba ti mo ti mbage ti koli, mo dengi na lo ti mbage ti wali ni nga. 40  Na tongana mbeni zo aye ti gue na mo na gbele ngbanga ti mû bongo ti mo ti yâ ni, mo zia lo mû ti ndo ni nga. 41  Na tongana mbeni zo ti komande agbu mo na ngangu ti tambela na lo kilomètre oko, mo tambela na lo kilomètre use. 42  Mû ye na zo so ahunda ye na mo, na mo turnê peko pëpe na zo so aye ti mû kuda na tïtî mo, so, na kiringo na ni ande, a hunda lo ti zia mbeni ye na ndo ni pëpe. 43  “ALA mä so a tene: ‘Mo ndoye mba ti mo na mo ke wato ti mo.’ 44  Me mbi tene na ALA: ALA ngbâ ti ndoye awato ti ALA na ti sambela ndali ti azo so ayeke sara ye ti ngangu na ALA. 45  ALA sara tongaso ti fa so ALA yeke amolenge ti Babâ ti ALA so ayeke na yayu, teti lo sara si lâ ti lo asu na ndo ti azo ti sioni nga na azo ti nzoni. Na lo sara si ngu-nzapa apika na ndo ti azo ti mbilimbili nga na azo ti mbilimbili pëpe. 46  Tongana ALA ndoye gi azo so andoye ALA, futa wa ALA wara na pekoni? Azo ti rongo nginza ti lapo ayeke sara tongaso nga pëpe? 47  Na tongana ALA yeke bara gi aita ti ALA, kota ye wa ALA yeke sara? Azo ti amara ayeke sara tongaso nga pëpe? 48  Ndani la, a lingbi ALA ga azo so alingbi kue tongana ti so Babâ ti ALA so ayeke na yayu alingbi kue.

Kete tënë