Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Matthieu 4:1-25

4  Yingo ague na Jésus na yando si Zabolo atara lo.  Lo mû jeûne teti lâ bale-osio na bï bale-osio. Tongaso, nzara asara lo.  Wahanda aga, lo tene na lo: “Tongana mo yeke mbeni molenge ti Nzapa, tene na atênë so ti ga mapa.”  Me lo kiri tënë na Zabolo, lo tene: “A sû na Mbeti ti Nzapa a tene: ‘Zo ayeke ngbâ na fini gi na lege ti mapa pëpe, me na lege ti tënë kue so asigigi na yanga ti Jéhovah.’ ”  Na pekoni, Zabolo ague na lo na yâ ti gbata so ayeke nzoni-kue. Lo zia lo na li ti gbagba ti temple.  Na Zabolo atene na lo: “Tongana mo yeke mbeni molenge ti Nzapa, huru mo tï na sese, teti a sû na Mbeti ti Nzapa a tene: ‘Fade lo yeke mû yanga na a-ange ti lo ndali ti mo, na fade ala yeke yô mo na yâ ti maboko ti ala si mo pika gere ti mo na mbeni tênë oko pëpe.’ ”  Jésus atene na lo: “A sû nga na Mbeti ti Nzapa a tene: ‘A lingbi mo zia Jéhovah Nzapa ti mo na tara pëpe.’ ”  Zabolo akiri ague na lo na ndo ti mbeni hoto so ayo na nduzu mingi. Lo fa na lo aroyaume kue ti dunia so nga na gloire ti ala.  Na lo tene na lo: “Fade mbi yeke mû na mo aye so kue tongana mo kuku na sese na mo voro mbi.” 10  Jésus atene na lo: “Hon kâ, Satan! Teti a sû na Mbeti ti Nzapa a tene: ‘A yeke gi Jéhovah Nzapa ti mo si a lingbi mo voro lo, na a yeke gi lo oko si a lingbi mo sara kusala so ayeke nzoni-kue na lo.’ ” 11  Na nda ni, Zabolo azia lo, na bâ, a-ange aga na ato nda ti sara kua na lo. 12  Tongana lo mä so a gbu Jean a bi lo na da ti kanga, lo londo lo gue na Galilée. 13  Nga, lo londo na Nazareth, lo ga lo sara kodoro na Capernaüm, na tere ti kota ngu na sese ti Zabulon na ti Nephtali. 14  Ye ni asi tongaso si tënë so a fa na lege ti prophète Ésaïe aga tâ tënë, tongana a tene: 15  “Ô sese ti Zabulon na sese ti Nephtali, na tere ti lege so ague na kota ngu, na mbage ti Jourdain, Galilée ti amara! 16  Azo so aduti na yâ ti bingo abâ kota lumière. Âdu ti ala so aduti na ndo so gbede ti kuâ ayeke dä, lumière alondo asu na ndo ti ala.” 17  Ti londo na ngoi ni so ti ga na ni, Jésus ato nda ti fa tënë, lo tene: “ALA changé bê ti ALA, ngbanga ti so royaume ti yayu aga nduru awe.” 18  Tongana lo yeke tambela na tere ti kota ngu ti Galilée, lo bâ aita use: Simon so a iri lo Pierre, na ita ti lo André. Ala yeke bi gbanda na yâ ti ngu ni ngbanga ti so ala yeke awagingo susu. 19  Lo tene na ala: “ALA mû peko ti mbi, na fade mbi yeke sara si ALA ga awagingo azo.” 20  Na hio, ala zia agbanda ni, na ala mû peko ti lo. 21  Na tongana lo yeke hon, lo bâ ambeni ita use: Jacques na ita ti lo Jean, amolenge ti Zébédée. Ala na babâ ti ala Zébédée ayeke na yâ ti ngö, na ala ngbâ ti leke agbanda ti ala. Lo iri ala. 22  Gi na peko ti iringo ndo ni, ala zia ngö ni nga na babâ ti ala, na ala mû peko ti lo. 23  Na pekoni, Jésus atambela na sese ti Galilée kue. Lo fa ye na yâ ti asynagogue ti ala nga lo fa nzoni tënë ti royaume. Lo sava mara ti akobela na asongo tere nde nde kue na popo ti azo ni. 24  Sango ti lo amû yâ ti Syrie kue. Ala ga na lo azo kue so tere ti ala ason, ala so awoko ndali ti akobela na apasi nde nde, ala so asioni yingo ayeke na yâ ti ala nga ala so ayeke na kobela ti makako na ala so mbage ti tere ti ala akui. Lo sava ala. 25  Ndani la, azo mingi mingi amû peko ti lo, ala londo na Galilée, na Décapole, na Jérusalem, na Judée nga na mbage ti Ngu ti Jourdain.

Kete tënë