Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Matthieu 3:1-17

3  Na ngoi ni kâ, Jean Baptiste aga, lo yeke fa tënë na yando ti Judée.  Lo tene: “ALA changé bê ti ALA, ngbanga ti so royaume ti yayu aga nduru awe.”  A yeke lo so a sara tënë ti lo na lege ti prophète Ésaïe, tongana a tene: “ALA mä! Mbeni zo ayeke dekongo na yando, lo tene: ‘ALA leke lege ti Jéhovah, ALA sara si alege ti lo aduti nzoni.’ ”  Lo Jean ni, lo yü bongo so a sara ni na kuä ti tere ti chameau na lo kanga na yâ ti lo mbeni ceinture so a leke ni na poro ti nyama. Kobe ti tengo ti lo ayeke agbadora nga na mafuta ti wotoro ti ngonda.  Azo ti Jérusalem na ti Judée kue, nga ala ti kodoro ni kue so ayeke na tere ti Ngu ti Jourdain, aga na mbage ti lo.  Na lo batize ala na yâ ti Ngu ti Jourdain. Ala yeke fa asiokpari ti ala na gigi.  Tongana lê ti lo atï na ndo ti gbâ ti aFarizien na aSadducéen so ayeke ga na batême ni, lo tene na ala: “ALA, amolenge ti asioni ngbo, zo wa si atene na ALA so ALA lingbi ti kpe kota ngonzo so ayeke ga?  Tongaso, zia ALA lë lengo so alingbi biani na changengo bê.  Zia ALA tene na bê ti ALA pëpe: ‘Babâ ti e ayeke Abraham.’ Teti mbi tene na ALA so Nzapa alingbi ti mû atênë so ti sara si a ga amolenge ti Abraham. 10  Dö ayeke na gunda ti akeke awe. Tongaso, keke oko oko kue so alë nzoni lengo pëpe, a lingbi a dë ni na sese na a bi ni na wâ. 11  Ti mbi, mbi batize ALA na ngu ngbanga ti so ALA changé bê ti ALA. Me lo so ayeke ga na peko ti mbi ayeke ngangu ahon mbi, lo so mbi kpa pëpe ti zi poro na gere ti lo. A yeke lo si ayeke batize ande ALA na yingo vulu nga na wâ. 12  Ye ti lo ti pengo na alê ti kobe ayeke na maboko ti lo. Fade lo yeke sara si ndo ti pikango lê ti kobe ti lo avuru kue. Fade lo yeke bungbi blé ti lo na yâ ti gogoro. Me poro ti peko ni, fade lo yeke gbi ni na wâ so a lingbi ti mingo ni pëpe.” 13  Jésus alondo na Galilée na lo ga na Jean na Ngu ti Jourdain ti tene Jean abatize lo. 14  Me Jean atara ti kanga lege na lo, lo tene: “Mbi la mbi lingbi fade ti gue na mbage ti mo si mo batize mbi, me fadeso mo la mo yeke ga na mbage ti mbi?” 15  Me Jésus atene na lo: “Ti so ni so, zia a duti tongaso, teti a yeke na lege so si a lingbi e sara ye kue so ayeke mbilimbili.” Na Jean azia ti kanga lege na lo. 16  Tongana a batize Jésus awe, fade fade lo sigigi na gbe ti ngu ni. Na bâ, yayu azi na lo bâ yingo ti Nzapa so ayeke zu na ndo ti lo tongana mbeni kolokoto. 17  Nga, bâ, mbeni go asara tënë na yayu, a tene: “So ayeke Molenge ti mbi so mbi ndoye lo mingi, lo so bê ti mbi anzere na lo mingi.”

Kete tënë