Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

Matthieu 26:1-75

26  Tongana Jésus ahunzi ti sara atënë so kue awe, lo tene na adisciple ti lo:  “ALA hinga so a ngbâ lango use ti tene a sara matanga ti Pâque. Na a yeke zia Molenge ti zo na maboko ti azo ti tene ala kanga lo na ndo ti keke.”  Na ngoi ni so, aprêtre-mokonzi nga na a-ancien ti azo ni abungbi tere ti ala na yâ ti gbagba ti kota prêtre ni so iri ti lo ayeke Caïphe.  Ala mä tere ti gbu Jésus na lege ti mayele na ti fâ lo.  Me ala yeke tene: “Zia e sara ni pëpe na ngoi ti matanga ni, ti tene wusuwusu alondo na popo ti azo ni pëpe.”  Na ngoi so Jésus ayeke na Béthanie na da ti Simon, zo ti buruma,  mbeni wali aga na tere ti lo, na ngbenda ti albâtre, ngbenda ti mbeni mafuta ti nginza mingi so a zia yombo dä. Na wali ni ato nda ti tuku mafuta ni na li ti Jésus so ayeke duti na tere ti table ti te kobe.  Na bango ye so, bê ti adisciple ni ason na ala tene: “Ngbanga ti nyen si a yeke buba mafuta so tongaso?  A lingbi fade ti kä ye so na kota ngere na ti mû nginza ni na awayere!” 10  Teti lo hinga tënë so, Jésus atene na ala: “Ngbanga ti nyen ALA ye ti ga na kpale na wali so? Ye so lo sara na mbi ayeke nzoni mingi. 11  Teti awayere ayeke ngbâ lakue na ALA, me mbi, mbi yeke ngbâ lakue na ALA pëpe. 12  Tongana wali so atuku mafuta so a zia yombo dä so na tere ti mbi, lo sara ni ti leke mbi teti ngoi ti lungo mbi. 13  Ti tâ tënë ni, mbi tene na ALA: Na ndo kue so a yeke fa nzoni tënë so dä na dunia kue, fade a yeke sara nga tënë ti ye so wali so asara, ti tene azo adabe ti ala na lo.” 14  Na pekoni, mbeni oko na popo ti adisciple bale-oko na use, so iri ti lo ayeke Judas Iscariote, ague na mbage ti aprêtre-mokonzi, 15  lo tene na ala: “ALA yeke mû na mbi nyen ti tene mbi kä lo na ALA?” Ala tene so ala yeke mû na lo alê ti nginza ti argent bale-ota. 16  A to nda ni na ngoi ni so, Judas ayeke gi mbeni nzoni lege ti kä Jésus. 17  Na kozo lango ti matanga ti amapa so a sara na mama ni pëpe, adisciple aga na tere ti Jésus, ala hunda lo: “Mo ye e leke aye ni na ndo wa si mo te kobe ti Pâque ni?” 18  Lo tene na ala: “ALA gue na yâ ti gbata ni na ndo ti zo tongaso, na ALA tene na lo, Wafango ye atene: ‘Ngoi ti mbi so a diko ni awe ayeke nduru ti si. Fade mbi na adisciple ti mbi e yeke sara matanga ti Pâque na da ti mo.’ ” 19  Adisciple ni asara ye ni tongana ti so Jésus amû yanga na ala ti sara. Ala leke aye kue teti matanga ti Pâque ni. 20  Tongana a si na lakui awe, lo na adisciple ti lo bale-oko na use ayeke duti na tere ti table. 21  Na ngoi so ala yeke te kobe, lo tene: “Ti tâ tënë ni, mbi tene na ALA, mbeni oko na popo ti ALA ayeke kä mbi ande.” 22  Na mango tënë so, vundu asara ala mingi, na ala oko oko kue ato nda ti tene na lo: “Seigneur, a yeke mbi?” 23  Na lo tene: “Zo so mbi na lo e yeke yôro maboko na yâ ti sembe ni, a yeke lo si fade ayeke kä mbi. 24  Biani, Molenge ti zo ayeke hon, gi tongana ti so a sû tënë ni na ndo ti lo na yâ ti Mbeti ti Nzapa. Me mawa na zo so na lege ti lo si a kä Molenge ti zo! A yeke nzoni mingi ngbanga ti zo ni so tongana a dü lo fade pëpe.” 25  Judas so ayeke nduru ti kä lo, atene: “Rabbi, a yeke mbi?” Jésus atene na lo: “Mo wani mo tene awe.” 26  Tongana ala ngbâ ti te kobe, Jésus amû mbeni mapa, na tongana lo iri tënë nzoni na ndo ni awe, lo kungbi yâ ni na lo mû ni na adisciple ni, lo tene: “ALA mû ni, ALA te. So ayeke fä ti tere ti mbi.” 27  Lo mû nga mbeni kopo ti vin na tongana lo kiri singila na Nzapa awe, lo mû ni na ala, lo tene: “ALA kue ALA nyon ni, 28  teti so ayeke fä ti ‘mênë ti mbele ni’, mênë ti mbi so biani ayeke tuku ande ndali ti azo mingi ti tene a pardone asiokpari. 29  Me mbi tene na ALA, mbi yeke nyon ande ngu ti lê ti vigne mbeni pëpe juska na lango so mbi na ALA e yeke nyon mbeni fini ni na yâ ti royaume ti Babâ ti mbi.” 30  Na nda ni, tongana ala sepela Nzapa na bia awe, ala sigigi ala gue na ndo ti Hoto ti akeke ti olive. 31  Jésus atene na ala: “Na bï so, fade ALA kue ayeke girisa lege ndali ti aye so ayeke si na mbi. Teti a sû na Mbeti ti Nzapa a tene: ‘Fade mbi yeke dë berger ni, na angasangbaga ti kundu ni ayeke kangbi kirikiri.’ 32  Me tongana a zingo mbi na kuâ awe, mbi yeke gue kozo ti ALA na Galilée.” 33  Me Pierre akiri tënë na lo, lo tene: “Atâa atanga ni kue agirisa lege ndali ti aye so ayeke si na mo, fade mbi, mbi yeke girisa lege oko pëpe!” 34  Jésus atene na lo: “Ti tâ tënë ni, mbi tene na mo: Gi na bï so, kozo si mbeni koli-kondo atoto, fani ota mo yeke tene ande so mo hinga mbi pëpe.” 35  Pierre atene na lo: “Atâa a yeke ti tene mbi na mo e kui oko, mbi lingbi oko pëpe ti tene so mbi hinga mo pëpe.” Tanga ti adisciple ni kue atene nga tongaso. 36  Na pekoni, Jésus na adisciple ti lo asi na ndo so a iri ni Gethsémané, na lo tene na ala: “ALA duti ti ALA ge, na ngoi so mbi yeke gue ti mbi kâ ti sambela.” 37  Lo mû Pierre nga na amolenge ti Zébédée use na tere ti lo. Vundu ato nda ti gbu lo na lo gi bê ti lo ngangu mingi. 38  Na lo tene na ala: “Âme ti mbi ayeke na vundu mingi, même nduru na kuâ. ALA ngbâ ge, na mbi na ALA kue e lango pëpe.” 39  Na lo hon kete, lo kuku na lo ba li ti lo na sese, lo sambela, lo tene: “Babâ ti mbi, tongana lege ayeke dä, zia si kopo so ahon yongoro na mbi. Me zia a duti tongana ti so bê ti mbi aye pëpe, me tongana ti so bê ti mo aye.” 40  Tongana lo kiri na mbage ti adisciple ni, lo bâ so ala yeke lango, na lo tene na Pierre: “A yeke ngangu na ALA ti lango pëpe gi teti ngbonga oko tongaso legeoko na mbi? 41  ALA lango pëpe na ALA ngbâ ti sambela lakue, tongaso si ALA tï na yâ ti tara pëpe. Biani, yingo aye ti sara ye, me mitele awoko.” 42  Lo kiri lo gue ti fani use ni, lo sambela, lo tene: “Babâ ti mbi, tongana lege ayeke dä pëpe ti tene kopo so ahon yongoro na mbi, me a lingbi mbi nyon gi ni, zia a duti tongana ti so bê ti mo aye.” 43  Lo kiri lo ga, na lo wara ala na lango, teti so lê ti ala ane na lango. 44  Tongaso lo zia ala, lo hon na lo sambela ti fani ota ni, lo kiri lo tene gi oko tënë ni. 45  Na pekoni, lo ga na mbage ti adisciple ni, lo tene na ala: “Na mara ti ngoi tongaso, ALA yeke lango na ALA yeke wu tere ti ALA! Bâ, ngbonga ni apusu nduru awe ti tene a kä Molenge ti zo ti zia lo na maboko ti awasiokpari. 46  ALA londo, e gue. Bâ, zo ti kango mbi aga nduru awe.” 47  So tënë angbâ na yanga ti lo, bâ, Judas, mbeni oko na popo ti adisciple bale-oko na use, aga. Lo mû azo mingi mingi na peko ti lo so ayeke na a-épée nga na anduru keke. Aprêtre-mokonzi nga na a-ancien ni si atokua ala. 48  Zo ti kango lo ni afa mbeni ye na azo ni kozoni, lo tene: “Zo so mbi yeke su ande ngbangba ti lo, a yeke lo la. ALA gbu lo.” 49  Na lo gue gi na mbage ti Jésus, lo tene: “Bara mo, Rabbi!” Na lo su ngbangba ti lo a ninga. 50  Me Jésus atene na lo: “Koli, mo yeke ge ngbanga ti nyen?” Na azo ni aga, ala zia maboko na ndo ti Jésus si ala gbu lo. 51  Me, bâ, mbeni oko ti ala so ayeke na tere ti Jésus ayôro maboko ti lo, lo gboto épée ti lo, lo dë zo ti kua ti kota prêtre ni na lo fâ mê ti lo. 52  Me Jésus atene na lo: “Kiri na épée ti mo na place ni, teti azo kue so amû épée ayeke kui ande na lege ti épée. 53  Wala mo bâ so mbi lingbi ti hunda na Babâ ti mbi ti tokua na mbi fade fadeso légion ti a-ange ahon bale-oko na use pëpe? 54  Tongana mbi sara ye so, ka ye so Mbeti ti Nzapa afa ti tene a si biani tongaso, a yeke ga tâ tënë tongana nyen?” 55  Na ngoi ni so, Jésus atene na gbâ ti azo so aga: “ALA ga na a-épée nga na anduru keke ti gbu mbi tongana ti so a yeke sara na mbeni zo ti gbungo aye ti azo na ngangu? Lâ na lâ mbi yeke duti na yâ ti temple, mbi yeke fa ye, me ALA gbu mbi lani pëpe. 56  Me aye so kue asi ti tene ambeti so aprophète asû aga tâ tënë.” Tongaso, adisciple ni kue azia lo, ala kpe. 57  Azo so agbu Jésus ague na lo na ndo ti Caïphe, kota prêtre ni, ndo so ascribe nga na a-ancien ti azo ni abungbi tere ti ala kâ awe. 58  Pierre amû peko ti lo, me lo ngbâ a yo. Lo gue juska na gbagba ti kota prêtre ni, na tongana lo lï na yâ ni awe, lo duti na tere ti azo ti kua ti yâ ti gbagba ni ti bâ ye so ayeke si. 59  Na oko ngoi ni, aprêtre-mokonzi nga na amembre ti Sanhédrin ni kue ayeke gi tënë ti wataka ti bi na li ti Jésus ti wara lege ti fâ lo. 60  Atâa so atémoin ti wataka mingi aga, ala wara mbeni tënë oko pëpe. Na pekoni, azo use aga, 61  ala tene: “Koli so atene, ‘Mbi lingbi ti kungbi temple ti Nzapa na sese na ti leke ni na lango ota.’ ” 62  Tongana kota prêtre ni amä tënë so, lo luti na lo tene na Jésus: “Mo yeke na tënë ti tene pëpe? So tënë ti nyen la si ala yeke bi na li ti mo so?” 63  Me Jésus azi yanga pëpe. Tongaso kota prêtre ni atene na lo: “Na iri ti Nzapa so ayeke na fini, mbi zia mo na gbe ti bä ti tene mo tene na e wala mo yeke Christ, Molenge ti Nzapa!” 64  Jésus atene na lo: “Mo wani mo tene awe. Me mbi tene na ALA: Ti londo laso, ALA yeke bâ ande Molenge ti zo so ayeke duti na mbage ti koti ti ngangu, na lo yeke ga na ndo ti ambinda ti yayu.” 65  Na mango tënë so, kota prêtre ni asuru abongo ti lo ti ndo ni, lo tene: “Lo zonga ndo awe! E yeke na bezoin ti ambeni témoin ti sara na nyen? ALA wani ALA mä zonga ni na mê ti ALA awe. 66  ALA tene ti ALA nyen?” Ala kiri tënë: “Lo lingbi na kuâ!” 67  Na pekoni ala tuku ngu ti yanga na lê ti lo, nga ala kpo lo na gobo. Ambeni apika lê ti lo, 68  ala tene: “Mo so mo yeke Christ, tongana mo yeke prophète, fa na e zo so apika mo so.” 69  Tongana Pierre ayeke duti na gigi na yâ ti gbagba ni, mbeni maseka-wali so ayeke zo ti kua aga na tere ti lo, lo tene: “Mo kue mo yeke fade na tere ti Jésus, zo ti Galilée so!” 70  Me Pierre abere tënë ni na lê ti azo kue, lo tene: “Mbi hinga tënë so mo yeke tene so pëpe.” 71  Na peko ti so Pierre alondo ague na yanga ti gbagba ni, mbeni maseka-wali ni nde abâ lo na atene na azo so ayeke kâ: “Koli so kue ayeke lani na tere ti Jésus, zo ti Nazareth so.” 72  Na Pierre akiri abere na lo deba tere ti lo: “Mbi hinga ti mbi koli so oko pëpe!” 73  Kete na pekoni, azo so ayeke luti na ndo ni so aga, ala tene na Pierre: “Ti tâ tënë ni, mo kue mo yeke oko ti ala. Bâ, lege so mo yeke tene na yanga ti kodoro ni akä mo awe.” 74  Tongaso lo to nda ti iri sioni na ndo ti lo wani, na ti deba tere ti lo: “Mbi hinga ti mbi koli so oko pëpe!” Na fade fade mbeni koli-kondo atoto. 75  Na Pierre adabe ti lo na tënë so Jésus atene fade: “Kozo si mbeni koli-kondo atoto, fani ota mo yeke tene so mo hinga mbi pëpe.” Na lo sigigi, lo toto ngangu mingi.

Kete tënë