Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA See 2013 revision

Matthieu 25:1-46

25  “Tongaso, royaume ti yayu ayeke duti ande tongana amasia bale-oko so amû alampe ti ala na ala gue ti tingbi na mbeni koli so ayeke mû wali fini fini.  Oku ayeke amasia ti buba, na oku ayeke amasia so ayeke sara ye na ndara.  Amasia ti buba ni amû alampe ti ala, me ala mû mafuta na tere ti ala pëpe.  Âdu ti amasia so ayeke sara ye na ndara, ala mû alampe ti ala nga ala mû angbenda ti ala so ala tuku mafuta na yâ ni.  Teti so koli so ayeke mû wali fini fini asi hio pëpe, lango asara ala kue na ala lango.  Tâ na bê ti bï, mbeni go adekongo: ‘Bâ, koli ni asi awe! ALA gue atingbi na lo.’  Tongaso amasia ni kue alondo na ala bâ lege ti alampe ti ala.  Amasia ti buba ni atene na ala so ayeke sara ye na ndara: ‘ALA mû na e mbeni mafuta ti ALA kete, ngbanga ti so alampe ti e ayeke gue ti mingo.’  Na amasia so ayeke sara ye na ndara akiri tënë na ala: ‘E bâ so mafuta ti e ni ayeke mingi pëpe ti lingbi e na ALA kue. A yeke nzoni ALA gue na azo ti kango ni na ALA vo ti ALA mafuta ni.’ 10  Na ngoi so ala yeke gue ti vo mafuta ni, koli ni asi, na amasia so aleke tere ti ala awe alï legeoko na lo na matanga ti mariage ni. Na a kanga yanga-da ni na peko ti ala. 11  Na pekoni, tanga ti amasia ni aga, na ala tene: ‘Kota zo, kota zo, zi yanga-da ni na e!’ 12  Lo kiri tënë na ala, lo tene: ‘Ti tâ tënë ni mbi tene na ALA, mbi hinga ALA pëpe.’ 13  “Ni la, zia ALA lango pëpe, ngbanga ti so ALA hinga lango ni nga na ngbonga ni pëpe. 14  “Ye ni ayeke tongana mbeni koli so ayeke nduru ti gue na tambela na kodoro wande. Lo iri angbâa ti lo na lo zia aye ti lo na tïtî ala. 15  Na mbeni ngbâa ni oko, lo mû na lo talent oku. Na mbeni, lo mû na lo talent use. Na mbeni nde, lo mû na lo talent oko. Lo mû ye ni na zo oko oko alingbi na ngangu ti lo, na lo hon ti lo na kodoro wande. 16  Hio na pekoni, lo so awara talent oku ague adë buze na ni na lo wara ambeni talent oku na ndo ni. 17  Lo so awara talent use asara nga tongaso, na lo wara ambeni talent use na ndo ni. 18  Me ti lo so awara gi talent oko, lo gue lo zi dû na yâ ti sese na lo honde lê ti nginza ti argent ti wa ti lo ni dä. 19  “Lango mingi na pekoni, wa ti angbâa so aga ti leke tënë ti nginza na ala. 20  Na lo so awara lani talent oku aga na lo fa ambeni talent oku so lo wara na ndo ni. Lo tene: ‘Kota zo, mo mû lani na mbi talent oku. Me bâ, mbi wara ambeni oku na ndo ni.’ 21  Wa ti lo ni atene na lo: ‘So nzoni! Mo so mo yeke nzoni ngbâa nga mo yeke be-ta-zo! Mo yeke be-ta-zo na ndo ti aye so ayeke mingi pëpe. Fade mbi zia mo na ndo ti aye mingi. Ga, mo duti na ngia legeoko na wa ti mo.’ 22  Na pekoni, lo so awara lani talent use aga na lo tene: ‘Kota zo, mo mû lani na mbi talent use. Me bâ, mbi wara ambeni use na ndo ni.’ 23  Wa ti lo ni atene na lo: ‘So nzoni! Mo so mo yeke nzoni ngbâa nga mo yeke be-ta-zo! Mo yeke be-ta-zo na ndo ti aye so ayeke mingi pëpe. Fade mbi zia mo na ndo ti ambeni ye mingi. Ga, mo duti na ngia legeoko na wa ti mo.’ 24  “Na nda ni, lo so awara lani talent oko aga na lo tene: ‘Kota zo, mbi hinga so mo yeke zo so ayeke sara ngia na aye ti mo pëpe, mo yeke ko ye na ndo so mo lu ye dä pëpe nga mo yeke ro ye na ndo so mo pë lê ti kobe dä pëpe. 25  Ni la, mbi sara mbeto, si mbi gue mbi honde talent ti mo ni na gbe ti sese. Bâ, ye ti mo la.’ 26  Wa ti lo akiri tënë na lo, a tene: ‘Mo sioni ngbâa nga zo ti goigoi! Mo hinga mo tene mbi yeke ko ye na ndo so mbi lu ye dä pëpe nga mbi yeke ro ye na ndo so mbi pë lê ti kobe dä pëpe. 27  Tongaso, a lingbi mo zia fade nginza ti mbi na ndo ti azo ti batango nginza, si tongana mbi ga, mbi wara ye ti mbi na mbeni ye na ndo ni. 28  “ ‘ALA zi talent ni na maboko ti lo na ALA mû ni na lo so ayeke na talent bale-oko. 29  Teti zo kue so ayeke na ye, fade a mû na lo mbeni na ndo ni na a sara si ye ti lo awu mingi. Me zo so ayeke na ye pëpe, même ye so lo yeke na ni, fade a yeke zi ni na tïtî lo. 30  ALA mû ngbâa so ahinga ti sara nzoni ye oko pëpe so, ALA bi lo na gigi na yâ ti bingo. Kâ la si fade lo yeke toto na lo yeke te pembe ti lo.’ 31  “Na ngoi so Molenge ti zo ayeke ga na yâ ti gloire ti lo na a-ange kue na tere ti lo, fade lo yeke duti na ndo ti trône ti lo ti gloire. 32  Fade a yeke bungbi amara kue na gbele lo. Na lo yeke kangbi popo ti azo tongana ti so berger ayeke kangbi popo ti angasangbaga na angasa. 33  Fade lo yeke zia angasangbaga ni na mbage ti maboko ti lo ti koli, na angasa ni na mbage ti maboko ti lo ti wali. 34  “Na pekoni, fade gbia ni ayeke tene na ala so ayeke na mbage ti maboko ti lo ti koli: ‘ALA so Babâ ti mbi airi tënë nzoni na ndo ti ALA, ALA ga ALA wara royaume so a leke ni teti ALA ngbene ye so a zia gere ti dunia, 35  ngbanga ti so nzara asara mbi lani, na ALA mû na mbi ye ti te. Nzara ti ngu asara mbi lani, na ALA mû na mbi ngu ti nyon. Mbi yeke wande lani, na ALA yamba mbi nzoni mingi. 36  Tere ti mbi ayeke lani senge, na ALA yü na mbi bongo. Mbi tï lani kobela, na ALA bâ lege ti mbi. Mbi yeke lani na kanga, na ALA ga ti bâ mbi.’ 37  Na fade azo ti mbilimbili ni ayeke kiri tënë na lo, atene: ‘Seigneur, lawa si e bâ mo lani so nzara asara mo, na e mû na mo kobe ti te? Wala lawa si nzara ti ngu asara mo, na e mû na mo ngu ti nyon? 38  Lawa si e bâ so mo yeke wande, na e yamba mo nzoni mingi? Wala tere ti mo ayeke senge, na e yü na mo bongo? 39  Lawa si e bâ so mo tï kobela wala so mo yeke na kanga na e gue ti bâ mo?’ 40  Na fade gbia ni akiri tënë na ala, lo tene: ‘Ti tâ tënë ni, mbi tene na ALA: So ALA sara ni lani na mbeni oko ti ala so ayeke kete mingi na popo ti aita ti mbi so, andâ ALA sara ni na mbi la.’ 41  “Na pekoni, fade lo tene na ala so ayeke na mbage ti maboko ti lo ti wali: ‘ALA hon yongoro kâ na tere ti mbi, ALA so a deba ALA awe, ti gue na lê ti wâ ti lakue lakue so a leke ni ngbanga ti Zabolo na a-ange ti lo, 42  ngbanga ti so nzara asara mbi lani, me ALA mû na mbi ye ti te pëpe. Nzara ti ngu asara mbi lani, me ALA mû na mbi ngu ti nyon pëpe. 43  Mbi yeke wande lani, me ALA yamba mbi nzoni pëpe. Tere ti mbi ayeke lani senge, me ALA yü na mbi bongo pëpe. Mbi tï lani kobela na mbi yeke lani na kanga, me ALA bâ lege ti mbi pëpe.’ 44  Na fade ala nga ayeke kiri tënë, atene: ‘Seigneur, lawa si e bâ mo lani so nzara asara mo, wala nzara ti ngu asara mo, wala mo yeke wande, wala tere ti mo ayeke senge, wala mo tï kobela, wala mo yeke na kanga na e sara kua na mo pëpe?’ 45  Na fade lo kiri tënë na ala, lo tene: ‘Ti tâ tënë ni, mbi tene na ALA: So ALA sara ni lani pëpe na mbeni oko ti ala so ayeke kete mingi na popo ti aita ti mbi so, ALA sara ni na mbi pëpe.’ 46  Fade ala so ayeke wara kuâ teti lakue lakue, me azo ti mbilimbili ayeke gue ti wara fini ti lakue lakue.”

Kete tënë