Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Matthieu 23:1-39

23  Na pekoni, Jésus asara tënë na gbâ ti azo nga na adisciple ti lo, lo tene:  “Ascribe na aFarizien aduti ala wani na ndo ti ngende ti Moïse.  Tongaso, aye kue so ascribe na aFarizien ayeke fa na ALA, ALA sara ni na ALA bata ni. Me ALA sara tongana ti ascribe na aFarizien ni pëpe, ngbanga ti so ala yeke sara tënë ni, me ala yeke sara ye alingbi na ni pëpe.  Ala kanga anengo kungba na ala zia ni na ndo ti go ti azo. Me ala wani aye ti ndu ni kete na li ti maboko ti ala pëpe.  Aye kue so ala yeke sara, ala yeke sara ni gi ti tene azo abâ ala. Ti ala, akete kete bozo so a zia aversê ti Mbeti ti Nzapa dä, ala yeke sara ni kota, na ala yü ni ti bata na tere ti ala. Ala sara si yanga ti bongo ti ala ayo.  Ala ye gi kozo place na ngoi ti tengo akobe ti lakui, nga ala ye gi akozo ngende na yâ ti asynagogue.  Na ala ye ti tene azo abara ala na gara nga ti tene a iri ala Rabbi.  Me ti ALA, zia mbeni zo airi ALA Rabbi pëpe, teti wafango ye na ALA ayeke gi oko. Me ALA kue ayeke aita.  Nga, ALA iri mbeni zo na ndo ti sese so Babâ ti ALA pëpe, ngbanga ti so Babâ ti ALA ayeke gi oko, lo so ayeke na yayu. 10  Wala ALA zia mbeni zo airi ALA ‘amokonzi’ pëpe, teti Mokonzi ti ALA ayeke gi oko, Christ. 11  Me zo so ayeke kota mingi na popo ti ALA, a lingbi lo duti zo ti kua ti ALA. 12  Zo so ayä iri ti lo, fade a sara si lo ga kete. Na zo so asara tere ti lo kete, fade a yä iri ti lo. 13  “Mawa na ALA, ascribe na aFarizien, ALA awahandango lê ti zo! ALA kanga lege ti royaume ti yayu na azo. Me ALA wani, ALA yeke lï dä pëpe nga ALA yeke zia lege pëpe na azo so aye ti lï dä ti lï. 14*  —— 15  “Mawa na ALA, ascribe na aFarizien, ALA awahandango lê ti zo! ALA yeke fâ ngu-ingo nga ALA yeke tambela na kuru sese ti gue ti sara si zo oko aga prosélyte.* Na tongana lo ga ni awe, ALA sara si lo ga zo so alingbi na Géhenne fani use ahon ALA wani. 16  “Mawa na ALA, awaziba so ayeke fa lege na amba ti ala. ALA so atene: ‘Tongana mbeni zo adeba tere ti lo na iri ti temple, a sara ye oko pëpe. Me, tongana mbeni zo adeba tere ti lo na iri ti lor ti temple ni, a yeke ti lo ti sara ye alingbi na deba ni.’ 17  ALA so li ti ALA ayeke dä pëpe nga so ALA yeke awaziba! Ti tâ tënë ni, so wa si ayeke kota mingi? Lor ni wala temple ni so asara si lor ni aga nzoni-kue? 18  Nga ALA tene: ‘Tongana mbeni zo adeba tere ti lo na iri ti gbalaka, a sara ye oko pëpe. Me, tongana mbeni zo adeba tere ti lo na iri ti sandaga so ayeke na ndo ti gbalaka ni, a yeke ti lo ti sara ye alingbi na deba ni.’ 19  ALA awaziba! Ti tâ tënë ni, so wa si ayeke kota mingi? Sandaga ni wala gbalaka ni so asara si sandaga ni aga nzoni-kue? 20  Tongaso, zo so adeba tere ti lo na iri ti gbalaka ni, lo deba tere ti lo na iri ti gbalaka ni nga na iri ti ye kue so ayeke na ndo ni. 21  Nga, zo so adeba tere ti lo na iri ti temple, lo deba tere ti lo na iri ti temple ni nga na iri ti lo so aduti na yâ ni. 22  Na zo so adeba tere ti lo na iri ti yayu, lo deba tere ti lo na iri ti trône ti Nzapa nga na iri ti lo so aduti na ndo ti trône ni. 23  “Mawa na ALA, ascribe na aFarizien, ALA awahandango lê ti zo! ALA yeke mû dîme ti menthe, ti aneth na ti cumin. Me ALA bâ na nene ni pëpe aye so ayeke kota ahon ni na so Ndia ahunda: So ti tene mbilimbili, sarango nzoni bê na zo nga dutingo be-ta-zo. A yeke aye so si a lingbi ALA sara ni fade, me na oko ngoi ni, ALA girisa nga pëpe ambeni ye ni so. 24  ALA, awaziba so ayeke fa lege na amba ti ala! ALA yeke zi ngungu na yâ ti ye ti nyongo ti ALA, me ALA yeke mene chameau! 25  “Mawa na ALA, ascribe na aFarizien, ALA awahandango lê ti zo! ALA yeke sukula tere ti kopo na ti sembe si avuru, me yâ ni asi singo na aye so a gbu na ngangu nga na sarango ye ahon ndo ni. 26  Mo Farizien so mo yeke waziba so! Sukula yâ ti kopo nga na yâ ti sembe kozoni, si tere ni nga avuru. 27  “Mawa na ALA, ascribe na aFarizien, ALA awahandango lê ti zo! ALA kpa adû ti kuâ so tere ni ayeke vuru, so na gigi a yeke pendere, me yâ ni asi singo na abio ti akuâ nga na mara ti asioni ye nde nde kue. 28  ALA yeke tongaso nga. Na gigi, ALA kpa azo ti mbilimbili, me na yâ ni, bê ti ALA asi singo na nzara ti handango lê ti azo nga na kpengo ndia pëpe. 29  “Mawa na ALA, ascribe na aFarizien, ALA awahandango lê ti zo! ALA yeke leke adû ti kuâ ti aprophète na ALA yeke sara pendere na tere ti asende ti kuâ ti azo ti mbilimbili. 30  Na ALA tene: ‘Tongana e yeke lani na ngoi ti akotara ti e, ka e yôro maboko ti e legeoko na ala na yâ ti mênë ti aprophète pëpe.’ 31  Na tenengo tongaso, ALA yeke sara tënë na tere ti ALA wani, so ALA yeke amolenge ti azo so afâ lani aprophète ni. 32  Ka ALA hunzi gi akusala so akotara ti ALA ato nda ti sara lani so ma! 33  “ALA angbo, amolenge ti asioni ngbo, ALA lingbi ande ti kpe ngbanga ti Géhenne tongana nyen? 34  Ndani la, mbi yeke tokua na ALA aprophète na awandara nga na awafango ye. Me fade ALA yeke fâ ambeni na popo ni na ALA yeke kanga ambeni na ndo ti keke, ALA yeke pika ambeni na zaza na yâ ti asynagogue ti ALA, nga ALA yeke sara ye ti ngangu na ambeni na yâ ti agbata nde nde, 35  tongaso si mênë ti azo ti mbilimbili kue so atuku na sese aga na ndo ti ALA. A londo na mênë ti Abel, zo ti mbilimbili, ti si na mênë ti Zacharie molenge ti Barachie so ALA fâ lo na popo ti akubu ti temple na gbalaka ni. 36  Ti tâ tënë ni, mbi tene na ALA: Aye so kue ayeke ga ande na ndo ti azo ti ngoi so. 37  “Jérusalem, Jérusalem, lo so afâ aprophète nga lo so abo na tênë ala so a tokua ala na mbage ti lo. Fani mingi mbi ye ti bungbi amolenge ti mo na ndo oko tongana ti so mama ti kondo abungbi amolenge ti lo na gbe ti maboko ti lo. Me ALA yeda pëpe! 38  Bâ, a zia da ti ALA na ALA awe. 39  Teti mbi tene na ALA, fade ALA yeke bâ mbi oko pëpe juska ALA tene: ‘Tënë nzoni ayeke na ndo ti lo so aga na iri ti Jéhovah!’ ”

Kete tënë

Bâ kete tënë ti Mt 17:21.
Wande so asara nzapa ti aJuif.