Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Matthieu 22:1-46

22  Jésus akiri asara tënë na ala na lege ti atoli, lo tene:  “Royaume ti yayu ayeke tongana mbeni koli, mbeni gbia, so asara matanga ti mariage ndali ti molenge ti lo ti koli.  Lo tokua angbâa ti lo ti iri azo so a tisa ala na matanga ti mariage ni. Me azo ni aye ti ga pëpe.  Lo kiri lo tokua ambeni ngbâa ni, lo tene: ‘ALA tene tënë so na azo so a tisa ala: “Bâ, mbi tö kobe ti midi awe. Mbi fâ abagara nga na anyama ti mafuta. Mbi leke ye kue awe. ALA ga na matanga ti mariage ni.” ’  Me azo ni amä tënë ni tongana senge tënë, na ala hon. Mbeni ahon na yaka ti lo, na mbeni ahon na dengo buze ti lo.  Me atanga ni agbu angbâa ni, azonga ala, asara pasi na ala na afâ ala.  “Ngonzo agbu gbia ni ngangu, na lo tokua aturugu ti lo si ala futi azo ti fango zo so nga ala zö gbata ti ala.  Na pekoni, lo tene na angbâa ti lo: ‘A leke ye kue teti matanga ti mariage ni awe, me azo so a tisa ala fade ti ga alingbi na ni pëpe.  Tongaso, ALA gue na akota lege ti gbata ni, na zo kue so ALA wara lo, ALA tisa lo ti ga na matanga ni.’ 10  Angbâa ni asara tongaso. Ala gue na akota lege ni, ala iri azo kue so ala wara ala, asioni zo nga na anzoni zo. Azo ni so aga si aduti na tere ti table asi yâ ti ndo so a sara matanga ni dä. 11  “Tongana gbia ni alï ti bâ agene ni, lê ti lo atï na ndo ti mbeni koli so ayü bongo ti mariage ni pëpe. 12  Gbia ni atene na lo: ‘Koli, mo lï ge tongana nyen, so mo yü bongo ti mariage ni pëpe so?’ Yanga ti koli ni akanga. 13  Tongaso gbia ni atene na azo ti kua ti lo: ‘ALA kanga maboko ti lo na gere ti lo na ALA bi lo na gigi na yâ ti bingo. Kâ la si fade lo yeke toto na lo yeke te pembe ti lo.’ 14  “Teti a tisa gbâ ti azo, me a soro gi kete.” 15  Tongaso aFarizien ague na ala mä tere ti tene ala gbu lo na tënë ti yanga ti lo. 16  Na pekoni, ala tokua adisciple ti ala legeoko na azo ti Hérode ti tene tënë so na lo: “Wafango ye, e hinga so mo yeke tene gi tâ tënë lakue nga mo yeke fa tënë ti Nzapa na lege ti tâ tënë. E hinga nga so mo yeke mû mbage ti mbeni zo pëpe, teti mo sara ye na zo gi ndali ti lê ti lo pëpe. 17  Tene na e: Ti mo, Ndia amû lege na zo ti futa lapo ti molenge ti kodoro na César wala pëpe?” 18  Me teti so Jésus ahinga sioni bê ti ala, lo tene: “ALA awahandango lê ti zo so, ngbanga ti nyen ALA yeke tara mbi? 19  ALA fa na mbi mbeni lê ti nginza so ayeke futa na lapo.” Ala ga na lo denier oko. 20  Lo tene na ala: “Li ti zo so nga na iri so ayeke na ndo ti lê ti nginza ni ayeke ti zo wa?” 21  Ala tene: “A yeke ti César.” Tongaso lo tene na ala: “ALA kiri na César aye so ayeke ti César, me na Nzapa aye so ayeke ti Nzapa.” 22  Tongana ala mä tënë so, bê ti ala adö, na ala zia lo ala hon. 23  Gi na lango ni so, aSadducéen, so atene zingongo ti akuâ ayeke dä pëpe, aga na mbage ti lo na ala hunda lo: 24  “Wafango ye, Moïse atene lani: ‘Tongana mbeni koli akui si lo de ti dü molenge pëpe, a lingbi ita ti lo ti koli asara mariage na wali ti lo ni ti dü molenge na iri ti ita ti lo ni.’ 25  Bâ, lani ambeni ita ti koli mbasambala ayeke dä na popo ti e. Yaya ni asara mariage na lo kui. Me teti so lo dü molenge pëpe, lo zia wali ni na ita ti lo. 26  Ye ni asi nga tongaso na use ita ti lo ni na ota ni, juska na ala mbasambala kue. 27  Na peko ti ala kue, wali ni nga akui. 28  Tongaso, na ngoi ti zingongo ti akuâ, fade wali ni ayeke duti wali ti lo so wa na popo ti ala mbasambala ni? So ala kue la amû wali ni so.” 29  Jésus akiri tënë na ala, lo tene: “ALA girisa lege awe, ngbanga ti so ALA hinga Mbeti ti Nzapa nga na ngangu ti Nzapa oko pëpe, 30  teti na ngoi ti zingongo ti akuâ, akoli ayeke sara mariage pëpe na awali nga ayeke sara mariage pëpe. Me ala yeke tongana a-ange so ayeke na yayu. 31  Na ndo ti tënë ti zingongo ti akuâ, ALA diko pëpe ye so Nzapa atene ândö na ALA? Lo tene: 32  ‘Mbi yeke Nzapa ti Abraham, Nzapa ti Isaac na Nzapa ti Jacob.’ Lo yeke Nzapa ti akuâ pëpe, me ti azo so ayeke na fini.” 33  Tongana gbâ ti azo so ayeke dä amä tënë so, bê ti ala adö ndali ti fango ye ti lo. 34  Na peko ti so aFarizien amä so lo kanga yanga ti aSadducéen awe, ala bungbi tere ti ala. 35  Na mbeni oko ti ala, so lo hinga ye mingi na ndo ti Ndia, ahunda tënë na Jésus ti tara lo: 36  “Wafango ye, commandement wa si ayeke kota ahon atanga ni kue na yâ ti Ndia?” 37  Jésus akiri tënë na lo: “ ‘Mo ndoye Jéhovah Nzapa ti mo na bê ti mo kue, na âme ti mo kue nga na bibe ti mo kue.’ 38  So ayeke commandement so ayeke kota ahon atanga ni kue na a yeke kozoni la. 39  Use commandement ni, so akpa ti kozoni so, ayeke so: ‘Mo ndoye mba ti mo tongana mo wani.’ 40  Ndia ni kue, nga na ambeti ti aProphète, aluti na ndo ti acommandement use so.” 41  Na ngoi so aFarizien abungbi tere ti ala na ndo oko, Jésus ahunda ala: 42  “ALA tene ti ALA nyen na ndo ti Christ? Lo yeke molenge ti zo wa?” Ala kiri tënë na lo: “Lo yeke molenge ti David.” 43  Lo tene na ala: “Ka a sara tongana nyen si, na lege ti ngangu ti yingo, David airi lo ‘Seigneur’? tongana lo tene: 44  ‘Jéhovah atene na Seigneur ti mbi: “Mo duti na mbage ti maboko ti mbi ti koli juska mbi zia awato ti mo na gbe ti gere ti mo.” ’ 45  So David airi lo ‘Seigneur’ so, lo kiri ti duti molenge ti lo ni tongana nyen?” 46  Zo oko ti kiri tënë na lo ayeke dä pëpe. Ti londo na lango ni so, mbeni zo ti tara ti hunda tënë na lo ayeke dä pëpe.

Kete tënë