Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Matthieu 20:1-34

20  “Teti royaume ti yayu ayeke tongana mbeni koli, mbeni wa ti da, so asigigi na kota ndapre ti gi azo ti mû ala na kua ti yaka ti vigne ti lo.  Tongana lo na azo ti kua ni amä tere awe ti tene lango oko lo futa ala denier oko, lo tokua ala na yâ ti yaka ti vigne ti lo.  A si nduru na ngbonga ota, lo bâ ambeni zo so ayeke duti na gara na ala yeke na kua ti sarango ni pëpe.  Lo tene na ala: ‘ALA nga, ALA gue na yaka ti vigne ti mbi, na fade mbi mû na ALA ye so alingbi,’  na ala gue. A kiri a si nduru na ngbonga omene, nga na ngbonga gumbaya, lo sara nga gi tongaso.  Na nda ni, nduru na ngbonga bale-oko na oko, lo sigigi na lo wara ambeni zo so ayeke luti, na lo tene na ala: ‘Ngbanga ti nyen, na yâ ti lango ni so kue, ALA yeke luti ge na ALA yeke na kua ti sarango ni pëpe?’  Ala tene na lo: ‘Mbeni zo ti mû e na kua ayeke dä pëpe.’ Lo tene na ala: ‘ALA nga kue, ALA gue na yaka ti vigne ti mbi.’  “Tongana a si na lakui awe, wa ti yaka ti vigne ni atene na zo so ayeke na ndo ti kua ni: ‘Mo iri azo ti kua ni na mo futa na ala nginza ti ala. Mo to nda ti futa azo so mbi mû ala na kua na ndangba ni ti kiri na ala so mbi mû ala kozoni.’  Na ngoi so azo so lo mû ala na kua na ngbonga bale-oko na oko ni aga, zo oko oko awara denier oko. 10  Tongana azo so lo mû ala na kua kozoni aga, ala tene na bê ti ala so ala yeke wara ande ti ala nginza mingi ahon so. Me ala nga awara denier oko. 11  Na tongana ala wara nginza ni, ala to nda ti diko tënë na gbe ti go ti ala na tere ti wa ti da ni, 12  ala tene: ‘Azo so aga na ndangba ni asara kua ngbonga oko. Me mo futa ala alingbi na e, e so e bâ pasi ti sara kua na yâ ti lango ni so kue nga na yâ ti ndowa!’ 13  Me wa ti da ni akiri tënë na mbeni oko ti ala, lo tene: ‘Koli, mbi sara sioni na mo pëpe! Mbi na mo e mä tere fade ti futa mo denier oko pëpe? 14  Mû ye ti mo, mo gue. Mbi ye ti mû na zo so mbi mû lo na kua na ndangba ni oko ye so mbi mû na mo. 15  Mbi lingbi ti sara ye ti bê ti mbi na aye ti mbi wani pëpe? Wala lê ti mo ayeke sioni ngbanga ti so mbi yeke nzoni zo?’ 16  A yeke tongaso si fade azo ti ndangba ni aga azo ti li ni, na azo ti li ni aga azo ti ndangba ni.” 17  Tongana Jésus ayeke nduru ti montê na Jérusalem, lo iri gi adisciple ti lo bale-oko na use, na tongana ala yeke tambela na lege, lo tene na ala: 18  “ALA bâ, e yeke montê na Jérusalem la, na fade a yeke zia Molenge ti zo na maboko ti aprêtre-mokonzi nga na ascribe. Fade ala yeke fâ ngbanga ti kuâ na li ti lo, 19  na fade ala yeke zia lo na maboko ti azo ti amara ti tene ala he lo, ala pika lo na zaza nga ala kanga lo na ndo ti keke si lo kui. Me na ota lango ni, a yeke zingo lo na kuâ.” 20  Na pekoni, mama ti amolenge ti Zébédée aga na tere ti Jésus, lo na amolenge ti lo ti koli. Lo ba li ti lo na gbe ti Jésus na lo hunda mbeni ye na lo. 21  Jésus atene na lo: “Mo ye nyen?” Lo tene na Jésus: “Mû yanga ti tene amolenge ti mbi ti koli use so aduti na tere ti mo, oko na mbage ti maboko ti mo ti koli na oko na mbage ti maboko ti mo ti wali, na yâ ti royaume ti mo.” 22  Jésus atene na amolenge ni: “ALA hinga ye so ALA yeke hunda so pëpe. ALA lingbi ti nyon kopo so mbi ga nduru ti nyon ni so?” Ala tene na lo: “E lingbi.” 23  Lo tene na ala: “Ti kopo ti mbi ni, ALA yeke nyon ande ni biani. Me ti duti na mbage ti maboko ti mbi ti koli nga na mbage ti maboko ti mbi ti wali, a yeke ti mbi ti mû ni pëpe. Me a yeke ti ala so Babâ ti mbi aleke ni ndali ti ala.” 24  Tongana atanga ni bale-oko amä tënë so, bê ti ala ason na tere ti aita use so. 25  Me Jésus airi ala na tere ti lo, na lo tene: “ALA hinga so amokonzi ti amara ayeke sara mokonzi na ndo ti amara ni, na akota zo ni ayeke na komandema na ndo ti ala. 26  Ti ALA, a yeke tongaso pëpe. Me zo so aye ti ga kota na popo ti ALA, a lingbi lo duti zo ti kua ti ALA. 27  Na zo so aye ti duti na li ni na popo ti ALA, a lingbi lo duti ngbâa ti ALA. 28  A yeke tongana ti Molenge ti zo so aga ti tene azo asara kua na lo pëpe, me lo ga ti sara kua na azo na ti mû âme ti lo tongana ngere so a futa ti zi na azo mingi.” 29  Tongana ala yeke sigigi na yâ ti Jéricho ti hon, azo mingi mingi amû peko ti lo. 30  Awaziba use ayeke duti na tere ti lege. Tongana ala mä so Jésus si ayeke hon so, ala dekongo, ala tene: “Seigneur, Molenge ti David, sara nzoni bê na e!” 31  Me azo ni asuku na ala ti kanga yanga ti ala. Ye oko, ala kiri ala dekongo ngangu, ala tene: “Seigneur, Molenge ti David, sara nzoni bê na e!” 32  Tongaso Jésus aluti, lo iri ala, na lo tene: “ALA ye mbi sara nyen na ALA?” 33  Ala tene na lo: “Seigneur, e ye si lê ti e azi.” 34  Mawa ti ala asara Jésus, na lo ndu lê ti ala. Fade fade, lê ti ala azi na ala mû peko ti lo.

Kete tënë