Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA See 2013 revision

Matthieu 18:1-35

18  Na ndembe ni so, adisciple aga na tere ti Jésus, ala hunda lo: “Ti tâ tënë ni, zo wa la ayeke kota mingi na yâ ti royaume ti yayu?”  Lo iri mbeni kete molenge, lo zia lo na popo ti ala,  na lo tene: “Ti tâ tënë ni, mbi tene na ALA: Tongana ALA changé lege ti ALA pëpe na ALA ga tongana akete molenge pëpe, fade ALA yeke wara lege ti lï na yâ ti royaume ti yayu oko pëpe.  Ni la, zo so ayeke sara ande tere ti lo kete tongana kete molenge so, a yeke zo tongaso si ayeke kota mingi na yâ ti royaume ti yayu.  Na zo so ayamba mbeni kete molenge tongana lo so ndali ti iri ti mbi, lo yamba mbi nga.  Me zo so asara si mbeni oko ti akete zo so amä na bê na mbi atï, a yeke nzoni a kanga mbeni kota tênë ti nekango na ye na go ti lo, mara ni so alele ayeke gboto ni si ayeke turnê, na a bi zo ni tâ na yâ ti kota ngu-ingo.  “Mawa na dunia so ndali ti aye ti lo so akanga lege na mabe ti zo! Biani, aye so akanga lege na mabe ti zo alingbi gi ti ga, me mawa na zo so aye ni aga na lege ti lo!  Ni la, tongana maboko ti mo wala gere ti mo ayeke sara si mo tï, fâ ni na bi ni yongoro na mo. A yeke nzoni mingi teti mo ti tene mbeni mbage ti tere ti mo wala gere ti mo abuba, me mo wara fini, ahon ti tene a bi mo na amaboko ti mo wala agere ti mo use kue na lê ti wâ so ayeke lakue lakue.  Nga, tongana lê ti mo ayeke sara ti tene mo tï, gboto ni na bi ni yongoro na mo. A yeke nzoni mingi teti mo ti wara fini na lê ti mo oko, ahon ti tene a bi mo na alê ti mo use kue na yâ ti wâ ti Géhenne. 10  ALA sara hange si ALA bâ mbeni oko ti akete zo so tongana mbumbuse zo pëpe. Teti mbi tene na ALA so kâ na yayu, a-ange ti ala ayeke bâ lakue lê ti Babâ ti mbi so ayeke na yayu. 11*  —— 12  “ALA bâ tënë so tongana nyen? Tongana mbeni koli ayeke na angasangbaga ngbangbo oko, na oko ti ala agirisa, fade lo yeke zia atanga ni bale-gumbaya na gumbaya so na ndo ti ahoto ti gue ti gi oko so agirisa so pëpe? 13  Na tongana lo wara lo so agirisa so, ti tâ tënë ni, mbi tene na ALA, tere ti lo ayeke nzere mingi ndali ti oko so lo wara lo, ahon atanga ni bale-gumbaya na gumbaya so agirisa pëpe. 14  Legeoko nga, a yeke nzoni pëpe na lê ti Babâ ti mbi so ayeke na yayu tongana mbeni oko ti akete zo so agirisa. 15  “Nga, tongana ita ti mo asara mbeni siokpari, gue mo fa na lo siokpari so lo sara. Zia a duti gi na popo ti ALA use. Tongana lo mä mo, mo kiri na lo na nzoni lege awe. 16  Me tongana lo mä mo pëpe, mo mû zo oko wala use na tere ti mo, tongaso si na lege ti tënë ti yanga ti atémoin use wala ota, gere ti tënë kue aluti nzoni. 17  Tongana lo mä ala pëpe, sara tënë ni na congrégation. Tongana lo mä même congrégation pëpe, zia mo bâ lo tongana mbeni zo ti amara nga tongana zo ti rongo nginza ti lapo. 18  “Ti tâ tënë ni, mbi tene na ALA: Ye kue so ALA kanga ni na sese ge ayeke duti ande ye so a kanga ni na yayu awe. Na ye kue so ALA zi ni na sese ge ayeke duti ande ye so a zi ni na yayu awe. 19  Ti tâ tënë ni, mbi kiri mbi tene na ALA: Tongana azo use na popo ti ALA amä tere na sese ge na ndo ti mbeni ye so ayeke kota na so a lingbi ala hunda ni, fade Babâ ti mbi so ayeke na yayu ayeke sara ye ni so na ala. 20  Na ndo so azo use wala ota abungbi dä na iri ti mbi, mbi yeke na popo ti ala na ndo ni so.” 21  Na pekoni, Pierre aga na tere ti Jésus na lo hunda lo: “Seigneur, a lingbi ita ti mbi asara siokpari na tere ti mbi juska fani oke si mbi pardone lo? Juska fani mbasambala awe?” 22  Jésus atene na lo: “Mbi tene na mo, mo pardone lo gi juska fani mbasambala pëpe, me juska fani bale-mbasambala na mbasambala. 23  “Ndani la, royaume ti yayu ayeke tongana mbeni koli, mbeni gbia, so aye ti leke tënë ti nginza na angbâa ti lo. 24  Tongana lo to nda ti leke tënë ni na ala, a ga na lo mbeni koli so nginza ti gbia ni ayeke na li ti lo alingbi na talent saki bale-oko [so ti tene, denier kutu bale-omene]. 25  Me, ngbanga ti so lo yeke na ye ti kiri na nginza ni pëpe, gbia ni amû yanga ti tene a kä koli ni, wali ti lo, amolenge ti lo nga na aye ti lo kue ti tene a futa na kuda ni. 26  Tongaso, ngbâa ni atï na sese, lo voro yanga na gbia ni, na lo tene: ‘Mo kanga bê ti mo, fade mbi yeke kiri na nginza ni kue na mo.’ 27  Tongana gbia ni amä tënë so, mawa asara lo. Lo zia ngbâa so ti gue nga lo zi kuda ni kue na li ti lo. 28  Me, tongana ngbâa so asigigi, lo tingbi na mbeni mba ti lo ngbâa ni. Nginza ti lo so ayeke na li ti mba ti lo ni ayeke denier ngbangbo oko. Lo gbu mba ti lo ni, na lo to nda ti pete go ti lo, lo tene: ‘Mo kiri na mbi nginza ti mbi kue so ayeke na li ti mo.’ 29  Tongaso, mba ti lo ngbâa ni atï na sese na lo voro yanga na lo, lo tene: ‘Kanga bê ti mo, fade mbi yeke kiri na nginza ni na mo.’ 30  Me lo ye ti mä lo pëpe, lo sigigi, lo mû yanga si a bi mba ti lo ni na da ti kanga juska ti tene lo kiri na nginza ni so ayeke na li ti lo. 31  Na tongana amba ti lo angbâa abâ ye so asi, vundu agbu ala mingi na ala gue ala fa na gbia ni peko ti ye kue so asi. 32  Tongaso, gbia ni airi lo na lo tene na lo: ‘Mo sioni ngbâa so, tongana mo voro yanga ti mo fade na mbi, mbi zi kuda na li ti mo kue. 33  Mo nga kue, a lingbi mo sara fade nzoni bê na mba ti mo so, tongana ti so mbi kue mbi sara na mo fade so pëpe?’ 34  Na ndo ti tënë so, ngonzo agbu gbia ni ngangu na lo zia lo na maboko ti azo ti batango da ti kanga juska ti tene lo kiri na nginza ni kue so ayeke na li ti lo. 35  Babâ ti mbi so ayeke na yayu ayeke sara na ALA tongaso nga tongana ALA oko oko kue apardone aita ti ALA na bê ti ALA kue pëpe.”

Kete tënë

Bâ kete tënë ti Mt 17:21.