Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Matthieu 16:1-28

16  A-Farizien na aSadducéen aga nduru na Jésus. Ti tara lo, ala hunda lo ti sara na ala mbeni fä so alondo na yayu.  Lo kiri tënë na ala, lo tene: “[[Tongana ndo ague ti vuko, ALA yeke tene ka: ‘Ndo ni ayeke duti nzoni ngbanga ti so lê ti nduzu ni abe bengo.’  Na tongana a yeke ndapre, ALA yeke tene: ‘Ndo ni ayeke dë ande dengo, ngu ayeke pika laso, ngbanga ti so lê ti nduzu ni abe bengo nga avuko kete.’ ALA hinga ti fa nda ti lê ti nduzu, me ALA hinga ti fa nda ti afä ti angoi pëpe.]]  Azo ti ngoi so ayeke asioni zo na ala yeke be-ta-zo* na Nzapa pëpe. Ala ngbâ ti hunda ti bâ mbeni fä, me a yeke fa na ala mbeni fä oko pëpe, gi fä ti Jonas.” Na ndo ti tënë so, lo zia ala lo hon.  Tongana adisciple ni afâ ngu awe, ala girisa ti mû mapa.  Jésus atene na ala: “ALA zi lê ti ALA, ALA sara hange na mama ti mapa ti aFarizien na aSadducéen.”  Tongaso ala yeke sara tënë na popo ti ala, ala tene: “E ga na mapa oko pëpe.”  Teti lo hinga tënë so, Jésus atene: “Azo ti kete mabe, ngbanga ti nyen ALA yeke diko tënë na popo ti ALA ndali ti so ALA yeke na mapa pëpe?  Ade ALA mä yâ ti tënë ni pëpe? ALA dabe ti ALA pëpe na mapa oku so azo saki oku ate? ALA ro lani asakpa oke? 10  Wala ALA dabe ti ALA pëpe na amapa mbasambala so azo saki osio ate? Na ALA ro lani kota sakpa oke? 11  A sara tongana nyen si ALA hinga pëpe so mbi yeke sara na ALA tënë ti mapa pëpe? Me ALA sara hange na mama ti mapa ti aFarizien na aSadducéen.” 12  Fadeso ala hinga so lo yeke tene na ala ti sara hange na aye so aFarizien na aSadducéen ayeke fa, me pëpe na tâ mama ti mapa. 13  Tongana lo si na sese ti Césarée ti Philippe, Jésus ahunda adisciple ti lo: “Azo ayeke tene ti ala so Molenge ti zo ayeke zo wa?” 14  Ala tene: “Ambeni zo atene lo yeke Jean Baptiste, ambeni atene lo yeke Élie, ambeni nga atene lo yeke Jérémie wala mbeni oko ti aprophète.” 15  Lo hunda ala: “Me ti ALA, ALA tene mbi yeke zo wa?” 16  Simon Pierre akiri tënë, atene: “Mo yeke Christ, Molenge ti Nzapa so ayeke na fini.” 17  Na pekoni, Jésus atene na lo: “Ngia ayeke na mo Simon, molenge ti Jonas, ndali ti so a yeke pëpe mitele na mênë si afa na mo tënë so, me a yeke Babâ ti mbi so ayeke na yayu si afa ni na mo. 18  Nga, mbi tene na mo: Mo yeke Pierre. Na ndo ti kota tênë so, fade mbi leke congrégation ti mbi dä, na fade yanga ti Hadès ayeke hon ni na ngangu pëpe. 19  Na fade mbi yeke mû na mo akelele ti royaume ti yayu, na aye kue so mo yeke kanga ni na sese ge ayeke duti ande ye so a kanga ni na yayu awe. Nga, aye kue so mo yeke zi ni na sese ge ayeke duti ande ye so a zi ni na yayu awe.” 20  Na pekoni, lo gboto mê ti adisciple ni ngangu ti tene ala tene na mbeni zo oko pëpe so lo yeke Christ. 21  Ti londo na ngoi ni so, Jésus Christ ato nda ti fa na adisciple ti lo so a lingbi lo gue na Jérusalem ti bâ pasi mingi na maboko ti a-ancien, aprêtre-mokonzi nga na ascribe. A yeke fâ lo ande, me na ota lango ni, a yeke zingo lo na kuâ. 22  Na ndo ti tënë so, Pierre agboto Jésus yongoro kete, na lo to nda ti suku na lo, lo tene: “Zia a zi mo na yâ ti ye so, Seigneur; ye tongaso ayeke si ande na mo oko pëpe.” 23  Me lo turnê peko ti lo, na lo tene na Pierre: “Hon na peko ti mbi kâ, Satan! Mo yeke mbeni tênë ti pikango gere ndali ti mbi, ngbanga ti so mo yeke na abibe ti Nzapa pëpe, me mo yeke na abibe ti azo.” 24  Na Jésus atene na adisciple ti lo: “Tongana mbeni zo aye ti ga na peko ti mbi, zia lo ke tere ti lo wani na lo yô keke ti pasi ti lo na lo mû peko ti mbi lakue lakue. 25  Teti zo so aye ti sö âme ti lo, fade lo yeke girisa ni. Me zo so agirisa âme ti lo ndali ti mbi, fade lo yeke wara ni. 26  Tongana mbeni zo awara dunia so kue me lo girisa âme ti lo, ye ti nzoni wa lo wara dä? Wala nyen la si zo ayeke mû ande na place ti âme ti lo? 27  Teti a fa kozoni awe so Molenge ti zo ayeke ga na yâ ti gloire ti Babâ ti lo legeoko na a-ange ti lo. Na fade lo yeke futa zo oko oko alingbi na sarango ye ti lo. 28  Ti tâ tënë ni, mbi tene na ALA: Na popo ti azo so aluti ge so, fade ambeni ayeke kui ande pëpe juska ala bâ Molenge ti zo aga na yâ ti royaume ti lo kozoni si.”

Kete tënë

Bâ kete tënë ti Mt 12:39.