Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Matthieu 15:1-39

15  A-Farizien na ascribe alondo na Jérusalem na ala ga na mbage ti Jésus. Ala tene:  “Ngbanga ti nyen adisciple ti mo ayeke doro ngobo ti azo ti giriri? Na tapande, tongana ala ye ti te kobe, ala yeke sukula maboko ti ala pëpe.”  Lo kiri tënë na ala, lo tene: “Ngbanga ti nyen ALA nga ALA yeke doro commandement ti Nzapa ndali ti ngobo ti ALA?  Na tapande, Nzapa atene: ‘Mo ne babâ na mama ti mo’, nga, ‘Zia zo so azonga babâ wala mama ti lo awara kuâ.’  Me ti ALA, ALA tene: ‘Tongana mbeni zo atene na babâ wala mama ti lo: “Ye kue so mbi yeke na ni na so mo lingbi fade ti wara nzoni dä, a yeke matabisi so mbi zia ni nde awe ti mû na Nzapa,”  a yeke ngbanga ti lo pëpe ti ne babâ ti lo.’ Ni la, ndali ti ngobo ti ALA, ALA sara si tënë ti Nzapa ayeke na ngangu mbeni pëpe.  ALA awahandango lê ti zo, a yeke na lege ni si Ésaïe atene prophétie na ndo ti ALA, tongana lo tene:  ‘Azo so agonda mbi gi na yanga ti ala senge, me bê ti ala ague yongoro mingi na mbi.  A yeke senge senge si ala ngbâ ti voro mbi, ngbanga ti so aye so ala yeke fa ayeke gi acommandement so alondo na azo.’ ” 10  Na lo iri gbâ ti azo ni na tere ti lo, lo tene na ala: “ALA mä tënë so na ALA gbu nda ni: 11  A yeke pëpe ye so alï na yanga ti zo si ayeke sara si lo ga sioni. Me ye so alondo na yanga ti zo ti sigigi, ni la asara si lo ga sioni.” 12  Na pekoni, adisciple aga atene na lo: “Mo hinga so bê ti aFarizien ason na tere ti mo ndali ti atënë so mo tene so?” 13  Lo kiri tënë, lo tene: “Keke kue so Babâ ti mbi so ayeke na yayu alu ni pëpe, fade a yeke gboto ni na gunda ni kue. 14  ALA zia aFarizien so. Ala yeke awaziba so ayeke fa lege na amba ti ala. Teti tongana mbeni waziba afa lege na mbeni mba ti lo waziba, ala use kue ayeke tï na dû.” 15  Na ndo ti tënë so, Pierre atene na lo: “Fa nda ti tapande so nzoni na e si.” 16  Jésus atene: “ALA nga kue, ALA gbu nda ti ye pëpe? 17  ALA hinga pëpe so ye kue so alï na yanga ti zo ague na yâ ti akamba ti yâ ti lo, na pekoni a sigigi a gue na dû ti kabinë? 18  Me, aye so asigigi na yanga ti zo alondo na bê, na a yeke aye so la asara si zo aga sioni. 19  Na tapande, aye so alondo na bê ayeke: sioni tënë, tënë ti fango zo, tënë ti gingo wali wala koli nde, tënë ti lango-sioni, tënë ti nzi, tënë ti témoin ti wataka nga na zonga. 20  Aye so la asara si zo aga sioni. Me tongana zo asukula maboko ti lo pëpe si lo te kobe, a yeke ye so la asara si lo ga sioni pëpe.” 21  Jésus azia ndo so, na lo gue na mbage ti Tyr nga na Sidon. 22  Bâ, mbeni wali ti kodoro ti Phénicie, so asara kodoro na ndo ni so, aga, na lo dekongo, lo tene: “Seigneur, Molenge ti David, sara nzoni bê na mbi, teti sioni yingo ayeke sara sana mingi na molenge ti mbi ti wali.” 23  Me Jésus azi yanga na wali ni pëpe. Adisciple ti lo aga nduru na lo na ala hunda lo atene: “Tene na wali so ti gue, ngbanga ti so lo ngbâ ti dekongo na peko ti e.” 24  Jésus akiri tënë, lo tene: “A tokua mbi pëpe na mbage ti azo nde, me gi na mbage ti angasangbaga ti da ti Israël so agirisa.” 25  Wali ni aga, lo ba li ti lo na gbe ti Jésus, na lo tene: “Seigneur, mû maboko na mbi!” 26  Jésus akiri tënë, lo tene: “A yeke na lege ni pëpe ti mû mapa so ayeke ti amolenge ti bi ni na amolenge ti mbo.” 27  Wali ni atene: “Tâ tënë, Seigneur. Me, biani amolenge ti mbo ayeke te afuku ti kobe so alondo na ndo ti table ti awa ti ala si a tï na sese.” 28  Na Jésus atene na lo: “Wali! mabe ti mo ayeke kota biani. Zia ye ni asi na mo tongana ti so mo ye.” Na tere ti molenge ti lo ni asava gi na ngoi ni so. 29  Jésus alondo na ndo so, lo gue nduru na tere ti kota ngu ti Galilée. Na pekoni lo montê na ndo ti hoto, na lo duti kâ. 30  Na azo mingi mingi aga nduru na lo, ala ga na azo ti bubango gere, awazin, awaziba, awabuburu nga na ambeni zo ti kobela ni nde nde tongaso. Ala zia ala na gbele lo, na lo sava ala. 31  Tongaso, bê ti gbâ ti azo so apika tongana ala bâ awabuburu so ayeke sara tënë, azo ti bubango gere so ayeke tambela nzoni nga na awaziba so ayeke bâ ndo. Na bango aye so, ala mû gloire na Nzapa ti Israël. 32  Jésus airi adisciple ti lo, lo tene na ala: “Mawa ti gbâ ti azo so asara mbi, ngbanga ti so a sara laso lango ota awe si ala yeke na tere ti mbi na ala yeke na ye ti tengo ni pëpe. Na mbi ye pëpe ti tene na ala ti gue na nzara na yâ ti ala. Peut-être ala lingbi ti woko na lege.” 33  Me, adisciple ni atene na lo: “Na yâ ti benyama tongaso, e yeke wara mapa na ndo wa ti mû na gbâ ti azo so si a lingbi ala?” 34  Tongaso, Jésus ahunda ala: “ALA yeke na mapa oke?” Ala tene: “Mbasambala, na ambeni kete susu so ayeke mingi pëpe.” 35  Na tongana lo tene na gbâ ti azo so ti duti na sese awe, 36  lo mû amapa mbasambala ni nga na asusu ni, lo kiri singila na Nzapa, lo fâ yâ ni na lo mû ni na adisciple ni, na adisciple ni akangbi ni na gbâ ti azo so. 37  Azo ni kue ate ni na yâ ti ala asi. A ro tanga ti anduru ni so angbâ, na a si akota sakpa mbasambala. 38  Ala so ate kobe ni ayeke akoli saki osio. A diko awali na akete molenge pëpe. 39  Ti hunzi na ni, tongana lo tene na azo ni ti gue awe, lo ko na yâ ti ngö na lo gue na sese ti Magadan.

Kete tënë