Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Matthieu 14:1-36

14  Na lâ ni kâ, Hérode, so ayeke Komanda ti sese ni, amä sango ti Jésus,  na lo tene na azo ti kua ti lo: “So ayeke Jean Baptiste la. A zingo lo na popo ti akuâ awe, ni la lo yeke sara akusala ti ngangu so.”  Hérode agbu lani Jean, lo kanga lo na lo bi lo na da ti kanga ndali ti Hérodiade so ayeke wali ti Philippe ita ti Hérode ni,  ngbanga ti so Jean ayeke tene lani na lo: “Ndia amû lege na mo ti mû wali so pëpe.”  Me, atâa so Hérode aye ti fâ Jean, lo sara mbeto ti azo ndali ti so ala bâ Jean tongana mbeni prophète.  Me na ngoi so a yeke sara matanga ti dungo Hérode, molenge ti Hérodiade ti wali adodo na gbele azo so aga na a nzere na Hérode mingi,  si Hérode amû zendo nga lo deba yanga ti lo ti mû na molenge-wali ni ye kue so lo hunda.  Na teti mama ti lo si azia tënë ni na yanga ti lo, lo tene: “Mû na mbi li ti Jean Baptiste ge na yâ ti kpangbala sembe.”  Vundu agbu Gbia Hérode. Me ndali ti so lo deba yanga ti lo awe, nga ndali ti azo so ayeke te kobe legeoko na lo, lo mû yanga ti tene a ga na li ti Jean Baptiste na a mû ni na molenge-wali ni. 10  Lo tokua ndo na a gue a dë go ti Jean na da ti kanga. 11  A ga na li ti Jean ni na yâ ti kpangbala sembe na a mû ni na maseka-wali ni, na lo gue na ni na mama ti lo. 12  Na pekoni, adisciple ti Jean ague amû kuâ ti lo, ala lu ni. Na ala gue, ala sara tënë ni na Jésus. 13  Tongana Jésus amä tënë so, lo zia ndo ni, lo mû ngö lo gue na mbeni ndo so azo ayeke dä pëpe ti duti gi lo oko. Me tongana gbâ ti azo amä so lo hon, ala londo na yâ ti agbata ni na ala mû peko ti lo na gere. 14  Tongana lo sigigi, lo bâ azo mingi mingi; na mawa ti ala asara lo na lo sava azo ti ala so ayeke na kobela. 15  Me tongana lâ akui awe, adisciple ti lo aga atene na lo: “Ndo ni ge ayeke yâ ti benyama na ngbonga ni ahon mingi awe. Mo tene na gbâ ti azo so ti gue, tongaso si ala gue na yâ ti akete kodoro na ala vo ye ala te.” 16  Me, Jésus atene na ala: “A yeke nzoni azo ni ague pëpe, me ALA wani amû ye ti tengo ni na azo so.” 17  Adisciple ni atene na lo: “E yeke na mbeni ye oko ge ti mû na ala pëpe, gi mapa oku na susu use.” 18  Lo tene na ala: “ALA ga na ni na mbi ge.” 19  Na pekoni, lo mû yanga na azo ni ti duti na ndo ti apere. Lo mû mapa oku na susu use so, lo yô lê ti lo na nduzu, na lo iri tënë nzoni na ndo ni. Na pekoni, lo fâ yâ ti mapa ni na lo mû ni na adisciple ti lo na adisciple ni akangbi ni na gbâ ti azo so. 20  Azo ni kue ate, yâ ti ala asi. Na pekoni, a ro tanga ti anduru ni so angbâ na a si sakpa bale-oko na use. 21  Akoli kue so ate kobe ni, wungo ti ala ayeke saki oku tongaso. A diko awali na akete molenge dä pëpe. 22  Na pekoni, hio, lo mû yanga na adisciple ti lo ti montê na yâ ti ngö na ti hon kozo na lo na mbage ti ngu ni, nga na oko ngoi ni, lo tene na gbâ ti azo ni ti gue. 23  Na nda ni, tongana lo tene na azo ni ti gue awe, gi lo oko lo montê na ndo ti hoto ti sambela. A yeke bï na ngbonga ahon mingi, me lo ngbâ kâ gi lo oko. 24  Na oko ngoi ni so, ngö ni ague yongoro na yanga ti ngu ni awe, me a wara kpale ti hon ndali ti amapo ti ngu ni, ngbanga ti so pupu ayeke ga gi gango na mbage ti ala. 25  Me na kota ndapre, Jésus ayeke ga na mbage ti ala, lo yeke tambela na ndo ti kota ngu ni. 26  Tongana lê ti ala atï na ndo ti Jésus so ayeke tambela na ndo ti kota ngu ni, li ti ala aga kirikiri, na ala tene: “So ye ti ndima la!” Na ala dekongo na mbeto. 27  Me hio, Jésus atene na ala: “ALA dë bê ti ala, mbi la. ALA sara mbeto pëpe.” 28  Na Pierre atene na lo: “Seigneur, tongana a yeke mo la, mû yanga na mbi ti tambela na ndo ti ngu ni ti gue na tere ti mo.” 29  Jésus atene na lo: “Mo ga!” Na Pierre asigigi na yâ ti ngö ni, lo tambela na ndo ti ngu ni ti gue na tere ti Jésus. 30  Me, tongana lo bâ kota pupu ti ngu ni, mbeto agbu lo, na tongana lo to nda ti lï ngu, lo dekongo, lo tene: “Seigneur, mo sö mbi!” 31  Hio, Jésus ayôro maboko ti lo na lo gbu Pierre, lo tene na lo: “Mo zo ti kete mabe, ngbanga ti nyen mo zia si kite ahon ndo ti mo?” 32  Tongana ala montê na yâ ti ngö ni awe, kota pupu ni akaï. 33  Na azo so ayeke na yâ ti ngö ni aba li ti ala na gbe ti lo, ala tene: “Mo yeke tâ Molenge ti Nzapa biani.” 34  Na tongana ala fâ ngu ni awe, ala si na Gennésareth. 35  Tongana azo ti ndo ni ahinga so a yeke lo, ala tokua yanga na ando kue so ayeke na tere ni, na a ga na lo azo kue so tere ti ala ason. 36  Ala gue avoro yanga na lo ti tene ala ndu gi yanga ti bongo ti lo ti ndo ni. Na azo kue so andu ni, tere ti ala aga nzoni.

Kete tënë