Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

Matthieu 13:1-58

13  Na lango ni so, Jésus azia da ni lo hon, lo gue lo duti na tere ti kota ngu.  Azo mingi mingi abungbi na tere ti lo. Tongaso, lo ko na yâ ti ngö na lo duti, me azo ni kue aluti ti ala na yanga ti ngu ni.  Na lo fa aye mingi na ala na lege ti atoli, lo tene: “Bâ, mbeni zo ti lungo ye ague ti lu ye.  Na ngoi so lo yeke lu angongoa ti kobe ni, ambeni atï na tere ti lege na andeke aga adë ni kue.  Ambeni atï na ando so ayeke tênë, so sese ayeke dä mingi pëpe. Na fade fade ala sigigi ngbanga ti so sese ni alï mingi pëpe.  Me tongana lâ asu, a gbi akobe so asigigi na ala hule ngbanga ti so gunda ti ala ayeke dä pëpe.  Ambeni nga atï na popo ti akî, na akî ni akono na apete ndo ti akobe ni.  Me ambeni atï na ndo ti pendere sese, na ala to nda ti lë. Mbeni alë fani ngbangbo oko, mbeni alë fani bale-omene na mbeni alë fani bale-ota.  Zia zo so ayeke na mê amä.” 10  Adisciple aga na ala hunda lo, atene: “Ngbanga ti nyen mo yeke sara tënë na ala na lege ti atoli?” 11  Lo kiri tënë, lo tene: “A mû lege na ALA ti gbu nda ti atënë ti royaume ti yayu so Nzapa ahonde nda ni. Me a mû lege na azo so pëpe ti gbu nda ni. 12  Zo so ayeke na ye, fade a mû na lo mbeni na ndo ni na a sara si ye ti lo awu mingi. Me zo so ayeke na ye pëpe, même ye so lo yeke na ni, fade a yeke zi ni na tïtî lo. 13  A yeke ndani la si mbi yeke sara tënë na ala na lege ti atoli, ngbanga ti so ala yeke bâ ndo, me ala bâ ndo gbä, ala yeke mä ndo, me ala yeke mä ye pëpe nga ala yeke gbu nda ni pëpe. 14  Nga, prophétie ti Ésaïe ayeke ga tâ tënë na ndo ti ala, tongana a tene: ‘Ti mango ni, ALA yeke mä, me fade ALA yeke mä yâ ti tënë ni oko pëpe. Ti bango ni, ALA yeke bâ, me fade ALA yeke gbu nda ti ye oko pëpe. 15  Teti bê ti azo so akpengba, na mê ti ala ayeke mä ndo, me ala ye ti sara ye alingbi na ni pëpe, na ala kanga lê ti ala; si lê ti ala abâ ye oko pëpe, na mê ti ala amä ye oko pëpe, na bê ti ala agbu nda ti ye oko pëpe na ala changé lege ti ala pëpe si mbi sava ala.’ 16  “Me, ngia ayeke na lê ti ALA ngbanga ti so a bâ ndo, na ngia ayeke na mê ti ALA ngbanga ti so a mä ndo. 17  Ti tâ tënë ni, mbi tene na ALA: Aprophète nga na azo ti mbilimbili mingi ayeke lani na nzara ti bâ aye so ALA yeke bâ so, me ala bâ ni lani pëpe. Nga, ala yeke lani na nzara ti mä aye so ALA yeke mä so, me ala mä ni lani pëpe. 18  “ALA mä fadeso toli ti zo ti lungo ye so. 19  Tongana mbeni zo amä tënë ti royaume na lo gbu nda ni pëpe, Zo ti sioni aga na agboto tënë so a lu na yâ ti bê ti lo. So ayeke lê ti kobe so a lu na tere ti lege. 20  Ti lê ti kobe so a lu na ando so ayeke tênë, a yeke zo so amä tënë ni na fade fade lo yeda na ni na ngia. 21  Na teti so gunda ti lo ayeke dä pëpe, lo maï teti mbeni ngoi, na tongana aye ti vundu asi wala a sara ye ti ngangu na lo ndali ti tënë ni, fade fade lo tï. 22  Âdu ti lê ti kobe so a lu na popo ti akî, a yeke zo so amä tënë ni, me gingo bê ndali ti aye ti ngoi so nga ngangu so mosoro ayeke na ni ti handa zo apete ndo ti tënë ni, na lo wara lege ti lë lengo pëpe. 23  Ti lê ti kobe so a lu na ndo ti pendere sese, a yeke zo so amä tënë ni na lo gbu nda ni, na biani lo maï na lo lë alê ni. Mbeni alë fani ngbangbo oko, mbeni alë fani bale-omene, na mbeni alë fani bale-ota.” 24  Lo fa mbeni toli ni nde na gbâ ti azo so ayeke mä lo, lo tene: “Royaume ti yayu ayeke tongana mbeni zo so alu pendere ngongoa ti kobe na yaka ti lo. 25  Na ngoi so azo angbâ ti lango, wato ti lo aga na lo lu asioni pere na popo ti ablé ni, na lo hon. 26  Tongana blé ni asigigi na alë lê ni, asioni pere ni asigigi nga. 27  Na angbâa ti wa ti da ni aga na ala tene na lo: ‘Kota zo, mo lu lani apendere ngongoa ti kobe na yaka ti mo pëpe? Me tongana nyen si asioni pere asigigi dä?’ 28  Lo kiri tënë na ala, lo tene: ‘Mbeni zo, mbeni wato, si aga asara ye so.’ Na ala tene na lo: ‘Mo ye si e gue e gboto asioni pere ni?’ 29  Lo tene: ‘Ên-ën, si na gbotongo asioni pere ni, ALA gboto ablé ni nga pëpe. 30  ALA zia ni use kue amaï juska na kongo lê ti kobe. Na ngoi ni so, fade mbi yeke tene na azo ti kongo lê ti kobe ni: ALA gboto asioni pere ni kozoni, ALA kanga ni ti gbi ni. Na pekoni, ALA gue ALA bungbi ablé ni na ALA zia ni na yâ ti gogoro ti mbi.’ ” 31  Mbeni toli ni nde so lo fa na azo ni ayeke so: “Royaume ti yayu ayeke tongana lê ti keke ti moutarde so mbeni zo amû ni na lo lu na yâ ti yaka ti lo. 32  Lê ti moutarde ni ayeke kete mingi ahon tanga ti angongoa ti kobe kue, me tongana a kono, a ga kota ahon tanga ti akobe ti yaka ni kue, na a ga mbeni keke so andeke ti nduzu aga na awara ndo ti lango na ndo ti amaboko ni.” 33  Lo tene mbeni toli ni nde na gbâ ti azo so ayeke mä lo, lo tene: “Royaume ti yayu ayeke tongana mama ti mapa so mbeni wali amû, lo më ni na kota sembe oko ti farine, juska farine ni kue asuku.” 34  Jésus atene atënë so kue na gbâ ti azo so na lege ti atoli. Biani, atënë kue so lo fa, lo mû gi toli si lo fa na ni na ala, 35  tongaso si tënë so a fa lani na lege ti prophète ni aga tâ tënë, tongana lo tene: “Fade mbi zi yanga ti mbi ti tene tënë na lege ti atoli. Fade mbi sigigi na aye so a honde ni ngbene ye so a leke gere ti dunia.” 36  Tongana lo tene na gbâ ti azo so ti gue awe, lo lï na da. Na adisciple ti lo aga na tere ti lo, ala tene: “Fa na e nda ti toli ti asioni pere so a lu na yaka.” 37  Lo kiri tene na ala, lo tene: “Zo ti lungo pendere ngongoa ti kobe ni ayeke Molenge ti zo. 38  Yaka ni ayeke dunia so. Âdu ti pendere ngongoa ti kobe ni, a yeke amolenge ti royaume. Me asioni pere ni ayeke amolenge ti Zo ti sioni. 39  Wato so alû asioni pere ni ayeke Zabolo. Ngoi ti kongo lê ti kobe ni ayeke ngoi so aye ti mbeni ngoi ayeke gue ti hunzi. Na azo ti kongo lê ti kobe ni ayeke a-ange. 40  Legeoko tongana ti so a gboto asioni pere na a zö ni na wâ, fade a yeke duti nga tongaso na ngoi so aye ti ngoi so ayeke gue ti hunzi. 41  Fade Molenge ti zo ayeke tokua a-ange ti lo, na fade ala yeke zi na yâ ti royaume ti lo aye kue so ayeke sara si zo atï nga na azo so angbâ ti kpe ndia pëpe. 42  Fade a-ange ni ayeke bi ala na yâ ti four ti wâ. Kâ la si fade ala yeke toto na ala yeke te pembe ti ala. 43  Na lâ ni so, fade azo ti mbilimbili ayeke su tongana lâ na yâ ti royaume ti Babâ ti ala. Zia zo so ayeke na mê amä. 44  “Royaume ti yayu ayeke tongana mbeni mosoro so a honde ni na yâ ti yaka. Na mbeni koli awara ni na lo honde ni. Teti so tere ti lo anzere mingi, lo gue lo kä aye ti lo kue na lo vo yaka so. 45  “Nga, royaume ti yayu ayeke tongana mbeni wadengo buze so ayeke tambela na nduzu ti gi apendere perle. 46  Na tongana lo wara mbeni perle oko so ngere ni ayeke ngangu mingi, lo gue, na hio lo kä aye ti lo kue na lo vo perle so. 47  “Nga, royaume ti yayu ayeke tongana mbeni kota gbanda so a bi ni na ngu-ingo na a gbu mara ti asusu nde nde kue. 48  Na tongana kota gbanda ni asi awe, ala gboto ni na yanga ti ngu ni, ala duti na ala ro anzoni susu ni na yâ ti akungba, me ala tuku asioni susu ni na ngonda. 49  A yeke ye so ayeke si ande na ngoi so aye ti ngoi so ayeke gue ti hunzi: Fade a-ange ayeke sigigi ti zi azo ti sioni na popo ti azo ti nzoni. 50  Na fade a-ange ni ayeke bi azo ti sioni so na yâ ti four ti wâ. Kâ la si fade ala yeke toto na ala yeke te pembe ti ala. 51  “ALA gbu nda ti atënë so kue awe?” Ala tene na lo: “En.” 52  Lo tene na ala: “So ALA gbu nda ti tënë so awe so, wafango ye kue so a fa ye na lo na ndo ti royaume ti yayu ayeke tongana mbeni koli, mbeni wa ti da, so asigigi na afini ye nga na angbene ye na yâ ti gogoro ti mosoro ti lo.” 53  Tongana Jésus ahunzi ti fa atoli so awe, lo zia ndo ni lo gue na mbeni ndo nde. 54  Na peko ti so lo kiri na kodoro so lo kono dä, lo to nda ti fa ye na azo na yâ ti synagogue ti ala. Bê ti ala adö si ala tene: “Koli so awara ti lo ndara so nga na ngangu ti sara na akusala ti ngangu so na ndo wa? 55  Molenge ti sarapande so la pëpe? Iri ti mama ti lo ayeke Marie pëpe? Na aita ti lo ti koli ayeke Jacques, Joseph, Simon nga na Judas pëpe? 56  Na aita ti lo ti wali ayeke na popo ti e pëpe? Koli so ahinga ti lo aye so kue na ndo wa?” 57  Na bê ti ala ato nda ti son na tere ti lo. Me Jésus atene na ala: “A yeke ne ka prophète na yâ ti kodoro ti lo pëpe nga na yâ ti da ti lo wani pëpe, me gi na mbeni ndo nde.” 58  Na lo sara akusala ti ngangu mingi kâ pëpe ngbanga ti so mabe amanke ala.

Kete tënë