Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Matthieu 12:1-50

12  Na ngoi ni kâ, Jésus ayeke hon na yâ ti ayaka ti blé na lâ ti sabbat. Nzara asara adisciple ti lo, ala ko alê ti blé na ala yeke te.  Tongana aFarizien abâ ye so, ala tene na lo: “Bâ! Adisciple ti mo ayeke sara ye so ndia amû lege na zo pëpe ti sara ni na lâ ti sabbat.”  Lo tene na ala: “ALA diko pëpe tënë ti ye so David asara lani na ngoi so nzara asara lo na azo ti lo?  Lo lï na yâ ti da ti Nzapa na ala te amapa so a zia na gbele Nzapa. Me ndia amû lani lege na lo wala azo ti lo ti te mapa ni pëpe, a mû lege gi na aprêtre ti te ni.  Wala, ALA diko pëpe na yâ ti Ndia, so na alâ ti sabbat, aprêtre so ayeke na temple abâ lâ ti sabbat ni pëpe tongana mbeni lango so ayeke nzoni-kue? Me atâa so kue, tënë oko ayeke na li ti ala pëpe.  Me, mbi tene na ALA, mbeni zo so ayeke kota ahon temple ayeke na ndo so.  Ye oko, tongana fade ALA gbu nda ti tënë so a tene: ‘Mbi ye sarango nzoni bê na zo, me mbi ye sandaga pëpe,’ ka ALA fâ ngbanga pëpe na ndo ti azo so tënë ayeke na li ti ala pëpe.  Teti Molenge ti zo ayeke Seigneur ti sabbat.”  Lo zia ndo so lo hon, na lo lï na yâ ti synagogue ti ala. 10  Bâ, mbeni koli ayeke dä so maboko ti lo abuba. Ti tene ala wara tënë na li ti Jésus, ala hunda lo, ala tene: “Ndia amû lege na zo ti kaï kobela na lâ ti sabbat?” 11  Lo kiri tënë na ala, lo tene: “Na popo ti ALA so, zo wa la tongana lo yeke na ngasangbaga oko, na ngasangbaga ni atï na dû na lâ ti sabbat, fade lo yeke gue ti mû lo ti sigigi na ni pëpe? 12  ALA bâ, ngere ti zo ahon ti ngasangbaga! Tongaso, ndia amû lege na zo ti sara mbeni ye ti nzoni na lâ ti sabbat.” 13  Na pekoni, lo tene na koli ni: “Yôro yâ ti maboko ti mo.” Na lo yôro ni, na maboko ti lo ni akiri aga nzoni tongana ti mbeni mbage ni. 14  Me aFarizien asigigi na ala mä tere na ndo ti Jésus ti bâ tongana nyen ti fâ lo. 15  Tongana lo mä tënë ti ye so, Jésus azia ndo ni lo hon. Gbâ ti azo amû peko ti lo, na lo sava ala kue. 16  Me, lo gboto mê ti ala ngangu ti tene ala fa lo na azo pëpe, 17  tongaso si tënë so a tene lani na lege ti prophète Ésaïe aga tâ tënë, tongana lo tene: 18  “Bâ, wakua ti mbi so mbi soro lo, lo so mbi ndoye lo mingi, lo so âme ti mbi awara ngia na mbage ti lo! Fade mbi zia yingo ti mbi na ndo ti lo, na fade lo yeke fa polele na azo ti amara ye so a iri ni mbilimbili. 19  Fade lo yeke papa na zo pëpe, lo yeke dekongo pëpe nga zo ayeke mä go ti lo na ndo ti akota lege pëpe. 20  Sosongo so awoko awe, lo yeke dö ni pëpe, na mèche so wâ ni ayeke gue ti mingo, lo yeke mingo ni pëpe juska lo sara si fango ngbanga ti mbilimbili asö benda. 21  Fade beku ti amara aduti na ndo ti iri ti lo.” 22  Na pekoni, ala ga na lo mbeni koli so sioni yingo ayeke na yâ ti lo, lo yeke waziba nga yanga ti lo akanga. Tongana Jésus asava koli so, koli ni asara tënë na lo bâ ndo. 23  Biani, bê ti azo mingi so kue adö na ala tene: “Âmanke Molenge ti David la pëpe?” 24  Tongana aFarizien amä tënë so, ala tene: “Koli so ayeke tomba asioni yingo gi na ngangu ti Béelzéboub, mokonzi ti asioni yingo.” 25  Tongana lo hinga tënë so ayeke na bê ti ala, lo tene na ala: “Royaume kue so yâ ni akangbi ayeke futi, na gbata wala da kue so yâ ni akangbi ayeke ngbâ na nduzu pëpe. 26  Legeoko nga, tongana Satan ayeke tomba Satan, andâ lo yeke kangbi yâ ti lo wani. Tongaso, fade royaume ti lo angbâ na nduzu tongana nyen? 27  Nga, tongana mbi yeke tomba asioni yingo na ngangu ti Béelzéboub, ka amolenge ti ALA ayeke tomba ti ala asioni yingo ni na ngangu ti zo wa? Ndani la, amolenge ti ALA si ayeke duti awafango ngbanga na ndo ti ALA. 28  Me tongana a yeke na lege ti yingo ti Nzapa si mbi yeke tomba asioni yingo, biani royaume ti Nzapa asi na ALA awe si ALA hinga pëpe so. 29  Mbeni zo alingbi biani ti lï na ngangu na da ti mbeni wangangu na ti gbu akungba ti lo tongana lo kanga wangangu ni kozoni pëpe? A yeke gi tongana lo kanga wangangu ni awe si fade lo yeke gbu akungba ti da ti lo. 30  Zo so ayeke na mbage ti mbi pëpe ake mbi, na zo so abungbi azo legeoko na mbi pëpe akangbi yâ ti azo kirikiri. 31  “Na ndo ti tënë so, mbi tene na ALA: Fade a pardone azo ndali ti siokpari kue wala zongango ndo kue. Me zo so azonga yingo, a yeke pardone lo ande pëpe. 32  Na tapande, zo so asara sioni tënë na tere ti Molenge ti zo, fade a pardone lo. Me zo so asara sioni tënë na tere ti yingo vulu, a yeke pardone lo ande pëpe, atâa na yâ ti aye ti ngoi so wala na yâ ti aye ti ngoi so ayeke ga. 33  “Tongana ALA sara si keke aga nzoni, ALA sara nga si lengo ti keke ni aga nzoni; tongana ALA sara si keke ni abuba, ALA sara nga si lengo ni abuba, ngbanga ti so a hinga keke na lege ti lengo ni. 34  ALA, amolenge ti asioni ngbo, teti so ALA yeke asioni zo, ALA lingbi ti sara anzoni tënë tongana nyen? Teti yanga ayeke sara tënë ti ye so ayeke mingi na bê. 35  Zo ti nzoni asigigi na aye ti nzoni so ayeke na yâ ti nzoni mosoro ti lo, na zo ti sioni asigigi na aye ti sioni so ayeke na yâ ti sioni mosoro ti lo. 36  Mbi tene na ALA, buba tënë kue so azo ayeke tene, ala yeke kiri tënë ndali ni na Lâ ti fango ngbanga, 37  teti so a yeke na lege ti tënë ti yanga ti mo si a yeke diko mo ande tongana zo ti mbilimbili, nga na lege ti tënë ti yanga ti mo si a yeke fâ ande ngbanga na ndo ti mo.” 38  Ti kiri tënë na lo, ambeni scribe na aFarizien atene: “Wafango ye, e ye mo sara mbeni fä si e bâ.” 39  Lo kiri tënë na ala, lo tene: “Azo ti ngoi so ayeke asioni zo na ala yeke be-ta-zo* na Nzapa pëpe. Ala ngbâ ti hunda ti bâ mbeni fä, me a yeke fa na ala mbeni fä oko pëpe, gi fä ti prophète Jonas. 40  Teti legeoko tongana ti so Jonas asara lâ ota na bï ota na yâ ti mbeni kota susu, fade Molenge ti zo ayeke sara nga lâ ota na bï ota kâ na gbe ti sese. 41  Azo ti Ninive ayeke londo ande na lâ ti ngbanga legeoko na azo ti ngoi so, na ala yeke fâ ngbanga na ndo ti azo so, ndali ti so ala changé bê ti ala na peko ti tënë so Jonas afa lani. Me, bâ, mbeni zo ayeke ge so ayeke kota ahon Jonas. 42  Gbia-wali ti mbage ti Mbongo ayeke londo ande na lâ ti ngbanga legeoko na azo ti ngoi so, na lo yeke fâ ngbanga na ndo ti azo so, ndali ti so lo londo na nda ti sese ti ga ti mä ndara ti Salomon. Me, bâ, mbeni zo ayeke ge so ayeke kota ahon Salomon. 43  “Tongana mbeni sioni yingo asigigi na yâ ti mbeni zo, lo yeke hon na ando so ngu ayeke dä pëpe ti gi ndo ti wu tere ti lo dä, me lo wara ndo oko pëpe. 44  Tongaso lo tene: ‘Mbi yeke kiri na da ti mbi so mbi zia ni si mbi hon so.’ Na tongana lo kiri, lo wara yâ ti da ni senge, a balêe yâ ti da ni avuru na a leke yâ ni pendere. 45  Na pekoni, lo kiri lo gue na lo mû ambeni yingo mbasambala so ayeke sioni mingi ahon lo. Ala lï na yâ ti da ni, na ala lango dä. Na nda ni, dutingo ti zo so aga sioni mingi ahon ti kozoni. Ti azo ti sioni ti ngoi so ayeke duti ande nga tongaso.” 46  Tongana lo ngbâ ti sara tënë na gbâ ti azo so, bâ, mama ti lo na aita ti lo ayeke luti na gigi, na ala ye ti sara tënë na lo. 47  Tongaso mbeni zo atene na lo: “Bâ, mama ti mo na aita ti mo ayeke luti na gigi, na ala ye ti sara tënë na mo.” 48  Lo kiri tënë na zo ni so, lo tene: “Mama ti mbi ni ayeke zo wa? Na aita ti mbi ni ayeke azo wa?” 49  Lo yôro maboko ti lo na mbage ti adisciple ti lo, lo tene: “Bâ, mama ti mbi na aita ti mbi ni la! 50  Zo so asara ye so bê ti Babâ ti mbi so ayeke na yayu aye, zo so la ayeke ita ti mbi ti koli, ita ti mbi ti wali nga mama ti mbi.”

Kete tënë

Na Grec: “so agi mbeni koli nde.”