Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Matthieu 11:1-30

11  Tongana Jésus ahunzi ti mû awango so na adisciple ti lo bale-oko na use so awe, lo londo na ndo so ti gue ti fa ye nga ti fa tënë na yâ ti ambeni gbata.  Me Jean so ayeke na da ti kanga amä sango ti akusala so Christ asara. Tongaso, lo tokua adisciple ti lo  ti hunda tënë so na Jésus: “Mo yeke Lo so ayeke ga? Wala a lingbi e ku mbeni zo nde?”  Jésus akiri tënë na ala, lo tene: “ALA gue, ALA fa na Jean peko ti ye so ALA yeke mä so na ye so ALA yeke bâ so:  Awaziba ayeke bâ ndo, azo so gere ti ala abuba ayeke tambela nzoni, a sara si tere ti azo ti buruma aga nzoni, azo so mê ti ala akanga ayeke mä ndo, a yeke zingo akuâ, na a yeke fa nzoni tënë na awayere.  Ngia ayeke na lo so abâ pëpe na mbage ti mbi mbeni ye so asara si lo pika gere ti lo.”  Tongana adisciple ti Jean amû lege ti gue, Jésus ato nda ti sara tënë ti Jean na gbâ ti azo so, lo tene: “ALA gue lani na yando ti bâ nyen? Ti bâ mbeni sosongo so pupu ayengi ni?  ALA gue lani ti bâ nyen mbilimbili? Ti bâ mbeni koli so ayü apendere bongo? Bâ, ala so ayeke yü apendere bongo ayeke na yâ ti ada ti agbia.  Tongaso, ngbanga ti nyen si ALA gue lani? ALA gue ti bâ mbeni prophète? Biani, mbi tene na ALA, a yeke mbeni prophète, na lo hon même mbeni prophète. 10  A yeke lo so a sara tënë ti lo na Mbeti ti Nzapa, a tene: ‘Bâ, mbi yeke tokua watokua ti mbi kozo ti mo, fade lo yeke leke lege ti mo ti tene mo hon dä!’ 11  Ti tâ tënë ni, mbi tene na ALA: Na popo ti azo so awali adü ala, mbeni so abâ gigi na so ayeke kota ahon Jean Baptiste ayeke dä pëpe. Me mbeni zo so ayeke kete na yâ ti royaume ti yayu ayeke kota ahon lo. 12  Ti londo na lâ ti Jean Baptiste ti si juska fadeso, royaume ti yayu ayeke ye so azo ayeke sara ngangu ti wara ni, na ala so angbâ ti sara ngangu ayeke gbu ni. 13  Teti ambeti ti aProphète nga na Ndia ni kue afa tënë ti prophétie juska ti si na Jean. 14  Tongana ALA yeda, bâ tënë ni la: Lo yeke ‘Élie so a tene lo yeke ga.’ 15  Zia zo so ayeke na mê, amä. 16  “Fade mbi haka azo ti ngoi so na azo wa? Ala yeke tongana akete molenge so aduti na agara ti sara ngia na ala yeke dekongo na amba ti ala, 17  ala tene: ‘E huru flûte na ALA, me ALA dodo pëpe. E dema tere ti e na kongo, me ALA pika tere ti ALA pëpe ti fa so ALA sara vundu.’ 18  Legeoko nga, Jean aga, lo te kobe pëpe na lo nyon ye pëpe. Me azo atene: ‘Sioni yingo ayeke na yâ ti lo.’ 19  Molenge ti zo aga, ti lo, lo te ye na lo nyon ye, me azo atene: ‘Bâ, so zo ti tengo ye na zo ti nyongo vin ahon ndo ni. Lo yeke kamarade ti azo ti rongo nginza ti lapo na ti awasiokpari.’ Me, a yeke hinga so ndara ayeke mbilimbili na lege ti akusala ti lo.” 20  Na pekoni, lo to nda ti suku na azo ti agbata so lo sara akusala ti ngangu dä mingi, ngbanga ti so ala changé bê ti ala pëpe, 21  lo tene: “Mawa na mo, Chorazin! Mawa na mo, Bethsaïda! Akusala ti ngangu so a sara na yâ ti ALA, tongana a sara ni lani na yâ ti Tyr na Sidon, ka a ninga awe si azo ti Tyr na Sidon ayü vuko bongo ti fungo na asac na ala duti na yâ ti mburu ti wâ ti fa so ala changé bê ti ala. 22  Ni la, mbi tene na ALA: Na Lâ ti fango ngbanga, ngbanga ti ALA ayeke duti ngangu mingi ahon ti Tyr na Sidon. 23  Ti mo, Capernaüm, peut-être fade a yeke yä mo juska na yayu? Fade mo yeke zu na Hadès! Teti akusala ti ngangu so a sara na yâ ti mo, tongana a sara ni lani na Sodome, ka Sodome angbâ juska laso. 24  Ni la mbi tene na ALA: Na Lâ ti fango ngbanga, ngbanga ti mo ayeke duti ngangu mingi ahon ti kodoro ti Sodome.” 25  Na ngoi ni so, Jésus akiri atene: “Babâ, mbi sepela mo na lê ti azo kue, mo Seigneur ti yayu na ti sese, ngbanga ti so mo honde aye so na awandara nga na azo so ahinga ndo, me mo fa ni na akete molenge. 26  Biani, Babâ, a nzere na lê ti mo ti sara tongaso. 27  Babâ ti mbi azia aye kue na tïtî mbi. Mbeni zo ti hinga Molenge ni tâ nzoni mingi ayeke pëpe, gi Babâ ni. Nga, mbeni zo ti hinga Babâ ni tâ nzoni mingi ayeke pëpe, gi Molenge ni nga na zo kue so Molenge ni aye ti fa Babâ ni na lo. 28  ALA ga na mbi, ALA kue so asara ngangu kua na kungba ane ALA, na fade mbi dë bê ti ALA. 29  ALA yô joug ti mbi na ALA manda ye na tere ti mbi, teti mbi yeke sara ye na ngangu pëpe na mbi yeke na tâ be-ti-molenge, na fade ALA wara dengo bê ngbanga ti âme ti ALA. 30  Teti a yeke ngangu pëpe ti yô joug ti mbi na kungba ti mbi ayapu.”

Kete tënë