Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Matthieu 10:1-42

10  Lo iri adisciple ti lo bale-oko na use na lo mû na ala komandema na ndo ti asioni yingo, si ala lingbi ti tomba ala nga ti sava mara ti akobela na asongo tere nde nde kue.  Iri ti abazengele bale-oko na use ayeke so: Simon, so a iri lo Pierre, na ita ti lo André; Jacques na ita ti lo Jean so ayeke amolenge ti Zébédée;  Philippe na Barthélemy; Thomas na Matthieu, zo ti rongo nginza ti lapo; Jacques, molenge ti Alphée, na Thaddée;  Simon so a iri lo Zo so ayapu na sarango ye, na Judas Iscariote so na pekoni lo kä Jésus.  Jésus atokua ala bale-oko na use so, na lo mû yanga so na ala: “ALA mû lege ti azo ti amara pëpe na ALA lï na yâ ti mbeni gbata ti Samarie pëpe.  Me, ALA ngbâ ti gue na mbage ti angasangbaga ti da ti Israël so agirisa.  Tongana ALA yeke gue, ALA fa tënë, ALA tene: ‘Royaume ti yayu aga nduru awe.’  ALA sava azo ti kobela, ALA zingo akuâ, ALA sara si azo ti buruma aga nzoni, ALA tomba asioni yingo. ALA wara senge senge, ALA mû na azo senge senge.  ALA mû lor wala argent wala ngengere ti zia na bozo ti nginza so ALA yeke kanga na gbe ti yâ ti ALA so pëpe. 10  Nga, ALA mû pëpe bozo ti kobe ndali ti lege. ALA mû pëpe mbeni use bongo ti yü na gbe ti abongo. ALA mû mbeni poro nde na ndo ni pëpe. Nga, ALA mû mbeni keke nde pëpe ti tambelango na ni. Teti zo ti kua alingbi na kobe ti lo. 11  “Na yâ ti mbeni gbata wala kete kodoro so ALA lï dä, ALA gi na yâ ni zo so alingbi, na ALA duti na ndo so juska ALA londo ti hon. 12  Tongana ALA yeke lï na yâ ti da ni, ALA bara azo ti da ni. 13  Tongana azo ti da ni alingbi, zia siriri ti ALA aduti na ndo ti da ni. Me tongana azo ti da ni alingbi pëpe, zia siriri ti ALA akiri na ALA. 14  Na ndo kue so mbeni zo ayamba ALA pëpe wala lo mä tënë ti ALA pëpe, tongana ALA yeke sigigi na yâ ti da ni so wala na yâ ti gbata ni so, ALA pika sese ti gere ti ALA. 15  Ti tâ tënë ni, mbi tene na ALA: Na Lâ ti fango ngbanga, fade ngbanga ti gbata so ayeke duti ngangu mingi ahon ti kodoro ti Sodome na Gomorrhe. 16  “Bâ, mbi yeke tokua ALA tongana angasangbaga so ayeke na popo ti ambo ti ngonda. Ni la, zia ALA sara ye na hange tongana angbo na ALA duti na tënë na li ti ALA pëpe tongana akolokoto. 17  Zia ALA sara hange na azo, ngbanga ti so fade ala yeke gue na ALA na gbele ngbanga na azo ni ayeke pika ALA na zaza na yâ ti asynagogue ti ala. 18  Fade a yeke gue na ALA na gbele agouverneur nga na agbia ngbanga ti mbi, si ALA wara lege ti fa tënë na ala nga na azo ti amara. 19  Me, tongana a gue na ALA, ALA gi bê ti ALA pëpe na ndo ti tënë so ALA lingbi ande ti tene. Nga ALA gi bê ti ALA pëpe na ndo ti lege ti tenengo tënë ni. Teti fade na ngbonga ni so, a yeke fa na ALA ye so ALA lingbi ti tene, 20  ngbanga ti so a yeke ALA pëpe si ayeke sara tënë, me a yeke yingo ti Babâ ti ALA si ayeke sara tënë na lege ti ALA. 21  Nga, fade ita ayeke kä ita ti lo si a fâ lo, na babâ ayeke sara nga tongaso na molenge ti lo. Na amolenge ayeke londo ti ke ababâ na amama ti ala na ti sara si a fâ ala. 22  Fade ALA yeke ga azo so azo kue ake ALA ndali ti iri ti mbi. Me zo so agbu ngangu juska na nda ni, lo si a yeke sö lo ande. 23  Tongana a sara ye ti ngangu na ALA na yâ ti mbeni gbata, ALA kpe ALA gue na mbeni nde. Biani, mbi tene na ALA: ALA yeke hunzi tambela ti ALA na yâ ti agbata ti Israël kue pëpe kozoni si Molenge ti zo aga. 24  “Disciple ahon wafango ye na lo pëpe, wala ngbâa ahon wa ti lo pëpe. 25  Tongana disciple aga tongana wafango ye na lo, na ngbâa tongana wa ti lo, so alingbi na ala awe. Asinga so azo airi wa ti da ni Béelzéboub, si fade ala iri azo ti da ti lo ni tongaso pëpe? 26  Tongaso, ALA sara mbeto ti azo so pëpe. Teti mbeni ye so a honde ndo ni na so ayeke ngbâ ande gi na hondengo ni ayeke dä pëpe. Nga tënë so a honde ni ayeke ngbâ gi na hondengo ni pëpe. 27  Ye so mbi tene na ALA na vukongo ndo, ALA tene ni na lumière. Na ye so ALA mä a tene ni na kete go, ALA luti na li ti da ti fa tënë ni. 28  ALA sara pëpe mbeto ti azo so ayeke fâ tere ti zo me ala lingbi ti fâ âme pëpe. Me ALA sara mbeto ti lo so alingbi ti futi âme nga na tere ti zo kue na yâ ti Géhenne. 29  A yeke kä anzërê use na senge lê ti pata oko pëpe? Me mbeni oko ti anzêrë so ayeke tï na sese pëpe sân ti tene Babâ ti ALA ahinga ni. 30  A diko même kuä ti li ti ALA oko oko kue awe. 31  Tongaso, ALA sara mbeto pëpe: ngere ti ALA ahon ngere ti gbâ ti anzêrë. 32  “Zo kue so atene na yanga ti lo na gbele azo so lo yeke beoko na mbi, fade mbi nga mbi yeke tene na yanga ti mbi na gbele Babâ ti mbi so ayeke na yayu so mbi yeke beoko na zo so. 33  Me zo so atene na gbele azo so ni hinga mbi pëpe, fade mbi nga mbi yeke tene na gbele Babâ ti mbi so ayeke na yayu, so mbi hinga lo pëpe. 34  ALA tene na bê ti ALA pëpe so mbi ga ti zia siriri na ndo ti sese. Mbi ga ti zia siriri pëpe, me ti zia épée. 35  Teti mbi ga ti zia kangbi: Fade molenge-koli ake babâ ti lo, molenge-wali ake mama ti lo, na wali so ade maseka ake mama ti koli ti lo. 36  Ti tâ tënë ni, fade awato ti zo ayeke duti azo ti da ti lo wani. 37  Zo so aye babâ wala mama ti lo mingi ahon mbi, lo lingbi na mbi pëpe. Na zo so aye molenge ti lo ti koli wala molenge ti lo ti wali mingi ahon mbi, lo lingbi na mbi pëpe. 38  Zo so ayeda na keke ti pasi ti lo pëpe na lo mû peko ti mbi pëpe, lo lingbi na mbi pëpe. 39  Zo so abata âme ti lo, fade lo yeke girisa ni. Na zo so agirisa âme ti lo ndali ti mbi, fade lo yeke wara ni. 40  “Zo so ayamba ALA, andâ lo yamba mbi nga. Na zo so ayamba mbi, lo yamba nga zo so atokua mbi. 41  Zo so ayamba mbeni prophète ngbanga ti so a yeke prophète, fade lo wara futa so prophète ayeke wara ni. Zo so ayamba zo ti mbilimbili ngbanga ti so a yeke zo ti mbilimbili, fade lo wara futa so zo ti mbilimbili ayeke wara ni. 42  Nga, zo so amû gi kopo oko ti ngu ti dê na oko ti akete zo so ti tene lo nyon ngbanga ti so lo yeke mbeni disciple, mbi tene na ALA biani, fade lo yeke girisa futa ti lo oko pëpe.”

Kete tënë