Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Marc 9:1-50

9  Jésus akiri atene na ala: “Ti tâ tënë ni, mbi tene na ALA: Na popo ti azo so aluti ge so, ambeni ayeke kui ande pëpe juska ala bâ royaume ti Nzapa aga na ngangu ti lo awe si.”  Tongaso lango omene na pekoni, Jésus amû gi Pierre, Jacques na Jean, lo gue na ala na ndo ti mbeni hoto so ayo na nduzu mingi, so zo ayeke dä pëpe. Na tere ti lo agbian na lê ti ala,  abongo ti lo ti ndo ni aza zango, a vuru mingi. Mbeni zo ti sukulango bongo na ndo ti sese so alingbi pëpe ti sukula bongo si avuru tongaso.  Nga, Élie na Moïse asigigi na lê ti ala, ala yeke sara tënë na Jésus.  Tongana Pierre abâ ye so, lo tene na Jésus: “Rabbi, a yeke nzoni e ngbâ gi ge. Zia e leke atente ota, oko ti mo, oko ti Moïse na oko ti Élie.”  Biani, lo hinga ye so a lingbi lo tene pëpe, teti mbeto ahon ndo ti ala mingi.  Mbeni mbinda aga amû ndo ti ala kue, na mbeni go asara tënë na yâ ti mbinda ni, a tene: “So ayeke Molenge ti mbi so mbi ndoye lo mingi. ALA mä lo.”  Me, mo ye ti bâ, ala bâ ndo na tere ti ala, na ala bâ mbeni zo na tere ti ala mbeni pëpe, gi Jésus awe.  Tongana ala londo na ndo ti hoto ni ala yeke zu, Jésus agboto mê ti ala ngangu ti sara tënë ti ye so ala bâ so na zo oko pëpe juska Molenge ti zo azingo na kuâ si. 10  Na ala bata tënë so nzoni, me ala hunda tere na popo ti ala na ndo ti nda ti tënë ti zingongo ti lo na kuâ so. 11  Ala to nda ti hunda lo, ala tene: “Ngbanga ti nyen si ascribe atene so a lingbi Élie aga kozoni si?” 12  Lo tene na ala: “Biani, a lingbi Élie aga kozoni na lo yeke kiri ti leke aye kue na place ni. Me ngbanga ti nyen Mbeti ti Nzapa atene so a lingbi Molenge ti zo abâ pasi mingi nga azo ayeke bâ lo tongana mbumbuse zo? 13  Me mbi tene na ALA so Élie aga ti lo awe, na ala sara na lo aye kue so bê ti ala aye gi tongana ti so a sû tënë ni na ndo ti lo na yâ ti Mbeti ti Nzapa.” 14  Tongana ala ga na mbage ti tanga ti adisciple ni, ala bâ azo mingi mingi so angoro ala na ascribe so ayeke dë gaba na adisciple ni. 15  Me gi so lê ti gbâ ti azo ni kue atï na ndo ti Jésus, bê ti ala apika, na ala kpe loro aga na mbage ti lo na ala to nda ti bara lo. 16  Jésus ahunda ala: “Tënë ti nyen si ALA yeke dë gaba na ndo ni na adisciple ti mbi?” 17  Na mbeni oko na popo ti gbâ ti azo ni atene na lo: “Wafango ye, mbi ga na molenge ti mbi ti koli na mo ngbanga ti so lo yeke na mbeni yingo so asara si lo sara tënë pëpe. 18  Na ndo kue so yingo ni agbu lo, lo yeke bi molenge ni na sese, na mousse ayeke sigigi na yanga ti lo, lo yeke te pembe ti lo nga ngangu ayeke hunzi na lo. Mbi tene na adisciple ti mo ti tomba sioni yingo so, me ala sara gbä.” 19  Jésus akiri tënë na ala, lo tene: “ALA, azo ti ngoi so, so mabe amanke ALA, fade mbi ngbâ na tere ti ALA juska lawa? Fade mbi kanga bê ti mbi na ALA juska lawa? ALA ga na lo na mbi.” 20  Tongaso ala ga na molenge ni na lo. Me gi so sioni yingo so abâ Jésus, lo sara si molenge ni ato nda ti gboto. Na pekoni, molenge ni atï na lo yeke rulê tere ti lo na sese na mousse ayeke sigigi na yanga ti lo. 21  Jésus ahunda babâ ti molenge ni, lo tene: “Ye ni ato nda ti sara molenge ni lawa?” Babâ ni atene: “Ye ni ato nda ti sara lo ngbene ye so lo ngbâ kete. 22  Fani mingi sioni yingo so ayeke bi lo na lê ti wâ nga na yâ ti ngu ti fâ lo. Me tongana mo lingbi ti sara mbeni ye, bâ mawa ti e na mû maboko na e.” 23  Jésus atene na lo: “Tënë ti mo so ‘Tongana mo lingbi,’ biani, ti zo so ayeke na mabe, ye kue alingbi ti si.” 24  Hio, babâ ti molenge ni adekongo, lo tene: “Mbi yeke na mabe! Mû maboko na mbi na ndo so mabe atia mbi dä!” 25  Tongana Jésus abâ so gbâ ti azo ayeke kpe loro ti ga na tere ti ala, lo suku na sioni yingo ni, lo tene: “Mo yingo so mo sara si molenge so aga wabuburu, mbi tene na mo ti sigigi na yâ ti lo na ti kiri na yâ ti lo mbeni pëpe.” 26  Na peko ti so sioni yingo so adekongo na lo sara si molenge ni agboto lege mingi, lo sigigi. Molenge ni aga tongana kuâ, tongaso mingi ti azo ni ayeke tene: “Lo kui awe!” 27  Me Jésus agbu maboko ti molenge ni, lo yô lo na nduzu na molenge ni alondo. 28  Na peko ti so lo lï na yâ ti mbeni da, adisciple ti lo aga na ala hunda lo na ngoi so mbeni zo ayeke dä pëpe, ala tene: “Ngbanga ti nyen si e tomba sioni yingo so gbä?” 29  Lo kiri tënë na ala, lo tene: “A lingbi ti tomba mara ti sioni yingo tongaso na lege ti mbeni ye nde pëpe, gi na lege ti sambela awe.” 30  Ala londo na ndo so ala fâ na yâ ti Galilée, me lo ye pëpe si mbeni zo ahinga tënë ni. 31  Lo yeke fa ye na adisciple ti lo, lo tene: “Fade a yeke mû Molenge ti zo ti zia lo na maboko ti azo, na ala yeke fâ lo ande. Me atâa so ala yeke fâ lo, lango ota na pekoni, lo yeke zingo na kuâ.” 32  Ala gbu nda ti tënë so pëpe, na ala sara mbeto ti hunda lo na ndo ni. 33  Ala si na Capernaüm. Na tongana lo yeke na yâ ti da, lo hunda ala: “Tënë ti nyen la si ALA yeke papa fade na ndo ni na lege so?” 34  Ala duti kpô, ngbanga ti so, na lege fade, ala yeke papa na popo ti ala ti bâ zo wa la ayeke kota ahon atanga ni. 35  Tongaso lo duti, lo iri adisciple bale-oko na use na lo tene na ala: “Tongana mbeni zo aye ti duti zo ti li ni, a lingbi lo duti ndangba ti ALA kue na lo sara kua na ALA kue.” 36  Lo mû mbeni kete molenge, lo zia lo na popo ti ala, lo zia maboko ti lo na ndo ti go ti molenge ni na lo tene na ala: 37  “Zo so ayamba mbeni oko ti akete molenge tongaso ndali ti iri ti mbi, lo yamba mbi nga. Na zo so ayamba mbi, lo yamba gi mbi oko pëpe me lo yamba nga lo so atokua mbi.” 38  Jean atene na lo: “Wafango ye, e bâ mbeni koli so ayeke tomba asioni yingo na iri ti mo, na e tara ti kanga lege na lo ngbanga ti so lo yeke tambela na e pëpe.” 39  Me Jésus atene: “ALA tara ti kanga lege na lo pëpe, teti mbeni zo so ayeke sara kusala ti ngangu na iri ti mbi na so hio na pekoni lo yeke zonga mbi ayeke dä pëpe. 40  Teti zo so ake e pëpe, lo yeke zo ti e. 41  Nga zo so amû na ALA mbeni kopo ti ngu ti tene ALA nyon ngbanga ti so ALA yeke azo ti Christ, ti tâ tënë ni, mbi tene na ALA, fade lo girisa futa ti lo oko pëpe. 42  Me zo so asara si mbeni oko ti akete zo so amä na bê na mbi atï, a yeke nzoni a kanga mbeni kota tênë ti nekango na ye na go ti lo, mara ni so alele ayeke gboto ni si a yeke turnê, na a bi lo tâ na yâ ti ngu-ingo. 43  “Tongana maboko ti mo asara si mo tï, fâ ni. A yeke nzoni mingi teti mo ti tene mbeni mbage ti tere ti mo abuba, me mo wara fini, ahon ti tene a bi mo na amaboko ti mo use kue na yâ ti Géhenne, na lê ti wâ so a lingbi ti mingo ni pëpe. 44*  —— 45  Tongana gere ti mo asara si mo tï, fâ ni. A yeke nzoni mingi teti mo ti tene mbeni gere ti mo abuba, me mo wara fini, ahon ti tene a bi mo na agere ti mo use kue na yâ ti Géhenne. 46*  —— 47  Tongana lê ti mo asara si mo tï, bi ni yongoro. A yeke nzoni mingi teti mo ti lï na yâ ti royaume ti Nzapa na lê ti mo oko, ahon ti tene a bi mo na alê ti mo use kue na yâ ti Géhenne, 48  ndo so angusu ni akui pëpe na a lingbi ti mingo wâ ni pëpe. 49  “A lingbi a tuku wâ na tere ti zo oko oko kue, tongana ti so a yeke tuku ingo na tere ti mbeni ye. 50  Ingo ayeke nzoni; me tongana songo ti ingo asigigi dä awe, fade ALA yeke kiri na songo ni so dä tongana nyen? ALA duti na ingo na yâ ti fini ti ALA na ALA duti lakue na siriri na popo ti ALA.”

Kete tënë

Bâ kete tënë ti Mt 17:21.
Bâ kete tënë ti Mt 17:21.