Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Marc 7:1-37

7  A-Farizien na ambeni scribe so alondo na Jérusalem si aga abungbi na tere ti lo.  Na ala bâ so ambeni disciple ti lo ayeke mû maboko ti ala so ayeke sioni, ala yeke te na kobe, so ti tene ala sukula maboko ti ala ni pëpe.  Ti aFarizien nga na aJuif kue, tongana ala ye ti te kobe, ala yeke sukula maboko ti ala juska na nduzu si. Ala sara tongaso ti bata ngangu ngobo ti azo ti giriri.  Na tongana ala londo na gara ala kiri, kozo si ala te kobe, ala yeke fi ngu na tere ti ala ti zi sioni na tere ti ala. A fa nga na ala gbâ ti ambeni ngobo si ala yeke bata ni ngangu: atënë tongana yorongo na gbe ti ngu akopo, akete ta ti ngu nga na ata so a sara ni na gengere.  A-Farizien na ascribe so ahunda lo: “Ngbanga ti nyen adisciple ti mo ayeke sara ye pëpe alingbi na ngobo ti azo ti giriri, me ala yeke te kobe na maboko ti ala so ayeke sioni?”  Lo tene na ala: “ALA awahandango lê ti zo so, a yeke na lege ni si Ésaïe atene prophétie na ndo ti ALA, tongana ti so Mbeti ti Nzapa atene: ‘Azo so agonda mbi na yanga ti ala, me bê ti ala ague yongoro mingi na mbi.  A yeke senge senge si ala ngbâ ti voro mbi, ngbanga ti so aye so ala yeke fa ayeke gi acommandement so alondo na azo.’  ALA dö lege ti commandement ti Nzapa ALA zia na ALA bata ngangu ngobo ti azo.”  Nga, lo tene na ala: “Na kode, ALA ke acommandement ti Nzapa tongaso si ALA bata ngobo ti ALA. 10  Na tapande, Moïse atene: ‘Mo ne babâ na mama ti mo’, nga, ‘Zia zo so azonga babâ wala mama ti lo awara kuâ.’ 11  Me ti ALA, ALA tene: ‘Tongana mbeni zo atene na babâ wala mama ti lo: “Ye kue so mbi yeke na ni na so mo lingbi fade ti wara nzoni dä ayeke korban (so ti tene, matabisi so a zia ni nde awe ti mû na Nzapa),” ’ . . . 12  ALA zia lege pëpe na zo tongaso ti sara mbeni kete ye teti babâ wala mama ti lo. 13  Na sarango tongaso, ALA sara si tënë ti Nzapa ayeke na ngangu mbeni pëpe ndali ti ngobo so ALA fa ni na azo ti gue na ni. Nga, ALA yeke sara ambeni mara ti aye tongaso mingi.” 14  Na pekoni, lo kiri lo iri gbâ ti azo ni na tere ti lo, na lo tene na ala: “ALA kue, ALA mä mbi na ALA gbu nda ti tënë so: 15  Mbeni ye so alondo na gigi si ague na yâ ti zo na so alingbi ti sara si lo ga sioni ayeke dä pëpe. Me a yeke aye so alondo na yâ ti zo asigigi la asara si lo ga sioni.” 16*  —— 17  Tongana lo zia gbâ ti azo ni si lo lï na yâ ti da, adisciple ti lo ato nda ti hunda lo na ndo ti tapande so. 18  Lo tene na ala: “ALA nga kue ALA hinga ti bâ nda ti tënë pëpe tongana azo so? ALA hinga pëpe so mbeni ye so alondo na gigi si alï na yâ ti zo na so alingbi ti sara si lo ga sioni ayeke dä pëpe? 19  teti so ye ni ayeke lï na yâ ti bê ti zo ni pëpe, me a yeke hon na yâ ti akamba ti yâ ti lo si a sigigi a gue na dû ti kabinë.” Na lege ti tënë so, lo fa so akobe kue ayeke nzoni. 20  Na ndo ni, lo tene: “A yeke ye so alondo na yâ ti zo asigigi si a sara si lo ga sioni, 21  teti a yeke na yâ ti azo, na yâ ti bê ti azo, si asioni tënë ayeke sigigi: tënë ti lango-sioni, tënë ti nzi, tënë ti fango zo, 22  tënë ti gingo wali wala koli nde, tënë ti sarango bê ti ye, asioni kusala, tënë ti handa, sarango sioni ye na kamene pëpe, lê so abâ ye na nzara ni, zonga, baba, sarango ye ti buba. 23  Aye ti sioni so kue alondo na yâ ti bê ti zo na asara si lo ga sioni.” 24  Lo londo na ndo so, lo gue na sese ti Tyr na Sidon. Lo lï na yâ ti mbeni da na lo ye si zo ahinga tënë ni pëpe. Atâa so kue, azo ahinga ni. 25  Na hio, mbeni wali so sioni yingo ayeke na yâ ti kete molenge ti lo ti wali amä tënë ti lo na lo ga lo tï na gere ti Jésus. 26  Wali ni ayeke zo ti Grèce, me lo londo na Phénicie so ayeke na kodoro ti Syrie. Lo yeke hunda Jésus ti tomba sioni yingo so ayeke na yâ ti molenge ti lo ti wali. 27  Me Jésus atene na wali ni: “Zia amolenge ate ye yâ ti ala asi awe si, teti a yeke na lege ni pëpe ti mû mapa so ayeke ti amolenge ti bi ni na amolenge ti mbo.” 28  Me wali ni akiri tënë na Jésus, lo tene: “Tâ tënë, seigneur. Me, amolenge ti mbo so ayeke na gbe ti table ayeke te afuku ti kobe ti akete molenge so.” 29  Na ndo ti tënë so, Jésus atene na wali ni: “Ndali ti tënë so mo tene so, mo gue, sioni yingo so asigigi na yâ ti molenge ti mo ti wali ni awe.” 30  Tongaso wali ni akiri na yanga-da ti lo, na lo wara kete molenge ni so alango na ndo ti gbogbo na sioni yingo ni asigigi na yâ ti lo awe. 31  Tongana lo londo na sese ti Tyr lo yeke kiri, lo fâ yâ ti Sidon ti gue na mbage ti kota ngu ti Galilée na lo hon na yâ ti sese ti Décapole. 32  Na ala ga na lo mbeni koli so mê ti lo akanga na so mbeni ye akanga menga ti lo. Na ala voro yanga na Jésus ti zia maboko ti lo na ndo ti koli so. 33  Lo mû koli ni na popo ti gbâ ti azo so na lo gue na lo yongoro kete. Tongana lo na koli ni gi li ti ala use, lo yôro ali ti maboko ti lo na yâ ti mê ti koli ni. Na pekoni, lo tuku ngu ti yanga ti lo, lo ndu menga ti koli so. 34  Lo bâ ndo na nduzu, lo wu ngangu, lo tene: “Ephphatha,” so aye ti tene, “Mo zi.” 35  Na mê ti koli ni azi na ye so akanga menga ti lo azi nga, si lo to nda ti sara tënë nzoni. 36  Lo gboto mê ti ala ti sara tënë ti ye so na mbeni zo pëpe. Me lakue tongana lo yeke gboto mê ti ala ti sara tënë ni pëpe, ala kiri afa tënë ni mingi ahon ti kozo. 37  Biani, bê ti ala kue adö ngangu mingi na ala tene: “Lo yeke sara aye kue nzoni. Même lo sara si azo so mê ti ala akanga amä ndo nga azo so yanga ti ala akanga asara tënë.”

Kete tënë

Bâ kete tënë ti Mt 17:21.