Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

Marc 5:1-43

5  Ala si na mbage ti kota ngu ni, na kodoro ti azo ti Gérasa.  Gi so Jésus alondo na yâ ti ngö ni lo zu na sese, mbeni koli so sioni yingo ayeke na yâ ti lo alondo na popo ti asende ti akuâ aga atingbi na lo.  Lo yeke lango gi na popo ti asende ti akuâ ni. Juska na ngoi ni so, zo oko awara lege pëpe ti gbu lo ti kanga lo ngangu même na zingiri,  ngbanga ti so fani mingi a kanga maboko ti lo na gere ti lo na azingiri, me lo yeke fâ gi yâ ni fango. Mbeni zo so ayeke na ngangu ti gbu lo si lo duti kpô ayeke dä pëpe.  Bï na lâ, lo yeke dekongo lakue na popo ti asende ti akuâ nga na li ti ahoto, na lo yeke suru tere ti lo na atênë.  Me gi so lê ti lo atï na ndo ti Jésus so angbâ ayo, lo kpe loro, lo ba li ti lo na gbe ti Jésus.  Na peko ti so lo dekongo na kota go awe, lo tene: “Jésus, Molenge ti Nzapa so ayeke na nduzu na ndo ti aye kue, ti mo na mbi nyen? Mbi hunda na mo ti deba yanga ti mo na iri ti Nzapa ti sara pasi na mbi pëpe.”  Lo sara tënë so ngbanga ti so Jésus ayeke tene fade na sioni yingo ni: “Mo sioni yingo, mo sigigi na yâ ti koli so!”  Me Jésus ato nda ti hunda lo: “Iri ti mo ayeke nyen?” Lo kiri tënë na Jésus: “Iri ti mbi ayeke Légion, ngbanga ti so e yeke gbani gbani.” 10  Na lo voro yanga na Jésus fani mingi ti tomba asioni yingo ni na yâ ti kodoro ni pëpe. 11  Gbâ ti agaduru ayeke kâ na tere ti hoto, ala yeke te ye. 12  Tongaso, ala voro yanga na lo, ala tene: “Tokua e na yâ ti agaduru so, si e lï na yâ ti ala.” 13  Lo zia lege na ala ti gue. Tongaso, asioni yingo so asigigi, ala gue alï na yâ ti agaduru ni, na agaduru ni, so wungo ti ala ayeke saki use tongaso, alondo na loro na li ti hoto ni atï na yâ ti kota ngu ni, na ala oko na oko anyon ngu akui. 14  Me azo ti batango agaduru ni akpe ague asara tënë ni na yâ ti gbata ni nga na akete kodoro so ayeke na tere ni. Na azo aga ti bâ ye so asi. 15  Tongaso, ala ga na tere ti Jésus na ala bâ koli so asioni yingo ayeke fade na yâ ti lo, lo duti, lo yü bongo nga li ti lo aga nzoni awe, lo so ayeke fade na bungbi ti asioni yingo na yâ ti lo, na mbeto agbu azo ni. 16  Nga, azo so abâ fade ye ni afa na azo so aga peko ti ye so asi na koli so asioni yingo ayeke fade na yâ ti lo nga na agaduru ni. 17  Tongaso, ala to nda ti voro yanga na lo ti zia sese ti ala ti hon. 18  Tongana Jésus ayeke ko na yâ ti ngö, koli so ayeke fade na asioni yingo na yâ ti lo ato nda ti voro yanga na lo ti tene lo na Jésus ague na lo ngbâ na tere ti lo. 19  Jésus ayeda pëpe, me lo tene na koli ni: “Kiri na afami ti mo, na mo fa na ala peko ti ye so kue Jéhovah asara ndali ti mo nga tongana nyen lo sara nzoni bê na mo.” 20  Koli so ahon, na lo to nda ti fa na yâ ti kodoro ti Décapole tënë na ndo ti aye kue so Jésus asara ndali ti lo, na li ti azo ni kue akpe. 21  Na peko ti so Jésus amû ngö si lo kiri lo fâ kota ngu ni na mbage ni ge, azo mingi mingi abungbi na tere ti lo. Lo yeke na yanga ti kota ngu ni. 22  Mbeni mokonzi ti synagogue so iri ti lo ayeke Jaïrus aga, na tongana lê ti lo atï na ndo ti Jésus, lo gue lo tï na gbele lo, 23  lo voro yanga fani mingi na Jésus, lo tene: “Tere ti kete molenge ti mbi ti wali ason ngangu mingi. Pardon, ga mo zia maboko ti mo na ndo ti lo ti tene tere ti lo aga nzoni si lo ngbâ na fini.” 24  Na ndo ti tënë so, Jésus ague legeoko na lo. Nga, azo mingi mingi ayeke mû peko ti lo na ala yeke pete lo. 25  Mbeni wali ayeke dä. Lo yeke na kobela so asara si mênë ayeke ga na tere ti lo mingi, a sara ngu bale-oko na use awe. 26  Lo bâ pasi mingi na maboko ti gbâ ti awanganga, nga lo buba nginza ti lo kue, me kobela ti lo ni akaï pëpe, a ngbâ gi ti gue na li ni. 27  Tongana lo mä sango ti Jésus, lo lï na popo ti gbâ ti azo ni, lo ga na mbage ti peko ti Jésus na lo ndu bongo ti lo ti ndo ni, 28  teti wali ni ayeke tene: “Tongana mbi ndu gi yanga ti abongo ti lo ti ndo ni, mbi yeke sava ande.” 29  Gi na lê ni lê ni, mênë so ayeke ga mingi na tere ti lo so akaï. Na lo wani lo hinga so ngangu kobela so ayeke na tere ti lo akaï awe. 30  Gi na ndembe ni so nga, Jésus ahinga so mbeni ngangu asigigi na tere ti lo. Tongaso, lo bâ ndo na tere ti lo na popo ti gbâ ti azo ni na lo tene: “Zo wa la andu abongo ti mbi ti ndo ni so?” 31  Me adisciple ti lo ato nda ti tene na lo: “Mo bâ gbâ ti azo ayeke pete mo mbage na mbage, na mo hunda ndo mo tene: ‘Zo wa la andu mbi?’ ” 32  Me lo yeke gi ndo na tere ti lo ti bâ wali so andu lo so. 33  Mbeto agbu wali ni na tere ti lo ayeke dö. Na ngbanga ti so lo hinga ye so asi na lo, wali ni aga, lo tï na gbe ti Jésus na lo tene na lo tâ tënë kue. 34  Jésus atene na lo: “Molenge ti mbi, mabe ti mo asava mo awe. Mo gue na siriri, na zia mo duti na nzoni seni na peko ti ngangu kobela ti mo so.” 35  Tongana lo ngbâ ti sara tënë, bâ, ambeni koli ti da ti mokonzi ti synagogue aga na ala tene: “Molenge ti mo ti wali akui awe. Ndani nyen si mo ngbâ ti son li ti wafango ye?” 36  Me tongana tënë ni atï na mê ti Jésus, lo tene na mokonzi ti synagogue ni: “Sara mbeto pëpe. Duti gi na mabe awe.” 37  Na lo zia lege na azo ti mû peko ti lo pëpe, gi Pierre, Jacques na ita ti lo Jean. 38  Tongana ala si na da ti mokonzi ti synagogue, lo bâ kota wuluwulu, azo so ayeke toto na ayeke dema tere mingi na kongo. 39  Na peko ti so lo lï na da ni awe, lo tene na azo ni: “Ngbanga ti nyen ALA yeke sara kota wuluwulu na ALA yeke toto tongaso? Molenge ni akui pëpe, me lo yeke lango.” 40  Na ndo ti tënë so, ala to nda ti he lo na ti zere lo. Me tongana a tomba azo ni kue na gigi awe, Jésus amû babâ na mama ti molenge ni nga na ala so ayeke na tere ti lo, na lo lï na ndo so molenge ni ayeke dä. 41  Lo gbu maboko ti molenge ni, lo tene na lo: “Talitha kumi,” so nda ni aye ti tene “Maseka-wali, mbi tene na mo: Londo!” 42  Gi na lê ni lê ni, maseka-wali ni alondo na lo to nda ti tambela. Lo yeke na ngu bale-oko na use. Gi na ndembe ni so, li ti ala akpe kue si tere ti ala anzere ngangu mingi. 43  Me lo mû yanga na ala lege mingi ti sara tënë ni na zo oko pëpe, nga lo tene na ala ti mû mbeni ye ti tengo na molenge ni.

Kete tënë