Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Marc 4:1-41

4  Lo kiri lo to nda ti fa ye na tere ti kota ngu ni. Na azo mingi mingi abungbi na tere ti lo. Tongaso, lo ko na yâ ti ngö, lo duti na yâ ni na lê ti ngu ni. Me azo ni kue angbâ ti ala na sese na yanga ti kota ngu ni.  Na lo to nda ti fa aye mingi na ala na lege ti atoli. Na yâ ti fango ye ti lo, lo tene:  “ALA mä tënë so si: Mbeni zo ti lungo ye ague ti lu ye.  Na ngoi so lo yeke lu ye ni, mbeni ngongoa ni atï na tere ti lege na andeke aga adë ni kue.  Mbeni atï na ndo so ayeke tênë, so sese ayeke dä mingi pëpe, na a sigigi hio ngbanga ti so sese ni alï mingi pëpe.  Me tongana lâ asu, lâ ni agbi ni si a hule ngbanga ti so gunda ni ayeke dä pëpe.  Mbeni atï na popo ti akî, na akî ni akono na apete ndo ni si a lë pëpe.  Me ambeni atï na ndo ti pendere sese, ala sigigi na ala kono, na ala to nda ti lë. Ala lë fani bale-ota, fani bale-omene nga fani ngbangbo oko.”  Lo zia tënë so na ndo ni: “Zia zo so ayeke na mê ti mä amä.” 10  Tongana lo yeke duti gi lo oko, ala so ayeke na tere ti lo nga na adisciple bale-oko na use ato nda ti hunda lo na ndo ti atoli so. 11  Lo kiri tënë na ala, lo tene: “A mû lege na ALA ti gbu nda ti tënë ti royaume ti Nzapa so Nzapa ahonde nda ni. Me ti tanga ti azo ni, ala yeke mä gi atoli ni awe, 12  tongaso si, atâa so ala yeke bâ ndo, ala lingbi ti bâ ye pëpe. Atâa so ala yeke mä ndo, ala lingbi ti gbu nda ni pëpe, na ala changé lege ti ala pëpe si mbi pardone ala.” 13  Lo tene nga na ala: ALA gbu nda ti toli so pëpe? Ka ALA yeke gbu ande nda ti ambeni toli ni so kue tongana nyen? 14  “Zo ti lungo ye alu tënë ni. 15  Ambeni zo ayeke tongana alê ni so ayeke na tere ti lege, ndo so a lu tënë ni dä. Gi hio na peko ti so ala mä tënë ni, Satan aga azi tënë ni so a lu na bê ti ala. 16  Legeoko nga, ambeni zo ni ayeke tongana alê ni so a lu na ando so ayeke tênë. Gi hio na peko ti so ala mä tënë ni, ala yeda na ni na ngia. 17  Me gunda ti ala ayeke dä pëpe, na ala maï teti mbeni ngoi. Gi so aye ti vundu asi wala a sara ngangu na ala ndali ti tënë ni, ala tï. 18  Ambeni zo nga ayeke tongana alê ni so a lu ni na popo ti akî. A yeke azo so amä tënë ni, 19  me agingo bê ndali ti aye ti ngoi so, ngangu so mosoro ayeke na ni ti handa zo nga nzara ti tanga ti aye alï na bê ti ala na apete ndo ti tënë ni, na a wara lege ti lë lengo pëpe. 20  Na nda ni, ambeni zo ayeke tongana alê ni so a lu na ndo ti pendere sese. Na peko ti so ala mä tënë ni, ala yeda na ni nzoni na ala lë fani bale-ota, fani bale-omene nga fani ngbangbo oko.” 21  Nga, lo tene na ala: “Zo ayeke ga na lampe ti zia na gbe ti sakpa wala na gbe ti gbogbo pëpe. Me lo yeke ga na ni ti zia na ndo ti ye ti yongo lampe, ni la pëpe? 22  Teti ye kue so a honde ni fadeso, a honde ni gi ti tene a sigigi mbeni lâ. Na ye kue so a honde ndo ni ngangu, a honde ndo ni gi ti tene azo ahinga tënë ni ande. 23  Zo so ayeke na mê ti mä, zia lo mä.” 24  Lo kiri lo tene na ala: “ALA sara hange na ye so ALA yeke mä. A yeke ye so ALA yeke mû ti haka na ye na azo si fade a yeke mû ti haka na ye na ALA. Biani, a yeke zia mbeni na ndo ni na ALA. 25  Teti zo so ayeke na ye, fade a mû na lo mbeni na ndo ni. Me zo so ayeke na ye pëpe, même ye so lo yeke na ni, fade a yeke zi ni na tïtî lo.” 26  Na lo kiri lo tene: “Legeoko nga, royaume ti Nzapa ayeke tongana mbeni koli so abi ngongoa ti kobe na sese. 27  Lo lango na bï na lo zingo na ndapre, ngongoa ti kobe ni asigigi na akono, me lo hinga ye oko dä pëpe. 28  Sese ni wani asara si kobe ni asigigi yeke yeke. Kozoni, a sigigi tongana kete pere, na pekoni keke ni asigigi nga na nda ni tâ lê ti kobe ni asigigi na ndo ti keke ni. 29  Me gi so lê ni akpengba awe, lo to nda ti fâ ni na zembe ngbanga ti so ngoi ti kongo ni alingbi awe.” 30  Na lo tene: “E yeke haka royaume ti Nzapa na nyen? Wala e yeke mû toli wa ti fa na ni? 31  E yeke haka ni na lê ti keke ti moutarde. Na ngoi so a lu ni na sese, a yeke kete mingi ahon tanga ti angongoa ti kobe kue na ndo ti sese. 32  Me na peko ti so a lu ni awe, a sigigi na a kono ahon tanga ti akobe kue ti yaka, na amaboko ni akono mingi. Na tongaso andeke ti nduzu awara ndo ti duti ti ala na gbe ti dê ni.” 33  Jésus atene tënë ni na ala na lege ti mara ti gbâ ti atoli tongaso. Lo tene na ala gi ye so ala lingbi ti mä yâ ni. 34  Biani, atënë kue so lo fa, lo mû gi toli si lo fa na ni na ala, me tongana gi lo na adisciple ti lo, lo yeke fa nda ti aye ni kue na ala. 35  Na lango ni so, tongana lakui alingbi awe, Jésus atene na ala: “Zia e fâ ngu ni e gue na mbage ni kâ.” 36  Tongana ala tene na gbâ ti azo ni ti gue awe, ala mû lo na yâ ti ngö ni so lo yeke dä, na ambeni ngö nga ahon legeoko na lo. 37  Na mbeni kota pupu aya ngangu na amapo ti ngu ni ayeke tuku na yâ ti ngö ni, tongaso ngu aga nduru ti si yâ ti ngö ni. 38  Me lo yeke lango na mbage ti ngbonda ti ngö ni, lo zia li ti lo na ndo ti mbeni kohli. Tongaso ala zingo lo na ala tene na lo: “Wafango ye, so e yeke kui so, a sara ye na mo pëpe?” 39  Na ndo ti tënë so, lo londo, lo suku na pupu ni na lo tene na kota ngu ni: “Kaï! Duti kpô!” Na pupu ni akaï na ndo adë ngii. 40  Tongaso lo tene na ala: “Ngbanga ti nyen mbeto ahon ndo ti ALA? ALA de ti duti na mabe pëpe?” 41  Me tâ mbeni kota mbeto agbu ala, na ala yeke tene na popo ti ala: “So zo wa la tongaso, so même pupu na kota ngu kue amä yanga ti lo so?”

Kete tënë