Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Marc 2:1-28

2  Ambeni lango na pekoni, Jésus akiri ague na Capernaüm, na azo amä so lo yeke na yanga-da.  Tongaso azo abungbi gbani si ndo ti duti ayeke dä mbeni pëpe, même juska na yanga ti da ni. Na lo to nda ti tene tënë ti Nzapa na ala.  Na azo aga na lo mbeni koli so mbage ti tere ti lo akui na so azo osio si ayô lo.  Me teti so ala wara lege pëpe ti gue na koli ni tâ na tere ti Jésus ngbanga ti gbâ ti azo ni, ala koro dû na li ti da ni tâ gi na ndo so Jésus ayeke dä. Na pekoni, ala sara si gbogbo ni nga na zo ti kobela so alango na ndo ni azu na yâ ti da ni.  Tongana Jésus abâ mabe ti ala, lo tene na koli so mbage ti tere ti lo akui so: “Molenge ti mbi, a pardone asiokpari ti mo awe.”  Me ambeni scribe ayeke dä, ala yeke duti na ala yeke tene atënë so na bê ti ala:  “Ngbanga ti nyen koli so ayeke sara tënë tongaso? Lo yeke zonga Nzapa la. Zo wa la alingbi ti pardone asiokpari, zo wa? Gi Nzapa oko awe.”  Me na yâ ti li ti lo, Jésus ahinga hio tënë so ala yeke tene na yâ ti bê ti ala. Tongaso, lo tene na ala: “Ngbanga ti nyen ALA yeke tene atënë tongaso na yâ ti bê ti ALA?  Ti tene na koli so mbage ti tere ti lo akui so: ‘A pardone asiokpari ti mo awe,’ wala ti tene na lo: ‘Londo, mo mû gbogbo ti mo, mo tambela,’ so wa si ayeke ngangu pëpe? 10  Me ti tene ALA hinga so a mû komandema na Molenge ti zo na ndo ti sese ti pardone asiokpari,” . . . lo tene na zo so mbage ti tere ti lo akui so: 11  “Mbi tene na mo: ‘Londo, mo mû gbogbo ti mo, mo gue na da ti mo.’ ” 12  Na ndo ti tënë so, koli ni alondo, na hio lo mû gbogbo ti lo na lo tambela na lê ti azo kue. Li ti ala kue akpe na ala mû gloire na Nzapa, ala tene: “E de ti bâ mara ti ye tongaso lâ oko pëpe.” 13  Jésus akiri ague na yanga ti kota ngu ni, na gbâ ti azo ni kue angbâ gi ti mû peko ti lo, na lo to nda ti fa ye na ala. 14  Me tongana lo yeke hon, lê ti lo atï na ndo ti Lévi, molenge ti Alphée, so ayeke duti na da ti rongo nginza ti lapo. Lo tene na lo: “Mû peko ti mbi.” Na lo londo, lo mû peko ti Jésus. 15  Na pekoni, a bâ Jésus na da ti Lévi, lo yeke duti na tere ti table si lo yeke te kobe. Gbâ ti azo ti rongo nginza ti lapo nga na awasiokpari ayeke nga na tere ti table ni, na ala yeke duti na tere ti Jésus na adisciple ti lo si ala yeke te kobe. Ala yeke gbani gbani na ala yeda ti mû peko ti lo. 16  Me, tongana ascribe so ayeke aFarizien abâ so lo yeke te kobe legeoko na awasiokpari nga na azo ti rongo nginza ti lapo, ala to nda ti sara tënë na adisciple ti lo, ala tene: “Lo yeke te kobe legeoko na azo ti rongo nginza ti lapo nga na awasiokpari biani?” 17  Tongana Jésus amä tënë so, lo tene na ala: “Azo so angbâ ngangu ayeke na bezoin ti wanganga pëpe, me gi azo ti kobela. Mbi ga ti iri azo ti mbilimbili pëpe, me awasiokpari.” 18  Adisciple ti Jean nga na aFarizien ayeke mû ka jeûne lakue. Tongaso ala ga si ala hunda lo: “A sara tongana nyen si adisciple ti Jean na ti aFarizien ayeke mû jeûne, me adisciple ti mo ayeke mû jeûne pëpe?” 19  Na Jésus atene na ala: “Tongana koli so ayeke mû wali fini fini angbâ na tere ti akamarade ti lo, ala lingbi ti mû jeûne? Ala lingbi pëpe ti mû jeûne na ngoi kue so lo ngbâ na tere ti ala. 20  Me ambeni lango ayeke ga ande so fade a yeke zi lo na tere ti ala, na a yeke na ngoi ni so la si fade ala yeke mû jeûne. 21  Mbeni zo ayeke mû fini yanga ti bongo ti fü na lê ti kä ti ngbene bongo pëpe. Tongana lo sara ni, ngangu ti fini yanga ti bongo ni ayeke gboto ngbene bongo ni, na lê ti kä ti bongo ni akiri akono. 22  Nga, mbeni zo ayeke tuku fini vin na yâ ti angbene bozo ti vin pëpe. Me tongana lo tuku ni dä, abozo ni ayeke sungba, na vin ni ayeke yuru kirikiri na abozo ni ayeke buba. Ye oko, azo ayeke tuku fini vin na yâ ti afini bozo ti vin.” 23  Mbeni lâ, Jésus ayeke hon na yâ ti ayaka ti blé na lâ ti sabbat. Na adisciple ti lo ato nda ti ko alê ti blé. 24  Me aFarizien atene na lo: “Bâ ye! Ngbanga ti nyen adisciple ti mo ayeke sara ye so ndia amû lege na zo pëpe ti sara ni na lâ ti sabbat?” 25  Lo tene na ala: “ALA diko lâ oko pëpe tënë ti ye so David asara lani? na ngoi so lo yeke na ye pëpe na nzara asara lo, lo na azo ti lo. 26  Na yâ ti mbaï so asara tënë ti prêtre-mokonzi Abiathar, a tene so David alï na yâ ti da ti Nzapa na lo te amapa so a zia na gbele Nzapa, na lo mû mbeni nga na azo so ayeke na tere ti lo. Amapa so ndia amû lege na mbeni zo nde pëpe ti te ni, me a mû lege gi na aprêtre ti te.” 27  Tongaso, lo tene na ala: “Lâ ti sabbat abâ gigi ngbanga ti zo, me a yeke zo si abâ gigi ngbanga ti lâ ti sabbat pëpe. 28  Ndani la si Molenge ti zo ayeke Seigneur même ti sabbat.”

Kete tënë