Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Marc 15:1-47

15  Hio na kota ndapre, aprêtre-mokonzi, a-ancien nga na ascribe, so ti tene amembre ti Sanhédrin ni kue, abungbi ti mä tere. Na pekoni, ala kanga Jésus, ala gue na lo na ala mû lo na Pilate.  Tongaso Pilate ahunda lo atene: “Mo yeke gbia ti aJuif?” Lo kiri tënë na lo, lo tene: “Mo wani mo tene awe.”  Me aprêtre-mokonzi ni ato nda ti bi atënë mingi na li ti lo.  Pilate akiri ahunda lo: “Mo yeke na tënë ti kiri na ni pëpe? Bâ gbâ ti atënë so ala yeke bi na li ti mo so.”  Me Jésus akiri mbeni tënë oko pëpe, tongaso li ti Pilate akpe.  Lakue na ngoi ti matanga so, Pilate ayeke zi ka na ala mbeni zo ti kanga oko, lo so ala hunda ti tene a zi lo.  Na ngoi ni so, mbeni zo so a iri lo Barabbas ayeke dä, lo yeke sara kanga legeoko na azo so ake yanga ti ngorogbia, na so na yâ ti kengo yanga ti ngorogbia ni ala fâ zo.  Tongaso gbâ ti azo ni aga na ala hunda Pilate mingi ti sara tongana ti so lo yeke sara ka na ala.  Lo kiri tënë na ala, lo tene: “ALA ye mbi zi na ALA gbia ti aJuif ni?” 10  Biani, Pilate ahinga so a yeke kota bê si apusu aprêtre-mokonzi ti ga na Jésus na lo. 11  Me aprêtre-mokonzi ni apusu gbâ ti azo ni ti hunda ti tene lo zi na ala gi Barabbas. 12  Pilate akiri atene na ala: “Ka mbi sara ande nyen na lo so ALA iri lo gbia ti aJuif?” 13  Ala kiri adekongo, ala atene: “Kanga lo na ndo ti keke!” 14  Me Pilate atene na ala: “Me, ye ti sioni wa si lo sara?” Azo ni kue angbâ gi ti dekongo ngangu: “Kanga lo na ndo ti keke!” 15  Teti Pilate aye ti sara ye so bê ti gbâ ti azo so aye, lo zi na ala Barabbas. Lo mû yanga si a pika Jésus na zaza, na pekoni lo mû lo ti tene a kanga lo na ndo ti keke. 16  Na pekoni, aturugu alï na lo na yâ ti gbagba, so ti tene na yangbo ti gouverneur ni. Na ala iri aturugu ni kue ti bungbi. 17  Ala yü na lo mbeni bongo ti bengba so avuko kete, na ala leke mbeni couronne ti kî, ala zia ni na li ti lo. 18  Ala to nda ti bara lo, ala tene: “Bara mo, Gbia ti aJuif!” 19  Nga, ala yeke pika li ti lo na mbeni keke ti sosongo, ala tuku ngu ti yanga na tere ti lo, ala kuku na likuni ti ala si ala yeke ba li ti ala na gbe ti lo. 20  Na nda ni, tongana ala he lo a lingbi ala awe, ala zi bongo ni so ayeke bengba na avuko kete so, na ala yü na lo abongo ti lo ti ndo ni. Na ala sigigi na lo ti gue ti kanga lo na ndo ti keke. 21  Nga, ala gbu na ngangu mbeni koli so alondo na mbeni ndo si lo yeke kiri na yâ ti kodoro ni na lege ni so ti yô keke ti pasi ti Jésus. Iri ti lo ayeke Simon, lo yeke zo ti kodoro ti Cyrène, nga babâ ti Alexandre na Rufus. 22  Ala gue na lo na Golgotha, so nda ni aye ti tene Ndo-ti-bio-ti-li. 23  Na ndo so, ala tara ti mû na lo vin so ala zia myrrhe dä ti tene a sara zo tongana mbangi. Me lo ke ti nyon ni. 24  Ala kanga lo na ndo ti keke, ala kangbi yâ ti abongo ti lo ti ndo ni na popo ti ala na lege so ala bi mbeni ye tongana dé ti bâ zo wa si ayeke mû nyen. 25  A yeke nduru na ngbonga ota si ala kanga lo na ndo ti keke. 26  Na a sû mbeni mbeti a zia na li ti lo na nduzu ti fa tënë so a bi na li ti lo. Mbeti ni atene: “Gbia ti aJuif.” 27  A kanga nga na ndo ti keke na tere ti lo azo use so ayeke azo ti gbungo aye ti azo na ngangu, oko na mbage ti maboko ti lo ti koli na oko na mbage ti maboko ti lo ti wali. 28*  —— 29  Azo so ayeke hon na lege ato nda ti sara sioni tënë na lo, na ala yeke yengi li ti ala, ala yeke tene: “He, mo so mo tene mo yeke kungbi temple na mo yeke leke ni na lango ota, 30  mo sö fini ti mo wani na londongo na ndo ti keke ti pasi so ti zu na sese ma!” 31  Legeoko nga, aprêtre-mokonzi na ascribe ayeke he lo na popo ti ala, ala tene: “Lo sö lani fini ti ambeni zo, me lo lingbi ti sö fini ti lo wani pëpe! 32  Zia lo Christ ni, Gbia ti Israël, alondo fadeso na ndo ti keke ti pasi so lo zu na sese ma, tongaso si e bâ na lê ti e na e mä na bê na lo!” Même ala so a kanga ala na ndo ti keke na tere ti lo ayeke zonga lo. 33  Ti si na nduru na ngbonga omene, bingo atï na ndo ti kodoro ni kue juska nduru na ngbonga gumbaya. 34  A si nduru na ngbonga gumbaya, Jésus adekongo, lo tene: “Eli, Eli, lama sabachthani?”, so nda ni aye ti tene: “Nzapa ti mbi, Nzapa ti mbi, mo zia mbi ngbanga ti nyen?” 35  Na ambeni na popo ti ala so ayeke luti nduru na ndo ni so, tongana ala mä tënë so, ala to nda ti tene: “Bâ, lo yeke iri Élie.” 36  Me mbeni zo akpe loro, lo ndûru ndokoro na yâ ti kpingo vin, lo zia ni na li ti mbeni keke ti sosongo, na lo mû ni na lo ti tene lo nyon, lo tene: “ALA zia lo! Zia e bâ wala Élie ayeke ga ti mû lo ti zia lo na sese.” 37  Me Jésus adekongo na kota go, na lo kui; 38  na yâ ti rido ti temple ni asuru use, a londo na nduzu juska na gbe ni. 39  Tongana turugu ti kota kamba so ayeke na tere ti lo abâ lege so Jésus akui na ni, lo tene: “Ti tâ tënë ni, koli so ayeke fade Molenge ti Nzapa.” 40  Ambeni wali nga ayeke dä so angbâ yongoro si abâ ye ni. Na popo ti ala, a yeke wara Marie ti Magdala nga na Marie mama ti Jacques Kete na ti Joses. A yeke wara nga Salomé. 41  A yeke awali so atambela lani na peko ti lo ti sara kua na lo ngbene ye so lo yeke na Galilée. Ambeni wali mingi ayeke nga dä so aga legeoko na lo na Jérusalem. 42  Teti so lakui apusu nduru awe, na a yeke lango ti Lekengo aye, so ti tene lango so aga kozoni na lâ ti sabbat, 43  Joseph ti kodoro ti Arimathée aga. Lo yeke mbeni zo ti Kota Bungbi so iri ti lo awu mingi. Lo nga kue lo yeke ku royaume ti Nzapa. Na mbeto pëpe lo gue na gbele Pilate na lo hunda ti mû kuâ ti Jésus. 44  Me Pilate agi ti hinga wala Jésus akui awe. Tongaso, lo iri turugu ti kota kamba ni, lo hunda lo ti hinga wala Jésus akui awe. 45  Na peko ti so turugu ni ayeda awe, Pilate amû kuâ ni na Joseph. 46  Na Joseph avo mbeni pendere bongo ti lin, lo zi Jésus lo zia na sese, na lo kanga lo na pendere bongo ti lin so, na lo zia lo na yâ ti mbeni dû ti kuâ so a zi ni na yâ ti mbeni kota tênë. Na lo pusu mbeni kota tênë lo kanga na yanga ti sende ti kuâ ni. 47  Me Marie ti Magdala nga na Marie mama ti Joses angbâ ti bâ ndo so a zia lo dä.

Kete tënë

Bâ kete tënë ti Mt 17:21.