Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

Marc 13:1-37

13  Tongana lo yeke sigigi na yâ ti temple, mbeni disciple ti lo oko atene na lo: “Wafango ye, bâ mara ti atênë nga na mara ti ada so ma!”  Me Jésus atene na lo: “Mo bâ akota da so kue? Tênë oko ayeke ngbâ ande ge na ndo ti mbeni pëpe. A yeke tuku ni ande kue na sese.”  Tongana lo yeke duti na ndo ti Hoto ti akeke ti olive na lo yeke bâ temple ni, Pierre, Jacques, Jean na André ato nda ti hunda lo na ngoi so lo yeke gi lo oko, ala tene:  “Tene na e: Lawa si aye so ayeke si ande? Nga fä ni ayeke nyen tongana aye so kue ayeke gue biani ti hunzi?”  Jésus ato nda ti tene na ala: “ALA sara hange si mbeni zo ahanda ALA pëpe.  Azo mingi ayeke ga na iri ti mbi, ala yeke tene: ‘Mbi si mbi yeke Lo,’ na fade ala yeke handa azo mingi.  Nga, tongana ALA yeke mä tënë ti abira so atï nduru na ALA nga na ambeni so atï yongoro na ALA, ALA zia si mbeto ahon ndo ti ALA pëpe; a lingbi aye so asi, me ade nda ni asi pëpe.  “Teti fade mara ayeke londo na bira na tere ti mbeni mara, na royaume ayeke londo na bira na tere ti mbeni royaume. Fade sese ayeke yengi na ando nde nde na peko ti tere, na kota nzara ayeke tï. Aye so ayeke tongo nda ti aye ti vundu so akpa songo yâ so agbu wali so aye ti dü.  “Ti ALA, ALA bâ tere ti ALA nzoni. Fade azo ayeke gue na ALA na gbele ngbanga na a yeke pika ALA na yâ ti asynagogue. Fade a yeke gue na ALA na ngbanga na gbele agouverneur nga na gbele agbia ngbanga ti mbi, si ALA wara lege ti fa tënë na azo so. 10  Nga, a lingbi a fa nzoni tënë na amara kue kozoni si. 11  Me, tongana azo ayeke gue na ALA na gbele ngbanga, ALA gi bê ti ALA kozoni pëpe na ndo ti tënë so ALA lingbi ande ti tene. Me ye so a zia na yanga ti ALA ti tene na ngbonga ni so, ALA tene ni, teti a yeke ALA pëpe si ayeke sara tënë, me a yeke yingo vulu si ayeke sara tënë. 12  Nga, fade ita ayeke kä ita ti lo si a fâ lo, na babâ ayeke sara nga tongaso na molenge ti lo. Na fade amolenge ayeke londo ti ke ababâ na amama ti ala na ti sara si a fâ ala. 13  Fade ALA yeke ga azo so azo kue ake ala ndali ti iri ti mbi. Me zo so agbu ngangu juska na nda ni, lo si a yeke sö lo ande. 14  “Tongana ALA bâ ye ti saleté so asara si ye kue abuba aduti na ndo so a lingbi lo duti fade dä pëpe (zia zo so ayeke diko tënë ni abâ nda ni nzoni), na ngoi ni so, zia ala so ayeke na Judée alondo akpe na li ti ahoto. 15  Zia zo so ayeke na li ti da azu na sese pëpe, nga lo lï pëpe na yâ ti da ti lo ti mû mbeni ye ti hon na ni. 16  Nga, zia zo so ayeke na yaka akiri pëpe ndali ti aye so angbâ na peko ti lo ti mû bongo ti lo ti ndo ni. 17  Mawa na awali so ayeke na ngo, nga na ala so angbâ ti mû me na molenge na alango ni so! 18  ALA ngbâ ti sambela si ye ni asi pëpe na ngoi so dê ayeke mingi. 19  Teti alango ni so ayeke duti ande alango ti mbeni kota ye ti vundu so mara ni ade ti si lâ oko pëpe ngbene ye so Nzapa aleke aye juska ti si na ngoi ti fadeso, na mara ni ayeke kiri ti si ande pëpe. 20  Biani, tongana fade Jéhovah akiri na alango ni so nduru pëpe, ka mitele oko ayeke sö kuâ pëpe. Me ndali ti azo so lo soro ala, lo kiri na alango ni nduru. 21  “Nga, tongana mbeni zo atene na ALA: ‘Bâ, Christ la ge so,’ ‘Bâ, lo la kâ so!’ ALA mä na bê na tënë ni so pëpe. 22  Teti aChrist ti wataka nga na aprophète ti wataka ayeke londo na ala yeke sara ande afä nga na aye ti dongo bê si, tongana lege ayeke dä, ala handa azo so a soro ala. 23  Tongaso, ALA sara hange. Mbi sara tënë ti aye so kue na ALA kozoni awe. 24  “Me na alango ni so, na peko ti kota ye ti vundu so, fade lâ ayeke vuko, na nze ayeke su pëpe, 25  na atongoro ayeke londo ande na nduzu ti tï, na angangu so ayeke na yayu ayeke yengi ande. 26  Na ala yeke bâ ande Molenge ti zo so ayeke ga na yâ ti ambinda, na kota ngangu nga na gloire. 27  Fade lo yeke tokua a-ange, si ti londo na apupu osio, nga ti londo na nda ti sese ti si na nda ti yayu, ala yeke bungbi na ndo oko azo ti lo so a soro ala. 28  “Zia ALA manda ye na ndo ti tapande ti keke ti figue: Gi na ngoi so akete maboko ni ato nda ti sigigi na afini kugbe ni nga asigigi, ALA hinga so ngoi ti maïngo ti akobe ti yaka aga nduru awe. 29  Legeoko nga, tongana ALA bâ aye so ayeke si, zia ALA hinga so lo si nduru awe, lo yeke na yanga-da. 30  Ti tâ tënë ni, mbi tene na ALA: Azo ti ngoi ni so ayeke hon pëpe juska aye so kue asi awe si. 31  Fade yayu na sese ayeke hon, me atënë ti mbi ayeke hon oko pëpe. 32  “Na ndo ti tënë ti lango ni so nga na ngbonga ni so, zo oko ahinga ni pëpe, atâa a-ange na yayu, wala Molenge ni ahinga ni pëpe, me gi Babâ ni. 33  ALA sara hange, zia lê ti ALA angbâ na zingo ni, teti ALA hinga pëpe lawa si lango so a fa ni awe ayeke si. 34  A yeke tongana mbeni koli so ayeke gue na kodoro wande na lo zia da ti lo na peko ti lo, lo mû komandema na angbâa ti lo, lo fa kua ti zo oko oko na lo, na lo mû yanga na sinziri ni ti lango pëpe. 35  Ni la, ALA lango pëpe, ngbanga ti so ALA hinga pëpe ngbonga ni so wa ti da ni ayeke ga na ni, wala na lakui, wala na bê ti bï, wala na toto ti kondo wala na yanga ti ndapre, 36  tongaso si na ngoi so lo si gi hio tongaso, lo wara ALA na lango pëpe. 37  Me tënë so mbi tene na ALA so, mbi tene ni na azo kue: ALA lango pëpe.”

Kete tënë