Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA See 2013 revision

Marc 12:1-44

12  Nga, lo to nda ti sara tënë na ala na lege ti atoli, lo tene: “Mbeni koli afâ yaka ti vigne na lo sara gbagba angoro ni, lo zi dû teti petengo na alê ti vigne na lo leke mbeni da ti sinziri. Lo zia yaka ni na awafango yaka ti tene ala loué ni, na lo gue na mbeni tambela na kodoro wande.  Tongana ngoi ti fango alê ti vigne ni alingbi awe, lo tokua mbeni ngbâa ti lo na awafango yaka ni ti tene ala mû na lo ti lo alê ti vigne ti yaka ni.  Me awafango yaka ni agbu lo, ala pika lo ngangu si ala zia lo kiri maboko senge.  Lo kiri lo tokua mbeni ngbâa ni na ala, me ala pika lo na li ti lo nga ala sara ye ti kamene na lo.  Na lo kiri lo tokua mbeni ngbâa ni nde, na ala fâ lo. Ti ambeni ngbâa ni mingi, awafango yaka ni apika ala ngangu, na ti ambeni ala fâ ala.  Oko zo so angbâ na lo ayeke molenge ti lo ti koli so lo ye lo mingi. Na nda ni, lo tokua molenge so na awafango yaka ni, lo tene: ‘Fade ala yeke kpe mbeto ti molenge ti mbi so.’  Me awafango yaka so atene na popo ti ala: ‘So héritier ti yaka ti vigne ni la. ALA ga, e fâ lo na fade ye ti héritier ni ayeke ga ti e!’  Tongaso ala gbu lo, ala fâ lo na ala bi lo na gigi na peko ti yaka ti vigne ni.  Fade wa ti yaka ti vigne ni ayeke sara nyen? Lo yeke ga ande ti futi awafango yaka so na lo yeke mû yaka ti vigne ni na ambeni zo nde. 10  ALA diko tënë so na yâ ti Mbeti ti Nzapa lâ oko pëpe? ‘Tênë so azo ti lekengo da ake ni so aga tâ kozo tênë ti gere ti da ni. 11  A yeke Jéhovah si asara ye so, na a yeke ye ti dongo bê na lê ti e.’ ” 12  Tongana ala mä tënë so, ala yeke gi lege ti gbu lo, ndali ti so ala bâ so lo tene toli so ndali ti ala. Me mbeto ti gbâ ti azo so asara ala. Ni la, ala zia lo na ala hon. 13  Na pekoni, ala tokua ambeni Farizien nga na azo ti Hérode ti gue na mbage ti lo ti tene ala gbu lo na tënë ti yanga ti lo. 14  Tongana ala si kâ, ala tene na lo: “Wafango ye, e hinga so mo yeke tene gi tâ tënë lakue nga mo yeke mû mbage ti mbeni zo pëpe, teti mo sara ye na zo gi ndali ti lê ti lo pëpe. Me mo yeke fa tënë ti Nzapa na lege ti tâ tënë. Tene na e: Ndia amû lege na zo ti futa lapo ti molenge ti kodoro na César wala pëpe? 15  A lingbi e futa ni wala e futa ni pëpe?” Teti so Jésus ahinga so ala sara ye gi ti handa lê ti lo, lo tene na ala: “Ngbanga ti nyen ALA yeke tara mbi? ALA ga na mbi mbeni denier oko mbi bâ.” 16  Ala ga na lo mbeni oko. Na lo tene na ala: “Li ti zo so nga na iri so ayeke na ndo ti lê ti nginza ni ayeke ti zo wa?” Ala tene na lo: “A yeke ti César.” 17  Tongaso Jésus atene na ala: “ALA kiri na César aye so ayeke ti César, me na Nzapa aye so ayeke ti Nzapa.” Tongana ala mä tënë so, bê ti ala ato nda ti dö. 18  Na pekoni aSadducéen, so atene zingongo ti akuâ ayeke dä pëpe, aga na mbage ti lo na ala hunda lo: 19  “Wafango ye, Moïse asû na e na mbeti so tongana ita ti mbeni zo akui, si lo zia na peko ti lo wali, me lo dü molenge pëpe, a lingbi ita ti lo ti koli amû wali ni ti tene lo dü molenge na iri ti ita ti lo. 20  Bâ, lani ambeni ita ti koli mbasambala ayeke dä. Yaya ni amû wali na lo kui. Me tongana lo kui, lo zia molenge na peko ti lo pëpe. 21  Na use ita ti lo amû wali ni, me lo kui na lo zia molenge na peko ti lo pëpe. Ti ota ita ti lo ni nga ayeke tongaso. 22  Ala mbasambala kue azia amolenge na peko ti ala pëpe. Na peko ti ala kue, wali ni nga akui. 23  So ala mbasambala kue la amû wali ni so, na ngoi ti zingongo ti akuâ, fade wali ni ayeke duti wali ti lo so wa?” 24  Jésus atene na ala: “A yeke ngbanga ti tënë so si ALA girisa lege awe so pëpe? Teti ALA hinga Mbeti ti Nzapa nga na ngangu ti Nzapa oko pëpe. 25  Na ngoi so ala zingo na kuâ, akoli ayeke sara mariage pëpe na awali nga ayeke sara mariage pëpe. Me ala yeke tongana a-ange so ayeke na yayu. 26  Me na ndo ti tënë ti akuâ, so a yeke zingo ala, ALA diko na yâ ti mbeti ti Moïse pëpe? So na yâ ti mbaï so asara tënë ti keke ti sisi, Nzapa atene na lo: ‘Mbi yeke Nzapa ti Abraham, Nzapa ti Isaac na Nzapa ti Jacob.’ 27  Lo yeke Nzapa ti akuâ pëpe, me ti azo so ayeke na fini. ALA girisa lege ngangu mingi.” 28  Na mbeni oko ti ascribe aga, lo mä ala na ngoi so ala yeke dë gaba na popo ti ala, na lo hinga so Jésus akiri tënë na ala pendere mingi. Tongaso, lo hunda Jésus: “Kozo commandement so ahon atanga ni kue ayeke so wa?” 29  Jésus akiri tënë: “Kozo commandement ayeke so: ‘Azo ti Israël, ALA mä si, Jéhovah Nzapa ti e, lo yeke gi Jéhovah oko. 30  Mo ndoye Jéhovah Nzapa ti mo na bê ti mo kue, na âme ti mo kue, na bibe ti mo kue nga na ngangu ti mo kue.’ 31  Use commandement ni ayeke so: ‘Mo ndoye mba ti mo tongana mo wani.’ Mbeni commandement ti hon ala so ayeke dä pëpe.” 32  Scribe ni atene na lo: “Wafango ye, tënë so mo tene ayeke tâ tënë: ‘Lo yeke gi oko, na mbeni nde ayeke dä pëpe, gi Lo awe,’ 33  na ti ndoye lo na bê ti mo kue, na hingango ye ti mo kue, na ngangu ti mo kue nga ti ndoye mba ti mo tongana mo wani ayeke nzoni mingi ahon a-offrande ti nyama so a zö ni na ngbongboro ni kue nga na asandaga nde nde kue.” 34  Na mango tënë so, Jésus abâ so koli so akiri tënë nzoni mingi, lo tene na lo: “Mo yeke yongoro na royaume ti Nzapa pëpe.” Na mbeni zo ti tara ti hunda tënë na lo ayeke dä pëpe. 35  Me tongana Jésus ayeke fa ye na yâ ti temple, na ngoi so lo yeke kiri tënë na atënë so kue, lo hunda tënë so: “A sara tongana nyen si ascribe atene so Christ ayeke molenge ti David? 36  Na lege ti yingo vulu, David wani atene: ‘Jéhovah atene na Seigneur ti mbi: “Mo duti na mbage ti maboko ti mbi ti koli juska mbi zia awato ti mo na gbe ti gere ti mo.” ’ 37  David wani airi lo ‘Seigneur,’ tongaso, lo kiri ti duti molenge ti lo ni tongana nyen?” Na azo mingi mingi so ayeke mä lo na ngia na bê ti ala. 38  Na yâ ti fango ye ti lo, lo tene: “ALA sara hange na ascribe so aye ti yü ayongoro bongo ti fono na ni nga ala ye ti tene azo abara ala na gara. 39  Ala ye akozo ngende na yâ ti asynagogue nga ala ye gi akozo place na ngoi ti tengo akobe ti lakui. 40  Ala yeke azo so ayeke hunzi aye kue ti yâ ti ada ti awomua na ala yeke tene ayongoro sambela ti tene azo abâ ala. Fade ngbanga ti ala so ayeke duti ngangu mingi.” 41  Lo duti lê na lê na asanduku ti nginza na lo yeke bâ gbâ ti azo so ayeke bi nginza na yâ ti asanduku ti nginza ni. Azo ti mosoro mingi ayeke bi gbâ ti alê ti nginza na yâ ni. 42  Na mbeni womua so ayeke wayere aga na lo bi na yâ ti sanduku ni akete lê ti nginza use so ngere ni ayeke kete mingi. 43  Tongaso Jésus airi adisciple ti lo, lo tene na ala: “Ti tâ tënë ni, mbi tene na ALA: Womua so, so ayeke wayere, abi ye mingi ahon azo kue so ayeke bi nginza na yâ ti asanduku ni, 44  ngbanga ti so ala kue abi gi anginza ti ala ti ndo ni, me wali so, na yâ ti yere ti lo, abi ye kue so lo yeke na ni, ye kue so lo yeke na ni ti bata na fini ti lo.”

Kete tënë