Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Marc 11:1-33

11  Tongana ala si nduru na Jérusalem, na Bethphagé nga na Béthanie, na ndo ti Hoto ti akeke ti olive, lo tokua ambeni disciple ti lo use,  na lo tene na ala: “ALA gue na yâ ti kete kodoro so ALA yeke bâ so. Gi na lingo ti ALA, fade ALA yeke wara mbeni kete lele so a kanga lo, mbeni kete lele so zo ade ti duti na ndo ti lo pëpe. ALA zi lo na ALA ga na lo.  Me tongana mbeni zo atene na ALA: ‘Ngbanga ti nyen ALA yeke sara ye so?’ ALA tene: ‘A yeke Seigneur si aye nyama ni, nga lo yeke kiri na lo na ndo so fade fadeso.’ ”  Tongaso ala gue na ala wara kete lele ni so a kanga lo na yanga ti mbeni da, na gigi na tere ti mbeni kete lege, na ala zi lo.  Me ambeni zo so ayeke luti kâ ato nda ti tene na ala: “Nyen la ALA yeke sara so? ALA yeke zi kete lele ni ngbanga ti nyen?”  Ala tene gi peko ti yanga ti Jésus na azo ni, na a zia lege na ala ti gue.  Ala ga na kete lele ni na Jésus, ala bi abongo ti ala ti ndo ni na ndo ti lele ni, na Jésus aduti na ndo ti lo.  Nga, gbâ ti azo agbara abongo ti ala ti ndo ni na ndo ti lege ni. Na ambeni afâ amaboko ti akeke so ayeke na tere ti lege.  Ala so ayeke hon kozo na lo nga ala so ayeke ga na peko ti lo ayeke dekongo atene: “E voro mo, mo sö lo! Tënë nzoni ayeke na ndo ti lo so aga na iri ti Jéhovah! 10  Tënë nzoni ayeke na ndo ti royaume so ayeke ga, royaume ti babâ ti e David! Mo so mo yeke kâ na nduzu, e voro mo, mo sö lo!” 11  Na lo lï na Jérusalem, lo gue na yâ ti temple. Lo bi lê ti lo, lo bâ aye kue, na teti so lakui aga nduru, lo sigigi lo gue na Béthanie, lo na adisciple bale-oko na use. 12  Na ndade ni, tongana ala londo na Béthanie ti sigigi, nzara asara lo. 13  Na tongana lo ngbâ ayo, lê ti lo atï na ndo ti mbeni keke ti figue so akugbe ni ayeke dä. Lo gue ti bâ wala lo lingbi ti wara lengo ni dä. Me, tongana lo si na tere ni, lo wara ye oko pëpe, gi akugbe ni, ngbanga ti so a yeke pëpe ngoi ti lengo ti afigue. 14  Tongaso, lo tene na keke ni: “Zia zo ate lengo ti mo mbeni pëpe teti lakue lakue.” Na adisciple ti lo ayeke mä lo. 15  Ala si fadeso na Jérusalem. Kâ, lo lï na yâ ti temple na lo to nda ti tomba azo so ayeke kä ye nga na azo so ayeke vo ye na yâ ni. Lo kinda atable ti azo so ayeke changé nginza na aye ti duti ti azo so ayeke kä akolokoto. 16  Na lo zia lege na mbeni zo pëpe ti yô kungba ti hon na ni na yâ ti temple. 17  Me lo ngbâ ti fa ye na ti tene: “A sû na Mbeti ti Nzapa pëpe? ‘Fade a yeke iri da ti mbi da ti sambela teti azo ti amara kue.’ Me, ALA sara si da ni aga kota dû ti azo ti gbungo aye ti azo na ngangu.” 18  Aprêtre-mokonzi na ascribe amä tënë so, na ala yeke gi lege ti fâ lo. Me ala sara mbeto ti lo ngbanga ti so bê ti gbâ ti azo ni kue angbâ lakue ti dö ndali ti afango ye ti lo. 19  A si ka na lakui, ala yeke sigigi na yâ ti gbata ni. 20  Me tongana ala yeke hon na lege na yanga ti ndapre, ala bâ keke ti figue ni. Keke ni ahule juska na gunda ni kue awe. 21  Tongaso Pierre adabe ti lo na ni, lo tene na Jésus: “Rabbi, bâ ye! Keke ti figue so mo deba ni so ahule awe.” 22  Na Jésus akiri tënë na ala, lo tene: “ALA mä na bê na Nzapa. 23  Ti tâ tënë ni, mbi tene na ALA: Zo so atene na hoto so: ‘Mo londo mo gue mo tï na yâ ti ngu-ingo,’ na lo dë kite na yâ ti bê ti lo pëpe, me lo yeke na mabe so ye so lo tene ayeke si, fade a yeke si tongana ti so lo hunda. 24  A yeke tongaso si mbi tene na ALA: Ye kue so ALA hunda ni na yâ ti sambela, ALA mä na bê so ALA wara ni awe, na fade ALA yeke wara ni. 25  Tongana ALA luti na ALA yeke sambela, ALA pardone tënë kue so ALA yeke na ni na bê ti ALA na tere ti mbeni zo, tongaso si Babâ ti ALA so ayeke na yayu alingbi nga ti pardone afaute ti ALA.” 26*  —— 27  Ala kiri aga na Jérusalem. Tongana Jésus ayeke tambela na yâ ti temple, aprêtre-mokonzi na ascribe nga na a-ancien aga na tere ti lo, 28  ala to nda ti tene na lo: “Na ndo wa si mo wara komandema ti sara na aye so? Zo wa si amû na mo komandema ti sara na aye so?” 29  Jésus atene na ala: “Mbi yeke hunda ALA na tënë oko. Tongana ALA kiri tënë na mbi, mbi nga mbi yeke fa na ALA ndo so mbi wara komandema so dä ti sara na aye so. 30  Batême so Jean amû lani na azo alondo na yayu wala na azo? ALA kiri tënë na mbi.” 31  Tongaso ala to nda ti sara tënë na popo ti ala, ala yeke tene: “Tongana e tene: ‘A londo na yayu,’ lo yeke tene ande na e: ‘Tongaso, ngbanga ti nyen si ALA mä na bê na lo pëpe?’ 32  Me fade e zia ye ahanda e si e tene: ‘A londo na azo’? ” Ala yeke na mbeto ti gbâ ti azo so, ngbanga ti so azo ni kue abâ so Jean ayeke lani mbeni prophète biani. 33  Na ala kiri tënë na Jésus, ala tene: “E hinga pëpe.” Na Jésus atene na ala: “Mbi kue mbi yeke tene na ALA pëpe ndo so mbi wara komandema so dä ti sara na aye so.”

Kete tënë

Bâ kete tënë ti Mt 17:21.