Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

Marc 10:1-52

10  Lo londo kâ, lo si na akatikati ti sese ti Judée, na mbage ti Ngu ti Jourdain. Gbâ ti azo akiri abungbi na tere ti lo, na tongana ti so lo yeke sara ka lakue, lo to nda ti fa ye na ala.  Na pekoni, aFarizien aga na tere ti lo. Ti tara lo, ala hunda lo wala ndia amû lege na koli ti sara divorce na wali ti lo.  Lo kiri tënë na ala, lo tene: “Moïse amû yanga na ALA ti sara nyen?”  Ala tene: “Moïse amû lege na koli ti sara mbeni mbeti ti divorce na ti tomba wali ti lo.”  Jésus atene na ala: “A yeke ndali ti kpengbango bê ti ALA si lo sû na ALA commandement so na mbeti.  Me, na tongo nda ni so Nzapa asara aye kue, ‘Lo sara ala koli na wali.  Ndani la, koli ayeke zia ande babâ na mama ti lo,  na ala use ayeke ga mitele oko.’ Tongaso, ala yeke use mbeni pëpe, me mitele oko.  Ni la, ye so Nzapa abungbi ni na gbe ti joug oko, zia mbeni zo akangbi yâ ni pëpe.” 10  Tongana ala kiri na da, adisciple ato nda ti hunda lo na ndo ti tënë so. 11  Na lo tene na ala: “Zo so asara divorce na wali ti lo na lo sara mariage na mbeni wali nde, lo gi mbeni wali nde la na lo sara sioni na wali ti lo. 12  Na tongana mbeni wali asara divorce na koli ti lo si na pekoni lo sara mariage na mbeni koli nde, andâ lo gi mbeni koli nde la.” 13  Na pekoni, azo ato nda ti ga na akete molenge na lo ti tene lo ndu ala. Me adisciple asuku na ala. 14  Tongana Jésus abâ ye so, bê ti lo ason si lo tene na ala: “ALA zia akete molenge ni aga na mbi. ALA tara ti kanga lege na ala pëpe, teti royaume ti Nzapa ayeke ti azo so ayeke tongana akete molenge so. 15  Ti tâ tënë ni, mbi tene na ALA: Zo so ayamba royaume ti Nzapa pëpe tongana mbeni kete molenge, fade lo yeke lï na yâ ni oko pëpe.” 16  Na Jésus amû amolenge ni na yâ ti maboko ti lo na lo to nda ti iri tënë nzoni na ndo ti ala na ziango maboko ti lo na ndo ti ala. 17  Tongana lo mû lege ti hon, mbeni koli amû loro aga, lo kuku na sese na likuni ti lo na gbe ti Jésus na lo hunda lo: “Nzoni Wafango ye, a lingbi mbi sara nyen ti wara ande fini ti lakue lakue?” 18  Jésus atene na lo: “Ngbanga ti nyen mo tene mbi yeke nzoni? Zo oko ti nzoni ayeke dä pëpe, gi Nzapa oko awe. 19  Mo hinga acommandement ni awe: ‘Mo fâ zo pëpe. Mo gi wali wala koli nde pëpe. Mo nzi ye pëpe. Mo tene mvene na li ti mbeni zo na gbele ngbanga pëpe. Mo handa zo ti mû ye ti lo pëpe. Mo ne babâ na mama ti mo.’ ” 20  Koli ni atene na lo: “Wafango ye, ngbene ye so mbi ngbâ maseka, mbi bata aye so kue awe.” 21  Jésus abâ lo, lo ye lo na bê ti lo si lo tene na lo: “A ngbâ na mo ye oko ti sara: Gue, mo kä aye ti mo, mo mû nginza ni na awayere, na fade mo yeke wara mosoro na yayu; na mo ga mo mû peko ti mbi.” 22  Me tere ti lo adë kue na mango tënë so, na lo hon na vundu na bê ti lo, ngbanga ti so lo yeke na aye mingi. 23  Jésus abi lê ti lo lo bâ azo so angoro lo, na pekoni lo tene na adisciple ti lo: “A yeke duti ande ngangu biani na azo so ayeke na nginza ti lï na yâ ti royaume ti Nzapa!” 24  Me na mango tënë ti Jésus so, li ti adisciple akpe. Jésus akiri atene na ala: “Amolenge ti mbi, a yeke biani ngangu ti lï na yâ ti royaume ti Nzapa! 25  A yeke ngangu pëpe na mbeni chameau ti lï na yâ ti dû ti suä ahon mbeni zo ti mosoro ti lï na yâ ti royaume ti Nzapa.” 26  Li ti ala akiri akpe kue, na ala tene na lo: “Tâ zo wa si alingbi ti wara fini?” 27  Jésus abâ yâ ti lê ti ala nzoni, na lo tene: “Azo alingbi ti sara ye so pëpe, me ti Nzapa a yeke tongaso pëpe, teti Nzapa alingbi ti sara ye kue.” 28  Pierre ato nda ti sara tënë na lo: “Bâ, e dö aye ti e kue e zia na e ngbâ ti mû peko ti mo.” 29  Jésus atene: “Ti tâ tënë ni, mbi tene na ALA: Zo kue so azia da ti lo, aita ti lo ti koli, aita ti lo ti wali, mama ti lo, babâ ti lo, amolenge ti lo na ayaka ti lo ngbanga ti mbi nga ngbanga ti nzoni tënë, 30  fade lo yeke wara na yâ ti ngoi ti fadeso ada, aita ti koli, aita ti wali, amama, amolenge na ayaka. Aye so kue lo yeke wara ni fani ngbangbo oko, nga a yeke sara aye ti ngangu na lo na ndo ni. Me na yâ ti aye ti ngoi so ayeke ga, lo yeke wara ande fini ti lakue lakue. 31  Me azo mingi so ayeke na li ni, fade ala yeke ga azo ti ndangba ni, na azo so ayeke na ndangba ni ayeke ga azo so ayeke na li ni.” 32  Ala yeke na lege ti montê na Jérusalem, na Jésus ayeke tambela kozo na ala, na bê ti ala adö. Nga ala so ayeke mû peko ti ala ato nda ti sara mbeto. Me lo kiri lo gboto adisciple ti lo bale-oko na use na mbage, na lo to nda ti tene na ala tënë ti aye so a sara tënë ni kozo awe ti si na lo, lo tene: 33  “Bâ, e yeke montê na Jérusalem la, na fade a yeke zia Molenge ti zo na maboko ti aprêtre-mokonzi nga na ascribe. Fade ala yeke fâ ngbanga ti kuâ na li ti lo na fade ala yeke zia lo na maboko ti azo ti amara, 34  na fade ala he lo, ala tuku ngu ti yanga na tere ti lo, ala pika lo na zaza nga ala fâ lo. Me lango ota na pekoni, lo yeke zingo na kuâ.” 35  Jacques na Jean, amolenge use ti Zébédée, aga na tere ti lo si ala tene na lo: “Wafango ye, e ye si mo sara na e ye so e yeke hunda ni na mo.” 36  Lo tene na ala: “ALA ye mbi sara na ALA nyen?” 37  Ala tene na lo: “Mû lege na e ti duti na tere ti mo, oko na mbage ti maboko ti mo ti koli na oko na mbage ti maboko ti mo ti wali, na yâ ti gloire ti mo.” 38  Me Jésus atene na ala: “ALA hinga ye so ALA yeke hunda so pëpe. ALA lingbi ti nyon kopo so mbi yeke nyon ni so? Wala ALA lingbi ti wara batême so mbi yeke wara ni so?” 39  Ala tene na lo: “E lingbi.” Na mango tënë ti ala so, Jésus atene na ala: “Ti kopo so mbi yeke nyon so, ALA yeke nyon ni ande. Nga ti batême so mbi ngbâ ti wara ni so, ALA yeke wara ni ande nga. 40  Me ti duti na mbage ti maboko ti mbi ti koli wala na mbage ti maboko ti mbi ti wali, a yeke ti mbi ti mû ni pëpe. Me a yeke ti ala so a leke ni ndali ti ala.” 41  Tongana atanga ni bale-oko amä tënë so, bê ti ala ato nda ti son na tere ti Jacques na Jean. 42  Me na peko ti so Jésus airi ala na tere ti lo, lo tene na ala: “ALA hinga so azo so a bâ ala tongana amokonzi ti amara ayeke sara mokonzi na ndo ti amara ni, na akota zo ti ala ayeke na komandema na ndo ti ala. 43  Ti ALA, a yeke tongaso pëpe. Me zo so aye ti ga kota na popo ti ALA, a lingbi lo duti zo ti kua ti ALA; 44  na zo so aye ti duti na li ni na popo ti ALA, a lingbi lo duti ngbâa ti ALA kue. 45  Même Molenge ti zo aga ti tene azo asara kua na lo pëpe, me lo ga ti sara kua na azo na ti mû âme ti lo tongana ngere so a futa ti zi na azo mingi.” 46  Ala lï na Jéricho. Me tongana Jésus na adisciple ti lo nga na azo mingi mingi so amû peko ti lo ayeke sigigi na yâ ti Jéricho, Bartimée (molenge ti Timée) ayeke duti na tere ti lege. Lo yeke waziba nga zo ti iringo ye. 47  Tongana lo mä so a yeke Jésus, zo ti Nazareth si ayeke hon so, lo to nda ti dekongo, lo tene: “Jésus, Molenge ti David, sara nzoni bê na mbi!” 48  Na mango lo, azo mingi ato nda ti suku na lo ti tene lo kanga yanga ti lo. Me lo ngbâ ti dekongo ngangu ahon ti kozo: “Molenge ti David, sara nzoni bê na mbi!” 49  Tongaso Jésus aluti na lo tene: “ALA iri lo.” Na ala iri waziba so, ala tene na lo: “Kanga bê ti mo, londo, bâ lo yeke iri mo.” 50  Lo bi bongo ti lo ti ndo ni, lo huru lo luti, na lo gue na tere ti Jésus. 51  Jésus atene na lo: “Mo ye mbi sara nyen na mo?” Waziba ni atene na lo: “Rabbouni, sara si mbi kiri mbi bâ ndo.” 52  Jésus atene na lo: “Mo gue, mabe ti mo asava mo awe.” Gi na peko ti tënë so, lo kiri lo bâ ndo, na lo to nda ti mû peko ti Jésus na ndo ti lege.

Kete tënë