Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA See 2013 revision

Marc 1:1-45

1  So ayeke tongo nda ti nzoni tënë na ndo ti Jésus Christ:  Gi tongana ti so a sû na yâ ti mbeti ti prophète Ésaïe, a tene: “(Bâ, mbi yeke tokua watokua ti mbi kozo na mo, na fade lo yeke leke lege ti mo ti tene mo hon dä.)  ALA mä! Mbeni zo ayeke dekongo na yando, lo tene: ‘ALA leke lege ti Jéhovah, ALA sara si alege ti lo aduti nzoni.’ ”  Ni la, Jean wabatizengo azo asi na yando, lo yeke fa tënë ti batême so ayeke fä ti changengo bê ti azo, tongaso si a pardone asiokpari ti ala.  Ndani la, azo ti sese ti Judée kue nga na azo kue ti Jérusalem aga na mbage ti lo, na lo batize ala na yâ ti Ngu ti Jourdain. Ala yeke fa asiokpari ti ala na gigi.  Jean ayü bongo so a sara ni na kuä ti tere ti chameau na lo kanga na yâ ti lo mbeni ceinture so a leke ni na poro ti nyama. Nga, lo yeke te ka agbadora nga na mafuta ti wotoro ti ngonda.  Na lo yeke fa tënë, lo tene: “Mbeni zo ayeke ga na peko ti mbi, lo yeke ngangu ahon mbi. Mbi kpa pëpe ti kuku ti zi akamba ti poro ti lo.  Mbi batize ALA na ngu, me ti lo, lo yeke batize ande ALA na yingo vulu.”  Na ngoi ni kâ, Jésus alondo na Nazareth ti Galilée lo ga, na Jean abatize lo na yâ ti Ngu ti Jourdain. 10  Gi so lo londo na gbe ti ngu ni lo sigigi, lo bâ yayu so ayeke zi, na yingo vulu so ayeke zu na ndo ti lo tongana mbeni kolokoto. 11  Na mbeni go asara tënë na yayu, a tene: “Mo yeke Molenge ti mbi, so mbi ndoye mo mingi; bê ti mbi anzere na mo mingi.” 12  Na hio na pekoni, yingo apusu lo ti gue na yando. 13  Tongaso lo ngbâ na yando kâ teti lango bale-osio. Satan atara lo, na lo yeke na popo ti anyama ti ngonda. Me a-ange ayeke sara kua na lo. 14  Na peko ti so a gbu Jean a bi lo na kanga, Jésus ague na Galilée, lo yeke fa nzoni tënë ti Nzapa, 15  lo tene: “Ngoi so a diko ni alingbi awe, na royaume ti Nzapa aga nduru awe. ALA changé bê ti ALA, na ALA mä na bê na nzoni tënë.” 16  Tongana lo yeke tambela na tere ti kota ngu ti Galilée, lo bâ Simon na ita ti lo André so ayeke bi agbanda ti ala na ngu ngbanga ti so ala yeke awagingo susu. 17  Na Jésus atene na ala: “ALA mû peko ti mbi, na fade mbi yeke sara si ALA ga awagingo azo.” 18  Na hio, ala zia agbanda ti ala ni, na ala mû peko ti lo. 19  Tongana lo hon kete, lo bâ Jacques na ita ti lo Jean, amolenge ti Zébédée. Ala yeke na yâ ti ngö ti ala na ala ngbâ ti leke agbanda ti ala. 20  Hio, lo iri ala. Na ala zia babâ ti ala Zébédée na yâ ti ngö ni, lo na azo ti kua ti lo, na ala mû peko ti Jésus. 21  Ala kue ague na Capernaüm. Gi so lango ti sabbat ato nda ni awe, lo lï na yâ ti synagogue na lo to nda ti fa ye na azo. 22  Na bê ti ala adö ngbanga ti kode ti fango ye ti lo, teti so lo yeke fa ye na ala tongana zo so awara komandema ni, me tongana ascribe pëpe. 23  Nga, tâ gi na ngoi ni so, mbeni koli so sioni yingo ayeke na yâ ti lo ayeke na yâ ti synagogue ti ala ni, na lo dekongo, 24  lo tene: “Ti mo na e nyen? Jésus, zo ti Nazareth. Mo ga ti futi e? Mbi hinga mo nzoni mingi: Mo yeke Lo so ayeke nzoni-kue so alondo na Nzapa si aga.” 25  Me Jésus asuku na lo, lo tene: “Kanga yanga ti mo, sigigi na yâ ti lo!” 26  Na sioni yingo ni ayengi koli ni ngangu, lo dekongo na kota go, na pekoni lo sigigi na yâ ti koli ni. 27  Tongaso, bê ti azo kue adö mingi na ala to nda ti sara tënë na popo ti ala, ala tene: “So nyen la? Mbeni fini fango ye! Lo yeke na ngangu ti mû yanga même na asioni yingo, na ala mä yanga ti lo.” 28  Ni la, gi hio tongaso, tënë ti lo amû ndo kue na yâ ti akodoro kue so ayeke na Galilée. 29  Na hio ala sigigi na yâ ti synagogue, ala gue na da ti Simon na André. Jacques na Jean kue ague legeoko na ala. 30  Mama ti wali ti Simon ayeke na kobela so asara si tere ti lo amû wâ mingi na lo yeke lango na gbogbo, na ala sara tënë ni hio na Jésus. 31  Jésus ague na tere ti mama ni, lo gbu maboko ti lo, lo yô lo na nduzu na kobela ni ahon na tere ti lo. Na mama ni ato nda ti sara kua na ala. 32  Tongana lakui alingbi awe, na lâ alinda awe, azo ato nda ti ga na lo azo kue so tere ti ala ason nga ala so asioni yingo ayeke na yâ ti ala. 33  Na azo ti kodoro ni kue abungbi tere ti ala tâ gi na yanga-da ni. 34  Tongaso, lo sava azo mingi so ayeke na mara ti akobela nde nde. Lo tomba asioni yingo mingi, me lo zia lege na ala pëpe ti sara tënë, ndali ti so ala hinga so lo yeke Christ. 35  Na yanga ti ndapre, so ndo angbâ ti vuko, lo londo lo sigigi, lo gue na mbeni ndo so azo ayeke dä pëpe, na kâ, lo to nda ti sambela. 36  Me Simon na ala so ayeke na tere ti lo ague ti gi lo, 37  na tongana ala wara lo, ala tene na lo: “Azo kue ayeke gi mo.” 38  Me lo tene na ala: “Zia e gue na mbeni ndo nde. E gue na akete gbata so ayeke nduru ge, tongaso si mbi lingbi nga ti fa tënë kâ, teti a yeke ngbanga ni si mbi ga.” 39  Na lo gue, lo fa tënë na yâ ti asynagogue ti ala na sese ti Galilée kue, na lo tomba asioni yingo. 40  Mbeni zo ti buruma aga na tere ti lo si lo voro yanga na Jésus, même lo kuku na gbe ti lo, lo tene: “Tongana mo ye, mo lingbi ti sara si tere ti mbi aga nzoni.” 41  Tongana Jésus abâ ye so, mawa agbu lo, lo yôro maboko ti lo, lo ndu zo ti buruma ni, na lo tene: “Mbi ye. Zia tere ti mo aga nzoni.” 42  Gi na lê ni lê ni, buruma ti lo ni ahon na lo ga nzoni. 43  Nga, lo gboto mê ti lo ngangu, na lo hunda na koli ni hio ti gue, 44  na lo tene na lo: “Hange si mo sara tënë ni na zo oko pëpe. Me mo gue, mo fa tere ti mo na prêtre, na mo mû matabisi so Moïse afa ni ndali ti tere ti mo so aga nzoni so, si ala bâ ni na lê ti ala.” 45  Me na peko ti so koli ni ahon awe, lo to nda ti sara tënë ni na azo mingi, na tënë ni amû ndo kue. Ye so asara si Jésus alingbi mbeni pëpe ti lï na yâ ti mbeni gbata na lê ti azo. Me lo ngbâ na gigi na ando so azo ayeke dä pëpe. Atâa so kue, azo angbâ ti londo na ando kue ti ga na mbage ti lo.

Kete tënë