Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Luc 9:1-62

9  Lo iri adisciple ti lo bale-oko na use na lo mû na ala ngangu nga na komandema na ndo ti asioni yingo kue na ti sava akobela.  Lo tokua ala ti fa tënë ti royaume ti Nzapa nga ti kaï akobela.  Na lo tene na ala: “ALA mû mbeni ye oko pëpe ndali ti lege. ALA mû keke ti tambelango na ni pëpe nga na bozo ti kobe pëpe. ALA mû mapa pëpe, ALA mû nginza ti argent pëpe nga ALA duti na bongo ti yâ ni use pëpe.  Me na ndo kue so ALA lï na yâ ti mbeni da, ALA ngbâ kâ juska ALA londo ahon.  Na ndo kue so azo ayamba ALA pëpe, tongana ALA yeke sigigi na yâ ti gbata so, ALA pika sese ti gere ti ALA ti fa so azo ni asara sioni.”  Tongaso, ala sigigi, ala hon na yâ ti akete kodoro oko oko ti sese ni, ala yeke fa nzoni tënë nga ala yeke sava kobela ti azo na ndo kue.  Hérode so ayeke Komanda ti sese ni amä tënë ti aye kue so asi, na li ti lo akpe kue ngbanga ti so ambeni zo ayeke tene a zingo Jean na popo ti akuâ awe.  Me ambeni atene Élie la asigigi so. Ti ambeni nde, a yeke mbeni oko ti aprophète ti giriri si azingo na kuâ.  Hérode atene: “Mbi dë go ti Jean lani awe. Tongaso, so zo wa la si mbi yeke mä atënë so na ndo ti lo so?” Ni la, Hérode ayeke gi lege ti bâ lo. 10  Tongana abazengele ni akiri, ala fa na Jésus peko ti aye so ala sara. Na lo mû ala na tere ti lo na ala gue na mbeni ndo so azo ayeke dä pëpe, na yâ ti mbeni gbata so a iri ni Bethsaïda. 11  Me tongana gbâ ti azo so amä tënë ni, ala gue na peko ti lo. Lo yamba ala na nzoni bê na lo to nda ti sara tënë na ala na ndo ti royaume ti Nzapa, nga lo sava ala so ayeke na bezoin ti tene a sava ala. 12  Lâ ayeke gue ti lï. Tongaso adisciple bale-oko na use aga na ala tene na lo: “Mo tene na gbâ ti azo so ti gue, si ala gue na yâ ti akete kodoro nga na ando so ayeke na yanga ti yaka nduru ge si ala wara ndo ti lango nga na kobe ngbanga ti so, ge, e yeke na yâ ti benyama.” 13  Me lo tene na ala: “ALA wani amû ye ti tengo ni na azo so.” Ala tene: “E yeke na mbeni ye pëpe, gi mapa oku na susu use. Peut-être gi tongana e gue e vo kobe ndali ti azo so kue si ala te ma.” 14  Biani, akoli ayeke saki oku tongaso. Me lo tene na adisciple ti lo: “ALA tene na azo ni ti duti mo bâ mo tene ala ye ti te kobe. Zia ala bungbi tere ti ala bale-oku bale-oku tongaso.” 15  Na adisciple ni asara tongaso, ala sara si azo ni kue aduti. 16  Na pekoni, lo mû mapa oku na susu use so, lo yô lê ti lo na nduzu, na lo iri tënë nzoni na ndo ni. Lo fâ yâ ni, lo to nda ti kangbi ni na adisciple ti zia na gbele gbâ ti azo so. 17  Azo ni kue ate, yâ ti ala asi. Na tanga ti anduru ni so angbâ, ala ro ni, ala wara sakpa bale-oko na use. 18  Na pekoni, tongana lo yeke sambela gi lo oko, adisciple ni aga na tere ti lo, na lo hunda ala, lo tene: “Gbâ ti azo ayeke tene ti ala so mbi yeke zo wa?” 19  Ala kiri tënë na lo, ala tene: “Ambeni zo atene Jean Baptiste, me ambeni nde atene Élie, ambeni nga atene so mbeni oko ti aprophète ti giriri si azingo na kuâ.” 20  Na pekoni, lo hunda ala: “Me ti ALA, ALA tene mbi yeke zo wa?” Pierre akiri tënë: “Mo yeke Christ ti Nzapa.” 21  Na lo gboto mê ti ala ngangu na lo wa ala ti sara tënë so na mbeni zo pëpe, 22  me lo tene: “A lingbi Molenge ti zo abâ pasi mingi, na fade a-ancien, aprêtre-mokonzi nga na ascribe ake lo. A yeke fâ lo ande, me na ota lango ni, a yeke zingo lo na kuâ.” 23  Na lo tene na ala kue: “Tongana mbeni zo aye ti ga na peko ti mbi, zia lo ke tere ti lo wani na lo yô keke ti pasi ti lo lâ na lâ na lo mû peko ti mbi lakue lakue. 24  Teti zo so aye ti sö âme ti lo, fade lo yeke girisa ni. Me zo so agirisa âme ti lo ndali ti mbi, fade lo yeke sö ni. 25  Ti tâ tënë ni, ye ti nzoni wa mbeni zo ayeke wara tongana lo wara dunia so kue, me lo girisa fini ti lo wala lo wara sioni na pekoni? 26  Teti zo so asara kamene ti mbi nga na kamene ti tënë ti mbi, fade Molenge ti zo ayeke sara kamene ti lo na ngoi so lo yeke si na yâ ti gloire ti lo na ti Babâ ni nga na ti a-ange so ayeke nzoni-kue. 27  Ti tâ tënë ni, mbi tene na ALA: Na popo ti azo so aluti ge so, ambeni ayeke kui ande pëpe juska ala bâ royaume ti Nzapa kozoni awe si.” 28  Biani, lango miombe tongaso na peko ti atënë so, lo mû Pierre, Jean na Jacques na tere ti lo na lo montê na ndo ti hoto ti sambela. 29  Tongana lo yeke sambela, lê ti lo aga nde na bongo ti lo avuru na aza zango. 30  Nga, bâ, akoli use ayeke sara tënë na lo, a yeke Moïse na Élie. 31  Ala sigigi na lê ti adisciple ni na yâ ti gloire na ala to nda ti sara tënë na lo na ndo ti hongo ti lo so a fa kozo awe a tene a yeke si na Jérusalem. 32  Lê ti Pierre nga na ala so ayeke na tere ti lo ane na lango, me tongana lango ni ahon kue na lê ti ala awe, ala bâ gloire ti lo nga na akoli use so ayeke luti na tere ti lo. 33  Na tongana ala yeke zia Jésus ti gue, Pierre atene na Jésus: “Wafango ye, a yeke nzoni e ngbâ gi ge. Zia e leke atente ota, oko ti mo, oko ti Moïse na oko ti Élie.” Lo hinga tënë so lo yeke tene so pëpe. 34  Me tongana Pierre ayeke sara atënë so, mbeni mbinda aga na ato nda ti mû ndo ti ala. So ala yeke lï na yâ ti mbinda ni, mbeto agbu ala. 35  Na mbeni go asara tënë na yâ ti mbinda ni, atene: “So ayeke Molenge ti mbi, lo so mbi soro lo. ALA mä lo.” 36  Tongana go ni ayeke sara fade tënë, Jésus angbâ gi lo oko. Me adisciple ni aduti kpô. Na alango ni so, ala fa peko ti aye so ala bâ na mbeni zo pëpe. 37  Na ndade ni, tongana ala londo na ndo ti hoto ni ala zu, azo mingi mingi aga atingbi na lo. 38  Na bâ, mbeni koli adekongo na popo ti gbâ ti azo ni, lo tene: “Wafango ye, mbi voro mo, mo bi lê ti mo na ndo ti molenge ti mbi ti koli, ngbanga ti so lo yeke gi oko molenge so mbi dü, 39  na bâ, mbeni yingo amû lo, na gi hio tongaso, molenge ni ayeke dekongo, na yingo so asara si lo yeke gboto, na mousse ayeke sigigi na yanga ti lo. Na tongana lo sara sana na molenge ni awe, a yeke ngangu ti tene yingo so asigigi na yâ ti lo. 40  Na mbi voro adisciple ti mo ti tomba yingo so, me ala tomba lo gbä.” 41  Jésus akiri tënë, lo tene: “ALA, azo ti ngoi so, so mabe amanke ALA, ALA so asara ye ti kirikiri mingi, fade mbi ngbâ na tere ti ALA juska lawa? Fade mbi kanga bê ti mbi na ALA juska lawa? Ga na molenge ti mo ni ge.” 42  Me tongana molenge ni ayeke pusu nduru, sioni yingo so abi lo na sese na lo sara si molenge ni agboto ngangu. Me Jésus asuku na sioni yingo ni, lo sava molenge ni na lo mû lo na babâ ti lo. 43  Na bê ti azo kue ato nda ti dö ndali ti kota ngangu ti Nzapa. Tongana bê ti ala kue angbâ ti dö na bango aye kue so lo yeke sara, lo tene na adisciple ti lo: 44  “ALA mä tënë so nzoni: A fa kozo awe so fade a yeke mû Molenge ti zo ti zia lo na maboko ti azo.” 45  Me lakue ade ala gbu nda ti tënë so pëpe. Biani, a honde nda ti tënë ni na ala si ala lingbi ti gbu nda ni pëpe. Na ala sara mbeto ti hunda lo na ndo ti tënë so. 46  Na pekoni, tënë alondo na popo ti ala ti bâ zo wa na popo ti ala ayeke duti kota ahon atanga ni kue. 47  Teti so Jésus ahinga tënë so ayeke na yâ ti bê ti ala, lo mû mbeni kete molenge, lo zia lo na tere ti lo, 48  na lo tene na ala: “Zo so ayamba kete molenge so ndali ti iri ti mbi, lo yamba mbi nga. Na zo so ayamba mbi, lo yamba nga lo so atokua mbi. Teti zo so asara tere ti lo kete na popo ti ALA kue, a yeke lo si ayeke kota.” 49  Jean atene na lo: “Wafango ye, e bâ mbeni koli so ayeke tomba asioni yingo na iri ti mo, na e tara ti kanga lege na lo ngbanga ti so lo yeke tambela na e pëpe.” 50  Me Jésus atene na lo: “ALA tara ti kanga lege na lo pëpe, teti zo so ake ALA pëpe, lo yeke zo ti ALA.” 51  Tongana ngoi ti tene a mû Jésus a gue na lo na yayu ayeke pusu nduru, lo zia gi lê ti lo ti gue na Jérusalem. 52  Tongaso lo tokua azo ti hon kozo na lo. Ala gue na ala lï na yâ ti mbeni kete kodoro ti azo ti Samarie ti leke ye ndali ti lo. 53  Me ala yamba lo pëpe, ngbanga ti so lo zia lê ti lo ti gue na Jérusalem. 54  Tongana adisciple Jacques na Jean abâ ye so, ala tene: “Seigneur, mo ye e tene na wâ ti londo na yayu ti zu na ti futi ala?” 55  Me Jésus aturnê na lo suku na ala. 56  Na pekoni, ala gue na mbeni kete kodoro nde. 57  Tongana ala yeke na ndo ti lege na ala yeke gue, mbeni zo atene na lo: “Mbi yeke mû peko ti mo ande na ndo kue so mo yeke gue dä.” 58  Jésus atene na lo: “Anyama ti mungo kondo ayeke na adû ti ala, na andeke ti nduzu ayeke na ando ti wu tere ti ala dä. Me Molenge ti zo ayeke na mbeni ndo ti zia li ti lo dä pëpe.” 59  Na pekoni, lo tene na mbeni zo ni nde: “Mû peko ti mbi.” Zo ni atene: “Mo zia mbi gue mbi lu babâ ti mbi kozoni si.” 60  Me Jésus atene na lo: “Zia akuâ alu akuâ ti ala, me mo gue mo fa tënë ti royaume ti Nzapa.” 61  Nga, mbeni zo ni nde atene: “Seigneur, mbi yeke mû ande peko ti mo. Me mo zia mbi gue mbi bara azo ti da ti mbi si.” 62  Jésus atene na lo: “Zo so agbu charrue na lo bâ aye so ayeke na peko, lo lingbi na royaume ti Nzapa pëpe.”

Kete tënë