Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

Luc 8:1-56

8  Kete na pekoni, lo to nda ti tambela na yâ ti agbata oko oko nga na yâ ti akete kodoro oko oko, lo yeke fa tënë na lo yeke tene nzoni tënë ti royaume ti Nzapa. Na adisciple bale-oko na use ayeke na tere ti lo.  Ambeni wali ayeke nga dä so lo tomba asioni yingo na yâ ti ala na lo sava akobela ti ala: Marie so a iri lo zo ti Magdala, so asioni yingo mbasambala asigigi na yâ ti lo,  Jeanne wali ti Chuza, koli so abâ ndo na ndo ti aye ti Hérode, Suzanne nga na ambeni wali mingi. Awali so ayeke mû aye ti ala ti mû maboko na Jésus na adisciple ti lo nga.  Tongana ambeni zo mingi mingi abungbi legeoko na ala so alondo na yâ ti agbata oko oko si aga na tere ti lo, lo mû mbeni toli, lo tene:  “Mbeni zo ti lungo ye ague ti lu ngongoa ti kobe ti lo. Tongana lo yeke lu ni, mbeni mbage ni atï na tere ti lege, azo adö ni na andeke ti nduzu adë ni kue.  Mbeni mbage ni atï na ndo ti kota tênë. Na peko ti so a sigigi, a hule ngbanga ti so ngu ayeke na gere ni pëpe.  Mbeni mbage ni nga atï na popo ti akî, na akî ni so akono legeoko na ni apete ndo ni.  Mbeni mbage ni atï na ndo ti pendere sese. Na peko ti so a sigigi, a lë fani ngbangbo oko.” Tongana lo sara atënë so awe, lo dekongo, lo tene: “Zia zo so ayeke na mê ti mä amä.”  Me adisciple ti lo ato nda ti hunda lo na nda ti toli so. 10  Lo tene: “A mû lege na ALA ti gbu nda ti atënë ti royaume ti Nzapa so Nzapa ahonde nda ni. Me ti tanga ti azo ni, a yeke gi na lege ti atoli, tongaso si atâa so ala yeke bâ ndo, ala bâ ndo gbä, atâa so ala yeke mä ndo, ala lingbi ti mä yâ ni pëpe. 11  Nda ti toli ni ayeke so: Ngongoa ti kobe ni ayeke tënë ti Nzapa. 12  Ala so atï na tere ti lege ayeke azo so amä tënë ni, me na pekoni Zabolo aga na lo zi tënë ni na bê ti ala tongaso si ala mä na bê pëpe na a sö fini ti ala pëpe. 13  Ala so atï na ndo ti kota tênë ayeke azo so, tongana ala mä tënë ni, ala yeda na ni na ngia, me gunda ti ala ayeke dä pëpe. Ala mä na bê teti mbeni ngoi, me a si na ngoi ti tara, ala tï. 14  Âdu ti so atï na popo ti akî, a yeke azo so amä tënë ni, me teti so agingo bê, mosoro nga na angia ti gigi so asara si ala gue yongoro, a pete ndo ti ala biani biani na ala wara lege oko pëpe ti lë nzoni. 15  Âdu ti so atï na ndo ti nzoni sese, a yeke azo so, na peko ti so ala mä tënë ni na nzoni bê, ala bata ni na ala gbu ngangu na ngoi so ala yeke lë lengo. 16  “Tongana mbeni zo azia wâ na lampe awe, lo yeke kuku mbeni ta na ndo ni pëpe wala lo yeke zia lampe ni na gbe ti gbogbo pëpe. Me lo yeke zia ni na ndo ti ye ti yongo lampe tongaso si ala so ayeke lï na yâ ti da ni alingbi ti bâ lumière ni. 17  Teti ye kue so a honde ni fadeso, a yeke sigigi polele mbeni lâ. Nga, ye kue so a honde ndo ni ngangu, lakue azo ayeke hinga ni, na lakue a yeke sigigi. 18  Tongaso, ALA sara hange na lege so ALA yeke mä na tënë. Teti zo so ayeke na ye, fade a mû na lo mbeni na ndo ni. Me zo so ayeke na ye pëpe, même ye so lo bâ lo tene lo yeke na ni, fade a yeke zi ni na tïtî lo.” 19  Na pekoni, mama ti lo na aita ti lo aga na peko ti lo, me ala lingbi ti si na tere ti lo pëpe ngbanga ti gbâ ti azo so ayeke dä. 20  Tongaso, a tene na lo: “Mama ti mo na aita ti mo ayeke luti na gigi na ala ye ti bâ mo.” 21  Me lo kiri tënë na ala, lo tene: “Mama ti mbi na aita ti mbi ayeke ala so amä tënë ti Nzapa na asara ye alingbi na ni.” 22  Mbeni lâ, lo na adisciple ti lo ako na yâ ti mbeni ngö, na lo tene na ala: “Zia e fâ kota ngu ni e gue na mbage ni kâ.” Tongaso ala gue. 23  Me tongana ala yeke kpe na ngö ni ti gue, lo lango. Mbeni ngangu pupu aya na ndo ti ngu ni, na ala to nda ti lï ngu na ala yeke na yâ ti kpale. 24  Tongaso ala gue ala zingo lo, ala tene: “Wafango ye, Wafango ye, e yeke kui!” Lo zingo, lo suku na pupu ni nga na mapo ni so alondo mingi na a kaï, nga ndo adë ngii. 25  Na pekoni, lo tene na ala: “Mabe ti ALA ayeke na ndo wa?” Me mbeto agbu ala, li ti ala akpe na ala yeke tene na popo ti ala: “So zo wa la tongaso? Lo mû yanga même na pupu nga na ngu na ala mä yanga ti lo.” 26  Na ala si na yanga ti ngu na kodoro ti azo ti Gérasa so abâ ndo lê na lê na Galilée. 27  Me na ngoi so Jésus ayeke zu na sese, mbeni koli ti gbata ni so asioni yingo ayeke na yâ ti lo atingbi na lo. A ninga mingi awe si koli so ayeke yü bongo pëpe na lo yeke duti na yanga-da pëpe, me lo yeke gi na popo ti adû ti kuâ. 28  Tongana lo bâ Jésus, lo dekongo na kota go, lo tï na gbele Jésus, na lo tene na kota go: “Jésus, Molenge ti Nzapa so ayeke na nduzu na ndo ti aye kue, ti mo na mbi nyen? Mbi voro mo, mo sara pasi na mbi pëpe.” 29  (Teti Jésus ayeke mû yanga fade na sioni yingo so ti sigigi na yâ ti koli ni. A ninga awe si sioni yingo so angbâ na yâ ti lo. Nga fani mingi, a kanga maboko na gere ti lo na zingiri na a zia zo ti sara sinziri na tere ti lo. Me lo yeke fâ yâ ni nga sioni yingo so ayeke gue na lo na mbeni ndo so azo ayeke dä pëpe.) 30  Jésus ahunda lo: “Iri ti mo nyen?” Lo tene: “Légion,” ngbanga ti so asioni yingo mingi si alï na yâ ti lo. 31  Asioni yingo ni angbâ ti voro yanga na Jésus ti mû yanga na ala pëpe ti gue na yâ ti kota dû so alï mingi. 32  Gbâ ti agaduru ayeke te kobe kâ na ndo ti hoto. Tongaso, ala voro yanga na lo ti mû lege na ala ti lï na yâ ti agaduru so. Na lo zia lege na ala ti gue. 33  Tongaso, asioni yingo so asigigi na yâ ti koli ni, ala gue alï na yâ ti agaduru ni, na agaduru ni alondo na loro na li ti hoto ni atï na yâ ti ngu-lende ni, na ala nyon ngu ala kui. 34  Me tongana azo ti batango agaduru ni abâ ye so asi, ala kpe ala gue asara tënë ni na yâ ti gbata ni nga na akete kodoro ni. 35  Na pekoni, azo asigigi ti bâ ye so asi. Ala ga na tere ti Jésus na ala wara koli ni so asioni yingo asigigi na yâ ti lo, lo yü bongo nga li ti lo aga nzoni awe, na lo yeke duti na sese na gere ti Jésus; na mbeto agbu ala. 36  Ala so abâ fade ye ni afa na azo so aga tongana nyen koli so asioni yingo ayeke fade na yâ ti lo aga nzoni. 37  Nda ni la, gbâ ti azo ti ando so angoro kodoro ti azo ti Gérasa ahunda na lo ti zia ndo ni ti hon, teti mbeto agbu ala mingi. Tongaso lo ko na yâ ti ngö ni, lo hon. 38  Me, koli so asioni yingo asigigi na yâ ti lo angbâ ti voro Jésus ti mû peko ti lo. Me Jésus atene na lo ti gue, lo tene: 39  “Mo kiri na kodoro na mo ngbâ ti fa tënë ti aye so Nzapa asara na mo so.” Ni la, koli ni ague, lo fa na yâ ti kodoro ni kue tënë ti aye so Jésus asara na lo. 40  Tongana Jésus akiri, gbâ ti azo ayamba lo nzoni ngbanga ti so ala kue ayeke ku lo kungo. 41  Me bâ, mbeni koli so iri ti lo ayeke Jaïrus aga, koli so ayeke mbeni mokonzi ti synagogue. Lo tï na gere ti Jésus na lo to nda ti voro yanga na Jésus ti lï na da ti lo, 42  ngbanga ti so gi oko molenge ti lo ti wali so lo dü, so ayeke na ngu bale-oko na use tongaso, ayeke nduru ti kui. Tongana Jésus ayeke gue, gbâ ti azo ayeke pete lo mbage na mbage. 43  Na mbeni wali so ayeke na kobela so asara si mênë ayeke ga na tere ti lo mingi a sara ngu bale-oko na use, so mbeni zo awara lege pëpe ti kaï kobela ti lo, 44  aga na mbage ti peko ti Jésus na lo ndu yanga ti bongo ti lo ti ndo ni. Gi na lê ni lê ni, mênë so ayeke ga na tere ti lo akaï. 45  Tongaso, Jésus atene: “Zo wa la andu mbi so, zo wa?” Tongana azo kue atene a yeke ala pëpe, Pierre atene: “Wafango ye, gbâ ti azo angoro mo na ala yeke pete mo mbage na mbage.” 46  Me Jésus atene: “Mbeni zo andu mbi, teti mbi bâ so ngangu asigigi na tere ti mbi.” 47  Tongana wali ni abâ so lo lingbi ti honde tere ti lo pëpe, so tere ti lo ayeke dö, lo ga lo tï na gbe ti Jésus na lo fa na lê ti azo ni kue nda ni so lo ndu Jésus nga tongana nyen tere ti lo akaï gi na lê ni lê ni. 48  Jésus atene na lo: “Molenge ti mbi, mabe ti mo asava mo awe. Mo gue na siriri.” 49  Tongana lo ngbâ ti sara tënë, mbeni zo ti da ti mokonzi ti synagogue ni aga, na lo tene: “Molenge ti mo ti wali ni akui awe. Mo zia ti son li ti wafango ye.” 50  Me tongana Jésus amä tënë so, lo kiri tënë na lo: “Sara mbeto pëpe. Duti gi na mabe, na fade a sö molenge-wali ni.” 51  Na ngoi so lo si na yanga-da ni, lo zia lege na mbeni zo nde pëpe ti lï legeoko na lo, gi Pierre, Jean, Jacques na babâ na mama ti molenge ni. 52  Me azo kue ayeke toto na ayeke pika tere ti ala ti sara vundu ndali ti molenge-wali ni. Tongaso, Jésus atene: “ALA kaï toto ni, ngbanga ti so molenge ni akui pëpe, me lo yeke lango.” 53  Na ndo ti tënë so, ala to nda ti he lo na ti zere lo ngbanga ti so ala hinga so molenge ni akui awe. 54  Me lo gbu maboko ti molenge-wali ni, lo tene: “Molenge-wali, londo!” 55  Yingo ti lo akiri dä, na lo londo na lê ni lê ni. Jésus amû yanga ti tene a mû na lo mbeni ye lo te. 56  Li ti babâ na mama ti molenge-wali ni akpe kue. Me Jésus awa ala ti sara tënë ti ye so asi so na mbeni zo pëpe.

Kete tënë