Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Luc 7:1-50

7  Tongana lo hunzi ti sara atënë ti lo kue na mê ti azo ni awe, lo lï na Capernaüm.  Ngbâa ti mbeni turugu ti kota kamba, so turugu ni aye lo mingi, ayeke na kobela na lo yeke nduru ti kui.  Tongana lo mä sango ti Jésus, lo tokua ambeni ancien ti aJuif ti hunda na Jésus ti ga ti sava ngbâa ti lo.  Azo so lo tokua ala asi na Jésus na ala to nda ti voro yanga mingi na lo, ala tene: “Lo lingbi biani ti tene mo sara ye so ndali ti lo,  ngbanga ti so lo ye mara ti e mingi, na a yeke lo si asara na e synagogue so.”  Tongaso Jésus ague legeoko na ala. Me tongana Jésus asi nduru na da ni, turugu ti kota kamba ni atokua akamarade ti lo kozo awe ti tene na lo: “Kota zo, mo bâ pasi senge senge pëpe, ngbanga ti so mbi lingbi pëpe ti tene mo lï na yâ ti da ti mbi.  Ndani la, mbi bâ tere ti mbi so mbi lingbi pëpe ti gue na tere ti mo. Me mo sara tënë, na zia tere ti zo ti kua ti mbi akaï.  Teti mbi kue mbi yeke zo so ayeke na gbe ti komandema ti mbeni zo, na mbi yeke na aturugu na gbe ti mbi nga. Tongana mbi tene na lo so: ‘Gue kâ!’ lo yeke gue. Na mbeni nde, mbi tene: ‘Ga!’ lo yeke ga. Na tongana mbi tene na ngbâa ti mbi: ‘Sara ye so!’ lo yeke sara ni.”  Biani, tongana Jésus amä tënë so, bê ti lo apika na tere ti koli so, lo turnê na mbage ti gbâ ti azo so amû peko ti lo na lo tene: “Mbi tene na ALA: Même na popo ti azo ti Israël, mbi de mbi wara mbeni zo na mara ti kota mabe tongaso pëpe.” 10  Tongana azo so turugu ni atokua ala akiri na yanga-da, ala wara ngbâa so na nzoni tere. 11  Kete na peko ti ye so, lo gue na mbeni gbata so a iri ni Naïn, na adisciple ti lo nga na azo mingi mingi ayeke gue legeoko na lo. 12  Tongana lo si nduru na yanga ti gbata ni, bâ, a yô kuâ ti mbeni koli a yeke sigigi na ni. Lo yeke gi oko molenge ti mama ti lo. Na ndo ni, mama ni ayeke womua. Azo mingi mingi so alondo na yâ ti gbata ni ayeke nga na tere ti womua so. 13  Na ngoi so lê ti Seigneur atï na ndo ti lo, mawa ti womua so asara lo na lo tene na lo: “Kaï toto ni.” 14  Na ndo ti ye so, lo pusu nduru na lo ndu gbogbo ti kuâ ni, na azo so ayô ni aluti. Na lo tene: “Maseka-koli, mbi tene na mo: Londo!” 15  Na kuâ ni alondo, lo duti, na lo to nda ti sara tënë. Na Jésus amû lo na mama ti lo. 16  Mbeto agbu ala kue, na ala to nda ti mû gloire na Nzapa, ala tene: “A yä mbeni kota prophète na popo ti e.” Ala tene nga: “Nzapa abi lê ti lo na mbage ti mara ti lo.” 17  Na sango ti lo amû yâ ti Judée kue nga na ando kue so ayeke na tere ni. 18  Adisciple ti Jean afa peko ti aye so kue na lo. 19  Tongaso, Jean airi adisciple ti lo use na lo tokua ala na Seigneur ti hunda lo: “Mo yeke Lo so ayeke ga? Wala a lingbi e ku mbeni zo nde?” 20  Tongana akoli so asi na Jésus, ala tene: “Jean Baptiste atokua e ti hunda mo: ‘Mo yeke Lo so ayeke ga? Wala a lingbi e ku mbeni zo nde?’ ” 21  Na ngbonga ni so, lo sava azo mingi so ayeke na akobela, asioni kobela na asioni yingo nga lo sara si awaziba mingi awara lege ti bâ ndo. 22  Jésus akiri tënë na adisciple use so, lo tene: “ALA gue, ALA fa na Jean peko ti ye so ALA bâ na ALA mä: Awaziba ayeke bâ ndo, azo so gere ti ala abuba ayeke tambela nzoni, a sara si tere ti azo ti buruma aga nzoni, azo so mê ti ala akanga ayeke mä ndo, a yeke zingo akuâ, na a yeke fa nzoni tënë na awayere. 23  Ngia ayeke na lo so abâ pëpe na mbage ti mbi mbeni ye so asara si lo pika gere ti lo.” 24  Tongana azo so Jean atokua ala ahon awe, Jésus ato nda ti sara tënë ti Jean na gbâ ti azo so, lo tene: “ALA gue lani na yando ti bâ nyen? Ti bâ mbeni sosongo so pupu ayengi ni? 25  ALA gue lani ti bâ nyen mbilimbili? Ti bâ mbeni koli so ayü apendere bongo ti ndo ni? Bâ, ala so ayeke yü apendere bongo nga so aduti na yâ ti mosoro ayeke na yâ ti ada ti agbia. 26  Tongaso, ALA gue lani ti bâ nyen? ALA gue ti bâ mbeni prophète? Biani, mbi tene na ALA, a yeke mbeni prophète, na lo hon même mbeni prophète. 27  A yeke lo so a sara tënë ti lo na Mbeti ti Nzapa, a tene: ‘Bâ, mbi yeke tokua watokua ti mbi kozo ti mo, fade lo yeke leke lege ti mo ti tene mo hon dä!’ 28  Mbi tene na ALA: Na popo ti azo so awali adü ala, mbeni oko ti duti kota ahon Jean ayeke dä pëpe. Me mbeni zo so ayeke kete na yâ ti royaume ti Nzapa ayeke kota ahon lo.” 29  (Tongana azo kue nga na azo ti rongo nginza ti lapo amä tënë so, ala tene Nzapa ayeke mbilimbili. Ala yeke azo so a batize ala na batême ti Jean. 30  Me aFarizien nga na ala so ahinga tënë ti Ndia mingi ake wango so Nzapa amû na ala. Ala yeke azo so Jean abatize ala pëpe.) 31  “Fade mbi haka azo ti ngoi so na azo wa? Na ala yeke tongana azo wa? 32  Ala yeke tongana akete molenge so aduti na gara na ala yeke dekongo na amba ti ala na popo ti ala, ala tene: ‘E huru flûte na ALA, me ALA dodo pëpe. E dema tere ti e na kongo, me ALA toto pëpe.’ 33  Legeoko nga, Jean Baptiste aga, lo te mapa pëpe na lo nyon vin pëpe. Me ALA tene: ‘Sioni yingo ayeke na yâ ti lo.’ 34  Molenge ti zo aga, lo te kobe na lo nyon ye, me ALA tene: ‘Bâ, so zo ti tengo ye na zo ti nyongo vin ahon ndo ni! Lo yeke kamarade ti azo ti rongo nginza ti lapo na ti awasiokpari!’ 35  Me, a yeke hinga so ndara ayeke mbilimbili na lege ti aye ti peko ti kusala ti lo.” 36  Mbeni Farizien ayeke hunda lo lakue ti ga ti te kobe na da ti lo. Tongaso, lo lï na da ti Farizien ni na lo duti na tere ti table ti te kobe. 37  Bâ, mbeni wali so azo ahinga lo na yâ ti gbata ni tongana wasiokpari amä so Jésus ayeke te kobe na da ti Farizien so. Lo ga na mbeni ngbenda ti mbeni mafuta so a zia yombo dä, 38  lo duti na peko ti Jésus, na tere ti gere ti lo, lo toto na lo zia si ngu ti lê ti lo ayuru na ndo ti gere ti Jésus na lo yeke mbô ni na kuä ti li ti lo. Nga, lo hunu gere ti Jésus na lo sara mafuta ni dä. 39  Tongana Farizien so atisa Jésus abâ ye so, lo sara tënë so na yâ ti bê ti lo: “Tongana koli so ayeke prophète, ka lo yeke hinga zo so ayeke ndu lo so, nga lo yeke hinga wala wali so ayeke tongana nyen, so ti tene wasiokpari.” 40  Me Jésus atene na lo: “Simon, mbi yeke na mbeni tënë ti tene na mo.” Lo tene: “Wafango ye, sara tënë ni!” 41  “Kuda ti mbeni zo ayeke na li ti akoli use. Kuda ti oko ayeke denier ngbangbo oku, me ti mbeni ayeke denier bale-oku. 42  Tongana ala yeke na ye pëpe ti futa na ni, lo sara nzoni bê, lo zi kuda ni na li ti ala use kue. Tongaso, na popo ti ala use so, zo wa la ayeke ndoye wa ti kuda ni mingi?” 43  Simon akiri tënë, lo tene: “Mbi bâ so a yeke lo so wa ti kuda ni asara nzoni bê azi gbâ ti kuda na li ti lo.” Jésus atene na lo: “Mo bâ ye ni na lege ni.” 44  Na ndo ti tënë so, Jésus aturnê na mbage ti wali ni na lo tene na Simon: “Mo bâ wali so? Mbi lï na da ti mo, mo mû na mbi ngu ti sukula na gere ti mbi pëpe. Me wali so asara si ngu ti lê ti lo ayuru na ndo ti gere ti mbi na lo mbô ni na kuä ti li ti lo. 45  Mo su ngbangba ti mbi pëpe. Me wali so, ngbene ye so mbi lï na da so, lo zia pëpe ti hunu gere ti mbi. 46  Mo sara mafuta na li ti mbi pëpe, me wali so asara mafuta so a zia yombo dä na gere ti mbi. 47  Ndali ti nzoni ye so, mbi tene na mo, atâa so asiokpari ti lo ayeke mingi, a pardone ni awe ngbanga ti so lo ndoye zo mingi. Me zo so a pardone lo mingi pëpe, lo ndoye zo mingi nga pëpe.” 48  Na pekoni, Jésus atene na wali so: “A pardone asiokpari ti mo awe.” 49  Na ndo ti tënë so, ala so ayeke te kobe legeoko na lo na table ni ato nda ti tene na yâ ti bê ti ala: “Koli so ayeke zo wa si même lo yeke pardone asiokpari?” 50  Me lo tene na wali ni: “Mabe ti mo asö mo awe. Mo gue na siriri.”

Kete tënë