Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Luc 6:1-49

6  Na mbeni lâ ti sabbat, Jésus ayeke hon na yâ ti ayaka ti blé, na adisciple ti lo ayeke ko alê ti blé, ala yeke foro ni na yâ ti maboko ti ala na ala yeke te.  Tongana ambeni Farizien abâ ye so, ala tene: “Ngbanga ti nyen ALA yeke sara ye so ndia amû lege na zo pëpe ti sara ni na lâ ti sabbat?”  Me Jésus akiri tënë na ala, lo tene: “ALA diko lâ oko pëpe tënë ti ye so David asara lani na ngoi so nzara asara lo na azo ti lo?  Lo lï na yâ ti da ti Nzapa na a mû na lo amapa so a zia na gbele Nzapa si lo te ni na lo mû mbeni na azo so ayeke na tere ti lo. Me ndia amû lege na zo oko pëpe ti te amapa so, a mû lege gi na aprêtre ti te ni.”  Na lo tene na ala: “Molenge ti zo ayeke Seigneur ti sabbat.”  Na mbeni lango ti sabbat nde, lo lï na yâ ti synagogue na lo to nda ti fa ye na azo. Kâ, mbeni koli ayeke dä so maboko ti lo ti koli abuba.  Lê ti ascribe na aFarizien ayeke gi na tere ti lo ti bâ wala lo yeke sava zo na lâ ti sabbat, tongaso si ala wara mbeni tënë ti bi na li ti lo.  Me Jésus ahinga atënë so ayeke na yâ ti bê ti ala, tongaso lo tene na koli so maboko ti lo abuba so: “Londo mo luti na popo ti e ge.” Na koli ni alondo lo luti.  Na pekoni, Jésus atene na ala: “Mbi yeke hunda ALA: Na lâ ti sabbat, ndia amû lege na zo ti sara mbeni ye ti nzoni wala ti sara mbeni ye ti sioni? ti sö mbeni âme wala ti fâ lo?” 10  Na peko ti so Jésus ayô lê ti lo si lo bâ ala kue, lo tene na koli ni: “Yôro yâ ti maboko ti mo.” Na koli ni ayôro ni, na a kiri a ga nzoni. 11  Me ngonzo agbu ala mingi, si na popo ti ala, ala to nda ti sara tënë ti ye so ala lingbi ti sara na Jésus. 12  Na yâ ti alango ni so, lo gue na li ti hoto ti sambela, na lo sambela Nzapa na bï ni so kue. 13  Me tongana ndo ahan awe, lo iri adisciple ti lo na lo soro ambeni bale-oko na use na popo ti ala, so lo di iri ti ala nga “abazengele”: 14  Simon, so lo mû na lo nga iri ti Pierre, na ita ti lo André, Jacques na Jean, Philippe na Barthélemy, 15  Matthieu na Thomas, Jacques molenge ti Alphée, na Simon lo so a di iri ti lo “zo so ayapu na sarango ye,” 16  Judas molenge ti Jacques nga Judas Iscariote, so lo ga zo ti kango zo. 17  Lo na ala azu legeoko, na lo ngbâ na mbeni ndo so ayeke kpangbala, na gbâ ti adisciple ti lo ayeke dä. Nga azo mingi mingi so alondo na yâ ti Judée kue, na Jérusalem nga na akodoro ti Tyr na ti Sidon so ayeke na yanga ti ngu, aga ti mä tënë ti lo na ti tene lo sava akobela ti ala. 18  Même azo so asioni yingo asara pasi na ala, lo sava ala. 19  Gbâ ti azo ni kue ayeke gi lege ti ndu lo, ngbanga ti so ngangu ayeke sigigi na tere ti lo na ayeke sava ala kue. 20  Lo yô lê ti lo, lo bâ adisciple ti lo na lo to nda ti sara tënë, lo tene: “Ngia ayeke na ALA awayere, teti royaume ti Nzapa ayeke ti ALA. 21  “Ngia ayeke na ALA, atâa so nzara ayeke sara ALA fadeso, teti yâ ti ALA ayeke si ande. “Ngia ayeke na ALA, atâa so ALA yeke toto fadeso, teti ALA yeke he ngia ande. 22  “Ngia ayeke na ALA, atâa azo ake ALA, atomba ALA, azonga ALA na abuba iri ti ALA a tene ALA yeke asioni zo ngbanga ti Molenge ti zo. 23  Na lango ni so ALA duti na ngia na ALA huru, teti bâ, futa ti ALA ayeke kota na yayu, teti a yeke oko ye so akotara ti azo so ayeke sara lani na aprophète. 24  “Me mawa na ALA azo ti mosoro, teti ALA wara ti ALA dengo bê ni kue awe. 25  “Mawa na ALA, ALA so yâ ti ALA asi fadeso, teti nzara ayeke sara ALA ande. “Mawa na ALA, ALA so ayeke he ngia fadeso, teti ALA yeke duti ande na vundu na ALA yeke toto. 26  “Mawa na ALA tongana azo kue ayeke sara nzoni tënë ti ALA, teti a yeke lani mara ti ye so si akotara ti azo so asara na aprophète ti wataka. 27  “Me mbi tene na ALA so ayeke mä mbi so: ALA ngbâ ti ndoye awato ti ALA na ti sara ye ti nzoni na azo so ake ALA, 28  ti iri tënë nzoni na ndo ti azo so ayeke deba ALA, ti sambela ndali ti azo so ayeke zonga ALA. 29  Zo so apika mbage ti ngbangba ti mo, dengi na lo mbage ni nga. Na zo so amû bongo ti mo ti ndo ni, mo gbanzi na lo pëpe même bongo ti mo ti yâ ni. 30  Mû ye na zo kue so ahunda ni na mo, na zo so amû aye ti mo ahon na ni, mo hunda lo pëpe ti kiri na ni. 31  “Nga, gi tongana ti so ALA ye azo asara na ALA, ALA sara tongaso na azo ni nga. 32  “Tongana ALA ndoye gi azo so andoye ALA, ye ti nzoni wa ALA wara na pekoni? Teti même awasiokpari andoye azo so ayeke ndoye ala. 33  Na tongana ALA sara ye ti nzoni gi na azo so asara ye ti nzoni na ALA, biani, ye ti nzoni wa ALA wara na pekoni? Même awasiokpari kue asara tongaso. 34  Nga, tongana ALA sara bon na azo so ALA ku ti tene azo ni akiri na ni, ye ti nzoni wa ALA wara na pekoni? Même awasiokpari asara bon na amba ti ala awasiokpari na amba ti ala ni akiri gi na oko ye ni. 35  Nde na so, ALA ngbâ ti ndoye awato ti ALA, ti sara ye ti nzoni nga ti sara bon, na ALA ku mbeni ye na pekoni pëpe. Fade futa ti ALA ayeke duti kota, na ALA yeke ga ande amolenge ti Lo so ayeke na nduzu na ndo ti aye kue, teti lo yeke sara nzoni na azo so ayeke kiri singila pëpe nga na azo ti sioni. 36  ALA ngbâ ti sara nzoni bê na azo gi tongana ti so Babâ ti ALA ayeke sara nzoni bê na azo. 37  “Nga, ALA zia ti fâ ngbanga na li ti azo, na fade a yeke fâ ngbanga na li ti ALA oko pëpe. ALA zia ti dë sioni ngbanga na li ti azo, na fade a yeke dë sioni ngbanga na li ti ALA oko pëpe. ALA ngbâ ti zi tënë na li ti azo, na fade a yeke zi tënë na li ti ALA. 38  ALA mû ye lakue na azo, na azo ayeke mû ande ye na ALA. Fade a haka ye nzoni, a pete ndo ni, a yengi ni, ye ni asi na ayeke tuku tukungo na sese, si a tuku ni na yanga ti bongo ti ALA. Teti a yeke oko ye so ALA mû ti haka na ye na azo si a yeke mû ande ti haka na ye na ALA.” 39  Na pekoni, lo mû mbeni tapande na ala, lo tene: “Mbeni waziba alingbi ti fa lege na mba ti lo waziba? Ala use kue ayeke tï ande na dû pëpe? 40  Zo ti mandango ye ahon wafango ye na lo pëpe, me zo kue so a fa ye na lo nzoni mingi, lo yeke ga ande tongana wafango ye na lo. 41  Ngbanga ti nyen mo yeke bâ kete pere so ayeke na yâ ti lê ti ita ti mo, me mo bâ pëpe kota keke so ayeke na yâ ti lê ti mo wani? 42  Tongana nyen si mo lingbi ti tene na ita ti mo: ‘Ita ti mbi, zia mbi zi kete pere so ayeke na yâ ti lê ti mo,’ me na oko ngoi ni, mo wani mo yeke bâ pëpe kota keke so ayeke na yâ ti lê ti mo? Mo wahandango lê ti zo! Mo zi kozoni kota keke so ayeke na yâ ti lê ti mo wani, si na pekoni mo bâ polele tongana nyen ti zi kete pere so ayeke na yâ ti lê ti ita ti mo. 43  “Mbeni nzoni keke so ayeke lë sioni lê ti keke ayeke dä pëpe, nga mbeni sioni keke so ayeke lë nzoni lê ti keke ayeke dä pëpe. 44  A yeke hinga keke oko oko na lege ti lengo ti lo. Na tapande, azo ako lê ti figue na yâ ti kî pëpe wala lê ti vigne na yâ ti keke ti sisi pëpe. 45  Zo ti nzoni asigigi na aye ti nzoni so ayeke na yâ ti nzoni mosoro ti yâ ti bê ti lo. Me zo ti sioni asigigi na aye ti sioni so ayeke na yâ ti sioni mosoro ti lo. Teti a yeke tënë so asi yâ ti bê ti lo si ayeke sigigi na yanga ti lo. 46  “Ngbanga ti nyen si ALA yeke iri mbi ‘Seigneur! Seigneur!’ me ALA yeke sara pëpe aye so mbi tene? 47  Zo kue so aga na mbi na lo mä atënë ti mbi nga lo sara ye alingbi na ni, fade mbi yeke fa na ALA zo so lo kpa lo: 48  Lo kpa mbeni zo so ayeke leke da, lo zi dû alï na lo zia gere ti da ni na ndo ti kota tênë. Na pekoni, tongana ngu asuku, bale asua na ngangu na apika tere ti da ni, me ngangu ti bale ni alingbi pëpe ti yengi da ni ngbanga ti so a leke ni nzoni. 49  Na mbeni mbage, zo so amä tënë ti mbi si lo sara ye alingbi na ni pëpe, lo kpa mbeni zo so aleke da na ndo ti sese, me lo zia gere ti da ni pëpe. Na bale asua na ngangu na apika tere ti da ni, na hio da ni atuku na sese, si a futi kue.”

Kete tënë