Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Luc 24:1-53

24  Me na kozo lango ti yenga ni, na kota ndapre ala gue na yanga ti dû ti kuâ ni. Ala mû a-épice so ala leke ni awe.  Ye oko, ala bâ so a pusu tênë so ayeke fade na yanga ti sende ti kuâ ni awe,  na tongana ala lï na yâ ni, ala wara kuâ ti Seigneur Jésus pëpe.  Na ngoi so li ti ala akpe ndali ti ye so, bâ, akoli use so ayü bongo so aza zango aluti na tere ti ala.  Mbeto agbu awali so na ala bi lê ti ala na sese. Akoli so atene na ala: “Ngbanga ti nyen ALA yeke gi Lo so ayeke na fini na popo ti azo so akui awe?  [[Lo yeke ge pëpe, me a zingo lo na kuâ awe.]] ALA dabe ti ALA na ye so lo tene na ALA na ngoi so lo de lani na Galilée,  lo tene so a lingbi a zia Molenge ti zo na maboko ti awasiokpari na a kanga lo na ndo ti keke si lo kui. Me na ota lango ni, lo yeke zingo na kuâ.”  Tongaso, ala dabe ti ala na atënë ti lo so.  Ala zia sende ti kuâ ni, ala kiri ala fa peko ti aye so kue na adisciple bale-oko na oko nga na tanga ti adisciple ni kue. 10  Awali so ayeke Marie ti Magdala, Jeanne nga na Marie mama ti Jacques. Nga, tanga ti awali ni so ayeke na tere ti ala ayeke fa peko ti aye so na abazengele. 11  Me, ala bâ ti ala atënë so gi tongana asenge tënë na ala ke ti yeda na tënë ti awali ni. 12  [[Me Pierre alondo, lo kpe loro lo si na yanga ti sende ti kuâ ni, lo dengi ti bâ ndo na yâ ni, lo bâ gi abongo so a kanga lani na kuâ ni. Tongaso, lo hon na lo gi li ti lo gbä na ye so asi.]] 13  Me, gi na lango ni so, adisciple use ayeke tambela ti gue na mbeni kete kodoro so ayo kilomètre bale-oko na oko tongaso na Jérusalem. Iri ti kete kodoro so ayeke Emmaüs. 14  Ala yeke sara tënë na popo ti ala na ndo ti aye kue so asi. 15  Tongana ala yeke sara lisoro nga ala yeke pika patara na popo ti ala, Jésus aga nduru na lo to nda ti tambela legeoko na ala. 16  Me lê ti ala azi pëpe ti hinga lo. 17  Lo tene na ala: “Atënë wa si ALA yeke pika patara na ndo ni na popo ti ALA tongana ALA yeke tambela so?” Ala luti na lê ti ala ayeke na vundu. 18  Mbeni oko ni so iri ti lo ayeke Cléopas akiri tënë na lo atene: “Mo yeke ti mo wande na Jérusalem, so aduti nde na tanga ti azo, si mo hinga pëpe aye so asi na yâ ni na yâ ti alango so?” 19  Lo hunda ala: “Aye wa?” Ala tene na lo: “Aye so andu Jésus, zo ti Nazareth, so aga ngangu prophète na gbele Nzapa nga na azo kue na lege ti kusala nga na tënë ti yanga ti lo, 20  nga tongana nyen aprêtre-mokonzi nga na amokonzi ti e ague na lo si a fâ ngbanga ti kuâ na li ti lo na a kanga lo na ndo ti keke. 21  Me e yeke fade na beku so koli so ayeke lo so a fa lo kozo awe ti zi azo ti Israël. Na ndo ni kue, e yeke na ota lango ni la ngbene ye so aye ni asi. 22  Nga, ambeni wali na popo ti e asara si li ti e akpe ngbanga ti so ala gue na sende ti kuâ ni na kota ndapre, 23  me ala wara kuâ ti lo pëpe, na ala ga ala tene so ala bâ nga mbeni ye ti ndima: a-ange so atene na ala atene lo yeke na fini. 24  Na ndo ni, ambeni zo na popo ti e ague na sende ti kuâ ni, ala wara ni gi tongana ti so awali so atene, me ala bâ lo pëpe.” 25  Tongaso, lo tene na ala: “ALA, azo so ndara amanke ala nga so bê ti ala ayeda hio pëpe na aye kue so aprophète atene giriri! 26  A lingbi Christ abâ pasi ti aye so pëpe si lo wara gloire ti lo?” 27  A londo na Moïse nga na ambeti ti aProphète kue, lo fa na ala, na yâ ti Mbeti ti Nzapa kue, nda ti aye so andu lo. 28  Na pekoni ala ga nduru na kete kodoro so ala yeke gue dä, na lo sara ye mo bâ mo tene lo ye ti hon hongo. 29  Me ala gbanzi lo, ala tene: “Mo ngbâ na e teti lakui aga nduru, nga e si na nda ti lango ni awe.” Na ndo ti tënë so, lo lï ti duti na ala. 30  Tongana lo na ala ayeke na tere ti table ti te kobe, lo mû mapa, lo iri tënë nzoni na ndo ni, lo fâ yâ ni na lo to nda ti mû ni na ala. 31  A yeke na ndo ti ye so si lê ti ala aga ti zi kue na ala hinga lo. Me lo girisa na lê ti ala. 32  Na ala tene na popo ti ala: “Na ngoi so lo yeke sara fade tënë na e na lege, nga so lo yeke zi nda ti Mbeti ti Nzapa kue na e, tënë ni ayeke ndu fade bê ti e mingi pëpe?” 33  Gi na ngbonga ni so, ala londo na ala kiri na Jérusalem. Ala wara adisciple bale-oko na oko nga na azo so abungbi legeoko na adisciple ni, 34  so ayeke tene: “Ti tâ tënë ni, a zingo Seigneur na kuâ awe na lo si na Simon!” 35  Fadeso ala wani afa peko ti aye so asi na ala na ndo ti lege nga tongana nyen ala hinga lo na lege so lo fâ yâ ti mapa ni. 36  Na ngoi so ala ngbâ ti sara tënë ti aye so, Jésus aga aluti na popo ti ala, [[na lo tene na ala: “Siriri aduti na ALA.”]] 37  Me ngbanga ti so mbeto ahon ndo ti ala, na tere ti ala adö fade mingi, ala bâ ti ala atene ala bâ mbeni yingo. 38  Tongaso lo tene na ala: “Ngbanga ti nyen li ti ALA aga kirikiri, nga ngbanga ti nyen kite ayeke na bê ti ALA? 39  ALA bâ maboko ti mbi nga na gere ti mbi, so mbi la. ALA ndu mbi ALA bâ, ngbanga ti so mbeni yingo ayeke na mitele nga na bio pëpe tongana ti so ALA bâ mbi yeke na ni so.” 40  [[Na ngoi so lo yeke sara tënë so, lo fa maboko nga na gere ti lo na ala.]] 41  Me teti so ala yeke na ngia mingi si ala de ti mä na bê na lo pëpe nga so li ti ala angbâ ti kpe, lo tene na ala: “ALA yeke na mbeni ye ti tengo ni ge?” 42  Tongaso ala mû na lo mbeni nduru zongo susu. 43  Lo mû ni na lo te ni na lê ti ala. 44  Na pekoni, lo tene na ala: “ALA dabe ti ALA na ngoi so mbi yeke lani na tere ti ALA, mbi tene so a lingbi aye kue so a sû ni ândö na ndo ti mbi na yâ ti ndia ti Moïse, na yâ ti ambeti ti aProphète nga na aPsaume aga tâ tënë.” 45  Na lo zi lege ti hingango ndo ti ala kue ti gbu nda ti Mbeti ti Nzapa. 46  Na lo tene na ala: “A yeke tongaso si a sû tënë ni na yâ ti Mbeti ti Nzapa, so Christ ayeke bâ pasi na lo yeke zingo na popo ti akuâ na ota lango ni, 47  si na lege ti iri ti lo a fa na amara kue tënë ti changengo bê ti wara pardon ti asiokpari. Ti londo na Jérusalem, 48  a lingbi ALA duti atémoin ti aye so. 49  Bâ, mbi yeke tokua na ndo ti ALA ye so Babâ ti mbi amû zendo ni. Me, ti ALA, ALA ngbâ na yâ ti gbata ni juska ALA wara ngangu so alondo na nduzu.” 50  Lo gue na ala juska na Béthanie, na lo yô maboko ti lo na nduzu lo iri tënë nzoni na ndo ti ala. 51  Na ngoi so lo yeke iri tënë nzoni na ndo ti ala, a zi lo na tere ti ala na a to nda ti gue na lo na yayu. 52  Ala ba li ti ala na gbe ti lo na ala kiri na Jérusalem na kota ngia. 53  Ala yeke lakue na yâ ti temple na sepelango Nzapa.

Kete tënë