Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

Luc 23:1-56

23  Tongaso, gbâ ti azo ni kue alondo na ala gue na Jésus na Pilate.  Ala to nda ti bi tënë na li ti lo, ala tene: “E wara koli so, lo yeke bi wusuwusu na yâ ti mara ti e, lo yeke kanga lege na azo ti futa lapo na César nga lo tene lo yeke Christ, mbeni gbia.”  Na Pilate ahunda lo na tënë so: “Mo yeke gbia ti aJuif?” Lo kiri tënë na lo, lo tene: “Mo wani mo tene awe.”  Na pekoni, Pilate atene na aprêtre-mokonzi nga na gbâ ti azo ni: “Mbi wara mbeni ye ti sioni na mbage ti koli so pëpe.”  Me ala luti na ndo ti tënë ni, ala tene: “Lo yeke pusu azo ti londo ti sara ye kirikiri na lege ti fango ye ti lo na yâ ti Judée kue, même a londo na Galilée ti si ge.”  Tongana lo mä tënë so, Pilate ahunda wala koli so ayeke mbeni zo ti Galilée.  Na tongana lo hinga mbilimbili awe so Jésus ayeke ti ndo so Hérode akomande na ndo ni, lo tokua lo na Hérode so ayeke nga na Jérusalem na ngoi ni so.  Tongana Hérode abâ Jésus, tere ti lo anzere mingi teti a ninga awe so lo ye ti bâ Jésus, ngbanga ti so lo yeke mä sango ti lo, na lo yeke ku ti bâ Jésus na sarango mbeni fä.  Tongaso, lo to nda ti hunda Jésus na gbâ ti atënë. Me Jésus akiri tënë oko na lo pëpe. 10  Me aprêtre-mokonzi na ascribe alondo na nduzu fani mingi na ala yeke sara tënë na ngangu ti bi tënë na li ti lo. 11  Na pekoni, Hérode na aturugu ti lo akiri na nengo ti Jésus na gbe ni, na Hérode ahe lo na yungo na lo mbeni bongo so aza zango na lo kiri na Jésus na Pilate. 12  Tâ na lango ni so, Hérode na Pilate aga akamarade, teti kozoni ala ke tere. 13  Tongaso Pilate airi aprêtre-mokonzi, amokonzi nga na azo ni ti bungbi na ndo oko, 14  na lo tene na ala: “ALA ga na koli so na mbi tongana mbeni zo ti pusungo azo ti ke yanga ti ngorogbia, me bâ, na lê ti ALA mbi hunda tënë na lo, me mbi wara nda ti atënë so ALA yeke bi na li ti lo so pëpe. 15  Hérode kue awara tënë na li ti lo pëpe, teti Hérode akiri na lo na e ge. ALA bâ, lo sara pëpe mbeni ye so alingbi na kuâ. 16  Tongaso, mbi yeke pika lo na mbi zi lo.” 17*  —— 18  Me ala nga na azo ti ala ni kue adekongo atene: “Fâ lo so, na mo zi na e Barabbas!” 19  (A bi Barabbas na kanga tënë ti kengo yanga ti ngorogbia so asi na yâ ti gbata ni nga tënë ti fango zo.) 20  Pilate akiri asara tënë na ala ngbanga ti so lo ye ti zi Jésus. 21  Na pekoni, ala to nda ti dekongo, ala tene: “Kanga lo na ndo ti keke! Kanga lo na ndo ti keke!” 22  Ti fani ota ni, lo tene na ala: “Ngbanga ti nyen? Ye ti sioni wa si koli so asara? Mbi wara na li ti lo mbeni ye so lo lingbi na kuâ ngbanga ni pëpe. Tongaso, mbi yeke pika lo na mbi yeke zi lo.” 23  Na mango tënë so, ala to nda ti luti ngangu na ndo ti tënë ti ala ni, ala dekongo nga ala hunda ti tene a kanga Jésus na ndo ti keke. Na go ti ala ato nda ti hon ndo ni. 24  Tongaso, Pilate ayeda ti fâ ngbanga alingbi na ye so ala hunda: 25  Lo zi koli so a bi lo lani na kanga tënë ti kengo yanga ti ngorogbia nga tënë ti fango zo, koli so ala hunda ti tene a zi lo. Me Pilate amû na ala Jésus ti tene ala sara ye ti bê ti ala na lo. 26  Tongana ala yeke hon na lo, ala zia maboko na ndo ti Simon, mbeni zo ti kodoro ti Cyrène. Lo londo na mbeni ndo si lo yeke kiri na yâ ti kodoro ni. Ala zia keke ti pasi ni na ndo ti go ti lo ti tene lo yô ni lo tambela na peko ti Jésus. 27  Azo mingi mingi ayeke dä so amû peko ti lo nga awali so ayeke pika tere ti ala ti fa so ala sara vundu, na ala yeke toto mingi ndali ti lo. 28  Jésus aturnê na mbage ti awali so na lo tene: “Amolenge-wali ti Jérusalem, ALA kaï ti toto ndali ti mbi. Me ALA toto ndali ti ALA wani nga ndali ti amolenge ti ALA. 29  Teti bâ, ngoi ayeke ga so azo ayeke tene ande: ‘Ngia ayeke na awali ngombo, na awali so adü molenge pëpe nga na ala so amû me na molenge pëpe!’ 30  Nga ala yeke to nda ti tene ande na ahoto: ‘ALA tï na ndo ti e!’ Nga na akete hoto: ‘ALA honde e!’ 31  Teti tongana ala sara aye so na ngoi so keke ni angbâ fini, ye ni ayeke si ande tongana nyen na ngoi so keke ni ahule?” 32  A yeke gue nga na ambeni koli use, asioni zo, ti fâ ala legeoko na Jésus. 33  Tongana ala si na ndo so a iri ni Bio-ti-li, ala kanga lo na ndo ti keke na ala kanga nga asioni zo so, oko na mbage ti maboko ti lo ti koli na oko na mbage ti maboko ti lo ti wali. 34  [[Me Jésus atene: “Babâ, mo pardone ala, teti ala hinga pëpe ye so ala yeke sara.”]] Na ndo ni, ti kangbi yâ ti abongo ti lo, ala bi mbeni ye tongana dé. 35  Azo aluti, ala yeke bâ ndo. Me amokonzi ni ayeke zere lo, ala tene: “Lo sö lani fini ti ambeni zo. Tongana lo yeke Christ ti Nzapa, Lo so Nzapa asoro lo, zia lo sö fini ti lo wani.” 36  Même aturugu ni ahe lo, ala ga nduru na tere ti lo na ala yôro na lo kpingo vin, 37  ala tene: “Tongana mo yeke gbia ti aJuif, mo sö fini ti mo wani.” 38  A zia nga mbeni mbeti na li ti lo na nduzu, mbeti ni atene: “So ayeke gbia ti aJuif.” 39  Me oko ti asioni zo so a kanga ala na ndo ti keke ato nda ti tene sioni yanga na lo: “Mo yeke Christ pëpe? Mo sö fini ti mo na ti e nga.” 40  Mba ti lo ni asuku na lo atene: “Mo kpe mbeto ti Nzapa pëpe? so mo kue mo yeke na gbe ti oko ngbanga ni so. 41  Ti e, ngbanga ni ayeke na lege ni teti e yeke wara futa so alingbi tâ na ye so e sara. Me koli so asara mbeni ye ti sioni oko pëpe.” 42  Na lo tene: “Jésus, dabe ti mo na mbi tongana mo ga na yâ ti royaume ti mo.” 43  Na Jésus atene na lo: “Ti tâ tënë ni, mbi tene na mo laso: Mo yeke duti ande na mbi na Paradis.” 44  A yeke nduru na ngbonga omene tongaso, me bingo atï na ndo ti sese kue juska nduru na ngbonga gumbaya, 45  ngbanga ti so lumière ti lâ ayeke dä pëpe. Na pekoni, yâ ti rido ti temple ni asuru use, tâ na bê ni. 46  Jésus adekongo na kota go na lo tene: “Babâ, mbi zia yingo ti mbi na maboko ti mo.” Tongana lo sara tënë so awe, lo kui. 47  So lo bâ aye so asi, turugu ti kota kamba ni ato nda ti mû gloire na Nzapa, lo tene: “Biani, koli so ayeke fade zo ti mbilimbili.” 48  Nga, gbâ ti azo ni kue so abungbi kâ teti ye so, tongana ala bâ aye so asi awe, ala londo ala kiri, ala yeke pika ndo ti kate ti ala na vundu. 49  Na azo kue so ahinga Jésus aluti yongoro. Nga, awali so amû peko ti lo ngbene ye na Galilée aluti na ala yeke bâ aye so. 50  Bâ, mbeni koli ayeke dä so iri ti lo ayeke Joseph, lo yeke mbeni zo ti Kota Bungbi ni. Lo yeke nzoni zo nga zo ti mbilimbili. 51  Koli so ayeda pëpe ti mû mbage na ye so ala leke nga so ala ye ti sara. Lo yeke zo ti Arimathée, mbeni gbata ti azo ti Judée, na lo yeke ku royaume ti Nzapa. 52  Koli so ague na mbage ti Pilate na lo hunda ti mû kuâ ti Jésus. 53  Lo zi kuâ ni lo zia na sese, lo kanga ni na pendere bongo ti lin na lo zia ni na yâ ti mbeni dû ti kuâ so a zi na yâ ti kota tênë, dû so ade a zia mbeni kuâ na yâ ni pëpe. 54  A yeke lango ti Lekengo tere, nga na lakui ni, lâ ti sabbat ayeke ga nduru. 55  Me awali, so alondo legeoko na lo na Galilée si aga, ague abâ sende ti kuâ ni nga ala bâ tongana nyen a zia kuâ ni na yâ ni. 56  Ala kiri na kodoro ti leke a- épice nga na amafuta so afun tongana yombo. Me tongana ti so Ndia afa, ala wu tere ti ala na lâ ti sabbat.

Kete tënë

Bâ kete tënë ti Mt 17:21.