Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Luc 21:1-38

21  Tongana Jésus ayeke bâ ndo, lo bâ azo ti mosoro so ayeke bi amatabisi ti ala na yâ ti asanduku ti nginza ni.  Na pekoni, lo bâ mbeni womua so ayeke wayere abi na yâ ti sanduku ni akete lê ti nginza use so ngere ni ayeke kete mingi,  na lo tene: “Ti tâ tënë ni, mbi tene na ALA: Atâa so womua so ayeke wayere, lo bi ye mingi ahon ala kue,  ngbanga ti so ala kue so abi matabisi, ala bi gi anginza ti ala ti ndo ni. Me womua so, na yâ ti yere ti lo, abi ye kue so lo yeke na ni ti bata na fini ti lo.”  Na pekoni, ambeni zo ayeke sara tënë ti temple ni, lege so a sara tere ni pendere na apendere tênë nga na aye so a zia ni nde si a mû ni na Nzapa.  Me Jésus atene: “Ti aye so ALA yeke bâ so, alango ayeke ga ande so tênë oko ayeke ngbâ ande ge na ndo ti mbeni pëpe. A yeke tuku ni ande kue na sese.”  Tongaso ala hunda lo, ala tene: “Wafango ye, lawa si aye so ayeke si ande biani? Na fä ni ayeke nyen tongana aye so ayeke si biani?”  Lo tene: “ALA sara hange si a handa ALA pëpe. Teti azo mingi ayeke ga na iri ti mbi, ala yeke tene: ‘Mbi si mbi yeke Lo,’ nga ala yeke tene: ‘Ngoi so a fa ni kozo aga nduru awe.’ ALA gue na peko ti azo so pëpe.  Nga, tongana ALA mä tënë ti abira nga na aye ti wusuwusu, ALA zia si mbeto ahon ndo ti ALA pëpe, teti a lingbi aye so asi kozoni, me nda ni ayeke si fade fade pëpe.” 10  Na pekoni, lo tene na ala: “Fade mara ayeke londo na bira na tere ti mbeni mara, na royaume ayeke londo na bira na tere ti mbeni royaume. 11  Na fade sese ayeke yengi ngangu na ando mingi, asioni kobela nga na kota nzara ayeke tï na ando nde nde na peko ti tere. Na fade a yeke bâ aye so amû mbeto na zo, nga na akota fä so alondo na yayu. 12  “Me kozoni na aye so kue, azo ayeke gbu ALA, na a yeke sara ye ti ngangu na ALA na guengo na ALA na yâ ti asynagogue nga na ada ti kanga. Fade a yeke gue na ALA na ngbanga na gbele agbia nga na agouverneur ndali ti iri ti mbi. 13  Fade ye so amû lege na ALA ti fa tënë. 14  Tongaso, ALA leke kozoni pëpe na yâ ti bê ti ALA kode so ALA yeke sara na tënë ti zi tënë na li ti ALA, 15  teti fade mbi yeke mû na ALA yanga nga ndara, so awato ti ALA kue so abungbi oko alingbi ande pëpe ti gbu lê ni wala ti ke ni. 16  Nga, fade même ababâ na amama ti ALA, aita ti ALA, afami ti ALA nga na akamarade ti ALA ayeke zia ALA na maboko ti awafango ngbanga, na ala yeke fâ ambeni na popo ti ALA. 17  Na fade ALA yeke ga azo so azo kue ake ala ndali ti iri ti mbi. 18  Me fade kuä ti li ti ALA oko tongaso ayeke futi pëpe. 19  Tongana ALA gbu ngangu, fade ALA yeke wara âme ti ALA. 20  “Na ndo ni, tongana ALA bâ aturugu so ayeke se kando angoro Jérusalem, zia ALA hinga so futingo lo aga nduru awe. 21  Na ngoi ni so, zia ala so ayeke na Judée alondo akpe na li ti ahoto, zia ala so ayeke na yâ ti Jérusalem ni asigigi, na zia ala so ayeke na yâ ti akete kodoro alï na yâ ti gbata ni pëpe. 22  Teti alango ni so ayeke ti kiringo peko ti sioni so azo asara, si aye kue so a sû na Mbeti ti Nzapa aga tâ tënë. 23  Mawa na awali so ayeke na ngo, nga na ala so angbâ ti mû me na molenge na alango ni so! Teti fade kota pasi ayeke ga na ndo ti sese ni nga ngonzo ti Nzapa ayeke tï na ndo ti azo so. 24  Na fade ala yeke tï na lê ti épée na a yeke gue na ala na ngbâa na popo ti amara kue. Na fade amara ayeke doro Jérusalem na gere juska ngoi so a diko teti amara ahunzi. 25  “Nga, afä ayeke duti ande na lê ti lâ na nze nga na atongoro. Na ndo ti sese, amara ayeke na kota vundu teti ala hinga pëpe mbeni ye ti sara ndali ti ngangu toto ti ngu-ingo nga ndali ti so a duti kpô pëpe, 26  na oko ngoi ni, fade azo ayeke woko na mbeto nga na kungo aye so ayeke ga na ndo ti sese so azo ayeke dä; teti angangu ti yayu ayeke yengi ande. 27  Na ala yeke bâ ande Molenge ti zo so ayeke ga na yâ ti mbeni mbinda, na ngangu nga na kota gloire. 28  Me tongana aye so ato nda ti si, ALA luti na ALA yô li ti ALA na nduzu teti ngoi ti zingo ALA aga nduru awe.” 29  Na ndo ti tënë so, lo mû mbeni tapande na ala: “ALA bâ keke ti figue nga na tanga ti akeke kue: 30  Tongana afini kugbe ti akeke so ayeke sigigi, na bango ni ALA wani ahinga so ngoi ti maïngo ti akobe ti yaka aga nduru awe. 31  Legeoko nga, tongana ALA bâ aye so ayeke si, ALA nga, zia ALA hinga so royaume ti Nzapa aga nduru awe. 32  Ti tâ tënë ni, mbi tene na ALA: Azo ti ngoi ni so ayeke hon pëpe juska aye kue asi awe si. 33  Fade yayu na sese ayeke hon, me atënë ti mbi ayeke hon oko pëpe. 34  “Me ALA sara hange si tënë ti tengo kobe ahon ndo ni, nyongo sämba ahon ndo ni nga na gingo bê ngbanga ti aye ti gigi ane bê ti ALA pëpe, na lango ni so aga hio tongaso na ndo ti ALA 35  tongana mbeni kûkû. Teti lango ni so ayeke ga ande na ndo ti azo kue so aduti na ndo lê ti sese kue. 36  Tongaso, zia lê ti ALA angbâ na zingo ni, ALA voro tere ti ALA na Nzapa lakue tongaso si ALA wara lege ti sigigi na yâ ti aye kue so a fa ni kozo awe ti tene a si, na ti tene ALA luti na gbele Molenge ti zo.” 37  Na kota lâ, lo yeke fa ye na yâ ti temple, me na bï, lo yeke gue ti lango na ndo ti hoto so a iri ni Hoto ti akeke ti olive. 38  Na yanga ti ndapre, azo ni kue ayeke ga na tere ti lo na yâ ti temple ni ti mä lo.

Kete tënë