Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Luc 2:1-52

2  Na lâ ni kâ, César Auguste asigigi na mbeni mbela so ahunda na azo ti sese kue ti gue si a zia iri ti ala na mbeti.  (Kozo ziango iri ti azo na mbeti so aduti lani na ngoi so Quirinius ayeke gouverneur ti Syrie.)  Na azo kue ague ti tene a zia iri ti ala na mbeti, zo oko oko ague na kodoro ti lo wani.  Tongaso, Joseph nga alondo na Galilée, na gbata ti Nazareth, ti gue na kodoro ti David so a iri ni Bethléhem, so ayeke na Judée, ngbanga ti so lo yeke mbeni zo ti da nga ti sewa ti David.  Lo gue ti zia iri ti lo na mbeti, lo na Marie, so lo sara mariage na lo awe. Na ndembe ni so, Marie aga nduru ti dü awe.  Tongana ala yeke kâ, ngoi ti dungo ni alingbi,  na lo dü mbeni molenge-koli, kozo molenge ti lo. Lo kanga molenge ni na bongo na lo zia lo na yâ ti mbeni ndo ti tengo kobe ti anyama ngbanga ti so ala wara ndo ti lango pëpe na yâ ti da ni.  Gi na yâ ti oko kodoro ni, aberger ayeke lango na gigi na yâ ti benyama nga na bï, ala ngbâ ti sara sinziri ti anyama ti ala.  Mo ye ti bâ, ange ti Jéhovah aluti na tere ti ala, na gloire ti Jéhovah asu angoro ala si mbeto agbu ala mingi. 10  Me ange ni atene na ala: “ALA sara mbeto pëpe, bâ mbi ga ti fa na ALA nzoni tënë ti mbeni kota ngia so azo kue ayeke wara ande, 11  ngbanga ti so a dü na ALA laso, na kodoro ti David, mbeni Sauveur, so ayeke Christ Seigneur. 12  Bâ, ye so ALA yeke hinga na ni ayeke so: ALA yeke wara ande mbeni foroto so a kanga lo na bongo na lo yeke lango na yâ ti mbeni ndo ti tengo kobe ti anyama.” 13  Hio na pekoni, gbâ ti aturugu ti yayu aga na tere ti ange so, ala yeke sepela Nzapa, ala tene: 14  “Gloire na Nzapa so ayeke kâ na nduzu, na sese, siriri na popo ti azo so Nzapa asara nzoni na ala.” 15  Tongana a-ange ni azia ala akiri na yayu awe, aberger ni ato nda ti tene na popo ti ala: “Zia e sara kue ti gue na Bethléhem ti bâ ye so asi, ye so Jéhovah asara tënë ni na e.” 16  Ala gue hio, na ala wara Marie na Joseph nga na foroto ni so alango na yâ ti ndo ti tengo kobe ti anyama. 17  Tongana ala bâ foroto ni, ala fa tënë ti ye so a sara tënë ni na ala na ndo ti kete molenge so. 18  Na azo kue so amä tënë so aberger ni atene na ala, bê ti ala adö, 19  me Marie abata atënë so kue na bê ti lo, nga lo yeke gbu li ti lo na ndo ti nda ti atënë so. 20  Na pekoni aberger ni akiri na ndo ti ala, ala yeke mû gloire na Nzapa nga ala yeke sepela lo teti aye kue so ala mä na ala bâ, gi tongana ti so a tene ni na ala. 21  Tongana lango miombe ni alingbi awe ti tene a fâ lo na ganza, a zia nga iri ti lo Jésus, iri so ange ni afa lani kozo si a mû ngo ti lo. 22  Nga, tongana alango ti sukulango sioni na tere ti ala alingbi kue awe, ala gue na lo na Jérusalem ti fa lo na Jéhovah, tongana ti so ndia ti Moïse afa, 23  alingbi na tënë so a sû na yâ ti ndia ti Jéhovah, a tene: “Akozo molenge ti koli kue so a dü ala, ala yeke nzoni-kue na lê ti Jéhovah,” 24  na ti mû sandaga tongana ti so ndia ti Jéhovah afa: “Akolokoto use wala akete pigeon use.” 25  Bâ, mbeni koli ayeke dä na Jérusalem, iri ti lo ayeke Siméon. Lo yeke mbeni koli so ayeke sara ye mbilimbili nga lo kpe mbeto ti Nzapa, lo yeke ku dengo bê so ayeke ga na azo ti Israël, na yingo vulu ayeke na ndo ti lo. 26  Nga, Nzapa afa na lo na lege ti yingo vulu so lo yeke kui pëpe juska lo bâ Christ ti Jéhovah si. 27  Yingo vulu apusu lo ti gue na yâ ti temple. Na tongana babâ na mama ni amû Jésus, kete molenge so, ague na lo na yâ ti temple ti sara na lo ye so ndia ahunda ka ti sara, 28  Siméon amû kete molenge ni na yâ ti maboko ti lo na lo gonda Nzapa, lo tene: 29  “Fadeso, Seigneur ti dunia kue, mo zia lege na ngbâa ti mo ti gue na siriri tongana ti so mo tene, 30  teti so mbi bâ na lê ti mbi awe lege so mo yeke ga na salut 31  na so mo leke ni na lê ti azo ti akodoro kue, 32  mbeni lumière ti zi bongo so akanga lê ti amara nga mbeni gloire teti azo ti mo Israël.” 33  Na bê ti babâ na mama ti molenge ni angbâ gi ti dö na mango aye so a yeke tene na ndo ti molenge ni. 34  Siméon airi nga tënë nzoni na ndo ti ala, me lo tene na Marie mama ti molenge ni: “Bâ, ndali ti molenge so, azo mingi na Israël ayeke tï nga ambeni mingi ayeke londo, na lo yeke ga mbeni fä so azo ayeke sara sioni tënë ni 35  (biani, mbeni yongoro épée ayeke kpo ande âme ti mo alï), tongaso si atënë ti bê ti azo mingi asigigi.” 36  Anne, mbeni prophète-wali ayeke dä, lo yeke molenge ti Phanuel, lo yeke ti kete mara ti Aser (ngu ti wali so ahon mingi awe, lo hinga lani koli pëpe juska lo mû mbeni koli na ala sara ngu mbasambala, 37  me fadeso lo yeke womua na lo yeke na ngu bale-miombe na osio), lo yeke manke ti gue na temple lâ oko pëpe, lo yeke sara kusala so ayeke nzoni-kue bï na lâ na mungo jeûne nga na vorongo tere na Nzapa. 38  Gi na ngbonga ni so, lo pusu nduru na lo to nda ti kiri singila na Nzapa na ti sara tënë ti molenge ni na ala kue so ayeke ku ngoi ti zingo Jérusalem. 39  Tongana ala sara awe aye kue so ndia ti Jéhovah ahunda, ala kiri na Galilée, na kodoro ti ala, Nazareth. 40  Na kete molenge ni angbâ lakue ti kono nga lo kpengba, ndara ti lo ayeke gue na li ni, nga Nzapa angbâ ti bâ lo na nzoni lê. 41  Ngu oko oko, babâ na mama ti lo ayeke gue lakue na Jérusalem ngbanga ti matanga ti Pâque. 42  Tongana lo wara ngu bale-oko na use, ala montê na Jérusalem tongana ti so ngobo ti matanga ni ahunda, 43  ala ngbâ kâ juska lango ti matanga ni ahunzi. Me tongana ala mû lege ti kiri, molenge-koli Jésus angbâ na peko na Jérusalem, na babâ na mama ti lo ahinga pëpe. 44  Ala bâ ti ala atene lo yeke na popo ti azo so ayeke kiri legeoko na ala. Na peko ti so ala tambela alingbi lango oko awe, ala to nda ti gi Jésus na popo ti afami ti ala nga na azo so ala hinga ala. 45  Me, teti so ala wara lo pëpe, ala kiri na Jérusalem, ala gi lo mbilimbili. 46  Na peko ti lango ota, ala wara lo na yâ ti temple, lo yeke duti na popo ti awafango ye, lo yeke mä ala nga lo yeke hunda tënë na ala. 47  Me ala kue so ayeke mä lo, bê ti ala ayeke pika lakue ndali ti aye so lo hinga nga ndali ti atënë so lo yeke kiri na ni. 48  Tongana ala bâ lo, bê ti ala adö, na mama ti lo atene na lo: “Molenge ti mbi, mo sara na e tongaso ngbanga ti nyen? Bâ, mbi na babâ ti mo, li ti e aga kirikiri na e yeke gi mo.” 49  Me lo tene na ala: “ALA yeke gi mbi ngbanga ti nyen? ALA hinga pëpe so mbi yeke duti gi na yâ ti da ti Babâ ti mbi?” 50  Me, ala gbu nda ti tënë so lo tene na ala so pëpe. 51  Lo kiri legeoko na ala na Nazareth na lo ngbâ ti woko tere na gbe ti ala. Nga, mama ti lo abata atënë so kue nzoni na yâ ti bê ti lo. 52  Na ndara ti Jésus ayeke maï nga lo yeke ga koli. Lo ngbâ ti nzere na lê ti Nzapa nga na lê ti azo.

Kete tënë