Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Luc 18:1-43

18  Lo to nda ti tene na ala mbeni toli ti fa na ala so a lingbi ala sambela lakue na ala zia lege ni pëpe,  lo tene: “Na yâ ti mbeni gbata, mbeni wafango ngbanga ayeke dä, lo kpe mbeto ti Nzapa pëpe, na lo ne nga zo oko pëpe.  Me mbeni womua ayeke na yâ ti gbata ni so, na lo yeke gue lakue na wafango ngbanga so, lo tene: ‘Bâ si a fâ yâ ti ngbanga ni nzoni na mbi na yâ ti tënë so ayeke na popo ti mbi na wato ti mbi.’  Biani, teti mbeni ngoi, wafango ngbanga so aye pëpe, me na pekoni, lo tene na yâ ti bê ti lo: ‘Mbi hinga so mbi kpe mbeto ti Nzapa pëpe wala mbi ne zo oko pëpe,  me teti so womua so ayeke ga lakue ti son li ti mbi, mbi yeke bâ si a fâ yâ ti ngbanga ni nzoni na lo, tongaso si lo ngbâ ti ga lakue pëpe ti son li ti mbi si mbi woko kue.’ ”  Na Seigneur atene: “ALA mä tënë so wafango ngbanga so atene so? atâa so lo yeke zo ti mbilimbili pëpe.  Biani, Nzapa nga ayeke bâ si a fâ ngbanga nzoni na ala pëpe? ala so lo soro ala awe na so ayeke toto na lo bï na lâ, atâa so lo yeke sara ye hio pëpe na mbage ti ala.  Mbi tene na ALA: Fade lo yeke bâ si a fâ ngbanga nzoni na ala nga hio. Me, tongana Molenge ti zo aga, fade lo wara biani mabe na ndo ti sese?”  Me lo tene toli so nga ndali ti ala so abâ tere ti ala so ala yeke mbilimbili mingi na ala bâ tanga ti azo tongana senge ye: 10  “Akoli use amontê na temple ti sambela, oko ayeke Farizien na mbeni oko ayeke zo ti rongo nginza ti lapo. 11  Farizien so aluti na lo to nda ti sambela tongaso na yâ ti bê ti lo: ‘Nzapa, mbi mû singila na mo so mbi yeke tongana tanga ti azo pëpe, so ayeke azo ti gbungo ye ti azo na likisi, azo so ayeke mbilimbili pëpe, azo so ayeke gi awali nde, wala même tongana zo ti rongo nginza ti lapo so. 12  Mbi yeke mû jeûne fani use na yâ ti yenga oko. Mbi yeke mû dîme ti aye kue so mbi wara.’ 13  Me zo ti rongo nginza ti lapo so aluti ti lo yongoro na lo ye même pëpe ti yô lê ti lo na nduzu, me lo yeke pika ndo ti kate ti lo, lo tene: ‘Nzapa, sara nzoni bê na mbi so mbi yeke wasiokpari.’ 14  Mbi tene na ALA: Zo ti rongo nginza ti lapo so akiri na yanga-da ti lo, sarango ye ti lo afa so lo yeke mbilimbili mingi ahon Farizien so. Teti zo kue so ayä iri ti lo, fade a sara si lo ga kete, me zo so a sara tere ti lo kete, fade a yä iri ti lo.” 15  Azo ato nda ti ga na lo nga amolenge ti ala so ade foroto ti tene lo ndu ala, me tongana adisciple abâ ye so, ala to nda ti suku na ala. 16  Me Jésus ahunda ti tene a ga na lo aforoto so, lo tene: “ALA zia akete molenge ni aga na mbi, na ALA tara ti kanga lege na ala pëpe. Teti royaume ti Nzapa ayeke ti azo so ayeke tongana akete molenge so. 17  Ti tâ tënë ni, mbi tene na ALA: Zo so ayamba royaume ti Nzapa pëpe tongana mbeni kete molenge, fade lo yeke lï na yâ ni oko pëpe.” 18  Mbeni mokonzi ahunda Jésus atene: “Nzoni Wafango ye, mbi yeke sara nyen ti wara ande fini ti lakue lakue?” 19  Jésus atene na lo: “Ngbanga ti nyen mo tene mbi yeke nzoni? Zo oko ti nzoni ayeke dä pëpe, gi Nzapa oko awe. 20  Mo hinga acommandement ni awe: ‘Mo gi wali wala koli nde pëpe. Mo fâ zo pëpe. Mo nzi ye pëpe. Mo tene mvene na li ti mbeni zo na gbele ngbanga pëpe. Mo ne babâ na mama ti mo.’ ” 21  Koli ni atene: “Ngbene ye so mbi ngbâ maseka, mbi bata aye so kue awe.” 22  Na mango tënë so, Jésus atene na lo: “Mbeni ye oko atia mo: Kä aye ti mo kue na mo mû nginza ni na awayere, na fade mo yeke wara mosoro na yayu; na mo ga mo mû peko ti mbi.” 23  Tongana lo mä tënë so, vundu asara lo mingi, ngbanga ti so lo yeke na mosoro mingi. 24  Jésus abâ lo na lo tene: “A yeke duti ande ngangu biani na azo so ayeke na nginza ti lï na yâ ti royaume ti Nzapa! 25  Biani, a yeke ngangu pëpe na mbeni chameau ti lï na yâ ti dû ti suä ti fungo na bongo ahon mbeni zo ti mosoro ti lï na yâ ti royaume ti Nzapa.” 26  Ala so amä tënë so atene: “Zo wa si alingbi ti wara fini biani?” 27  Lo tene: “Aye so azo alingbi ti sara ni pëpe, Nzapa alingbi ti sara ni.” 28  Me Pierre atene: “Bâ, e dö aye ti e wani e zia na e mû peko ti mo.” 29  Jésus atene na ala: “Ti tâ tënë ni, mbi tene na ALA: Zo kue so azia da ti lo, wala wali ti lo, wala aita ti lo ti koli, wala babâ na mama ti lo, wala amolenge ti lo ndali ti royaume ti Nzapa, 30  fade lo yeke wara aye so fani mingi ahon so na yâ ti ngoi ti fadeso, nga na yâ ti aye ti ngoi so ayeke ga, lo yeke wara fini ti lakue lakue.” 31  Lo gboto adisciple ti lo bale-oko na use na mbage, na lo tene na ala: “ALA bâ, e yeke montê na Jérusalem la, na aye kue so a sû ândö na mbeti na lege ti aprophète na ndo ti Molenge ti zo ayeke ga tâ tënë. 32  Na tapande, fade a yeke zia lo na maboko ti azo ti amara, a yeke he lo, a yeke sara ye ti kamene na lo na a yeke tuku ngu ti yanga na tere ti lo. 33  Na peko ti so ala yeke pika lo na zaza, ala yeke fâ lo ande, me na ota lango ni lo yeke zingo na kuâ.” 34  Ye oko, ala gbu nda ti aye so oko pëpe. Me tënë so lo tene, a honde nda ni na ala nga ala mä yâ ti aye so pëpe. 35  Tongana lo yeke pusu nduru na Jéricho, mbeni waziba ayeke duti na tere ti lege si lo yeke iri ye. 36  Teti so lo mä gbâ ti azo so ayeke hon, lo to nda ti hunda nda ni. 37  Ala tene na lo: “Jésus, zo ti Nazareth la ayeke hon so!” 38  Tongana lo mä tënë so, lo dekongo, lo tene: “Jésus, Molenge ti David, sara nzoni bê na mbi!” 39  Na azo so ahon kozo ato nda ti suku na lo ti tene lo kanga yanga ti lo, me lo ngbâ ti dekongo ngangu ahon ti kozo: “Molenge ti David, sara nzoni bê na mbi!” 40  Tongaso, Jésus aluti na lo mû yanga ti tene a ga na koli ni na lo. Tongana lo si nduru, Jésus ahunda lo: 41  “Mo ye mbi sara nyen na mo?” Lo tene: “Seigneur, sara si mbi kiri mbi bâ ndo.” 42  Tongaso, Jésus atene na lo: “Mo kiri mo bâ ndo. Mabe ti mo asava mo awe.” 43  Gi na lê ni lê ni, lo kiri lo bâ ndo, na lo to nda ti mû peko ti Jésus na mungo gloire na Nzapa. Azo ni kue, tongana ala bâ ye so, ala nga asepela Nzapa.

Kete tënë