Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

Luc 16:1-31

16  Na pekoni lo tene nga na adisciple ni: “Mbeni koli ayeke lani dä, lo yeke zo ti mosoro na lo yeke na mbeni wabatango ye ti lo. A tene na koli ni so wabatango ye ni ayeke buba amosoro ti lo.  Tongaso, zo ti mosoro so airi wabatango ye ni na lo tene na lo: ‘Tënë ti nyen si mbi yeke mä na ndo ti mo so? Mo fa na mbi peko ti aye ti mbi so mo bata, teti mo lingbi ti ngbâ wabatango ye ti da ni mbeni pëpe.’  Na pekoni, wabatango ye ni atene na yâ ti bê ti lo: ‘So patron ti mbi ayeke zi kua ti batango ye ni na tïtî mbi so, a lingbi mbi sara nyen? Mbi yeke na ngangu pëpe ti zi dû nga kamene ti iri ye asara mbi.  Mbi hinga ye so mbi yeke sara, tongaso si, na ngoi so a zi kua ti batango ye na tïtî mbi, azo ayamba mbi ande na da ti ala.’  Tongaso, lo iri zo oko oko so ayeke na kuda ti patron ti lo na li ti ala, na lo tene na kozo zo ni: ‘Kuda ti patron ti mbi ayeke na li ti mo oke?’  Zo ni atene: ‘Bath ngbangbo oko ti mafuta ti olive.’ Lo tene na zo ni: ‘Kiri mo mû mbeti ti mo ti mango tere ni, mo duti na mo sû hio na lê ni bath bale-oku.’  Na pekoni, lo tene na mbeni zo ni: ‘Ti mo kuda ni ayeke oke?’ Zo ni atene: ‘Kor ngbangbo oko ti blé.’ Lo tene na zo ni: ‘Kiri mo mû mbeti ti mo ti mango tere ni, mo duti na mo sû na lê ni kor bale-miombe.’  Atâa so wabatango ye ni ayeke mbilimbili pëpe, patron ni agonda lo ngbanga ti so lo sara ye na lege ti ndara. Biani, amolenge ti ngoi so ayeke sara ye na lege ti ndara mingi na mbage ti azo ti ngoi ti ala ahon amolenge ti lumière.  “Nga, mbi tene na ALA: ALA gi ti wara akamarade teti ALA wani na lege ti amosoro so ayeke mbilimbili pëpe, tongaso si na ngoi so amosoro ni ahunzi, akamarade so ayamba ALA na ando ti lango so angbâ lakue lakue. 10  Zo so ayeke be-ta-zo na yâ ti kete kete ye, lo yeke be-ta-zo nga na yâ ti ye so ayeke mingi. Me zo so ayeke mbilimbili pëpe na yâ ti kete kete ye, lo yeke nga mbilimbili pëpe na yâ ti ye so ayeke mingi. 11  Tongaso, tongana ALA fa pëpe so ALA yeke be-ta-zo na ndo ti tënë ti amosoro so ayeke mbilimbili pëpe, zo wa si ayeke zia ande na maboko ti ALA ye so ayeke tâ ye ti tene ALA bata? 12  Na tongana ALA fa pëpe so ALA yeke be-ta-zo na ndo ti ye ti mbeni zo nde, zo wa si ayeke mû ande na ALA ye so a bata ni na ALA? 13  Wakua oko alingbi ti duti ngbâa ti azo use pëpe. Teti fade lo ke mbeni oko na lo ye mbeni. Wala lo yeke ngbâ na mbeni oko na lo ke mbeni. ALA lingbi ti duti angbâa ti Nzapa nga na ti Mosoro pëpe.” 14  A-Farizien, so aye nginza mingi, ayeke mä aye so kue, na ala to nda ti zere lo. 15  Ndani la, lo tene na ala: “ALA yeke azo so afa na lê ti azo so ala wani ayeke mbilimbili, me Nzapa ahinga bê ti ALA, ngbanga ti so ye so azo abâ ni na nene ni mingi ayeke ye ti saleté na lê ti Nzapa. 16  “A fa tënë ti Ndia nga na ambeti ti aProphète juska asi na Jean. Ti londo na ngoi ti Jean ti ga na ni, a yeke royaume ti Nzapa si a yeke fa ni tongana nzoni tënë, na mara ti azo nde nde kue ayeke sara ngangu ti gue na mbage ni. 17  Biani, a yeke ngangu pëpe ti tene yayu na sese ahon, me ti tene mbeni marque ti gere-mbeti oko ti Ndia aga tâ tënë pëpe, a yeke ngangu mingi ahon so. 18  “Zo kue so asara divorce na wali ti lo na lo sara mariage na mbeni wali nde, lo gi mbeni wali nde la. Na zo so asara mariage na mbeni wali so asara mara ti divorce so na koli ti lo, andâ lo gi mbeni wali nde la. 19  “Mbeni koli ayeke lani dä, lo yeke na mosoro mingi na lo yeke yü gi bengba bongo so avuko kete nga bongo ti lin. Lâ na lâ ye ti lo kue ayeke gi nzoni. 20  Me mbeni zo ti iringo ye ayeke dä so iri ti lo ayeke Lazare. Lakue a yeke zia lo na yanga ti gbagba ti zo ti mosoro so, na tere ti lo kue ayeke gi na akota kä. 21  Lo ye ti te aye so ayeke londo na ndo ti table ti zo ti mosoro so si ayeke tï na sese. Biani, ambo ayeke ga ti su lê ti asioni kä ti lo ni. 22  Mbeni lâ, zo ti iringo ye so akui na a-ange ague na lo na nzoni ndo* na tere ti Abraham. “Zo ti mosoro so nga akui na a lu lo. 23  Na yâ ti Hadès, lo yô lê ti lo na nduzu, lo yeke na yâ ti pasi, na lo bâ Abraham yongoro kâ, na Lazare so ayeke na nzoni ndo na tere ti lo. 24  Tongaso lo iri ndo na lo tene: ‘Babâ Abraham, sara nzoni bê na mbi na mo tokua Lazare ti yôro li ti maboko ti lo na ngu ti dê na menga ti mbi, ngbanga ti so mbi yeke wu pono mingi na yâ ti wâ so ayeke za so.’ 25  Me Abraham atene: ‘Molenge ti mbi, dabe ti mo so mo wara lani aye ti nzoni alingbi na mo na ngoi so mo de na fini, me ti Lazare, lo wara lani aye ti sioni. Me fadeso, lo yeke na nzoni ndo ge, me mo, mo yeke na yâ ti pono. 26  Na ndo ti aye so kue, a zia mbeni kota dû na popo ti e na ALA, si azo so aye ti londo ge ti gue na ALA kâ alingbi ti gue pëpe, nga azo alingbi pëpe ti londo na ALA kâ ti ga na e ge.’ 27  Tongaso, lo tene: ‘Teti so ye ni ayeke tongaso, mbi hunda na mo, babâ, ti tokua Lazare na da ti babâ ti mbi, 28  ngbanga ti so mbi yeke na aita ti koli oku, si lo lingbi ti fa nda ti tënë ni kue na ala, si ala nga aga na ndo ti pasi so pëpe.’ 29  Me Abraham atene: ‘Moïse na aProphète ayeke na ala, zia ala mä Moïse na aProphète so.’ 30  Na lo tene: ‘Ên-ën, babâ Abraham. Me tongana mbeni zo so alondo na popo ti akuâ si ague na mbage ti ala, fade ala yeke changé bê ti ala.’ 31  Me Abraham atene na lo: ‘Tongana ala mä Moïse nga na aProphète so pëpe, ala lingbi pëpe ti yeda na tënë ni atâa mbeni zo alondo na popo ti akuâ.’ ”

Kete tënë

Na Grec: “na kate ti.”