Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

Luc 14:1-35

14  Na mbeni ngoi so lo lï na da ti mbeni mokonzi ti aFarizien ti te kobe na lâ ti sabbat, lê ti ala kue ayeke gi na tere ti lo.  Na bâ, mbeni koli so ayeke na kobela ti sukungo tere ayeke na gbele lo.  Jésus ahunda ala so ahinga Ndia mingi nga na aFarizien, lo tene: “Ndia amû lege na zo ti kaï kobela na lâ ti sabbat wala pëpe?”  Me ala zi yanga pëpe. Tongaso, lo gbu koli ni, lo sava lo na lo tene na lo ti gue.  Na lo tene na ala: “Na popo ti ALA so, zo wa la tongana molenge ti lo ti koli wala bagara ti lo atï na yâ ti mbeni dû ti ngu, fade lo yeke gue hio ti sigigi na lo na lâ ti sabbat pëpe?”  Na ala hinga tënë ti kiri na ni na lo pëpe.  Na pekoni, tongana lo bâ lege so azo so a tisa ala ayeke soro gi akozo ndo ni ndali ti ala wani, lo to nda ti fa mbeni tapande na ala, lo tene:  “Tongana mbeni zo atisa mo na mbeni matanga ti mariage, mo duti na kozo ndo pëpe. Peut-être lo tisa nga na ngoi ni so mbeni zo so ayeke kota ahon mo,  na zo so atisa ALA use kue ayeke ga ti tene na mo: ‘Mo zia ndo na zo so si lo duti.’ Na mo yeke londo na kamene ti gue ti duti na ndangba ndo ni. 10  Me tongana a tisa mo, mo gue mo duti na ndangba ndo. Tongaso si na ngoi so zo so atisa mo aga, lo yeke tene ande na mo: ‘Kamarade ti mbi, londo mo gue mo duti na li ni.’ Tongaso, mo yeke ne na lê ti azo so a tisa mo na ala kue. 11  Zo kue so ayä iri ti lo, fade a sara si lo ga kete. Na zo so asara tere ti lo kete, fade a yä iri ti lo.” 12  Na pekoni, Jésus atene nga na koli so atisa lo: “Tongana mo leke kobe ti midi wala kobe ti lakui, mo iri akamarade ti mo pëpe, aita ti mo pëpe, afami ti mo pëpe nga mo iri pëpe azo ti tere ti da ti mo so ayeke awamosoro. Peut-être ala nga alingbi ti tisa mo mbeni lâ, na so ayeke kiringo na mo ye so mo sara na ala lani. 13  Me tongana mo sara mbeni matanga, tisa awayere, awazin, azo ti bubango gere na awaziba. 14  Tongaso mo yeke duti ande na ngia ngbanga ti so ala yeke na ye oko pëpe ti kiri na ni na mo na pekoni. Me, fade a yeke kiri na ni na mo na ngoi ti zingongo ti azo ti mbilimbili na kuâ.” 15  Na mango atënë so, mbeni zo na popo ti azo so a tisa ala atene na Jésus: “Ngia ayeke na lo so ate mapa na yâ ti royaume ti Nzapa.” 16  Jésus atene na lo: “Mbeni zo aleke mbeni kota kobe ti lakui, na lo tisa azo mingi. 17  Tongana ngbonga ti tengo kobe ti lakui ni alingbi awe, lo tokua ngbâa ti lo ti tene na azo so a tisa ala: ‘ALA ga, ngbanga ti so a leke ye kue awe.’ 18  Me ala kue legeoko ato nda ti gi araison. Kozo zo ni atene na ngbâa ni: ‘Mbi vo mbeni yaka na a lingbi mbi gue mbi bâ ni si. Mbi hunda mo ti pardone mbi.’ 19  Mbeni atene: ‘Mbi vo abagara bale-oko na mbi ye ti gue ti bâ ala nzoni si. Mbi hunda mo ti pardone mbi.’ 20  Me mbeni nde atene: ‘Mbi sara mariage a ninga pëpe, ndani la mbi lingbi ti ga pëpe.’ 21  Tongaso, ngbâa ni akiri, lo fa peko ti atënë so na wa ti lo. Wa ti da ni asara ngonzo mingi na lo tene na ngbâa ti lo so: ‘Mo sigigi hio na akota lege nga na akete lege ti gbata ni, na mo ga na awayere, awazin, awaziba nga na azo ti bubango gere na ndo so.’ 22  Na pekoni, ngbâa ni atene: ‘Kota zo, yanga so mo mû, a sara ye alingbi na ni awe, me place angbâ.’ 23  Wa ti ngbâa ni atene na lo: ‘Mo sigigi na lege nga na ando so gbagba ayeke na tere ni, na mo gbu ala na ngangu ti lï, tongaso si yâ ti da ti mbi asi. 24  Teti mbi tene na ALA: Zo oko na popo ti azo so mbi tisa ala fade ayeke tara ande kobe ti mbi ti lakui ni pëpe.’ ” 25  Na mbeni ngoi so azo mingi mingi ayeke tambela legeoko na lo, lo turnê na lo tene na ala: 26  “Tongana mbeni zo aga na peko ti mbi, me lo ke babâ ti lo pëpe, mama ti lo pëpe, wali ti lo pëpe, amolenge ti lo pëpe, aita ti lo ti koli nga na aita ti lo ti wali pëpe, juska même na âme ti lo pëpe, lo lingbi pëpe ti ga disciple ti mbi. 27  Na zo so ayô keke ti pasi ti lo pëpe nga lo ga na peko ti mbi pëpe, lo lingbi pëpe ti duti disciple ti mbi. 28  Na tapande, zo wa na popo ti ALA, tongana lo ye ti sara mbeni tour, lo yeke duti kozoni pëpe ti diko ngere ni, ti bâ wala ye so lo yeke na ni alingbi ti tene lo hunzi na tour ni? 29  Tongaso pëpe, lo lingbi ti zia gere ti tour ni me lo lingbi pëpe ti hunzi ni, na peut-être azo kue so ayeke bâ ni ayeke to nda ti he lo, 30  ala tene: ‘Koli so ato nda ti leke tour, me lo lingbi pëpe ti hunzi ni.’ 31  Wala gbia wa, tongana lo yeke gue ti tingbi na mbeni gbia ti sara bira, lo yeke duti kozoni pëpe ti mä tere na azo ti lo ti bâ wala, na aturugu saki bale-oko, lo lingbi ti gbu lê ni na lo so ayeke ga na aturugu saki bale-use ti tiri na lo? 32  Biani, tongana lo lingbi pëpe ti gbu lê ni, lo yeke tokua ambeni lembe ti lo ti hunda siriri na ngoi so mba ti lo gbia ni angbâ yongoro. 33  Tongaso, zia ALA hinga biani so, na popo ti ALA so, zo so adö aye ti lo kue azia pëpe, lo lingbi pëpe ti duti disciple ti mbi. 34  “Biani, ingo ayeke nzoni. Me tongana songo ti ingo asigigi dä awe, fade a yeke kiri na songo ni dä tongana nyen? 35  A lingbi ti bungbi ni na sese wala na puru ti nyama pëpe. Azo ayeke tuku ni na gigi. Zia zo so ayeke na mê ti mä amä.”

Kete tënë