Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Luc 12:1-59

12  Na ngoi ni so, tongana azo saki na saki abungbi gbani si ambeni ayeke dö gere ti amba ti ala, Jésus ato nda ti sara tënë kozoni na adisciple ti lo, lo tene: “ALA sara hange na mama ti mapa ti aFarizien, so ti tene sarango ye ti ala ti handango lê ti zo.  Me mbeni ye so a honde ndo ni ngangu na so ayeke sigigi ande pëpe ayeke dä pëpe. Nga tënë so a honde ni ayeke ngbâ gi na hondengo ni pëpe.  Atënë so ALA tene na vukongo ndo, a yeke mä ni ande na lumière. Na tënë so ALA tene na kete go na yâ ti akubu, fade a yeke luti na li ti ada ti fa tënë ni.  Nga, mbi tene na ALA, akamarade ti mbi: ALA sara pëpe mbeto ti azo so ayeke fâ tere ti zo, me, na pekoni, ala lingbi pëpe ti sara mbeni ye nde ahon so.  Me mbi yeke fa na ALA zo so a lingbi ALA sara mbeto ti lo: ALA sara mbeto ti lo so tongana lo fâ zo, lo yeke na ngangu ti bi zo ni na yâ ti Géhenne. Biani, mbi tene na ALA: ALA sara mbeto ti Zo so.  A yeke kä anzêrë oku na alê ti pata use senge, ni la pëpe? Atâa so kue, Nzapa agirisa mbeni oko na popo ti ala pëpe.  Me ti ALA, a diko même kuä ti li ti ALA kue awe. Tongaso, ALA sara mbeto pëpe: ngere ti ALA ahon ngere ti gbâ ti anzêrë.  “Tongaso, mbi tene na ALA: Zo kue so atene na yanga ti lo na gbele azo so lo yeke beoko na mbi, fade Molenge ti zo nga ayeke tene na yanga ti lo na gbele a-ange ti Nzapa so ni yeke beoko na zo so.  Me zo so atene na gbele azo so ni hinga mbi pëpe, fade Molenge ti zo ayeke tene na gbele a-ange ti Nzapa so ni hinga lo pëpe. 10  Zo kue so asara sioni tënë na tere ti Molenge ti zo, fade a pardone lo. Me zo so azonga yingo vulu, a yeke pardone lo ande pëpe. 11  Me tongana a gue na ALA na gbele gbâ ti azo so abungbi, akota zo ti ngorogbia nga na azo ti komande, ALA gi bê ti ALA pëpe na lege so ALA yeke fa na tënë ni nga tënë so ALA lingbi kiri na ni ti zi tënë na li ti ALA. Nga, ALA gi bê ti ALA pëpe na ndo ti tënë so ALA yeke tene ande. 12  Teti fade, gi na ngbonga ni so, yingo vulu ayeke fa na ALA ye so a lingbi ALA tene.” 13  Na pekoni, mbeni zo na popo ti gbâ ti azo ni atene na lo: “Wafango ye, tene na ita ti mbi ti kangbi yâ ti ye ti héritier ni na ti mû ti mbi na mbi.” 14  Jésus atene na lo: “Koli, zo wa la azia mbi wafango ngbanga wala zo ti kangbingo yâ ti ye na ndo ti ALA?” 15  Tongaso lo tene na ala: “ALA zi lê ti ALA na ALA sara hange na alege nde nde kue ti sarango bê ti ye, ngbanga ti so, atâa tongana mbeni zo ayeke na mosoro mingi, fini ti lo alondo pëpe na aye so lo yeke na ni.” 16  Na ndo ti tënë so, lo tene mbeni toli na ala, lo tene: “Yaka ti mbeni zo ti mosoro alë mingi. 17  Tongaso, lo to nda ti tene na yâ ti bê ti lo: ‘Mbi yeke sara ande nyen, so fadeso mbi yeke na mbeni ndo ti zia akobe ti mbi ni dä pëpe so?’ 18  Lo tene: ‘Mbi yeke sara ande ye so, mbi yeke kungbi agogoro ti mbi ti leke ambeni kota ni. Na mbi yeke bungbi alê ti kobe ti mbi kue nga na anzoni ye ti mbi kue dä. 19  Na pekoni, mbi yeke tene na âme ti mbi: “Âme ti mbi, mo wara gbâ ti anzoni ye so alingbi na ngu mingi. Mo duti kpô, mo te, mo nyon na mo sara ngia.” ’ 20  Me Nzapa atene na lo: ‘Mo so li ti mo ayeke dä pëpe so, na bï so a yeke hunda âme ti mo. Na zo wa si ayeke wara aye so mo bata na gogoro so?’ 21  A yeke ye so ayeke si na zo so abungbi mosoro teti lo wani, me lo yeke na mosoro na mbage ti Nzapa pëpe.” 22  Tongaso, lo tene na adisciple ti lo: “ALA zia ti gi bê ti ALA na ndo ti âme ti ALA, wala ALA yeke te nyen, nga na ndo ti tere ti ALA, wala ALA yeke yü bongo ti nyen. 23  Teti âme ayeke kota mingi ahon kobe, na tere ayeke kota mingi ahon bongo. 24  ALA bâ akpakpo nzoni: Ala yeke lu lê ti kobe pëpe wala ala yeke ko lê ti kobe pëpe, nga ala yeke na gogoro wala da ti batango kobe pëpe, me Nzapa ayeke mû kobe na ala. Ngere ti ALA ahon mingi ngere ti andeke! 25  Zo wa na popo ti ALA, tongana lo ngbâ ti gi bê ti lo, lo lingbi ti zia mbeni kete lango* na ndo ti fini ti lo? 26  Tongaso, tongana ALA lingbi ti sara kete kete ye so pëpe, ndani nyen si ALA yeke gi bê ti ALA na ndo ti tanga ti aye? 27  ALA bâ mbilimbili tongana nyen akongo ayeke kono. Ala yeke sara kua pëpe wala ala yeke kpo abongo nga pëpe. Atâa so kue, mbi tene na ALA so même Salomon na yâ ti gloire ti lo kue ayü bongo tongana mbeni oko ti akongo so pëpe. 28  Asinga so Nzapa ayeke yü bongo na apere so ayeke na ngonda, apere so ayeke gi laso na kekereke a bi ni na four, si fade a nzere mingi na lo ti yü bongo na ALA pëpe? azo ti kete mabe. 29  Ni la, ALA zia ti gi bê ti ALA na ndo ti ye so ALA lingbi ti te nga ye so ALA lingbi ti nyon. ALA zia ti duti na bê so ayeke gi na nduzu. 30  Aye so kue, a yeke aye so azo ti dunia so ayeke gi ni gingo na bê ti ala kue. Me Babâ ti ALA so ayeke na yayu ahinga so ALA yeke na bezoin ti aye so. 31  Me, ALA ngbâ lakue ti gi royaume ti lo, na fade a yeke zia na ALA aye so na ndo ni. 32  “Kete kundu, ALA sara mbeto pëpe, ngbanga ti so Babâ ti ALA abâ so a yeke nzoni ti mû na ALA royaume ni. 33  ALA kä aye ti ALA nga ALA mû amatabisi na azo ti mawa. ALA leke teti ALA wani abozo ti nginza so ayeke buba pëpe, mosoro so ayeke hunzi lâ oko pëpe na yayu, ndo so zo ti nzi ayeke si nduru dä pëpe nga makongo ti tengo bongo ayeke te ni pëpe. 34  Teti ndo so mosoro ti ALA ayeke dä, bê ti ALA ayeke nga dä. 35  “ALA kanga bongo na gbe ti yâ ti ALA nga zia alampe ti ALA angbâ na zango ni, 36  na ALA duti tongana azo so ayeke ku wa ti ala na ngoi so lo londo na mariage ti kiri, si tongana lo si na lo pika yanga-da, ala lingbi ti zi ni hio na lo. 37  Ngia ayeke na angbâa so tongana wa ti ala asi na lo wara ala na lango pëpe! Ti tâ tënë ni, mbi tene na ALA: Lo yeke kanga bongo na gbe ti yâ ti lo nga lo yeke tene na ala ti duti na yanga ti table ti te kobe, na fade lo ga na tere ti ala ti sara kua na ala. 38  Na tongana wa ti ala ni asi kozo na bê ti bï, wala même na peko ti bê ti bï, na lo wara ala na lango pëpe, biani ala yeke duti na ngia! 39  Me zia ALA hinga ye so: Tongana wa ti da ahinga ngbonga so zo ti nzi ayeke ga na ni, ka lo lango pëpe na lo zia lege pëpe ti tene a kungbi yanga-da ti lo. 40  ALA nga, ALA leke tere ti ALA, ngbanga ti so a yeke na mbeni ngbonga so ALA bi bê ti ALA na ni pëpe si Molenge ti zo ayeke ga.” 41  Na pekoni, Pierre atene: “Seigneur, mo yeke tene toli so na e wala na tanga ti azo ni nga kue?” 42  Na Seigneur atene: “Zo wa mbilimbili si ayeke wabatango ye so ayeke be-ta-zo na so ayeke sara ye na ndara? Lo so wa ti lo azia lo na ndo ti azo ti kua ti lo kue ti mû lakue na ala kobe so alingbi na ala na ngoi ni so alingbi? 43  Ngia ayeke na ngbâa so tongana wa ti lo aga na awara lo na sarango tongaso! 44  Ti tâ tënë ni, mbi tene na ALA: Fade wa ti lo ni ayeke zia lo na ndo ti akungba ti lo kue. 45  Me tongana a si so ngbâa so atene na bê ti lo: ‘Wa ti mbi ayeke ga fade fadeso pëpe,’ na lo to nda ti pika awakua ni ti koli na ti wali na ti te ye nga ti nyon ye na ti sulêe, 46  wa ti ngbâa so ayeke ga ande na mbeni lango so lo ku ni pëpe nga na mbeni ngbonga so lo hinga ni pëpe, na fade wa ti lo so ayeke se lo tâ ngangu mingi na lo yeke zia lo na popo ti azo so ayeke be-ta-zo pëpe. 47  Tongaso, ngbâa so ahinga ye so bê ti wa ti lo aye, me so lo leke tere ti lo pëpe wala lo sara pëpe ye so bê ti wa ti lo ni aye, fade a yeke pika lo mingi. 48  Me zo so ahinga pëpe na lo sara aye so alingbi na pika, fade a yeke pika lo gi kete. Biani, zo kue so a mû ye mingi na lo, fade a hunda ye mingi nga na lo. Nga, zo so azo azia ye mingi na tïtî lo ti bata, fade ala hunda ye mingi na lo ahon ti so a yeke hunda ka ni. 49  “Mbi ga ti tingo wâ na ndo ti sese, na tongana wâ ni aza awe, mbi ye mbeni ye wa? 50  Biani, mbi yeke na mbeni batême so a lingbi a batize mbi na ni, na mbi yeke na vundu mingi juska batême ni ahunzi si! 51  ALA tene na bê ti ALA so mbi ga ti zia siriri na ndo ti sese? Mbi tene na ALA: Ên-ën, mbi ga ti zia siriri pëpe, me ti zia kangbi. 52  Ti londo na ngoi so, fade yâ ti azo oku so ayeke na yâ ti da oko ayeke kangbi. Fade azo ota ake azo use na azo use ake azo ota. 53  Fade yâ ti ala ayeke kangbi: Babâ ake molenge-koli, na molenge-koli ake babâ, mama ake molenge-wali na molenge-wali ake mama ti lo. Mama ti koli ake wali ti molenge ti lo, na wali ake mama ti koli ti lo.” 54  Na pekoni lo tene nga na gbâ ti azo so: “Tongana ALA bâ mbinda ayeke bungbi na mbage ti Do, hio ALA tene: ‘Kota pupu ti ngu ayeke ga,’ na a si tongaso. 55  Nga, tongana ALA bâ so pupu ti Mbongo ayeke ya, ALA tene: ‘Fade ndo ayeke mû wâ ngangu,’ na a yeke ye so asi. 56  ALA awahandango lê ti zo, ALA hinga nda ti aye ti sese na ti aye ti lê ti nduzu, me a sara tongana nyen si ALA hinga pëpe nda ti ngoi so e yeke dä so? 57  Ngbanga ti nyen ALA wani ALA bâ nga pëpe ye so ayeke mbilimbili? 58  Na tapande, tongana mo na wato ti mo ayeke gue na ngbanga na gbele mbeni mokonzi, na ngoi so mo na lo angbâ na lege, sara kue ti leke tënë ti papa so ayeke na popo ti mo na lo, tongaso si lo gue na mo oko pëpe na gbele wafango ngbanga, na wafango ngbanga azia mo na maboko ti turugu ti da-ngbanga, na turugu ti da-ngbanga ni abi mo na da ti kanga. 59  Mbi tene na mo: Biani, mo yeke sigigi na da ti kanga so pëpe juska mo futa tanga ti kete pata oko ni kue si.”

Kete tënë

Na Grec: “coudée oko.”