Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Luc 10:1-42

10  Na peko ti aye so, Seigneur asoro ambeni nde bale-mbasambala na lo tokua ala use use kozoni na lo ti gue na yâ ti agbata nga na ando kue so lo wani lo yeke gue ande dä.  Na lo to nda ti tene na ala: “Biani, akobe ti yaka ni ayeke mingi, me azo ti kua ni ayeke mingi pëpe. Tongaso, ALA hunda mingi na Wa ti kua ni ti tokua azo ti kua ti fâ akobe ti yaka ti lo.  ALA gue. Bâ, mbi yeke tokua ALA tongana amolenge ti ngasangbaga so ayeke na popo ti ambo ti ngonda.  ALA mû bozo ti nginza pëpe, ALA mû bozo ti kobe pëpe, ALA mû poro pëpe, nga ALA luti ti bara zo na lege pëpe.  Na ndo kue so ALA lï na yâ ti mbeni da, ALA tene kozoni: ‘Siriri aduti na da so.’  Na tongana mbeni zo so aye siriri ayeke dä, fade siriri ti ALA aduti na lo. Me tongana mbeni zo tongaso ayeke dä pëpe, fade siriri ti ALA akiri na ALA.  Tongaso ALA ngbâ na yâ ti da so, ALA te na ALA nyon ye so azo ni amû na ALA, teti zo ti kua alingbi na futa ti lo. ALA londo na mbeni da ALA gue na mbeni nde pëpe.  “Nga, na ndo kue so ALA lï na yâ ti mbeni kodoro si azo ni ayamba ALA, ALA te aye so a yeke zia na gbele ALA,  ALA sava azo ti kobela so ayeke na yâ ti kodoro ni na ALA ngbâ ti tene na azo ni: ‘Royaume ti Nzapa aga nduru na ALA awe.’ 10  Me na ndo kue so ALA lï na yâ ti mbeni gbata si azo ni ayamba ALA pëpe, ALA sigigi na ndo ti akota lege ti gbata ni na ALA tene: 11  ‘Même fuku ti sese ti gbata ti ALA so angbâ na gbe ti poro ti e, e yeke pika ni na tere ti ALA. Me, ALA girisa ye so pëpe: Royaume ti Nzapa aga nduru awe.’ 12  Mbi tene na ALA: Na lâ ni so, fade ngbanga ti gbata so ayeke duti ngangu mingi ahon ti kodoro ti Sodome. 13  “Mawa na mo, Chorazin! Mawa na mo, Bethsaïda! Akusala ti ngangu so a sara na yâ ti ALA, tongana a sara ni lani na yâ ti Tyr na Sidon, ka a ninga awe si azo ti Tyr na Sidon ayü vuko bongo ti fungo na asac na ala duti na yâ ti mburu ti wâ ti fa so ala changé bê ti ala. 14  Ni la, na lâ ti fango ngbanga, ngbanga ti ALA ayeke duti ngangu mingi ahon ti Tyr na Sidon. 15  Ti mo, Capernaüm, peut-être fade a yeke yä mo juska na yayu? Fade mo yeke zu na Hadès! 16  “Zo so amä ALA, lo mä mbi nga. Na zo so ake ALA, lo ke mbi nga. Na zo so ake mbi, lo ke nga lo so atokua mbi.” 17  Na pekoni, ala bale-mbasambala ni akiri na ngia na bê ti ala, ala tene: “Seigneur, même asioni yingo amä yanga ti e tongana e di iri ti mo.” 18  Na mango tënë so, lo tene na ala: “Mbi bâ Satan so alondo na yayu atï awe tongana wâ ti bekpa. 19  Bâ, mbi mû na ALA komandema ti dö na gbe ti gere ti ALA angbo nga na akpalakongo. Nga, mbi mû na ALA komandema na ndo ti ngangu kue ti wato, na fade mbeni ye oko ti sara sioni na ALA ayeke dä pëpe. 20  Me, ALA duti na ngia pëpe ndali ti so asioni yingo awoko tere na gbe ti ALA. Me ALA duti na ngia ngbanga ti so a sû iri ti ALA na mbeti na yayu awe.” 21  Tâ gi na ngbonga ni so, bê ti Jésus asi na ngia nga na yingo vulu, na lo tene: “Babâ, mbi sepela mo na lê ti azo kue, mo Seigneur ti yayu na ti sese, ngbanga ti so mo honde aye so ngangu na awandara nga na azo so ahinga ndo, me mo fa ni na akete molenge. Biani, Babâ, sarango tongaso anzere na lê ti mo. 22  Babâ ti mbi azia aye kue na tïtî mbi. Mbeni zo ti hinga Molenge ni ayeke pëpe, gi Babâ ni. Nga, mbeni zo ti hinga Babâ ni ayeke pëpe, gi Molenge ni nga na zo kue so Molenge ni aye ti fa Babâ ni na lo.” 23  Na ndo ti ye so, lo bâ ndo na mbage ti adisciple ti lo, na lo tene gi na ala: “Ngia ayeke na lê so abâ aye so ALA yeke bâ so. 24  Teti mbi tene na ALA: Aprophète nga na agbia mingi ayeke lani na nzara ti bâ aye so ALA yeke bâ so, me ala bâ ni pëpe. Nga, ala yeke lani na nzara ti mä aye so ALA yeke mä so, me ala mä ni pëpe.” 25  Bâ, mbeni koli so ahinga Ndia mingi alondo. Ti tara Jésus, lo tene: “Wafango ye, nyen la mbi yeke sara ande ti wara fini ti lakue lakue?” 26  Jésus ahunda lo atene: “Tënë ti nyen si a sû na yâ ti Ndia? Mo diko ye ni tongana nyen?” 27  Lo kiri tënë, lo tene: “ ‘Mo ndoye Jéhovah Nzapa ti mo na bê ti mo kue, na âme ti mo kue, na ngangu ti mo kue nga na bibe ti mo kue,’ nga ‘mo ndoye mba ti mo tongana mo wani.’ ” 28  Jésus atene na lo: “Mo kiri tënë na lege ni. ‘Ngbâ ti sara tongaso na fade mo yeke wara fini.’ ” 29  Me, teti so lo ye ti fa tere ti lo tongana zo ti mbilimbili, koli so ahunda Jésus: “Zo wa si ayeke biani mba ti mbi ni?” 30  Jésus akiri tënë, lo tene: “Mbeni koli alondo na Jérusalem, lo yeke zu ti gue na Jéricho na lo tï na maboko ti azo ti gbungo aye ti azo na ngangu. Ala mû ye kue na tere ti lo, ala pika lo sioni. Tongana ala zia lo ala hon, lo yeke nduru na kuâ. 31  Me, mbeni prêtre ayeke zu nga na lege ni so ayeke gue na Jéricho. Tongana lo bâ koli so, lo hon na mbage ti lege ni. 32  Legeoko nga, mbeni zo ti mara ti Lévi ayeke hon nga. Tongana lo si na ndo so na lo bâ koli ni, lo hon na mbage ti lege ni. 33  Me, mbeni zo ti Samarie so ayeke hon na lege ni asi na ndo ti lo, na tongana lo bâ koli so, mawa asara lo. 34  Lo ga na tere ti koli so, lo kanga akä ti lo, lo tuku mafuta na vin na lê ni. Na pekoni, lo zia lo na ndo ti lele ti lo ni, lo gue na lo na mbeni da so agene ayeke futa ti lango dä na lo bâ lege ti lo. 35  Na ndade ni, lo sigigi na denier use, lo mû na zo ti batango da ni, na lo tene: ‘Mo bâ lege ti koli so, na aye kue so mo yeke futa na ndo ni, tongana mbi kiri ge, fade mbi yeke kiri na ni na mo.’ 36  Ti mo, na popo ti azo ota so, zo wa la asara ye tongana mba ti zo so atï na maboko ti azo ti gbungo aye ti azo na ngangu?” 37  Lo tene: “Lo so asara nzoni bê na koli so.” Tongaso Jésus atene na lo: “Gue na mo kue mo sara tongaso.” 38  Tongana ala yeke hon, Jésus alï na mbeni kete kodoro. Kâ, mbeni wali so iri ti lo ayeke Marthe ayamba lo na da ti lo. 39  Wali so ayeke nga na mbeni ita ti lo ti wali so iri ti lo ayeke Marie. Marie aduti ti lo na sese na tere ti gere ti Seigneur na lo ngbâ ti mä tënë ti lo. 40  Me ti Marthe, lo zia si gbâ ti kua ahon ndo ti lo. Tongaso, lo pusu nduru, na lo tene: “Seigneur, a sara ye oko na mo pëpe so ita ti mbi ti wali azia gi mbi oko ti sara aye ni? Tene na lo ti ga ti mû maboko na mbi.” 41  Seigneur akiri tënë na lo atene: “Marthe, Marthe, aye mingi asara si mo yeke gi bê ti mo na li ti mo ayeke kpô pëpe. 42  A hunda aye mingi pëpe, wala même gi ye oko awe. Ti Marie, lo soro nzoni mbage ni, na fade a yeke zi ni na tïtî lo pëpe.”

Kete tënë