Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Kusala 7:1-60

7  Me kota prêtre ni atene: “Tënë ni ayeke tongaso?”  Étienne atene: “Aita, ababâ, ALA mä tënë so: Nzapa ti gloire asi na kotara ti e Abraham na ngoi so lo de na Mésopotamie, kozoni si lo sara kodoro na Haran,  na lo tene na Abraham: ‘Mo zia kodoro ti mo na afami ti mo, na mo sigigi. Ga na kodoro so mbi yeke fa ni ande na mo.’  Na pekoni, lo zia kodoro ti azo ti Chaldée na lo gue lo sara kodoro na Haran. Kâ, na peko ti so babâ ti lo akui, Nzapa afa lege na lo ti londo ti ga ti sara kodoro na ndo so ALA yeke lango dä fadeso.  Atâa so kue, Nzapa amû na lo pëpe mbeni sese na ndo so teti lo wani, même mbeni kete kete ndo so alingbi na konongo ti lê ti gere ti zo, lo mû na lo pëpe. Me Nzapa amû zendo ti mû na lo kodoro ni ti ga ye ti lo, nga ti ga ye ti ngongoa ti lo na peko ti lo, atâa so lo de lo wara molenge pëpe.  Nga, Nzapa atene biani so ahale ti lo ayeke duti ande awande na mbeni kodoro-wande na azo ni ayeke sara ala na ngbâa nga ala yeke sara pasi na ala teti ngu ngbangbo osio.  Na pekoni Nzapa atene: ‘Fade mbi yeke fâ ngbanga na ndo ti mara ni so ala yeke sara ngbâa na lo. Na peko ti aye so, ala yeke sigigi ande na kodoro ni na ala yeke sara kusala so ayeke nzoni-kue na mbi na ndo so.’  “Nga Nzapa ate mbele ti fango ganza na Abraham. Tongaso lo dü Isaac na lo fâ lo na ganza na lango miombe ni. Na pekoni, Isaac adü Jacob, na Jacob adü ababâ ti sewa bale-oko na use.  Na ababâ ti sewa ni asara kota bê na tere ti Joseph na ala kä lo si a gue na lo na Égypte. Me Nzapa ayeke na lo, 10  lo zi Joseph na yâ ti aye ti vundu ti lo kue, lo sara si asarango ye ti Joseph agbu bê ti Pharaon gbia ti Égypte nga ndara ti lo anzere na lê ti Pharaon ni. Lo soro Joseph ti komande na ndo ti Égypte nga na ndo ti da ti lo Pharaon kue. 11  Me mbeni kota nzara atï na ndo ti kodoro ti Égypte kue nga na ti Canaan, biani a yeke mbeni kota ye ti vundu. Na akotara ti e agi kobe gbä. 12  Me Jacob amä so akobe ti tengo ni ayeke na Égypte na lo tokua akotara ti e kâ ti fani oko ni. 13  Tongana ala gue ti use ni, Joseph afa tere ti lo na aita ti lo ti koli, na Pharaon ahinga sewa so Joseph alondo dä. 14  Tongaso Joseph atokua na babâ ti lo Jacob nga na afami ti lo kue ti zia ndo ni ti ga, na wungo ti a-âme so aga ayeke bale-mbasambala na oku. 15  Jacob azu na Égypte. Na pekoni lo kui, na akotara ti e akui nga. 16  A mû kuâ ti ala a gue na ni na kodoro ti Sichem, na a zia ala na yâ ti dû ti kuâ so Abraham avo ândö na nginza ti argent na maboko ti amolenge ti Hamor na kodoro ti Sichem ni. 17  “Tongana ngoi ti gango tâ tënë ti zendo so Nzapa amû lani na Abraham ayeke pusu nduru, wungo ti azo ni ague na li ni na ala ga gbani na Égypte 18  juska na lango so mbeni gbia nde alondo ti komande na ndo ti Égypte, gbia ni so ahinga Joseph pëpe. 19  Gbia ni so amû komandema ti lo ti sara ye ti mayele na tere ti mara ti e na lo pusu na lege ni pëpe ababâ ti dö amolenge ti ala so ade foroto ti zia, tongaso si a bata ala na fini pëpe. 20  A yeke na ngoi ni so si a dü Moïse, na lo yeke tâ pendere mingi, même na lê ti Nzapa. Na a bata lo nze ota na yâ ti da ti babâ ti lo. 21  Me tongana a zia lo na gigi, molenge ti Pharaon ti wali amû lo si abata lo tongana molenge ti lo wani. 22  Tongaso a fa ye na Moïse na ndo ti ndara kue ti azo ti Égypte. Biani, lo yeke ngangu na yâ ti atënë ti lo nga na yâ ti asarango ye ti lo. 23  “Tongana lo yeke gue ti wara ngu bale-osio, lo bi bê ti lo ti gue ti bâ dutingo ti aita ti lo, amolenge ti Israël. 24  Na tongana lê ti lo atï na ndo ti mbeni molenge ti Israël so mbeni zo ti Égypte ayeke sara ye na lo na lege ni pëpe, Moïse agbu koko ti zo ti Israël so zo ti Égypte ni ayeke sara sioni na lo, lo futa kula ndali ti zo ni, lo pika zo ti Égypte ni na kuâ. 25  Lo bâ ti lo lo tene aita ti lo ayeke hinga atene Nzapa si ayeke mû na ala salut na lege ti lo, me ala hinga ni pëpe. 26  Na ndade ni, lo si na ndo ti ala use na ngoi so ala yeke tiri, na lo tara ti ga na ala use kue ti kiri ti mä tere na yâ ti siriri, lo tene: ‘Akoli, ALA yeke aita. Ngbanga ti nyen ALA yeke sara ye na mba na lege ni pëpe?’ 27  Me lo so lo yeke sara ye na mba ti lo na lege ni pëpe so apusu Moïse yamba, lo tene: ‘Zo wa si a zia mo mokonzi nga wafango ngbanga na ndo ti e? 28  Ye ni mo ye ti fâ mbi tongana ti so mo fâ na zo ti Égypte biri so?’ 29  Na mango tënë so, Moïse akpe na lo ga wande so asara kodoro na sese ti Madian. Kâ, lo dü amolenge ti koli use. 30  “Ngu bale-osio na pekoni, na yando ti Hoto ti Sinaï, mbeni ange asi na lo na yâ ti menga-wa ti mbeni keke ti sisi. 31  Tongana Moïse abâ ni, bê ti lo adö. Me tongana lo yeke pusu nduru ti bâ ni nzoni, go ti Jéhovah asara tënë, a tene: 32  ‘Mbi yeke Nzapa ti akotara ti mo, Nzapa ti Abraham, ti Isaac na ti Jacob.’ Tere ti Moïse adö na mbeto, tongaso lo ye pëpe ti tara ti kiri ti bâ ye ni nzoni. 33  Jéhovah atene na lo: ‘Mo zi poro na gere ti mo teti ndo so mo yeke luti dä so ayeke ndo so ayeke nzoni-kue. 34  Biani, mbi bâ lege so a yeke sara sioni na azo ti mbi so ayeke na Égypte, na mbi mä dema ti ala na mbi zu ti zi ala. Fadeso, mo ga, fade mbi yeke tokua mo na Égypte.’ 35  Moïse so ala ke lo lani, ala tene: ‘Zo wa si a zia mo mokonzi nga wafango ngbanga?’ a yeke lo si, na lege ti ange so asi na lo na yâ ti keke ti sisi, Nzapa atokua lo ti duti mokonzi nga zo ti zingo ala. 36  Koli so asigigi na ala na peko ti so lo sara aye ti dongo bê na afä na Égypte, na kota Ngu-Bengba nga na yando teti ngu bale-osio. 37  “A yeke Moïse so si atene lani na amolenge ti Israël: ‘Fade Nzapa ayeke soro teti ALA na popo ti aita ti ALA mbeni prophète tongana mbi.’ 38  A yeke lo si aduti na popo ti congrégation na yando, lo na ange so asara tënë na lo na ndo ti Hoto ti Sinaï, nga lo na akotara ti e. Na lo wara atënë so ayeke nzoni-kue so angbâ kpu na kpu ti tene lo mû ni na ALA. 39  Akotara ti e ake ti mä yanga ti lo, me ala pusu lo yamba. Na yâ ti bê ti ala kâ, ala kiri na Égypte, 40  ala tene na Aaron: ‘Mo sara anzapa na e so ayeke tambela na dawa ti e. Âdu ti Moïse so asigigi na e na sese ti Égypte, e hinga ye so asi na lo pëpe.’ 41  Na ngoi ni so, ala leke mbeni molenge ti bagara na ala mû mbeni sandaga na yanda ni, na tere ti ala ato nda ti nzere na sarango matanga na gbele aye so ala leke ni na maboko ti ala. 42  Ndali ni, Nzapa aturnê na lo zia ala ti voro gbâ ti aye ti yayu, gi tongana ti so a sû tënë ni na yâ ti mbeti ti aprophète, a tene: ‘Ô azo ti da ti Israël, a yeke na mbi pëpe si ALA fâ anyama nga ALA mû asandaga na yando teti ngu bale-osio, ni la pëpe? 43  Me a yeke tente ti Moloch nga na tongoro ti nzapa Réphan si ALA yô ni, a-image so ALA leke ti voro ni. Ndani la, mbi yeke gue na ALA ande na ngbâa yongoro kâ na peko ti Babylone.’ 44  “Akotara ti e ayeke lani na tente so aduti tongana témoin na yando, gi tongana ti so lo mû yanga na Moïse ti leke ni alingbi na tapande ni so lo bâ lani. 45  Nga, akotara ti e so aga lani na pekoni amû ni, na ala lï na ni legeoko na Josué na sese so ayeke ti amara so Nzapa atomba ala na gbele akotara ti e. A ngbâ na ndo so juska na ngoi ti David. 46  David aga nzoni na lê ti Nzapa nga lo hunda ti tene a mû lege na lo ti leke mbeni da na Nzapa ti Jacob. 47  Me, Salomon si aleke mbeni da na Nzapa. 48  Ye oko, Lo so ayeke na nduzu na ndo ti aye kue alango pëpe na yâ ti ada so maboko ti zo si aleke ni, legeoko tongana ti so prophète ni atene: 49  ‘Jéhovah atene: “Yayu ayeke trône ti mbi na sese ayeke mbata ti gere ti mbi. Ka mara ti da wa si ALA yeke leke ande na mbi? Wala ndo so mbi lingbi ti wu tere dä ayeke so wa? 50  A yeke maboko ti mbi si asara aye so kue pëpe?” ’ 51  “ALA azo so li ti ALA akpengba nga so a fâ bê ti ALA nga na mê ti ALA na ganza pëpe so, ALA ngbâ ti sara ngangu-li na yingo vulu. Legeoko tongana ti so akotara ti ALA asara giriri, ALA nga ALA sara tongaso. 52  Na popo ti aprophète kue, prophète wa si akotara ti ALA asara ye ti ngangu na lo pëpe? Biani, akotara ti ALA so afâ lani azo so afa tënë kozoni na ndo ti gango ti Zo ti mbilimbili so, so laso ALA ga azo ti kango lo nga azo ti fango lo, 53  ALA, azo so awara lani Ndia so a mû ni na lege ti a-ange, me ALA bata ni pëpe.” 54  Biani, tongana ala mä atënë so, bê ti ala ason ngangu mingi, na ala to nda ti te pembe ti ala na tere ti lo. 55  Me Étienne, so asi singo na yingo vulu, ayeke bâ ndo gi na yayu, na lê ti lo atï na ndo ti gloire ti Nzapa nga Jésus so ayeke luti na koti ti Nzapa, 56  na lo tene: “ALA bâ, mbi bâ yayu azi na Molenge ti zo ayeke luti na koti ti Nzapa.” 57  Tongana ala mä tënë so, ala dekongo na kota go na ala zia maboko ti ala na mê ti ala na ala kue ague legeoko atuku na ndo ti lo. 58  Tongana ala bi lo na gigi ti gbata ni awe, ala to nda ti bo lo na tênë. Nga atémoin ni azia abongo ti ala ti ndo ni na tere ti mbeni maseka-koli so iri ti lo ayeke Saul. 59  Na ala ngbâ ti bo Étienne na tênë, na oko ngoi ni lo yeke iri ndo, lo tene: “Seigneur Jésus, mû yingo ti mbi.” 60  Na pekoni, lo kuku na likuni ti lo, lo dekongo na kota go, lo tene: “Jéhovah, mo zia siokpari so na li ti ala pëpe.” Tongana lo sara tënë so awe, lo kui.*

Kete tënë

Na Grec: “lango (na yâ ti kuâ).”