Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Kusala 5:1-42

5  Me, mbeni koli ayeke dä so iri ti lo ayeke Ananias. Lo kä mbeni sese, lo na wali ti lo Sapphira,  na lo zi mbeni mbage ti nginza ni na hondengo ni lo bata, wali ti lo nga ahinga tënë ni. Ananias aga gi na mbage ti nginza ni na lo zia ni na gbe ti abazengele.  Me Pierre atene: “Ananias, ngbanga ti nyen Satan akpengba bê ti mo ti handa yingo vulu nga ti zi mbeni mbage ti nginza ti yaka ni na hondengo ni ti bata?  Na ngoi kue so yaka ni angbâ na mo, a yeke ti mo pëpe? Nga na peko ti so a kä ni awe, mo lingbi ti sara ye ti bê ti mo na nginza ni pëpe? Ngbanga ti nyen mo leke kozo awe na bê ti mo ti sara mara ti ye tongaso? Mo tara ti handa azo pëpe, me ti handa Nzapa.”  Na mango atënë so, Ananias atï na sese na lo kui. Na kota mbeto agbu ala kue so amä tënë ni.  Na amaseka-koli alondo, ala kanga lo na bongo, ala yô lo asigigi na ni na ala lu lo.  Ngbonga ota tongaso na pekoni, wali ti lo alï, lo hinga ye so asi fade pëpe.  Pierre atene na lo: “Tene na mbi si, ALA use kue akä yaka ni na ngere tongaso?” Lo kiri tënë: “En, e kä ni na ngere tongaso.”  Na Pierre atene na lo: “Ngbanga ti nyen mo na koli ti mo amä tere ALA use ti zia yingo ti Jéhovah na tara? Bâ, gere ti ala so alu koli ti mo ayeke na yanga-da so, na fade ala yeke yô mo ti sigigi na ni.” 10  Na lê ni lê ni, lo tï na sese na gere ti Pierre na lo kui. Tongana amaseka-koli ni alï, ala wara lo na kuâ, na ala yô lo asigigi na ni na ala lu lo na tere ti koli ti lo. 11  Tongaso kota mbeto agbu azo ti congrégation ni kue na agbu nga ala kue so amä tënë ti aye so. 12  Nga, afä na aye ti dongo bê mingi angbâ ti si na popo ti azo na lege ti abazengele. Na ala kue, na beoko, ala yeke bungbi na gbe ti véranda ti Salomon. 13  Tâ tënë, zo oko na popo ti ambeni zo ni so ti kanga bê ti bungbi oko na ala ayeke dä pëpe. Atâa so kue, azo ti kodoro ni ayeke gonda ala mingi. 14  Nga, azo so amä na bê na Seigneur angbâ ti ga gi na ndo ni, azo mingi mingi, akoli nga na awali. 15  Tongaso ala ga na azo ti kobela même na akota lege na ala zia ala kâ na ndo ti akete gbogbo si tongana Pierre ayeke hon, gi gbede ti lo alingbi ti hon kamême na ndo ti mbeni zo oko na popo ti ala. 16  Nga, azo mingi mingi so alondo na yâ ti agbata so angoro Jérusalem angbâ gi ti ga, ala yeke ga na azo ti kobela nga ala so asioni yingo asara ala pasi, na ala kue awara sava. 17  Me kota prêtre ni na ala kue so ayeke na tere ti lo, so ti tene secte ti aSadducéen so ayeke lani dä na ngoi ni so, alondo, kota bê ahon ndo ti ala, 18  na ala zia maboko na ndo ti abazengele ni na ala bi ala na ndo so a yeke gbu azo si a yeke bata ala dä. 19  Me na bï ni, ange ti Jéhovah azi ayanga ti da ti kanga ni, lo sigigi na ala na lo tene: 20  “ALA gue, na tongana ALA yeke luti na yâ ti temple ni, ALA ngbâ ti fa na azo atënë kue na ndo ti fini so.” 21  Na peko ti tënë so, ala lï na yâ ti temple na kota ndapre na ala to nda ti fa ye na azo. Tongana kota prêtre ni nga ala so ayeke na tere ti lo asi, ala iri Sanhédrin ni nga na bungbi ti a-ancien kue ti amolenge ti Israël ti mû place, na ala tokua ndo na da ti kanga ni ti tene a ga na abazengele ni. 22  Me tongana aturugu ni asi kâ, ala wara abazengele ni na da ti kanga ni pëpe. Tongaso ala kiri ala fa peko ti ye ni, 23  ala tene: “E wara yanga ti da ti kanga ni so angbâ na kangango ni ngangu nga aturugu so ayeke luti na ayanga-da ni, me tongana e zi ni, e wara zo oko na yâ ni pëpe.” 24  Tongana mokonzi ti temple nga na aprêtre-mokonzi amä atënë so, ala hinga li ti ala pëpe na aye so, ala yeke hunda tere ti ala na ye so ayeke si ande na pekoni. 25  Me mbeni koli asi na lo fa peko ti ye so na ala, lo tene: “ALA bâ! Akoli so ALA bi na da ti kanga so ayeke na yâ ti temple, ala yeke luti na ala yeke fa ye na azo.” 26  Tongaso mokonzi ni ague legeoko na aturugu ti lo na ala gbu abazengele ni aga na ala, me ala sara ye ti ngangu na ala pëpe, teti ala sara mbeto ti tene azo ti kodoro ni abo ala na tênë. 27  Tongaso ala ga na abazengele ni na ala zia ala aluti na yâ ti kota da ti Sanhédrin ni. Na kota prêtre ni ahunda ala 28  na lo tene: “E mû yanga na ALA ngangu ti ngbâ ti fa ye na azo na iri so pëpe, na bâ, ALA sara si fango ye ti ALA amû yâ ti Jérusalem kue, na ALA leke na bê ti ALA gi ti zia tënë ti mênë ti koli so na li ti e.” 29  Pierre nga na tanga ti abazengele ni akiri tënë: “A lingbi e mä yanga ti Nzapa, so ayeke mokonzi, ahon ti mä azo. 30  Nzapa ti akotara ti e azingo na kuâ Jésus, lo so ALA fâ lo na kangango lo na ndo ti keke. 31  Nzapa ayä lo na nduzu na koti ti lo ti duti tongana Kota Mokonzi nga Sauveur, ti sara si azo ti Israël achangé bê ti ala na awara pardon ti asiokpari ti ala. 32  E yeke atémoin ti aye so, yingo vulu nga ayeke témoin ni, yingo so Nzapa amû ni na ala so ayeke mä yanga ti lo, so ayeke mokonzi.” 33  Tongana ala mä tënë so, tënë ni azö bê ti ala ngangu na ala ye ti fâ ala fango. 34  Me mbeni koli alondo aluti na popo ti azo ti Sanhédrin ni, lo yeke mbeni Farizien so iri ti lo ayeke Gamaliel, mbeni wafango Ndia so azo ti kodoro ni kue ane lo mingi. Lo mû yanga ti tene a sigigi na akoli so teti kete ngoi. 35  Na lo tene na ala: “Azo ti Israël, ALA sara hange na ALA wani na ye so ALA leke na bê ti ALA ti sara na azo so. 36  Na tapande, na yâ ti angoi so ahon, Theudas alondo, na lo tene so ni la, na ambeni koli ngbangbo osio tongaso atï na peko ti lo. Me a fâ lo, nga ala kue so amä yanga ti lo, yâ ti ala akangbi kirikiri na ala hunzi gi tongaso. 37  Na peko ti lo, Judas, zo ti Galilée, alondo na ngoi ti ziango iri ti azo na mbeti, na lo mû azo na peko ti lo. Me lo kue lo kui, na ala so kue ayeke mä lani yanga ti lo, yâ ti ala akangbi kirikiri. 38  Ni la, ti aye so ayeke si fadeso, mbi tene na ALA: ALA yôro yanga ti ALA na yâ ti tënë ti akoli so pëpe, me ALA zia ala kpô (teti tongana ye so ala leke ti sara so wala kusala ti ala ni so alondo na azo, fade a yeke kinda ni, 39  me tongana a londo na Nzapa, ALA lingbi ande pëpe ti kinda ni), tongaso pëpe, peut-être a yeke bâ so ALA yeke azo so ayeke tiri biani gi na Nzapa.” 40  Na ndo ti tënë so, ala mä tënë ti lo, na ala iri abazengele ni, ala pika ala, ala mû yanga na abazengele ni ti zia ti fa tënë na iri ti Jésus, na ala zia ala gue. 41  Abazengele so azia Sanhédrin ni ala gue, na ala yeke na ngia ngbanga ti so a bâ so ala lingbi ti tene a sara ye ti kamene na ala ndali ti iri ti Jésus. 42  Lâ na lâ na yâ ti Temple nga da na da, ala zia pëpe ti fa ye na ti fa nzoni tënë na ndo ti Christ Jésus.

Kete tënë