Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Kusala 4:1-37

4  Na ngoi so ala use angbâ ti sara tënë na azo ni, aprêtre-mokonzi, mokonzi ti temple ni nga na aSadducéen asi na ndo ti ala,  na bê ti ala ason ngbanga ti so Pierre na Jean ayeke fa ye na azo na ala yeke fa polele tënë ti zingongo ti akuâ na mungo tapande na ndo ti Jésus.  Ala zia maboko na ndo ti ala na a bata ala juska na ndade ni, teti ndo avuko awe.  Me azo mingi na popo ti ala so amä tënë ni amä na bê, na wungo ti akoli asi saki oku tongaso.  Na ndade ni, amokonzi ti aJuif, a-ancien ti ala nga na ascribe abungbi na Jérusalem  (mo yeke wara nga prêtre-mokonzi Anne, mo yeke wara Caïphe, Jean na Alexandre nga na azo kue ti sewa ti prêtre-mokonzi ni),  ala zia Pierre na Jean na popo ti ala, na ala to nda ti hunda ala: “Na ngangu ti zo wa wala na iri ti zo wa si ALA sara ye so?”  Tongaso Pierre so asi na yingo vulu atene na ala: “Amokonzi ti Israël nga na a-ancien,  tongana laso ALA yeke hunda tënë na e ndali ti mbeni nzoni kusala so e sara na tere ti mbeni zo ti kobela, ti hinga na lege ti zo wa si zo so asava, 10  zia ALA kue nga na azo ti Israël kue ahinga so a yeke na iri ti Jésus Christ, zo ti Nazareth so ALA kanga lo na ndo ti keke si lo kui me so Nzapa azingo lo na kuâ, a yeke na lege ti lo si koli so aluti ge na nzoni tere na lê ti ALA. 11  Jésus so ayeke ‘tênë so ALA, azo ti lekengo da, ALA bâ tongana senge ye, na so aga tâ kozo tênë ti gere ti da ni.’ 12  Nga, salut ayeke na mbeni zo nde pëpe, teti mbeni iri nde ayeke pëpe na gbe ti yayu so a mû ni na azo, so gi na lege ni si e lingbi ti wara salut.” 13  Tongana ala bâ lege so Pierre na Jean asara tënë na mbeto pëpe, nga ala hinga so Pierre na Jean ayeke azo so amanda mbeti pëpe* na ala yeke asenge zo, bê ti ala adö. Na ala to nda ti hinga mbilimbili so ala yeke azo so ayeke ândö na tere ti Jésus. 14  Na tongana ala ngbâ ti bâ koli ni so a sava lo awe, lo yeke luti na popo ti ala, ala yeke na tënë oko ti kiri na ni pëpe. 15  Tongaso ala mû yanga na ala ti sigigi na yâ ti kota da ti Sanhédrin ni, na ala to nda ti mä tere na popo ti ala, 16  ala tene: “Fade e sara tongana nyen na akoli so? Ti tâ tënë ni, a yeke mbeni kota fä si ala sara, kota fä so azo ti Jérusalem kue ahinga ni. Na e lingbi ti bere ni pëpe. 17  Me, ti tene tënë ni angbâ ti mû ndo mingi na popo ti azo pëpe, zia e suku na ala ngangu ti kiri ti mû iri so ti sara na tënë na mbeni zo oko tongaso pëpe.” 18  Na ndo ti tënë so, ala iri Pierre na Jean, ala gboto mê ti ala ti sara tënë wala ti fa ye na iri ti Jésus na mbeni ndo oko pëpe. 19  Me Pierre na Jean akiri tënë na ala, ala tene: “Wala a yeke nzoni na lê ti Nzapa ti tene e mä ALA ahon ti mä Nzapa, a yeke na ALA ti bâ. 20  Me ti e, e lingbi ti kaï pëpe ti sara tënë na ndo ti aye so e bâ na e mä.” 21  Tongaso, na peko ti so ala kiri ala suku ngangu na ala, ala zi ala, teti ala wara mbeni tënë oko tongaso ti luti na ndo ni ti se ala ngbanga ni pëpe nga ngbanga ti so ala sara mbeto ti gbâ ti azo ni, teti azo ni kue ayeke mû gloire na Nzapa ndali ti ye so asi. 22  Koli so a sara fä so na ndo ti lo ti sava lo so, ngu ti lo ahon bale-osio. 23  Na peko ti so a zi ala awe, ala gue na mbage ti amba ti ala na ala fa peko ti aye so aprêtre-mokonzi na a-ancien atene fade na ala. 24  Na mango tënë so, na beoko ala yä go ti ala na nduzu na Nzapa, ala tene: “Seigneur ti dunia kue, mo yeke Lo so asara yayu na sese na ngu-ingo nga na aye kue so ayeke na yâ ni, 25  mo so na lege ti yingo vulu mo tene na yanga ti kotara ti e David, wakua ti mo, mo tene: ‘Ngbanga ti nyen amara alondo na wusuwusu? Ngbanga ti nyen azo agbu li ti ala na ndo ti asenge ye? 26  Agbia ti sese aleke tere ti ala na amokonzi abungbi tongana zo oko ti ke Jéhovah nga ti ke zo ti lo so lo tuku mafuta na li ti lo.’ 27  Tongaso nga, Hérode na Ponce Pilate legeoko na azo ti amara nga na azo ti Israël abungbi biani na yâ ti gbata so ti ke wakua ti mo so ayeke nzoni-kue, Jésus, lo so mo soro* lo, 28  ti sara aye so maboko ti mo nga ye so bê ti mo aye aleke ni kozo awe ti si. 29  Fadeso, Jéhovah, mo dengi mê ti mo na atënë so ala tene ti zia mbeto na bê ti e so, na mo mû lege na angbâa ti mo ti ngbâ ti fa tënë ti mo na mbeto oko pëpe, 30  na ngoi so mo yeke yôro maboko ti mo ti sava azo nga si afä na aye ti dongo bê angbâ ti si na lege ti iri ti wakua ti mo so ayeke nzoni-kue, Jésus.” 31  Na tongana ala hunzi ti voro tere ti ala na Nzapa awe, ndo ni so ala bungbi dä ayengi, na ala kue asi na yingo vulu na ala yeke tene tënë ti Nzapa na mbeto pëpe. 32  Nga, azo mingi mingi so amä na bê na tënë ni ayeke na bê oko na âme oko, na même mbeni oko ayeke tene pëpe so aye so lo yeke na ni ayeke gi ti lo wani, me ala bungbi aye ti ala kue oko. 33  Nga, na lege ti kota ngangu, abazengele ni angbâ ti sara tënë na ndo ti zingongo ti Seigneur Jésus na kuâ, na kota nzobe ti Nzapa ayeke mingi mingi na ndo ti ala kue. 34  Biani, mbeni zo so ye atia lo ayeke dä pëpe na popo ti ala, teti ala kue so ayeke na ayaka wala ada, ala kä ni na ala ga na nginza ti aye ni so ala kä so, 35  ala zia ni na gbe ti abazengele. Na pekoni, a yeke kangbi ni na zo oko oko, a lingbi na ye so atia lo. 36  Tongaso Joseph, so abazengele ni airi lo nga Barnabas (so nda ni aye ti tene Molenge ti dengo bê ti zo), mbeni zo ti kete mara ti Lévi so a dü lo na kodoro ti Chypre, 37  ayeke na mbeni sese. Lo kä ni na lo ga na nginza ni lo zia na gbe ti abazengele.

Kete tënë

So ti tene ala si na akota da ti mandango tënë ti Nzapa ti aHébreu pëpe.
Bâ kete tënë ti Lc 4:18.