Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

Kusala 26:1-32

26  Agrippa atene na Paul: “A mû lege na mo ti sara tënë ti mo.” Tongaso Paul ayôro yâ ti maboko ti lo na lo to nda ti sara tënë ti gbu koko ti lo wani, lo tene:  “Na ndo ti aye kue so aJuif abi tënë na li ti mbi ndali ni, Gbia Agrippa, mbi yeke na ngia ti bâ so a yeke na gbele mo si mbi yeke sara tënë ti gbu koko ti mbi laso,  mbilimbili teti mo hinga nzoni mingi angobo kue ti aJuif nga na adengo gaba so ayeke na popo ti ala. Tongaso mbi voro mo ti kanga bê ti mä mbi.  “Biani, na ndo ti tënë ti sarango ye ti tere ti mbi na popo ti azo ti mara ti mbi nga na yâ ti Jérusalem, ti londo na ngoi so mbi de lani maseka, aJuif kue  so ahinga mbi kozoni ahinga so mbi duti lani tongana mbeni Farizien so asara ye alingbi na fango ye ti lege ti vorongo nzapa ti e, fango ye ni so ayeke tâ ngangu mingi. Tongana aJuif so aye, ala lingbi ti sara tënë ti témoin ni.  Me ti fadeso, a yeke ndali ti beku ti zendo so Nzapa amû na akotara ti e si mbi yeke luti na gbele ngbanga.  Na ndo ti zendo so, akete mara bale-oko na use ayeke ku nga ti bâ gango tâ tënë ni na sarango kusala so ayeke nzoni-kue na Nzapa bï na lâ, na ngangu ti ala kue. Ô gbia, a yeke na ndo ti tënë ti beku so si aJuif abi tënë na li ti mbi.  “Ngbanga ti nyen ALA dë kite so Nzapa ayeke zingo akuâ?  Ti mbi, mbi bâ so a yeke ngbanga ti mbi lani ti sara aye mingi ti ke iri ti Jésus, zo ti Nazareth. 10  Na biani, a yeke ye so mbi sara lani na Jérusalem. Mbi bi na da ti kanga azo mingi na popo ti ala so ayeke nzoni-kue, teti mbi wara lani komandema ni na tïtî aprêtre-mokonzi. Na tongana a ye ti fâ ala, mbi ye pekoni nga. 11  Na sengo ala fani mingi na yâ ti asynagogue kue, mbi tara ti pusu ala na ngangu ti bere tënë ti mabe ti ala. Na teti so bê ti mbi ason ahon ndo ni na tere ti ala, mbi gue juska ti sara ye ti ngangu na ala même na yâ ti ambeni gbata nde. 12  “So mbi bi tere ti mbi kue ti sara ye so, tongana mbi yeke gue na Damas na lege ti komandema nga na yanga so aprêtre-mokonzi amû na mbi, 13  Ô gbia, mbi bâ na ndo ti lege ni na midi mbeni lumière so aza ahon zango ti lâ si alondo na yayu. Lumière ni aza angoro mbi na angoro nga ala so ayeke tambela legeoko na mbi. 14  Na tongana e kue e tï na sese, mbi mä mbeni go so asara tënë na mbi na yanga ti Hébreu atene: ‘Saul, Saul, mo yeke sara ye ti ngangu na mbi ngbanga ti nyen? So mo ngbâ ti sara ngangu-li na asaworo ni, mo yeke sara sioni na mo wani.’ 15  Me mbi tene: ‘Mo yeke zo wa, Seigneur?’ Na Seigneur atene: ‘Mbi yeke Jésus, lo so mo yeke sara ye ti ngangu na lo so. 16  Me mo londo, mo luti na ndo ti gere ti mo. Teti a yeke ndali ti ye so si mbi fa tere ti mbi na lê ti mo: ti soro mo tongana wakua nga témoin ti aye so mo bâ nga na ti aye so fade mbi yeke sara si mo bâ na ndo ti mbi. 17  Na oko ngoi ni, mbi yeke zi mo na tïtî azo so nga na tïtî amara so mbi yeke tokua mo na ala, 18  ti zi lê ti ala, ti zi ala na yâ ti bingo ti ga na ala na lumière, ti zi ala na gbe ti komandema ti Satan ti ga na ala na Nzapa, si ala wara pardon ti asiokpari nga na ye ti héritier na popo ti azo so mabe ti ala na mbi asara si ala ga nzoni-kue.’ 19  “Tongaso, Gbia Agrippa, mbi sara ye nde pëpe na ye so mbi bâ, ye so alondo na yayu, 20  me na azo so ayeke na Damas kozoni nga na pekoni ala so ayeke na Jérusalem, na ando kue ti Judée nga na amara, mbi gue na tënë so na ala: a lingbi ala changé bê ti ala na ala ga na Nzapa na sarango akusala so alingbi biani na changengo bê. 21  A yeke ndali ti aye so si aJuif agbu mbi na yâ ti temple na ala tara ti fâ mbi. 22  Me, teti mbi wara mungo maboko so alondo na Nzapa, mbi ngbâ ti sara tënë ti témoin so laso na akete zo nga na akota zo, me mbi sara mbeni tënë nde pëpe, gi tënë ti aye so ambeti ti aProphète nga na Moïse afa lani atene a yeke si: 23  so a lingbi Christ abâ pasi, na tongana kozo zo so a yeke zingo lo na kuâ, lo yeke gue fade ti fa tënë na ti ga na lumière na aJuif nga na amara.” 24  Tongana lo yeke sara atënë so ti gbu koko ti lo, Festus asara tënë na kota go atene: “Paul, mo yeke ga zo ti fou! Hingango ye mingi ayeke gue na mo ti ga zo ti fou!” 25  Me Paul atene: “Kota zo Festus, mbi yeke ga zo ti fou pëpe, me mbi yeke sara atënë so ayeke tâ tënë nga ti zo so bibe ti lo ayeke nzoni. 26  Ti tâ tënë ni, gbia so mbi yeke sara tënë na lo na kamene pëpe ahinga tënë na ndo ti aye so nzoni mingi, teti mbi hinga biani so lo hinga aye so kue nzoni, ngbanga ti so a sara ye so na hondengo ni pëpe. 27  Gbia Agrippa, mo mä na bê na aProphète? Mbi hinga so mo mä na bê.” 28  Me Agrippa atene na Paul: “Na yâ ti kete ngoi, mo lingbi ti gue na mbi ti ga Chrétien.” 29  Na ndo ti tënë so, Paul atene: “Na gbele Nzapa, mbi ye si wala na yâ ti kete ngoi wala mbeni lâ, gi mo pëpe, me nga ala kue so ayeke mä mbi laso aga tongana mbi, me na yâ ti azingiri so pëpe.” 30  Gbia ni alondo, gouverneur ni, Bérénice na azo so aduti legeoko na ala asara nga tongaso. 31  Me tongana ala yeke sigigi, ala to nda ti tene na popo ti ala: “Koli so asara mbeni ye oko pëpe so alingbi na kuâ wala na kanga.” 32  Nga, Agrippa atene na Festus: “A lingbi fade ti zi koli so tongana lo hunda pëpe ti gue na tënë so na gbele César.”

Kete tënë