Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

Kusala 25:1-27

25  Tongana Festus agbu mbata ti kusala ti lo na yâ ti kodoro-komanda ni awe, lango ota na pekoni lo londo na Césarée lo montê na Jérusalem.  Na aprêtre-mokonzi nga na akota zo ti aJuif ague na tënë ti Paul na gbele lo. Tongaso ala to nda ti voro yanga na lo mingi,  ala hunda ti tene lo sara nzoni na ala, lo tokua ndo ti tene Paul aga na Jérusalem. Andâ ala zia ambeni zo na hondengo ni ti ku lo ti fâ lo na lege.  Me Festus atene so a yeke bata Paul na Césarée, na ni wani ni yeke nduru ti gue kâ na yâ ti kete ngoi.  Lo tene: “Tongaso zia azo so ayeke na li ti ALA azu kâ legeoko na mbi na ala bi tënë na li ti lo, tongana mbeni ye ti sioni ayeke dä ti tene na ndo ti koli so.”  Tongaso tongana lo ngbâ na popo ti ala gi lango miombe wala bale-oko, lo zu na Césarée. Na ndade ni, lo duti na ndo ti fango ngbanga na lo mû yanga ti tene a ga na Paul.  Tongana lo si, aJuif so alondo fade na Jérusalem si azu aluti angoro lo, ala bi gbâ ti akota tënë na li ti lo, me ala lingbi pëpe ti fa aye so afa atene atënë so ayeke tâ tënë.  Me Paul asara tënë so ti gbu koko ti lo, lo tene: “Mbi sara siokpari oko pëpe, atâa na tere ti Ndia ti aJuif, wala na tere ti temple wala na tere ti César.”  Teti so Festus aye si aJuif abâ lo na nzoni lê, lo tene na Paul: “Mo ye ti montê na Jérusalem si a fâ ngbanga ti mo kâ na gbele mbi na ndo ti atënë so?” 10  Me Paul atene: “Mbi yeke luti fadeso na gbele ngbanga ti César la, na a yeke na ndo so si a lingbi a fâ ngbanga ti mbi. Mbi sara ye ti sioni oko pëpe na aJuif, tongana ti so mo kue mo yeke bâ ni nzoni na lê ti mo. 11  Tongana mbi yeke biani mbeni zo ti sarango ye ti sioni na mbi sara mbeni ye ti sioni so alingbi na kuâ, mbi yeke kpe kuâ ni pëpe. Me, tongana aye so ala bi atënë ni na li ti mbi ayeke tâ ye pëpe, mbeni zo alingbi ti mû mbi pëpe ti zia na maboko ti ala ti nzere na ala. Mbi hunda ti gue na tënë ni na gbele César!” 12  Na pekoni, tongana Festus asara tënë na bungbi ti awawango ni awe, lo tene: “Mo hunda ti gue na tënë ni na gbele César, fade mo yeke gue na gbele César.” 13  Tongana ambeni lango ahon awe, Gbia Agrippa na Bérénice aga na Césarée na iri ti ngorogbia ti bara Festus. 14  Tongaso, tongana ala yeke sara alango mingi na ndo so, Festus azia atënë so andu Paul na gbele gbia ni, lo tene: “Mbeni koli ayeke dä so Félix azia lo si lo ngbâ na da ti kanga. 15  Na ngoi so mbi yeke lani na Jérusalem, aprêtre-mokonzi nga na a-ancien ti aJuif aga na tënë ti lo na gbele mbi, ala hunda ti tene a fâ sioni ngbanga na li ti lo. 16  Me mbi kiri tënë na ala mbi tene a yeke na lege ti ndia ti aRomain pëpe ti mû mbeni zo ti zia na maboko ti azo ti bingo tënë na li ti lo gi ti nzere na ala. Me kozoni kue, a lingbi lo tingbi lê na lê na azo so abi tënë na li ti lo nga lo wara lege ti sara tënë ti gbu koko ti lo na ndo ti tënë so a ga na lo na ngbanga ndali ni. 17  Tongaso na ngoi so ala kue asi ge, mbi ku pëpe, me na ndade ni mbi duti na ndo ti fango ngbanga na mbi mû yanga ti tene a ga na koli ni. 18  Azo ti bingo tënë na li ti lo ni aga, na ala fa pëpe mbeni ye ti sioni oko tongaso na ndo ti aye ti sioni so mbi bâ ti mbi fade mbi tene lo sara ni. 19  Ala papa gi na lo na ndo ti atënë so andu lege ti vorongo nzapa ti ala nga so andu mbeni zo so iri ti lo ayeke Jésus so lo kui awe me so Paul angbâ gi ti tene so lo yeke na fini. 20  Teti mbi hinga mbeni ye ti sara pëpe ndali ti papa ni so alondo na ndo ti atënë ni so, mbi hunda lo wala lo ye ti gue na Jérusalem si a fâ ngbanga ti lo na ndo ti atënë ni so kâ. 21  Me na ngoi so Paul ahunda ti tene a bata lo ti ku na desizion so Auguste ni ayeke mû, mbi mû yanga ti tene a bata lo juska na ngoi so mbi yeke tokua lo na César.” 22  Tongaso, Agrippa atene na Festus: “Mbi kue mbi ye ti mä koli so.” Festus atene: “Mo yeke mä lo kekereke.” 23  A si na ndade ni, Agrippa na Bérénice aga, ala yü bongo ti baba mingi na ala lï na yâ ti kubu ti tenengo ngbanga ni legeoko na amokonzi ti aturugu nga na akota zo ti gbata ni. Na tongana Festus amû yanga, a ga na Paul. 24  Na Festus atene: “Gbia Agrippa na ALA kue so ayeke laso ge na tere ti e, ALA bâ koli so gbâ ti aJuif kue aga abâ mbi ndali ti lo na Jérusalem nga na ndo so ge; ala dekongo atene a lingbi lo ngbâ na fini mbeni pëpe. 25  Me mbi bâ ti mbi so lo sara mbeni ye oko pëpe so alingbi na kuâ. Ni la, tongana koli so lo wani lo hunda ti gue na tënë so na gbele Auguste ni, mbi yeda ti tokua lo. 26  Me mbi yeke na mbeni mbilimbili tënë ti sû na mbeti na ndo ti lo na Seigneur ti mbi pëpe. Ni la, mbi ga na lo na gbele ALA, na mbilimbili na gbele mo Gbia Agrippa, tongaso si, na peko ti so a yeke hunda tënë na lo na gbele ngbanga so, mbi lingbi ti wara mbeni tënë ti sû ni na mbeti. 27  Teti mbi bâ ti mbi so a yeke na lege ni pëpe ti tokua mbeni zo ti kanga na ti fa pëpe atënë so a bi na li ti lo.”

Kete tënë